Tuesday, March 23, 2010

Taksa Khawnvar..

Taksa bung hrang hrangah hian enge pawimawh ber ang ti ta ila, sawi bik tur a vang hle mai. An pawimawh dan a inang vekin tangkai tak an ni vek hlawm bawk a. Hetihlai hian kan taksa pum kan chet vel nana tangkai bik tak mai chu kan khawhmuhna mit hi a ni, hei vang hi ni maw Taksa khawnvar an lo tih hial ni.

Ka naupan lai chuan Pathian zarah ka mit hi a chakin a tha khawp mai thin a, lehkhabu te hi mu chungin ka chhiar mai mai thin a, naupang a thuchang tarmit han vuahte hi ka chak thei khawp mai. Ka Pa hian I mit hi dim rawh, mu chungin lehkha chhiar suh min ti fo thin. Kan training laiin vawi khat chu thian dangte mit entir pahin ka inentir ve a, tarmit vuah ka chak deuh bawk nen. Doctorin an han check chu, chhiar tur an tih zawng zawng kha ka chhiar thei vek a!!!! Tarmit chu min chawh lo chiang asin, I mit hrui a chak vak lo anih hi tiin vitamin mum sen til tel hi min chawh a, ka ei zo peih lo leh nghal. Hun engemaw atang khan Office lamah te Computer kan lo hman nasat tak avangin ka mit chu a chiangkuang ta lo hle mai a, ka lu-te a na ngut ngut thin a, Doctor chu ka rawn leh ta ngei a, kar lo-ah ka tarmit power chu -1.5 a lo ni ta mai a, tarmit vuah a'n ngai chiah chu ka ning leh hle si.

High School kan kal lai khan zirlaibu-ah mitdel khaw chanchin kan zir thin. Bagota khua chu mitdel hlir an awm a, an tawngah HMU tih thumal hi an nei lo, a chhan chu khua an hmuh theih loh miau avangin, chuvangin chu tawngkam chu an nei lo mai a ni. Hmu chu enge a nih pawh an hre lo. He ramah hian pa pakhat chu engemaw tihpalh thil thu-in a thleng hlawl mai a, mite chuan an rawn dap huai huai mai a, ani chuan Ka hmu thei a ti ringawt a, enge hmu chu? An lo ti let hu mai. Tichuan, hmu chu hrilhfiah a'n tum ta a, mahse an pian tirh ata leh an nun hrim hrimah engmah an hmuh ngai loh avangin hrilhfiah an har hle a ni.

He kan mit ber hi khaw hmu thei lo-in awm ta ila eng ang fakau a hrehawm nge tih hi I ngaihtuah ngai em? Thenkhat chu mitdel sa-in an piang a, chungte chu mi vanduai, rualbanlo, mi khawngaihthlak kan ti thin. Nimahsela heng tisa mitdel te hi Pathian hretu an nih chuan mit var aia nun hlim tak an awm thei. Keini tisa mit tha pangai pu-te hi thlarau lam mitdel reng mai kan awm em le..

Mizo-te pawh hi tun hma chuan Pathian hre lo hnam kan ni a, thlarau lam mitdel vekin kan piang a. Tichuan,Sap ram atanga missionary-te zarah kan thlarau lam mit chu tihvarin a awm ta a. Vawiin thleng hian mizote chu kristian tia chhal ngam kan ni ta a ni. Nimahsela, hei hian kan thlarau nun hi a chhandam tak meuh em. Kan pi leh pu-te kristian an lo nih avang khan keini hi kristian ti-a sawi chu kan ni ngei mai, hei hian thlarau chhandamna famkim min pe vek em? Mahni theuh in ngaihtuah a ngai.

Isua khan Khawvel Eng in ni e.. a ti a, Engtinnge chu chu kan nih theih. Tin, Johana chuan Eng tak mitin ti eng thin kha a awm a, khawvelah a lo kal mek a ni.. tiin Isua chanchin a sawi a. Isua chu khawvel eng a ni a, chu Isua chu kan nunah kan neih chuan Isua chu kan enna a lo ni ang a, eng kan neih phawt chuan khawvel eng kan lo ni thei dawn a nih chu. Tichuan, Isua vekin In eng chu mi mit hmuhin eng rawh se a ti leh bawk a. Chu kan Eng Isua chu mite hmuh theih tura nunpui tur kan lo ni a nih chu.

Mit ber a thim chuan khawvel pawh a thim vek thin. I nuna Isua, Êng pawimawh tak I neih loh chuan I nun pum chu thim chhah mupin a tuam reng tihna a ni ang a, I tisa mit chu eng ang pawhin meng zau-in meng fiah mah la, mitdel I ni tho tho a nih chu. Thlarau lam mitdel nun chu a va hrehawm dawn tehlul em..!!!!

13 comments:

  1. Blind Valley i han sawiri tel chuan lung hlui a tileng hle mai. Ka ngaihtuah thin a, anni tan kha chuan han khawiha mam thil thel kha hmeltha an ni mai a, hmai tlang tha, hnarngul sang veh vawhte kha an hmeltha thei tlat lova... ka lung a len hle mai.

    Nang zawng, i hriatrengna a tha a, i ziak chhuak thiam bawk a, i tumah hian i thlep lut nalh thei em em bawk si a, Thiannu, i awhawm takzet a ni.

    ReplyDelete
  2. Ka koment hman lo ka chhiar hman loh vang in ho i ti om be le

    ReplyDelete
  3. Ziak tha leh reng mai!
    Facebook lamah chuan i va Mu nasa em em ve

    ReplyDelete
  4. kum sawm lai chu tarmit chhiar nan ka hmang ve ta reng mai. Ka theihnghilh deuh reng bawk.
    Thlarau lam mit tan chuan Bible hi kan tarmit thaber ani, a kal tlang hian engkim mai hi a lo fiah kuarh thin.

    ReplyDelete
  5. tawngkam iva thiam ve!!! Minla hria em?? Keini poh naktuk hian Field Training appointment an puang dawn a, kanu te pawh an lokal a.... Damtha em

    ReplyDelete
  6. Zaia - ti ve ziah teh suh.

    hmingtea - comment hman lo chung pawhin Hniak i hnutchhiah tal a, i ti lawmawm tho tho e.. :)

    Zovala - Nia, Facebook hi chawlh hahdam nan hmang ila ka tia.. :-)

    dr_feelgood - kei pawh hei tarmit kan ti ve ta reng chu anih hi... Bible hi ka tarmit bakah kan darthlalang a lo ni ngei e..

    tim - khai!!! i lo len luh ve hlawl chu le, ka mit vai emaw ka ti thelh alawm. Ka dam tha e, i nu chu min lo biak rawh, tunlai chu a reh lutuk, biak pawh min be duh lo. I appointment chu min la rawn hrilh ve dawn nia..

    ReplyDelete
  7. 1975 atang khân tarmit hi chu ka vuah, ka mit veilam leh dinglam hi a power a inchen lo viau, ka mit veilam ngat phei chu a special-a siamtîr a ngaih thin avàngin a khirhkhàn bìk, Phairam a ngai ziah thìn.

    Isua Krista kha vàn atanga Pa Pathianin a rawn Tirh a ni a. Nazareth Isua khawvèl lèn lai nite khân Juda-te khàn Pathian MI-TIRH a nih kha an awih thei meuh lo. Mahse, Isua khàn DEMONSTRATION mawi tak a hman hi in hre ve tawh ngei chuan ka ring. Chu chu hei hi a ni.

    Pathian Yahweh mi-Tirh Krista (Nazareth Isua) khàn MITDEL kha, a mit-khura chirh hnawihsakin a TIR ve lehchhàwng a. Khawi Dìl-ah nge a mita chirh chu va silfai tùra a tirh le? SILOAM Dìl-ah a ni, Siloam tih awmzia hi kan hre chiang em? "TIRH" tihna tho a ni.

    Zo-hnahthlàk awphawiin i sawi fiah teh ang. Pathian mi-Tirh Isua khàn mitdel kha Tirh Dìl-ah a mita chirhdiak awm va silfai tùrin a TIR. Mitvàrna a chhar ta!

    TIR (SENT) or "the one who is SENT from heaven" khàn "TIRH subject" a zirtîr fiah dàn hi a ngaihnawm hle a ni.

    Khawvèl Eng chungchângah chuan —Johana Bung 10-ah hian INPUMPEK KUT, Thlasik laia thil thleng chanchin chhiar tùr a awm.

    He KUT hi 165 BC Kislev 25 atanga Juda-ten an neih tan a ni; a chìnchhuak chu Makabia I & II-ah chiang takin a inziak a. Ka sawi zau lutuk lo mai ang, Apocrypha lam in lo keu ve a ngai a ni mai!

    Kum 168 BC Kislev 15 atangin Jerusalem Temple-a Juda-te zìng leh tlai inthawi vawi 2,300 lai tithuanawptu kha Suria mi Antiochus Epiphanes IV a ni a. Puithiam Makabia leh a faten thi leh thau, nunna thàpin an do lèt a. Jerusalem Temple tihbawrhbàn tawh kha THEN THIANGHLIM a nih leh theih làwmna Kùt HANUKKAH hi Kislev thla tàwp lam (December thlasik) laiin NI 8 awh an neih phah hlen ta a; chu ngei chu Isua pawh khàn a champhaphàk kum AD 29-ah a rawn hmang ve tih a lang chiang —

    Hanukkah (Inpumpek Kut tih aiin HLAN THAR LEHNA KUT tih a inhmeh zàwk)-ah hian Eng an chhi chiam thìn; ni riat lai an chhi. Mahse, èng an chhitte aia ENG ZAWK, khawvèl Entu Isua a awm. Chu Isua chu Johana 10-a Hanukkah Kut-ah khân tukhawkhàin an hre lo, Solomona Hulhliapah a vei tawn ve mai mai a nih kha!

    Temple kha hlan thianghlima chhuh kìr tùrin kum 3 zet an inbei; mahse, Temple kuta sak loh Tholeh Messia kha ni 3 leh zan 3 leikawchhûnga zalh a nih hnuin a tho leh ta! Temple kuta sak leh Temple kuta sak loh a inhlut hleih ta hle.

    Antiochus-a khan "Hmuh theih pathian" inchhâlin EPIPHANES a inti; hmuh theih Pathian kan neih chhun erawh chu Isua Krista chauh hi a ni zàwk.

    A sei ta hret, ziah zèl ka va chàk ...mahse, mi tam tak tàn ninawmah a kal hman leh dâwn!

    Varte, i zarah ka'n tih ve leh tàk ngheng chu, mi chophùr thiam bawk a ni ber e!

    I ziak hi a ngaihnawm thei em mai! Ka lo tel ve chàk hle a nih ber hi!

    Thanks!

    ReplyDelete
  8. chhiar xo ve vek....ka fiah kuar mai!!!!

    ReplyDelete
  9. Chawnghilh - always welcome. I rawn tuihnih hian min ti bengvar sawt thin ania, inthlahrung reng reng suh, a ngaihnawm bawk, rawn ti zel rawh.

    ReplyDelete
  10. Anonymous - va'n lawmawm ve, a engah chuan nge i fiah tak kuar le..???

    ReplyDelete
  11. A ngaihnawm thin e. Sawi belh vak dan chu ka hre lova, mahse thu i thiam thin khawp mai, 'goal' ah i pet lut tha thin bawk.

    ReplyDelete
  12. Mit hi a va pawimawh em! I ziak ngaihnawm thiam hle mai.

    ReplyDelete
  13. jralte - chuti em ni, i ti lawmawm tih bak chu sawi tur kei pawh ka hre lo e..

    keimah - nia ti raw, mit hi a that chuan a pawimawh zia hi kan ngaihtuah ngai lo zawk pawh a.. i ti lawmawm e

    ReplyDelete

Followers