Friday, December 12, 2008

Bat dei lawm ila

Tunlai chu Masi boruakin min chiah vel a, mahni tawkah buai ve em em a, ramriak bel ang maiin ka indaihlo a, chutih karah blog update ka duh ve a, ziah tur lam ka tlachham bawk si... eng tak chu ka ziak dawn ni maw ka ti a, ti hian ka ti ka ti kual a, Krismas te a lo thleng ang a, ka lung a va leng dawn tak em aw... Kenya lamah kal daih teh ang, tah chuan U Bula te bulah va thum bul bul ila ni mai ka ti ta a...

Ka ngaihtuah zel a, naupan laia kan Krismas hman dan-te, khaw vawh theih zia-te, tlaivar kan chak em em laia, khua a var thei tlat lo mai thinte kha aw.. zing lam Dar 2 velah chuan kan muthlu leh nge nge thin a nih kha.

Hetiang vel ka ngaihtuah lai hian naupan lai chanchin ka ngaihtuah chhuak a...

Lunglei kan awm lai (1985) vel hian Bat dei (Birthday) lawm hi kan han uar laileng khawp a, zan tin mai hian lawm tur tawk hi an awm reng mai a, naupangho intihhlimna a ni ber ang chu kan ri lui lui thin.

Vawi khat chu naupang pakhat hian kan veng pitar pakhat chu a birthday lawmna-a kal ve tur chuan a sawm a, Pitarte chuan, “Enge bat dei chu” tiin a lo zawt a, a ni chuan “Ele, chau ( Chow)” tiin a chhang.

A ni taka bat dei kha kan lawm a, chow kan kang ziah a, (chow chhuah tirh kha a nia.. ) kan ri dur dur thin, naupang a thu chang a birthday neitu khan kum engzat a hmanna nge tih pawh kan ngaihtuah ngai lo ni mai lo-in tu ber kha nge tih pawh kan hre chang lo hial thin.

Kum tinin Lal Isua piancham kan lawm a, kohhran tinah ruai theh tumin kan hmanhlel a, In leh Biakin, Kawn, kawtthler thlengin mawi tak takin kan chei a, naupang chu sawi loh nu leh pa thlengin thil thar engemaw tal neih kan tum vek a, zaikhawmna lamah erawh chuan nu leh pa lungleng zual tlem azawng bak hmuh tur an awm ngai thung lo. Theihtawpin kan inchhekarbawm a, uar takin kan hmang a, kum a lo thar meuh chuan kan chau hle tawh mai thin a nih hi.

Lalpian champha kan lawm dan hi in en chian a ngai hle tawhin a rinawm. Lal Isua tellova a birthday lawm hi kan tam viau thin lo maw le????. A behbawm buaipuia kan phul hlut thin hi bansan a, thinlung leh tih tak zeta naupiang chibai kan buk hi a hun tawh tak zet a ni.

Thursday, December 4, 2008

Ka Krismas ve!!!

Khawi nge, Zawng hnuhnung ang luap luap-in thian thenkhatte'n (abikin thianpa Zaia) Christmas puala a bua chhuah tham teh meuh an ziah tawh lai hian Damparengpuia ka krismas hman ve chanchin hian i'n sik-hawng ve dawn teh ang hmiang...

A rei tawh ang reng khawp mai a, thangkhat lian zet a ni tep tawh mai. 1996 khan Damparengpui lamah ka u Evangelist Teacher-a a awmna hmun a nih vangin awmpui turin ka kal a, Krismas te a hnai tawh bawk a, hman nghal law law a, kumthar erawh chu Aizawl lama hmang turin thiante nen chuan kan invai liam a, mahse thil pakhat ngaihtuah kim loh ka lo nei a, chu chu Damparengpui kal chu "Aiawt luh ang" a ni tih hi.

Khatih lai kha chuan MST bus hi Marpara leh N Kawnpui kal a awm a, anni an khah viau chuan motor dang phe zeuh pawh beisei tur a awm lo, a chang changa Pioneer motor pawl rawn tlan thin chu a ni mai.

Damparengpui chu Bru (Tuikuk) khua-ah chuan a lian ve pawl tak a ni a, in pawh a tam ve phian a, kar hnih khat han awm chuan an tawngte ka zir vel a, nuam ka ti viau a, “Mai cha ha de” han tihte, “Mangka ham doh”, "Khak chang ha” “Khrouh kaham de tong” tihte chu ka duh hun hunah ka pik liam a, pitar te te hi an lawm phian zel a.

Krismas Bawng tur chu thlalai leh patling ho chuan Tuirum ami an zu kai a, zan rei tawh-ah an rawn thleng chu kawtchhuah-ah kan han hmuak teh reng a, ka peih lo kher na-a In lama mahni-a lo awm kha ka peihlo zawk mah si..!!! (A chhan chu an awmna quarters hi daideng deuh, ramhnuai nena inri a nih vang mai ani) Pu Vuana (L) khatih laia CSM khan hma a rawn hruai a, Pu Nunmawia (Tunah CSM) te nen, kan ri thla luai luai mai a, Sa ei tur hmu ngai lo, an sa ei hnuhnung ber chu nikum Krismas a niang tih ang vel kha an ni bawk a, krismas-a sa ei tur bawng an rawn kai lut ruau ruau mai chu ropui danglam tak mai hi a ni a, Pu Vuana chuan intithu zet mai hian zai tur a ti a, kalkawngah Bawng chu a hma-ah an khalh a, a hnungah ET ho nen naupang nen, a kel rawl a kel rawlin an han zai ta reuh mai a..h kei pek kha ka nuih a za leh tlat pek a, ka nui huah huah maia, ka u-te pawh an nuih chu a za, mahse an nihna (ET) nen han nuih vur vur chu inhmeh lo an ti a, an nui lo mai mai a ni tih ka hre reng.

Krismas chu hlim takin kan hmang a, zaikhawm a ngai reng mai kha ka nin tawk a ni leh, in-ah mahni-in han awm dawn ila a zahthlak bawk si...!!!! (Heta zahthlak ka'n tih ber hi chu thil dang ni lo-in sanghar vel a ni ber)

Zaikhawmna inah chuan thutthleng pawh a awm hran chuang lo a, dap chhuatah kan thu thluang diai mai a, chhuat chu a tliang hneh hle. Kan hla han sak te reng reng kha a pianna lam ai mahin a thihna hmun kan thlir ngun zawk a, a chhan ber chu Krismas hla kha an tawngin nei tam hek lo. Krismas zaikhawm khan :

O angsa ma ia, O ang sa rung ia (Aw ka sawi thei lo,aw ka hril thiam lo)
Nini uainsohmoh kau no (A hmangaih a va mak em)
Thumo thumo angsa ma ia a sukhe (Thukna2ka sawi theilo min hmangaih)
Angno hiau mo (A va mak em)

tih kha an lampui dawrh dawrh a, ropui deuh chu a ni. Ruai kan theh a, Bawngsa bakah Changel hi vawksa nen an bai a, a thak hle a, mahse a tui khawp mai. Arsa hi maitai nen an kang bawk.

A ni hnihna kha sa-te kan la nei bawk a, ruai I nawn ang u tiin an han rel chawpchilh a, an ruai theh dan hi mahni chaw theuh ken a, ruai theh na-ah sa sem a ni mai a, a hautak lo phian a. Ruai nawnna chu chawhnu dar hnihah an ti a, keini pawh In atangin hmanhmawh lem lo-in dar 2 velah chuan kan han kal ve ta a, “Bakin phingphihlip a rep thei lo” tihte chu nepte hi a ni ringawt, ruai theh zo chu kan tawk ta sup sup mai a, a hmun kan han thlen chuan an lo tin kim tep tawh. Hahahaaaaa.....

Ka tum lawk angin Kumthar chu Aizawl-ah ka hmang dawn, a ninawm em mai tiin ni 28 dec-ah haw tumin ka in fam nasa mai a, Buhfai, bal, hmunphiah tih angreng eng eng emaw hawn tur nen Bapui tuai loh ang tuamin ka inbawk thluah a, ka Buhfai dahna chu Paihte ruksai an tih mai, green bag lian deuh mai kha a ni a, thil dang nen kawtchhuah lamah min thlah a, kan ri cho luai luai mai a, mahse chumi ni chuan Marpara Bus (MST) a lokal lo, ka thinrim hle, kan haw leh ta hna hna a, a tukah chuan pangngai te-in kan in ak chhuak leh a, ka bag vel chu a rih em avangin kawtchhuah hnai deuh Malawma te inah kan chhawp chho a, chumi ni chuan Bus chu a kal ngei, mahse a khat hneh lutuk a, kan bulah chuan a thawi pawn an ding duh eih lo, an tlan liam puat a, thingtlang kan awm laia Minister kan hmuah thin lai ang vel kha a ni. A phe vuai ringawt. Kan haw thla leh ta poh a. A tukah chuan Pu Sawma ET ve tho, a fa-te nen haw an duh a, kan han chhuak ho leh ta a, MST bus a awm loh pawhin motor dang remchang apiangah kal ang tiin Pioneer motor pawl pawh nise ka kal ang tiin ka tum ka ti ruh nasa mai a, mahse “gari krui de,” (Motor awm lo) tih chu bangah kan ziak rang vel ta mai mai a ni.

Kan haw thla leh chu Pu Sawma uang pheng chuan pitar ho hnenah chuan, “Khrouh kaham de tong..” (In lo dam em?) te a ti a, kan nui thla ta vak vak ringawt, a tuk chu 31st a nih avangin eng motor mah beisei tur a awm lo tih chiang sa a ni a, kumthar chu hman a ngai leh dawn tih hriat sa reng. In ka thleng chu vui hmui hi ka pu hnur mai a, Pu Sailova (ET ve tho)-in ral atanga vui hmui pu bura ka haw min hmu chu in ka luh hma-in ring tawk hian, “Ka naute saw, ka khawngaih lutuk, ar ka talh dawn,” a lo ti lawng lawng a, tlaiah chuan ar chu a talh tak tak a, a inah chaw kan ei zeih.

Kumthar chu bet vak lo-in ka hmang leh ta poh a, kum a thar rual rualin bus hmasa berah ka haw ang ka la ti fan. Khati em em-a haw ka chak kha Damparengpui ho leh ka U-te tana ka ngeiawm dan tur kha ka ngaihtuah lo reng reng, Tleitirlungmawldawntawii ka ni ngawt. Kumthar-ah chuan MST pawh nang lo-in Pioneer ho truck pawl ngei chuan West Phaileng thleng kan han chuang chho reuh mai a nih kha, W Phaileng-ah chuan Marpara Bus a lo ding a, tawt lutuk chungin kan inhnawh lui, ka la rui zui. Dam te chuan In chu ka thleng ve ta, Krismas leh kumthar ka hman tawhah chuan ka hman rei ber la ni ta hialin ka hria.

Friday, November 28, 2008

Ka upa em ni???

Engtik atang khan nge kan veng Tleirawl zawng zawngin min U tak kha aw..??? Min u mai a ni lo a, min Au vek (Au Din min ti..!!!!)

Tun hma kha chuan thiante inahte khan kan ar nghal luh vel mai mai a, nu leh pate chuan min uksak teh chiam ngai lo, tunah erawh chuan Sabengtung bangla lut ang khup khupa ringin pen lut lo mah ila ngaih pawimawh kan hlawh ta riau a, "Enge ni ta,? " Pa ber emaw Nu ber emaw hian an lo ti vat thin a, pawihai awm lo phei chuan lenchhuah that ngam pawh a ni ta zawk lo a, hei vang hi ni maw kum a tam deuh hi chuan kan lo taptawm ta deuh chawt mai a lo ni.

Tun hma kha chuan thimhlima thiante ina han chuankai zeuh pawhin ti dekin inah kan haw a, Khawnge I kal veng veng ti-a zawhna kan tawng ziah bawk a, tunah erawh zan dar 12-ah pawh haw mah ila chhungte hian kalna hi min zawt si se tawh lo a, tlangval 2/3 pawn min thlah raw sek sek, kawngka luh dawnah thawm nei deuh khut khut pawh ni ila an ngaih thalo tawh chuang lo. Tu emaw ber nen hi chuan han ti ve tak tak se ni tur tih ngaihdan te pawh an nei a ni mahna.

Tunhma kha chuan thalai thil tihkhawm leh inkhawm reng rengah khan Midum zinga suahdur nei te ber ang maiin kan thu zum reng mai thin kha a ni a, tunah erawh tihkhawm let let a awm tawh chuan ka ta emaw ti tlat tawh, a meizanghlaptu bera tan loh chuan awm thiam tawh tlat lo.

Tun hma kha chuan Sawmna Card reng reng khan min huam tel ngai meuh lo kha a ni a, tunah erawh tunhma-a lehkhathawn awmna thin lukhamhnuaite chu mahni puala Inneih sawmna emaw Man ei tura hriattirna tih te chuan a thlak zo tawh a, hma taka mut leh hma taka thawh chu kan thiltihthat awm chhun a ni a.

Tun hma kha chuan ei tura min chhawp ang ang kan eiin kan in mai kha a ni a, chawhmeh sawisel phei chu a tina tin eih chi a ni lo, tunah erawh chawlhni sa hmeh tur pawh mahni duh zawng zawng kan lei mai a, a siam danah lah duh dan danin kan siam a, min rilrempuilo an awm leh chi dang kan siamsak leh mai a, mahni tawka siamrem theih loh pawh a awm tawh lo. Nu-te an awm loh pawha Vawk hralhna man lo tel thei kha kan ni tawh tlat a.

Tunhma kha chuan thiante nen engkim kan ti tlangin kan nui za a, Cinema te pawh kan en ho ngai kha a ni a, tunah erawh an fa-te birthday lawmna-ah min sawm zur zut hlawm ta mai, hetih hunah tak hian buaithlak chang a awm thin. An faten min Nu ang nge min Ni ang tihah hian kan buai ta thin a, thenkhat ka in Ni tir a, thenkhat chu ka in Nu tir ta hlawm bawk a nih kha.

He thil inthlakthleng hi engtik atang chiah khan nge ka chungah a lo thlen tak kha aw… ka ngaihtuah let thei tawh lo e, ngaihtuah buai ting tang lo mai ang.

Ka la upa lo e, ka kum a tam ta deuh tih mai a ni.

Khawnge leng ang aw, leng rei ta sa sa
Leng zel ang aw, leng tar law law ang
Tu kan phu lo tu’n min phu hek lo
Hraileng awi lovin hm hm hm hm hm hm…

Monday, November 24, 2008

Phal loh thil ka ti

Thlalak hi hmun thenkhatah hian ngatinge an han khap tlat mai thin le...

Kolkatta FORUM-ah kan kal a, a chung ber khi INOX cinema hall a nia, Music and Lyrics tih film kha kan en a, a hmuhnawm khawp mai, kan haw thla lam chu kan bazar nghal zeih a, thlate kan la vel a, kan hmet zo chiah tih-in min rawn hau, thlalak phal loh an rawn ti.. Mahse kan la hman tlats...








Engeni na vei kan ti a, pawnah chuan kan han la nawn leh sak a..........














Inrinni khan Shopprite-ah kan bazar a, krismas a hnai tawh bawk a, an lo chei nasa tawh khawp mai a, ka insum leh thei pek lo, ka thiannu ka dintir te te a, thla ka la leh vei hmak a.......


Thlalak phal loh an rawn ti leh pek a, pawi lo e, ka la hman tho.... vawi thum lai ka hmet hman... hahaa












Thursday, November 20, 2008

Hlau suh

Mi-te hian engtinnge maw khawl lian pui pui hi chabi tereuhte hian an control bik le?

1st Step : Driving seat-ah ka’n thu ang el awl a, chutah seatbelt ka hreng a, seat ka’n pawt hnai hrawk bawk a. Switch kan on a, nung ve ta vut vut mai, accelerator ka’n rap chiah chu hmalamah hian BUR ni nghal mai. Het.. shala ngatinge ni ta mai, ka’n en chiang chu back tum na na na 1st gear-ah ka lo dah vung niin. Gear chu ka’n thlak leh te te a, garage atang chuan hnung lamah zawi muangin ka tawlh chhuak thei ve ta a.. Number plate erawh a khi ta thung a ni.

2nd : Ka tlan chhuak ve ta ngei, Driving School-ah chuan khawpui chhungah kan khalh a, Traffic light fel tak kara khalh chuan hlauh tur a lo awm lem lo a, in atanga ka inkhalh chhuak chu motor dang tam tak karah mipui nasa tak nen, traffic light awm lohna hmun atangin ka inkhalh chhuak bawk nen, ngaihtuah tur apui a tam ta lutuk, hnung lama mit nei ang kara awm a ngaih laiin hmalam en a ngai, sir lam nen, steering ven ngai bawk si, speed a dik em tih ngaihtuah ngai bawk, ka veng seng lo a ni ber mai a, chutah le, hlauh ang ngeiin ka hma-ah chuan mi pakhat coconut nawr hi a lo awm, a sira hel mai tur ka nih laiin amah tak chu ka pan ta chher chher mai a, ka bula thu Beira chuan “Captain kual rawh, kual rawh,” a ti lawm lawm na-a hmalam chu ngai patin ka pan a, atawpah tihngaihna ka hre tawh lo, kan break thut mai chu kan bu dawrh mai.

3rd : Tluang tak chuan kan tum ram kan thleng a, haw lam chu kawng ngai-ah kal lo-in motor tam lohna lam deuh tur min zawnpui a, kan tlan ve ta par par a, chutah le, helai-ah hian kual tawh rawh min ti thut a, kan kual mai chu ka dawk zawk mai a, slowly, slowly an ti chul mai a, ka tihzawih tumna lamah clutch tel lo-in ka’n break leh tuar pek a, kan insawi nghar nghar mai.

Hetiang hi a ni motor khalh chu, thil tam tak ka zir tawhte zingah passed har ka tih ber mai a ni. A chang chuan a uih zawn ang vut vutin ka tlan a, a chang leh Zawhte kawchhungna an sawi ang maiin ka zuai leh si. He thil teh hrep hi mite chuan Phone-a mi be mawlh mawlh chungin an khalh thei a, ti ti chungte’n kut khingkhatin an khalh a, kei ve lem tawng chu sawi loh, ka sangmar tlat mai thin a, engtinchuan ti bik ni maw??

Mario chuan Driving seat-a I awm tawh chuan I motor chauh ngaihtuah la, I kutah kan innghat a, hlau miah lo la, insangmar tun lo-in inthlahdul la, hla deuh en la, a ti, dan ni si lo zawm tur apui a va tam tak em. He khawl ropui tak hi ka kutah a awm a, ka thunun dan danin a awm mai a nih chuan keimah chu a mawhphurtu ka ni ta daih mai a, thu ka pek ang apianga awm tur a lo ni si a, Motor khalh chu chabi tereuhte-a bul tan leh steering control amaw ka tih laiin ka thluak lam daih hi a lo pawimawh a nih hi tih ka ngaihtuah ta a, Enge mawle, mihringte thunun tura siam na na na chu tih theih hun a la awm ve chek ang tih chu ka inhnemna dawrawm tak a ni mai e. Pathian-in Josua hnena Hlau suh a tih ang tho kha Motor khalhna atan pawha ka mamawh chu a lo ni fan a nih hi.

Thursday, November 13, 2008

Tawnhriat Hlimawmte

Chawlhni leh (16th Nov) thu ka sawi dawn a, ka inbuatsaih ve deuh atalangin tun kar chho chu blog pawh ka update lo. Vawiin chu thu chawhchawrawi mai mai ka'n post ang e, he ka vahvaihna rama ka tawnhriat hlimawm-te..

* Tawng hre sual - Vawi khat chu kan hotupa nen Youthcamp-ah kal ve kan tum a, a motor-in min rawn lam dawn, ka lo nghak. In atanga a chhuah hnu lawkah min rawn call a, "Tuilum i lo nei thei angem, hei Deise-in min rawn call hnuhnawh a, ka rawn chhuak laklawh tawh sia, litre 2 emaw, 1.5 vel emaw.." a ti a, Aw ka ti ve mai. A tawng kha ka hresual chiang khawp a. 'Boiled water' a ti kha Cold water a ti emaw ka tia. A litre zat rawn sawi teh thlap pawh chu, ka ti deuh reng a.. (Kan Brazillian pa hi a tawng hriat a har reng reng.. :) )

Tui vawt chu ka lo buatsaih diam a, a lo thleng chu "Tui chu a so tawh em..?" a ti a....

** Vawi khat leh chu ka Accountant hian ka tawng a hre sual thung nge ka hre lo. Voucher pakhat hi ka pe a, "Hei hi Virgilio zinna Expenditure a ni a, a detail ka hre duh a, lo zawt ta che.." ka ti a, a ni chuan, "Yes Captain.." a ti ve mai bawk a, a reh ta vang vang mai a, engmah min rawn hrilh ta hlei lo. A hnu-a ka zawh leh chuan Voucher chu a lo file tha diam a, engmah pawh chu a lo zawt chhuak lem hlei lo a....

*** Vawi khat chu Rute'i hian Kelsa a lei a, min hrilh a tum, kelsa tihna hre ta mai lo khan, “Captain, I buy meee” a ti a, kelsa tih chu ka hrethiam ve mai.

He nu vek hian an in tharah chaw ei turin min sawm a, an tuichhe paihna tura khur an siam, an la zawh loh deuh hlek hi min entir a, sawi thiam tawh hek lo, When we take bath, water will chuuuur…. here a ti a, tuichhe paihna tur tih ka hrethiam ve mai bawk.

**** Captain Regina-in vawi khat chu a ha hi a khawih a, hei hi enge a ti a, Teeth a nih kha ka ti a, “My teeth is sick” a ti top.

Capt. Regina bawk hi a pa-in a rawn tlawh a, min hrilh alawm mawle… Vawiin-ah ka pa a lokal dawn a.. a ti a. train nilo, thlawhna ni lo, Bus nilo, car nilo a ti zel a, keiin ka lo risk zel a, a tawpah chuan water a ti ta a, E… Ship ka ti chu yes…a ti thei ta, kan nui hnem leh pek.

Vawi khat chu inneihna-ah ruai kan theh a, Bawngsa an rawn dah chu Eng sa nge ka lo ti kher pek a, Beira chuan sawi ngaihna hre tawh hek lo.. Mooooo… dek thruai.

***** Kan nula pakhat hian Mr Din ti hlirin min ko bawk zu nia.

Friday, November 7, 2008

Talent

Kristian hmasa-te kha vawi khat chu an inkhawm na-ah Mahni talent theuh I sawikhawm ang u Chairman khan a ti a, hnung lama pa pakhat chuan,”E khai a, Biakin-ah pawh ta len leh len loh sawi te chu, a nihin a ni lo reng reng...” a lo ti bul bul e an tih chu.

Talent tih hi mizotawng ang maiin kan hmangin kan hre lar hle. Thiamna bik, chemkalna tiin JF-a chuan a hrilhfiah a, Mi thil thiam bik riaute hi an awm a, zaite, thusawite, lamte, ziak-te, lemziakte, thian kawmte, inkhelhte, infiamna chi hrang hrang leh thil dang tam takte pawh a ni thei ang.

Hetianga thiamna bik riau neite hi talent a nei tha a nia kan ti thin a, tin, Pathian rawngbawl tur pawh hian hetiang mi hi an tangkai duh bik em em a, zaithiam ngat phei chu an hlu leh zual hle hian ka hre thin.

Zaithiam sawi takah chuan zai mi hi ka ni lo ve chiang khawp-ah, ka la hre reng thin, vawi khat chu Sundle School Intermediate Dept-a ka awm laiin Inkhawmpuina-ah hian Solo intihsiak hi a tel a, hla chu Khawngaihna mak Mawi leh duhawm tih hi a ni a. Zaithiam lutuk pawh a ngai lo a, a solfa a dik chuan a tha a ni mai a, kan Zirtirtupa khan nang zai rawh min ti mauh mai a, hlauthawng chung chung chuan ka zir ve ta a, in lamah ka Pa leh ka U-ten a solfa dika ka sak theih nan min zirtir a, solfa na na na chuan ka sa dik ve fu.

A hun thlen hma-in kan zirtirtupa chuan sundle school-ah chuan rehearsal min neihtir ta alawm mawle.. Awi karei.. khami tum kha.. Zak takin kun chul chung hian ka ding chhuak a, ani chuan guiter a han perh a, zai ka'n tum teh reng a, ka pian ahnu lama ka thil tih tawh zawng zawnga ka hlawhchham chian ber a la ni awm e. Ka aw hi a ri chhuak thei lo reng reng a, ka khur nasa lutuk kha a ngaihna a awm thlawt lo, a mak a ni, mak tak a ni. Khatianga ding chhuak ve tawh si chu tial/lawi tak pawha han zai theih ve mai awm kha.... Tumah an nui lo nia, min ngaichang thap a, ka zai theih tak si lo-ah chuan hotupa tan tih ngaihna awm hek lo, ka thu mawl leh tawp.

Tun thleng hian Pathian hian talent pawh min pe ve lo a nih hi ka ti ziah, thil hi thiam bik nei lo hian ka tih zel zul phah ni te-in ka hria a, vawi khat chu ka thiannu Celeste-i hnenah, “Kei chu talent pawh ka nei lo aniang..” ka ti a, “No, Captain.. you have good talent, you are intelligent and brave, thats your talent” a ti a, ni tak maw.

Chuan pakhat leh chuan,"a hun taka thil pawimawh hriat chhuah theihna te leh hman thiamna te hi talent ropui chungchuang tak an ni.” tiin ka thil tih chu min comment sak bawk a. chu chu ka talent ve-ah ka puh mai dawn mawni? Mahse chutiang khawp chu niin ka inhre chiah chuang si lo.....!!!

Zawlnei Jeremia ang deuhin, 'Nimahsela, hei hi ka han hre chhuak leh ta a, chuvangin beiseina ka nei ta..' te han ti hluai ila... 'Pathian, awm lo ata min siamtu leh min thlangtu hian keimah ka inhriat aia chiangin min hria a, a duhna leh kohna hmun apianga ka kal hian ka mamawh tawk ang zelin Ama finna leh remhriatna hmangte-in min thuam thin a lo ni.' tih hi.

What can I say to cheer a world of sorrow?
How bring back hope where men have sorely failed?
Just where I am i'll speak the word of comfort,
Tell how for me Christ's sacrifice availed

Just where He needs me, my Lord has placed me
Just where he needs me, there would I be
And since he found me, by love he's bound me
To serve him joyfully

Sunday, November 2, 2008

INNEIH

Ram hrang leh hnam hrang hrangte hian mahni tihdan hi kan nei theuh mai a, tun tum chu kan ram (Mozambique) Inneih an sawngbawl dan hautak zet mai hi kan sawi ang e...

Dan tlangpuiin an Inneih hian ni thum a awh a. Zirtawpni-ah tanin chawlhni thleng an bei thin. Mizo in-a Man inhlanni kan tih ang hi anni chuan Lobolo an ti a, mahse an hmang nasa zawk mah. Mipa lam palai ang ve kha an lo kal a, gate an rawn luh dawn atangin thawm an rawn nei tan a, an zai a, gate-ah chuan hmeichhe lam chhungte chuan an lo chang bawk a, tichuan zai chungin in chhung an rawn lut a. A hma-in hmeichhe lam hian inneihna atana an thil mamawh turte list chhuakin an lo pe lawk vek a, hei hi an rawn keng a, suitcase khat tunin an rawn inbeng a ni. Chhuatah pher an phah a, manpui Mt 3000/- chu an han rem phawt a, chutah Mo Pa thawmhnaw, a Nu leh Pi leh midang thawmhnawte an han inpe leh a, chhuatah chuan an pharh zel a, an list en chung zelin an phawrh a ni.


Chutah hmeichhe lam aiawh khanan thil rawn kente chu a kim em tiin a check leh a, a kim ni-a a hriat hnu-ah Mo chu an ko ta a, mo dik tak ni lo a unaute chu an rawn chhuak hmasa a, hei hi kan duh a ni hleinem mipa lamin an ti ve thung, an han inhnial vel a, chutah Mo dik tak chu an ko chhuak ve ta a, a man chu puana funin an pe a, hei I man tur an rawn pe a, engtinnge I tih dawn le? An ti a, ani chuan Ka pa thu thu a ni e, ka pa ko rawh u a ti ve leh. A pa chu an han ko chhuak leh a, Mo chuan a pa chu a man nen chuan a va pan a, a hma-a thingthi-in a va pe dawn, a pa chuan Nangte chu hmeichhia Mo I ni a, engvanginnge I man tur I rawn ken, mipa chhungten min pe tur alawm a lo ti, Mipa lam atanga lokal pakhat kha a rawn kal vat a, a rawn dilpui a, chutah chuan a pa chuan a lo dawng thei ta a, i pasal te inah hian kumkhua-i awm ang em? tihte eng pawh thleng se he inah hian i rawn let tawh tur a ni lo a,i pasal bulah i awm reng tur a ni ti te-in a pa chuan eng eng emaw a lo hrilh a, man chu an inhlan fel thei ta a. An thawmhnaw tur chu an ha tawk hlawm em tih check turin room lamah an inhruai a, an han ha chin vek a, an tawk vek tih an hriatchian hnu-ah chuan engkim an tifel ta a, ruai kan theh ta mup mup a.


Mo leh Mo neitu thian hi kan tih dan anglo takin, Hmeichhia-in thian Mipa a dinpui a, Mipa-in Hmeichhe thian a dinpui thung a, kawng thenkhatah chuan a remchang zawk phianin a lang. Inrinni chu Vantlang hriatpuia Inneihna Ni a ni a, Sawrkar dan anga Inneihna a ni bawk.


Inneihna In an nei hranpa a, chutah chuan register marriage an nei thin. Hetah hian Innei tur apiang an kalkhawm a, an innghak thup mai a ni. Mo hruai motor chu a Mo hming inbelin an ding tuar mai a, pakhat an inneih zawhin midang an lut ve leh mai a, ralte vahai no la ang maiin a ri nuai nuai tawh mai a ni. A zo hmasa apiang an chhuak a, pawnah thla la-in an han ri leh hlut a, chutah park lam pang thla la turin an pan leh thin a ni. Inneihna-ah hian Zaipawl member 10 vel zel an awm a (Cartejo) an ti, an zai char char mai a ni. Thlalakna hmunah pawh neitu chan chang takin an zai reng a, an lam pah zel bawk a, heng ho hi an hah hle ang.

Hmun hrang hranga thla la-a kan kual fe hnu-ah reception tihna hmun (Salao) an tihah chuan kan kal ta a, he hmunah hian ruaipui kan kil a ni. Hetah hian Inneih Sawmna card kha ken vek tur a ni a, a chhan chu Card-ah khan kan dawhkan kil tur hming an ziah tel vek vang a ni, card keng lo chu luh an tum lo hrim hrim, kei pek chuan hre hek lo I, card ka keng lo a, mahse vanneihthlak takin Mo thianpa kha kan motor-ah kan phur hlauh a, gate-ah motorin kan lut a, ka tlang ve hram. Chumi hnu pawn mahni dawhkan hreta lo chu ka hawihai angreng dawn a, mahse buatsaihtute an lokal a, ka dawhkan an rawn sawi ta a, Milan a lo ni a, dawhkan hi hming hrang hrang an vuah a, Manchester, Barcelona, Chalsea, Milan etc tiin. Mo-te chu an thiante nen, zaipawl nen kan inrem fel zawh chuan an rawn ri lut leh ta chel chul a, kan lo ding vek a, chuan dawhsan an pan a, cake-te an zai a, cake zai zawh hian dawhkan tina an chhawpsa Champaigne an han tauh hawng ta hlawm a, a rik hian a ri pawp pawp mai a, an au dur dur zel bawk a, keini dawhkan chu officer ho min dahkhawm avangin zu an dah lo a, chhang an chhawp thung.

A tuk chawlhni-ah Biakin-a Inneihna kan hmang veleh thung a, mipa lam lawina kohhran-ah inneihna an buatsaih ve thin. Inkhawm banin mipa In lamah kan kal leh a, hetah hian ruai hnianghnar tak kan ei leh a, cake an zai leh bawk. Hun tawp lamah present pe duh tan hun an hawng a, a pe apiang hming an lo chhinchhiah zel a, pawl hming anih pawhin an insawi zel a, thianho pawh nise, hming putu an siam zel bawk. Zai leh lam chungin an rawn kal a, a ri leh nuai nuai mai a ni.

Thursday, October 30, 2008

Mi dang ve thung

Hman deuh a ka U Mamawii chet chhiatna ka'n sawi mai mai te'ng, post tur ka haihchham deuh tlat mai....

Revenue Dept. (Directorate)-a a Cashier laiin vawi khat chu an hotupa (Director) khan, "Tukin chu ka flush a chhe tlat mai, siamtir a ngai a ni," tiin a rawn report ve bawk a, (Toilet flush a nia.)

Ka U chuan tuilum dahna Flask amaw a lo ti pek a.. "I thlauh em ni a, a chhung a keh em?" tiin a lo zawt a,

An pu chuan, "Han thlauh mai mai chi pawh a ni em ni, a chhung keh leh keh loh pawh ka hre lo, a siamthiamte en tir a ngai ang, vaiho kan ko mai dawn em maw ni.." a ti a

Ani chuan, "Vai koh a ngai lo ang, ka lo en chhin ang e, a thlakna chu bazarah pawh an zuar mai ang, keini pawh kan thlak mai thin alawm.." lo ti awlsam leh et a, Flask chhunga a silver colour mum til tel hi amaw a la ti reng.. a dik tak chuan chutiang flask tha lo mai maia patling buai chu ho a ti rilru hle..

An pu chuan ring vak lo chungin a room-ah a hruai ta a, toilet-ah a'n luhpui chiah chu... a nui nasa mai mai..

"Flask (ssk) ka ti hleinem flush (ssh) ka tia lawm," a ti, ka u chuan engmah a sawizawm thei tawh lo. An nui vek, an pu nen chuan an innel phah ta phian a...

Tuesday, October 28, 2008

Naupangte


Ka thenawm naupangte hi an fel hlawm ania. Ka in-ah hian an rawn kal fo a, kan inbe thei tlem hle.

Min hmuh tawh chuan ka bulah a lokal vat a, "Captain," a rawn ti ringawt thin, chubak engmah sawi thiam tawh hek lo le.

Keiin, "Bom dia, como esta? onde está sua mãe?" (Good morning, how are you, where is your mother?) ka lo ti leh a

"Saiu" tih chu a chhanna ni leh mai.

Mahse ka bulah hian an rawn tawlh hret hret a, ka ina an rawn kal chuan, "É você com fome" tia ka zawh chuan, "Sim.." an ti ngei ngei. Ei tur angemaw ka pe a, an lawm thei hle.

Thursday, October 23, 2008

Chukchu dang

Hmanni deuh khan Medical Certificate ka mamawh avangin Doctor-ah check-up turin ka kal a, ka hmanhmawh pheng chuan ka tarmit ka keng lo a, office-ah tlan let lehin ka tarmit bawm dawhkana ka dah chu ka'n tham chhuak ringawt a, a tarmit tak chu Computer bulah a awm reng a, a bawm ruak ka lo keng tih a hmunah ka hmuchhuak chiah pek.

Doctor chuan min han check ta ngei, certificate duh chauh ka ni bawk a, natna dang nei hek lo i, ka mit berkher chu a lo check a.

Bangah hian mit entirna-a an dah thin ang alphabet tlar sawm emaw lai tur hi a khai a, a len dan indawt thla zut a ni a. Hla de daw-ah hian min thuttir a, "i mit lehlam kha hup la 1st line kha chhiar rawh le" a ti a, ka mit ka'n hup chu engmah ka hmu thei ta lo, "Ka chhiar thei lo" ka ti a, ani lah chuan "Chhiar rawh, chhiar rawh, tlar hmasa ber kha, English anih kha" a la ti zel a, "A te lutuk a, ka chhiar thei lo alawm" ka tih pawh chuan, "I mit kha hup la, lehlam hup leh la, line hmasa ber atang khan chhiar thla rawh" a ti zel a, tlar hmasa ber chu sawi loh, tlar li-na pawh ka hmu phe ruai mai a, chuti fakau-a ka mit lo chhe ta chu kei pawhin mak ka tiin ka tah a chhuak ut ut mai bawk a.

Ka vanduaina belhchhah turin Doctor lah chuan English a thiam lo zui, portuguese-in rang zet zetin a sawi a, "Tarmit i nei em? I tarmit nen khawi nge i chhiar theih" a ti, chu tak chuan ka chet chukchu-na a belhchhah, ka tarmit ber chu office-ah ka theihnghilh daih si. A thinrim lek lek hian ka hria a...

A tawpah chuan ka mit veilam hi a chhe zual a, dinglam chuan tlar hnihna vel chu ka chhiar thei a, ka ti a, ka nuih hi a za tlat mai a, Doctor pawh chuan nui chungin, "I tarmit chu bun reng rawh, motor i khalh phei chuan tarmit nen hlir khalh rawh" a ti a, lehkha chu tha tak chuan a ziak ve ta a, hlim takin kan inthen thei ta hram.

Monday, October 20, 2008

Dawithiam


Bible-ah hian Dawithiamte hi an chan a chhe khawp mai a, uite nen pawnah an awm tur thu Thupuanah kan hmu a, dawi thil reng reng chu Pathian tan thil tenawm a nihzia kan hre chiang hle awm e.

Mozambique-ah hian dawi thil leh dawithiam hi an la lar hle mai a, an hmanrua pawh khawlaiah langsar tak takin an la zuar fer fur a, Kristiante pawhin dawi hmanrua a nih hi tiin an en liam ve mai mai bawk.

Hmanni deuh khan Gaza province-a nu pakhat nau nei chuan Thingpui In No 3 a hring chhuak a, sawi a hlawh hle mai. An sawi tirh chuan ka awih lo a, an thin a rim lek lek zawk, hetiang hi a thleng thin alawm an ti tlat. Thenkhat chuan miin an dawi a nih an ring a, a chhan chu he province lamah hian ramhuai biak leh dawi thil (Traditional belief) a la lar hle a, an rin dan chuan mite hi dawi hmangin nau an pai tir thei an ti tlat a, hei hi Kristian tam tak, ka awmna lama mite pawh hian an la ring tlat.

He Nu hian nau pai ni-a inhria-in a inentir a, mahse Nurse-te chuan nau I pai lo tiin an haw tir a, a inentir hnu thla thum-ah he naute (No) hi a hring ta a ni. TV-ah te an broadcast nasa hle a, kei phei chuan ka hmu ve chiah lo a. Ka awih lo hle bawk. No chu a dawlh a, an zai chhuak a niang chu ka tia, mahse nau neih pangai angin a vei a, a nei an ti tlat a, ka hmu ve chiah si lo a, awihsak tur nge awih loh tur ka hre thiam chiah lo.

Vawi khat chu ka office kal tur kan hma chiahah hian motor pakhat hi a awm a, chuta mite chu ka chuanpuite chuan Witchdoctor an nih saw an ti a, engtinnge in hriat ka ti deuh kher pek. Motor atang chuan thla ka laksak a, ka chuanpuite chuan an lo hlauthawng khawp mai a, an thlalak hi an duh lo hle asin, an rawn hmuh che chuan an dawi mai ang che an ti a, an sawi ang tak tak chuan min rawn hmu fuh ta a, an inhrilh a, ka lam chu an rawn hawi ta thup mai a, traffic jam avangin kan ding si, kan hma chiahah an awm bawk si, an rawn hawi a, min rawn kawk zoh zoh mai a, engtin chuan min ti dawn ni maw ka ti rilru a, thinphu dep dep chung chuan finrawl ka chhuah ta a, hlau lo awm taka awmin kut ka va vai a, ka nuih vei sang bawk a, anni pawh chu an rawn nui ve ta a, chuan motor pawh chu a kal a, kan hma lawkah chuan an motor chu a chhe ta tlat mai a, an ding a, kan tlan pelh lai chuan kut vai pahin ka va nuih a, anni pawh chuan nui chungin min rawn vai let ve leh ta mai a, ka thiante chuan mak an ti hle a, an lo hlauthawng hman hle bawk.

Pathian kan lama a tan chuan tu-in nge min DO thei ang?

Wednesday, October 15, 2008

Che Chukchu

Tun tum chu ka chet chhiatna ka'n ziak mai mai te'ng...

Bawlhhlawh khura tlak thu

Kan ramah hian bawlhhlawh paihna hi mahni compound chhungah khur an lai a, tahchuan an paih mai thin a. Kan compound chhungah pawh hian chutiang khur chu kan nei a, a leilung hrim hrim hi Balu lei ang maia hnip a nih avangin a ruh chin chu thuk takah a awm vek mai a, chuvangin kan bawlhhlawh khur pawh a thuk ang reng a, a kotlang chu leivung hnip tak vek a ni.

Tichuan, bawlhhlawh ka paih tur kha a kotlang leihnip lai ka rap pial palh ta a, khurah ka tla lut ta mai, khur a thukin bawlhhlawh kan la paih tlem si, ka pil hmak mai a, ka au ta chel chul mai a. Thenawmnu Regina ka In-a kal tum a lo chhuah lai tak a ni a, ka tla tur min hmu hman a, a lo kal ta vat a, kan inpawt chhuak ta a.. kan nui nasa hle. Regina kha lo chhuak hlauh lo se eng chen nge ka tan ang aw tihte ka ngaihtuah mai mai.

Kawng bo

Thingtlanga tal leh seilian thang kan ni bawk a, college-ah pawh aizawla college lian ber Pachhunga University -a bul han tan chu a phurawm rualin a huphurhawm bawk a, ka kal hmasak ber ni hian kawng ka bo pang a.

Town Bus-a ka chuang kha Treasury Square-a chhuk tur ka chhukna ka hai a, sikulpuikawnah ka chhuk a, chuta tang chuan kulikawn lam ka la pan thla ta chher chher a, peng ka thleng har tawh lutuk ka ngaih tha lo chu ka let leh char char a, Republic peng -ah ka phei a, chuta tang chuan vanneih asiamin college peng ka hmu chhuak leh hlauh a, tlai lo-in college ka thleng thla ve ta hram, class-ah ka nihliap ka theihnghilh leh nghal.

Seal siamtir

Vawi khat chu Maranatha Press-ah hian Seal ka siamtir a, ka va lam leh chu an test na-ah khan stampad pawl an hmang a, a han chhu chhin chu a lo pawl ta phut si, "E he... a pawl alaw in siam, a sen asin ka duh" ka ti ta chiam a, a test tu chuan," a ink sen in hmang dawn alawm" a ti then a, ka fiah uar a... A neitupa Pu Robina lah chuan "Nula fel-te emaw kan ti a, kan lo chhuan ve tehlul che nen.." min ti fiamthu a, kan nuih leh tak chiam kha..

Tuesday, October 7, 2008

Passport


Matric kan exam dawna form kan fill-up in thlalak passportsize a ngai an ti a, kha kha passportsize-a thla ka lak hmasak ber a ni ta awm e...

Awm achin chung lam zawng te deuh hleka thla lak kha passportzise thlalak ni hmiang kan ti mai a. Passport pawh kan la ngaihtuah lo ni mai lo-in hriat pawh kan la hre fumfe lo a, hmuh te chu ka ha se hi a ni mai.

Tunah lah chuan passport tel lo-in ka awm thei tawh lo a ni si a. Engpawh ti dawn ila, i passport copy a ngai an ti zo vek mai. Doctor hmuh dawn tak ngial pawhin ka passport min dil a..!!! Xerox lah kan xerox hnem tawh narawh e...

Mozambique ka luh hian ka passport-ah visitors visa chauh min lo pe pek a, ka thlen hnu-ah residential visa dil nan Swaziland va zin lailawk a ngaih leh phah ta. Chhei raw..!!! ka awm thei dawn lo a niang ti-a ka ngaihtuah hnu-ah Lalpa ngaihtuahtu fel tak chuan ka tan kawng a lo buatsaih zel a, Swaziland-ah chuan Minute 15 chhung lekin residential visa ka nei thei ta a. Swaziland ram mawi tak ka hmuh phah hlauh bawk.

Hemi phek hi 12 months residential visa min pekna a ni.

Passport leh visa tello-a mi rama kan lut thei lo ang bawk hian Vanramah pawh Lal Isua tel lo chuan a luh theih loh tih hi min ngaihtuahtir zu nia....!!!!

Friday, October 3, 2008

Hlim

Hlim tereuhte
Khawiah pawh mi zui zel thin
Ke ler atanga lu chhip thlengin
Min ang em em reuh leh nghal a
Kan khuma ka zuan vel hian
Ka hma-ah chiah a zuang ve thin

He thu hi Primary school-ah kan zir thin a, hlim awm dan zirna a ni ber ang chu. Kan by-heart tluk tluk thin.

Ni sa-a kan kal chuan kan hlim kan hmu thei thin a, hlim hi tumahin kalsan emaw bihruksan emaw, thuhruk theih emaw ani lo a, kalna apiangah a lokalin kan din leh a ding ve a, kan thut leh hlim chu a thu ve mai thin a ni. Eng (Light) awmna ah chuan he hlim hi a awm tlat thin. Chu hlim chu kan kalsan thei lo ang bawkin he khawvela kan awm chhunga kan nundan te hi thuhruk emaw kalsan, bihruksan theih lohin hun tawpa rorelpui hunah chuan puanlan a la ni vek dawn a, kan thiltih azira rorelsaka awm tur kan ni.

Ringtu tan he thu hi a lo pawimawh em em mai tih ka ngaihtuah a. He khawvela kan awm chhung hian hna hrang hrang kan thawk a, thil chi hrang hrang kan ti a, kan nitin nun dan hian kan thih hnu awm danah kawngro a su thui em em a, damlaia nun thlahdah tak tan vanram beisei tur a awm lo ang bawkin damlaia Pathian duh zawnga hun hmangte erawh chuan hlimna chuai thei lo chu an chang dawn si a.

Monday, September 29, 2008

Zirna

Zirna han tih teh tawp chu...

17th-23rd Sept thleng seminar neiin kan camp a, a nuamin ka hlawkpui khawp mai a, thenkhat chuan thlarau lama an hlawkpuina tap zawih zawihin an sawi a, kei pawh thlarau lamah hlawkna ka nei teh meuh na chungin tisa lama ka hlawkna ka'n sawi mai mai.

Kar khat chhung teh meuh kan in khung hran avangin leh camp-na hmunah ei an siam vek avangin kar khat chhung mahni-a ei rawng in bawl chawp a ngai lo a, nuam ka ti hle, tlemin ka thau phah mai thei :)

Ka pian ahnu lamah laphiarfung hi ka la chelh lo ti ila ka tisual mai thei, chelh chu ka chelh tawh ngei, mahse laphiar hi zahthlak khawpin ka thiam lo a, kan seminar-ah hian nu-ho zingah ka zir ve a, ka lo thiam ve thei reng a, ka hlawkpui khawp mai. Hei vang hi a nia Zirna ka'n tih teh tawp. Nitin kan nun hi zirna a lo ni e.

Tuesday, September 16, 2008

Wild-Flower

The hills were alive with wildflowers
And I was as wild, even wilder than they
For at least I could run, they just died in the sun
And I refused to just wither in place

Just a wild mountain rose, needing freedom to grow
So I ran fearing not where I'd go
When a flower grows wild, it can always survive
Wildflowers don't care where they grow

Mihring hi kan awmna hmun azira inthlak danglam fo thin kan ni a, hei hian mi nghetlo kan nih zia a tilang chiang hle-in ka hre thin.
Tlang sang leh kham chhengchhe tak tak-ah pawh hian a pangper vel kan en chuan pangpar engemaw hi a lo par vul leh chek thin. Heng pangpar te reuh te te te hi an chhuanawmin an fei ngawt nia. Ka awmna hmun kham bakbahai takah hian ka par peih lo, mi pawn min hmu chuang lo a, ka awmna a hrehawmin tui a vang bawk si ka nung zo lo ang tih lam aiin, ka theih tawp kan chhuah ang e, ti niawm takin fere tak pawhin an par an thulh ngai chuang lo.
Tin, kawngsir, kawngkam mai maia to te pawhin ka awmna hmun hi a hulum angreng sia, miin min rawn pal anga, ka thi leh tho awm sia par lo mai teh ang an ti chuang lo. An theih ang angin kawng sirah chuan a lo par ve chil chel a, mite chu an lo kal a, an rawn rap ta ngei a, a parvul chhung chu a rei lo hle tak mai, mahse a dam chhung khan a theih tawp chu a chhuah tho a ni.
Keini kristian te nun dan tur pawh he ramtuktinpar ang hi a ni-in ka hria, Khawiah pawh awm ila, eng pawh ti ila, kei chu ringtu ka ni a, ka awmna hmun apiangah ka nihna hi mawi taka lanchhuahtir tur ka ni tih hi kan ngaihtuah reng a tul. Ka chhungte, thiante leh hotute'n min hmu-in engmah an hre chuang lo ti-a kan inthlahdah mai chuan chiang taka min hmu rengtu Pathian a awm a ni tih hi hriat reng a pawimawh hle.
Kan awmna apiangah kan tih theih a tlem emaw a tam emaw, miin min hmu emaw hmu lo emaw theih tawpin kan eng hi mi mithmuhah entir zel tur kan ni e.

Friday, September 12, 2008

Lunglen

Mihring tungchho-a kal tawh phawt chuan lunglen chang an nei vek ti ila kan tisual tam pui awm lo e, Kan pianhmang leh khawsakna te, khawsak dante a inan loh avangin kan lunlentu erawh chu a hrang nuaihin a rinawm. Phaizawla awm thang, coconut kung leh tuipui pawl ruih mai hmu reng thin tan chuan khamrang, tlang leh lungpui khawkrawk tak takte chuan an lung a len viau lo ang a, lem an ziah pawhin, tuipui lem, a kama coconut kung ding lai, tuipui piaha ni tla suar suar lem an ziak ang, a chhan chu, chu thil chu an hmuh zin tak, hmun danga an kal chang pawha an mitthla-a cham thin a nih avangin chu chuan an lung a len ta mai a ni.
Mizote lunglenna tlangpui chu Christmas leh engemaw hunpui pawimawh deuh kan hman thinte hian kan lung min len a, tin khamrang leh tlang hringdupte, luite luang dem demte, kham kara pangpar lo vul chiai-te. Lem kan ziah pawhin tlang kara ni chhuak lem kan ziak thin a ni lawm ni kha... chutah luite kha kawi ngiai-in a luang dem dem ngei ang a.
Mihring mizia a inanglo ang bawkin mi lungleng em em mai, thian leh chhungte ngai ngawih ngawih, an tel lova khawsa thei lo hial leh lunglen pawh a hre lo ang tih hialte an awm a, thenkhat ngawi renga lungleng veng veng an awm a, thenkhat chuan an lunglenna te an tilang nasa a, chumi hnem nan chuan hla mawi tak tak, lungkuai tak takte an phuah bawk a, thenkhat leh chuan thu ngaihnawm tak leh lungkuai thei takte an phuahin an ziak bawk a. Chumi hmang chuan anmahni ang bawka lungleng ve, puang chhuak thiam lo-ten inhnem nan an lo hmang ve bawk a. Zaithiamte hlei hlei hi an hlu ngei mai. Lunglen hnemtu tha tak an ni si a
Vankhama chuan
Ami'n suihlunglen an hril chang ni hian
Di zunah chhawl ang hian ka uai an ti
Ka suihlunglen ve chang han dawn ila
Chin lem a nei lo, khawtlang mai lo chuan
Hei hi maw an sawi khawtlang lunglen chu
Lungmawl tuara'n lairil a fan ve e
Khua san sikni sen, vanzawl a lo kai
Pengleng len thiam ten van dung an rawn thual
Fanglawr an liama sumtual lo dai
Hraichawi pipu leng zai sa e daikawma'n
Chun herawt pau, tui lawm arin chhawn e..
Val lunglen chang hnah lo kiu e chhuahtlanga'n
Tukkhum vilik rualten zamual an liam e
Dawng, ralkiu vaiva,
Awmkhua a har em e...
a lo ti a, ani chuan a han hawi vela a lung ti lengtu chu hla-in mawi takin a phuah chhuak nalh mai nia.
Ka thiante leh chhungte pawhin ka lung a leng ti-a ka sawi hi an hre khat khawp ang. Lunglenga kur duam duam chi ka ni lem lo bawk a, ka awmna hmun apiangah hian lunglenhnem tur tawk chu ka hmu ve zel pawh ni fahmiang. Vankhama ang deuh hi ka ni ve thin, ngaih bik nei lo, khawtlang lunglen ka nei a nih hi. Tu zunzamin nge min phuar han ti ila, tu zun mah a ni si lo, mahse lung hi a leng veng veng bawk si chu a nih hi.

Thursday, September 11, 2008

Hmanlai hian thlarawkpa hian khuang a chawi dawn a, mi leh sa a sawm kim hle mai a, ramsa chi hrang hrang pawh an lokal hnem hle, mi tupawh inngeih taka lam ho dial dial tur a ni a ti a. Thingdim turte chuan lam an zir tlut tlut bawk a.

Sakhi leh Sakuh hi an inkaihkuah chawt a, hawh teh keini hi kan inkawp mi awm em lam i'n thai chhin teh ang, an ti a
Khi kuh, khi kuh... e.. a rem lutuk an ti a, an lam a

Tangkawng hian a lo hmu a,ka lo tel ve ang e, a rem em a ti a
E, rem tehlul e, mahse kan lam nan a inrem emaw i'n ti chhin teh ang an ti a
Khi kuh, khi kuh, kuh tang kuh... e a inrem khawp mai an ti a, an lam zel a

Varihaw hian a lo hmu a, ka lo tel ve ang e, a rem em a ti a
E, rem tehlul a, mahse kan lam nen a inrem emaw i en chhin ang u an ti a
Khi kuh, khi kuh, kuh tang kuh Varihaw... an ti a an hlim dar dar hle

Khuangchawi ni chu a lo thleng ta a, thingdim tur ho chu tualah an intlar a, an lam nasa khawp mai a, changpatte, arekpachal te chu an lam su pherh hlawih hlawih mai a, nakinah chuan Zuhrei hian pangpar a beh a, a rawn lam thle nghel nghel mai a,
Mite chuan, Zuhreiin pangpar beh e,mawina nei e, thatna nei e,thle nghel nghel an ti a

Buipui hian a lo hmu a, zuhrei mah mawi an tih chuan mawi min ti ve tho ang a ti a, pangpar behin a va lam ve a
Mite chuan Buipuiin pangpar beh e, mawina nei lo, thatna nei lo, su bui bui an ti ta daih a

Buipui thinrim chuan khuang a chuh lawk a, a kua-ah a luhpui ta daih mai a. An ko vak vak a, a chhuak duh si lo a, hawh u tui i birh ang u an ti a, tui an birh ta tlut tlut mai a,Buipui chuan khuang chu a rawn vawrhchhuak a, Hawh awi u, in khuang hi, a bal pawh ka liak lo e, a ti a. A kaw kotlangah chuan arpa hi a lo ding a, a khupah a vawm fuh a, tun thlengin arpa khup hi hnung lamah a awm phah e an ti.

Tichuan, khuang an nei leh ta bawk a,an lam leh ta tluk tluk a, Sahuai hian khuang a vua a, a tui bawk a, nuam a ti khawp mai a, arekpachalte, changpat lamte chu hmuhnawm a ti hle mai a. nakinah chuan Ni hian chutia hlim taka an lam chu hmuh ve a chak a, lo chhuah a tum a, sahuai chuan i lo chhuah chuan changpatte, arekpachalte an khawro zo ang a ti a, a chhipah a nem tang tang a, mahse Ni chu a insum zo lo a, a rawn chhuak ta phut mai a, changpatte chu an thi zo ta, arekpachalte chu an khawro zo ta vek mai a. Sahuai thinrim chuan Ni hnenah chuan Tun chinah chuan ka hmu tui tawh lo ang che a ti a, ni chu a en duh ta lo a, tun thleng hian Sahuai hian ni hi a en duh lo a, a kun tlat zel a, en tir luih tuma kawih vanvadak pawn a maimitchhing tlat zel an ti.

Tichuan, ruai an theh ta a, zu leh sa a tam bawk a, nuam an ti hle mai a, chhimbuk hian dawhna hmun a chang ve lo a, kil khatah hian a lo thu ngui lup mai a, chu chu zute sa kham pheng chuan kan tlai vek ang chu maw tiin E, Buka sa kham ler lur chu a ti a, ani thinrim chuan a um ta hrep mai a.

(A thui dawn e mai, remchang dangah chhunzawm leh ang....)





Wednesday, September 10, 2008

Hmasa ber

A tirin Pathianin lei leh Van a siam a
Lei chu a chhia a, a ruak ngawt a ni a
Tichuan, Pathianin Eng lo awm rawh se a ti a
Eng chu a lo awm ta mai a

Followers