Tuesday, July 20, 2010

Suih-tung-tu-rut..

Hrui suih hi suih dan hrang hrang a awm a ni awm e, a then chu nghet taka thil phuar nante, a then thil phihawh nante, suih mawi hrim hrim te pawh a niang chu. Suih tak ngeia suih chu a nghet a, phelh mai mai pawh a har, suihtungturut hi chu a hmawrah hian han pawt ila a phelh leh mai thin.

Ka naupan laiin la kan phiar thin a, ka nu la chhum zawmkhawmin puanbu lemte siamin puan kan tah thin bawk, suih taka suih hi ka thiam lo a, suihtungturutin ka suih a, a dûk leh zur zur a, a manganthlak thin hle, puan tah khawn a tla tha thei lo a, a chang phei chuan tah a chhuak hial thin. Ka nu suih lah a nghet thei hle si a!!! A hnu chuan suihtaka suih min zirtir ta a, a nghet ve ta hle, han pawt vak vak mah ila, a nghet ting ting a ni mai, suihtungturut kha chu a hmawra pawh hian a phelh tlat zel.

Mizote mahni-a la an deh thin lai khan nula nungchang tha leh tha lo en nan an la deh lai an chik thin a ni awm e, ka nu sawi ka la hriat reng chu Tlangval thenkhat an thiannu an rimin a la chhum an lo khawl ruk sak a, an haw pahin Sumah an dah a, a lo tam tham deuh aniang, a zing buh deng turin a hmu chu a zak hle a ni awm e.

Nupui pasal inneih hi hrui suih nen hian an tehkhin teh chawk bawk a, suihtak chu a nghet ang bawkin inneihna hi chu nghet taka suih a ni tur a ni. SA Officer pakhat pawn Nu pakhat hnenah "Suihtungturuta ka suih mai mai, in innei rei ta zek mai" a ti fiamthu a, ani lah a nuihza khawp, inneihtirtu lam ai chuan a inneia te an pawimawh zawk daih bawk a ni.

Tleirawl chhoh laia ka thian kawmte pasal an nei vek tawh a!!! A then chu an inthen leh tawh hial (:P) Kan thiannu pakhat chu naupangte-in a High School teacher a nei vei a, fa 1 an nei chauh tihin a tlan hnu hnu, a nu chuan "I haw tawh lo ang" a ti a, ani chu lungleng leh si niang a rukin a haw leh, a nu thinrimin "I haw rau rau chuan i lo haw tawh lo ang" a ti leh thung, mahse a hnu rei lote-ah fa 2 an neih hnu-in a haw leh tho, an inthen hlen ta nghe nghe. Pakhat leh thung chu a pasal kha a tlangval laia Zu in thin pawha a hriat loh, fa 2 an han nei a, rui thei em em ta mai, an buai thei khawp a, nikum ka haw khan ka hnenah a lo sawi koh koh a, "Tihian ka tuar tang tang ang a, ka fate enkawl thei ni-a ka inhriat hunah a awm dan hi a sim loh chuan ka then nal nal ang" a ti bai bai mai, buaithlak hlawmin!!

Nupui pasal inneih hi hun rei lote atan mai ni lo-in dam chhung atana intiam an ni a, a nuamah leh a hrehawmah, hrisel leh bawrhsawm pawhin ti-a chham vek kha an ni a, an han innei ta cheng a, an ze thup thin lo lang chhuak an tuar zo lo fo thin. Hmeichhia hi kan pawimawh khawp mai, pasal neih hnu-a nun thlahdah, inchei tha duh mang lo, Nu te te inchei vurte chu tih rilru pu-a inthlahdah, pasal te tana iaiawm tak tur an awm nual mai. Hei hi tih loh tawp tur niin ka hre ve mai mai. Mipa lah hi nupui nei reng chunga nula hmeltha hre riau an awm bawk a...

Chuvangin ti hluai teh ang.. nupui/pasal neih chuan Suihtungturut ni lo Suihtak ngeia neih tur a ni e. Engkim huama nei an ni si a.

(Auditor ka mikhual a, thu leh hla pawh ka nei hlei thei lo, ka hunawl remchangah ka han ziak zuai a ni, a chung pawh a hawl fai zo ngut na maw chu???)


Tuesday, July 13, 2010

Beer-lahai-roi

Mahni seh seh mual hranah ti-a office chhunga hna thawh mual mual hnu-a Thingpui In chawlh han neih hi chu a nuam ve hranpa thin ngawt mai. Choka-ah kalkhawmin duh zawng zawng sawiin kan ri luai luai thin. Kei, a tawng thiam lo ber hi a bengchheng leh tawng hnem ber ka la ni ta dah thin a!!

Tukin chu ka thlen thlak hma-in Politics lam an lo khel a, ka ngaithla kur reng a, ka inrawlh lem lo. Tuna kan rorel lai mek Frelimo party hian term hnih an chelh tawh a, kan President Armando Guebuza hi duh lo an tam hle, chuti chung chuan 2009 October-a inthlanpui neih khan an thlang tling leh tho si. Inthlan dawn khan Renamo leh MDM party thawm a lian hle a, result a chhuah meuh chuan a ngai bawk an lo tling leh, hei hi eng dang vang a ni lo a, Frelimo party hi an lian laklawhin sum leh pai an nei a, Campaign laiin Puan, Bag, Lukhum leh sum hial pawh an sem chhuak nasa khawp a, mipui chu an awn leh dual mai niin a lang.

Chutia Frelimo an han sawisel leh vel chu "Nangmahni thiamloh alawm, duh thlan theihna in nei a, in Vote a, Frelimo tho in thlang tling a, ngah nge tuna in sawisel leh si, in duh loh tak tak te chuan inthlan lai khan vote mah ta che u" ka ti vel a, anni paw'n dik chu an ti tho, "Nia, suma lei theih an tam em a ni, a bikin Nu-ho hi puan an dawn chuan an lungawi a, an tam nasa mai si a, nuho pawl hi an chak bawk si a.." te an ti.

Chuti'n ka sawi ngawt tak na-a kan Mizoram dinhmun nen a danglam nasa vak chuang lo, kan in ang vel reng a ni e, tiin ka ngaihtuah leh hnuhnawh. Hmana kan sêl tawh bawk kha kan thlang tling a, hmana kan duh kha kan sêl leh vel mai mai a ni e, "Uiin a luak a ei leh a, Vawk tuihawkah bawk a inbual leh thin" tih zawng zawng kan neih zo a ni awm e.

Engpawhnise, famkim lo mihring kan ni miau a, a famkim a lo lan hunah chuan Thu tak zawng zawngah a hruai lut ang che u kan Bible-in a ti a, chumi lo lan hun chu nghakhlel takin kan thlir thin a nih hi.

Hagari, a Pi Sari'n a fapa Ismaela kum 13 emaw lek nena a hnawhchhuah khan thlaler hmunah kalna lam tur hre lovin a vak a vak a, chutah an tuithawl a lo ruak ta bawk nen, lungngai manganga rumin a fapa tuihala thi mai tur chu en ngam lo-in thingbuk hnuaiah a mut a, Pathian hnenah a tawngtai ta a, chutah chuan Pathianin a mit tih var sakin Tui a pe a ni tih kan hria. Bawihnu, ro luahtu tur ni lo, a piin a hnawhchhuah hnenah pawh Pathian chu a inlar a, a mamawh a pe a, chu hmun ngei chu a hmingah Beer-lahai-roi, Nunna Tuichhunchhuah tia vuah a nih tak kha.

Hlim leh lawm lai leh engkim a kal tluan lai hian Pathian hnena lawmthu sawi hi a awl deuh a, manganna leh harsatna tawh hian Pathian dem mai, beidawn mai hi a awl thin, Amah kan mamawh hun lai tak a nih thin vei nen. Kan chak lohna leh tlin lohna te hre vektu hnena inpumpek mai hian Nun a nuam mai a lo ni, khawvel thil ten min tibuai thin mahse, Hagarin Lalpa a tawhna hmun ngei hi tun thleng pawhin a la pangngai reng a, kan chak lohna zawng zawngte min hriatpui turin Amah chu a la rintlak reng zawk a ni.

Monday, July 5, 2010

Nawngsawhnawh..

Tunlai chu kan inkhel hah bawk a, hahchawlh nan hmanlai thil, ka rilru-a riak reng thin ka'n sawi mai mai teh ang.

Kan la naupang hle, 1986-7 bawr vel kha nita-in ka hria Nongsohnoh lar em em lai kha. Kan hlau thei khawp mai a, naupang tap thlem nan nawngsawhnawh in a man ang che tiin an sawi thaih thin.

Chutih lai chuan Kolasib-ah kan awm a, kan in awmna chu a fal ang reng hle na-a, tuilut kawng a ni bawk, mi feh kawng a ni bawk a, ram kal tur hian an rawn paltlang nasa thin, a chang chuan chu kawng chu a lun ve viau thin bawk.

Tlai khat chu nu pakhat feh hawng hi hlau thlabarin a rawn tlan haw a, thaw hlawp hlawp chungin tuilut vel-a a kal laiin mi mangang thlabar au rawl a hriat thu a rawn sawi a, “Tuilut-ah heti mai hian maw ka thih dawn, ni tla tur ka va ngai em..” a ti niin a sawi. Mite chuan nawngsawhnawh in tu emaw a la ta ni ngeiah an ngai a, an ngaihven hle, chu achhapah Tuilut ah ber kher leh nghal a ni vei nen. Tuilutah mangang au thawm an hria tih chu kar lo-ah a khaw khahin a khat a ni mai, tichuan, tlawmngai-in chu mi mangang chu chhanchhuak turin leh nawngsawhnawh chu man ngei turin Tuilut lamah chuan tlangval leh pa valai deuh, kal thei tur ni-a inhria chu an tlan thla ta zut zut mai a, chutih lai chuan khua a thim tawh a.

Mi chu an rawn pung khawm tam zel a, thenkhat hmanrua engmah keng lo-a rawn tlan chhuakte chuan kan thingkhawna thingfak chu an rawn phawi chawt hlawm bawk. Ka Pa Aizawl kal rawn haw hlim hlawt pawh chaw a bar sawk sawk a, iptepui-ah Chempui dahin a chhuak ve nghal bawk. Nawngsawhnawh chu man a, mi mangang thlabar chu chhanchhuah ngei an tum ruh hlawm hle, Kolasib Venglai atangte pawh chuan an rawn tlan thla zut zut a.

Nakin deuhah chuan nawngsawhnawh hmu zo lo beidawng an rawn haw tan, keini unau chu kan veranda ah kan thu a, hlauthawng em em in mi lo haw chu kan lo thlir a, kan tui pawh a hek ngei mai, a rawn haw a piang chuan tui an rawn lam vek bawk si a, ka u chu tui sem reng rengin a lo buai hle.

Nakinah chuan val upa lam deuh hian tlangval pahnih hi an rawn khalh haw ta tak tak a, kan kawtzawl ah chuan an pungkhawm a, chu tlangval pahnih chu a laiah an dah a, an au lawng lawng a, an thin a rim hle, chanchin ti hian tlangval pakhat zawk chuan a sawi ta a.

An hming chu Vena leh Rammawia an ni. Vena chuan “Thingzai turin kan thiandun hian kan kal a, zu kan keng a, tlaiah khan kan in a, ka thianpa hian inawhhlum a tum der a, a rui lungpuam khan ‘Tuilutah heti mai hian maw ka thih dawn, Ni tla tur ka va ngai em..’ a ti a” tiin a sawi. Chumi au thawm chu nu pakhat khan a hria a lo ni. Anni pahnih lah khan anni vanga buai tih hre lo-in an mi zawn chu an lo phek zawnpui ve chiam mai a lo ni a.

Val upa te chuan an zilhhau a, tlangval thenkhat chuan han khawih deuh hlak an chak hle, an thum mam mam a, mahse an in khapdai thei ta hram, mipui ti ralkhel zawnga che tawh lo turin an vau a, an tindarh ta hlawm.

Khata tang khan nawngsawhnawh ka hlauh thinna hi a reh hmak a, tun thleng hian nawngsawhnawh kan tih thin kha eng tak ni maw? Ka la ti reng mai.

Followers