Buaibuti

2007 kum tawp lam khan office hna tulah Kolkata kal a ngai hlauh mai a, hlauh taka, Christmas hnai tawh bawk a, chakkhai lam pah rem fu ang tiin phur takin ka insiam vei surh surh a, thiante leh chhungkhat te pawhin chutia a hun tak maia phai kal tur chu mamawh min chah nasa nangiang, thil chahte chu ka note bu te-ah chuan ka list vei thlap a.Tluang takin ka tum ram pawh ka thleng a, note bu-a ka ziah lohte pawh phone hmangin thil hawn tur min la rawn chah lawp lawp hlawm bawk a, ni danga khawih pawh ka la khawih ngai loh Tennis racquet thlengin min rawn chah a, keimah rau rauah chuan ka luck ve lai tak niin ka hria a, inti fel em emin ka rawn hawn ang tiin ka promise liam puat puat hlawm a.

Pathian tha takin min awmpui a, ka kal chhan ber ka hna chu Kolkata-a thiante zarah ka thlen tuk chuan ka zo fel ta mai a, zawh hman loh hlau-in return ticket lah chu ni hnih hnu-ah ka OK daih si, bazarna hun thawl duhthusam ka nei thei ta.

Tichuan, tih tur ber zo tawh bawk a, kawlpui ka kheng thla e, ti ang maiin bazar lamah chuan chakkhai chi hrang hrang lam turin ka phek chhuak ta a, kalna tur leh lei tur ka ngah em avangin thiante pawh ka hruai duh lo a, an nin palh takin tih thu-ah keimahin ka'n ar kawh chhuah ve tawp mai a ni.

A hmasa berin ka u pakhatin trolley suitcase min chah kha tiin new market lam ka'n hma phawt a, suitcase tha tak hnuh kal theih chu tlawm takin ka'n lei ta pang mai a, mahse ka tisual chiang hle mai, a lian si, pawm bo mai mai theih ni tawh hek lo, ka hnuk ka hnuk ta mai a, thil dang pawh ka lei belh zel a, new market-ah chuan ka suitcase chu ka hnuk ri ta rum rum reng mai a, vai ho chuan min en zui vawng vawng zel bawk a....

Duh tawka new market lam ka riam hnu chuan ka pawisa ken sa chuan daih ngaihna awm hek lo, inti changkang leh inti fimkhur-in pawisa fai keng tam duh lo-in ka account-ah mi pawisa min thawn vete chu ka dah vek si. ATM lam pan a ngai ta. Bag leh pheikhawkte ka lei duh bawk a, BK Market bul lawkah ka hman than em em ATM chu a awm kha tiin BK lam chu ka pan ta vang vang a, mahse aw, ngai teh, BK market bula ka ATM hriat chu a lo chhe hlauh mai, pawi thei ve... khawnge SBI ATM dang ka hriatna ka'n ngaihtuah chiam chiam a, tichuan taxi la-in ka zawng ta ngat ngat mai a, taxi driver pawhin min buaipui na-rawh e, hmun pakhat-ah chuan ka hmu ta hlauh mai, taxi atang chuan ka chhuk sawk sawk, ruah a sur suap suap zui, taxi driver pawh chuan ka tlanbo mai a hlau teh chek nge, ka buai lutuk a hlau zawk min rawn um ve dawr dawr zel a, ATM chu lo tha hlauh mai, ka duh ang pawisa ka la chhuak thei ta bawk a, ka thaw huai mai, mahse khua a lo tlai tawh em em, lei tur ka la ngah si. Market lam chu ka pan leh ta nal nal a.

Duhthusama bazar ka zawh fel chuan tlai lam dar 7 a ri der tawh, ka thlenin te chuan kei, mahni-a chhuak ta ringawt, dar 7 pawha la haw lo chu min ngaihtuah nasa mai a lo ni, min rawn phone ta chul a, khawnge I la awm em em, rawn haw vat rawh min ti. Kei lah ngaihtha em em in ka lo la bazar veng veng si a, e, ka lo haw dawn e tiin thlamuang takin kan inthlah ta a.

In ka thlen chuan buaina dang a chhuak leh ta. Ka thil lei zawh zai chu khawiah nge ka vawmbo zawh tak ang le.... suitcase lian tak 2 chu ka nei ngei a, ka thleninpa lah chuan a U-te signboard tur Puana siam poster lian pui, ka Dung chen lai tur chu min thawn a lo tum ve chhen a, hawnsak loh ka hreh bawk si. Ka thil lei vel chu ka'n pack ta tak tak a, ka cabin baggage takngial pawh chu zahthlak khawpa rit hi a ni a. Engemaw ti ti-in ka inbeng zo thei ta hram a, khawi lai mai pawh chu a khat tha em em vek mai a ni.

Tichuan, ka haw tur ni chu kawl-ah a lo chhuak ta, thiante leh chhungkhat laina-te thil tur ka hawn hnem bawk a, phur em em-in bungraw tam tak nen Bapui tuai loh ang tuamin ka thleninte nen chuan kan invai liam ta a. Airport-ah erawh rin aiin buaina ka tawk ta lo hlauh, theih tawpa cabin baggage-ah thil rit chi hlir ka beng avangin ka luggage chu kg 5 chiahin a excess a, min chawitir lo hlauh mai. Hlim em emin, tluang takin Aizawl lam pan chuan thlawk chho ve leh ta nal nal a.

Tin, ngai teh, Lengpui airport tluang taka ka thlen chuan kan thawnthu chu a tawp mai tura ka ngaih laiin a lo ni hauh lo, Arrival-a bungrua kan chang chu ka suitcase pakhat lo thleng ka chawi thla ka bula ka hung, a dang ena khaw dang ka hawisawn hlanin miin an lo la daih mai, ka buaizia leh mangan zia chu sawiin a siaklo, sawi loh pawn a siak chuang lo. Ka bula mi pakhat chu ka suitcase a hmuh leh hmuh loh ka zawt, mipa naupang pakhatin a lak kha, a chhuak tawh a ti ta mai.... duty ho ka ko, ka suitcase 1 mi-in an la ka ti, security an ko, air office ka lut, awm an awm mumal lo, ka chhuak leh, uite vawihkhum ang maiin ka vei tuak sek tawh mai, pawnah khi...tah parking vel-ah mi haw tur kan han enkual, kan hmu silo, ka bungraw dang ka la la bawk si lo, kha hun kher kha chu zawng mang chhe mang ang maiin ka talbuai. Min hmuaktu lah chu ka be lum lam hman lo, enge thil thleng tih hre mailo khan ka kalna apiangah min rawn um tak lawp lawp a...

Airport authority lam-a thianpa Vala ka phone ta ringawt, ani lah thlawhna bulah a lo la awm a, tikhan lo awm reng rawh, ka lo kal ang a ti a, a rawn tlan phei, chanchin ka'n sawi vel a, I suitcase chu I tag nen I enmil em? I ta ngei a ni maw? a ti, ka chiang ta hauh lo, ka lo enmil hauh lo mai a, I ta a ni lo mai thei asin a ti. Bungraw off-load a lo tam em em mai niin, report-ah hian ziak ve phawt mai la, naktuk lamah a lo thleng em tih ka lo ensak ang che, tunah chuan tih theih engmah a awm chuang lo a, haw phawt rawh a ti a, rilru bet lo zetin ka haw ta hnak hnak a.

In ka thleng pawh chu sai sawm kap ang maia luh tum kha, a thla tliak ang hna hna-in ka lut ta a, ka thil bo dan ka'n sawi suam suam a, naupang ho thil hawn nghak ho pawh an lo awm kim thap a, hrilh a hai duh ngei mai. Ka nu chuan, “In zin zing ve tawh a, harsatna leh thil bo pawh in sawi ngai lo a, mi chan in hriat ve na a nih chu, tawngtai ila, I hmu leh mai ang” tiin awlsam te-in min hnem a, rilru chu hahdam deuh huai a. Kolkatta lam thiante pawh phone-in ka zu hrilh, min mangan pui hle,kan lo tawngtaipui ang che an ti.

A tukah chuan Omega travels-ah bungrua a rawn thleng em? Mahni bungrua lo la palh rawn dah an awm em? tiin ka kal deuh chhen, anni pawn an ning viau mai thei. Mahse tha takin min chhang a, I la hmu mai ang an ti, an buangrua lo an la a nih chuan rawn dah mai awm tak a nih laia chu chen chen thawm ka hre lo chu thenkhatin min manganpui a, passenger list dil rawh an ti. khami ni-a thlawhna chuang ho list ka dil, min pe ve mai bawk, detective story te pawh a ang tan ta riau mai, airport-a lo hmutu khan mipa naupang a tih avangin hmeichhe ho chu chhui a ngai lo phawt, chutah mipa-ah pawh puitling chu kan paih leh thei, mipa naupang chuang chu an lo tam lo hle mai, kan sawr zim sawt viau e. Mipa naupangte chu a kalpuitute nen an hming ka la a, an phone number nen, hemite hi phone a, an bungrua ni lo an hawn em? tih zawh chauh chu hmabak a ni ta.

Mahse a la awm tlat, khami te khan tum rengin thurualpui neiin lo la ta se, kan bungrua ni lo kan hawn lo, lo ti ta tlat se, kei hian phone ringawt ila, min chhang tha duh dawn em ni?

Chutia hawina lam ber tur hre lo-a ka inngaihtuah buai lai chuan chung lam chhanna chu airport lama thianpa Vala atang daihin a rawn ri ta a, I bungrua a vaiin kan hmu a rawn ti. Halleluiah.............. Aw Lalpa thatzia hi tih a ni ringawt mai.

Ka bungrua kha a vaiin an lo off-load vek a lo ni, ka suitcase emaw ti-a ka lak ngawt kha ka ta a lo ni reng reng lo, keima thiam loh vek alo ni, thianpa Vala'n I tag nen I enmil em a tih chiah kha, lo enmil ila chuan ka ta a ni lo tih kha ka hre ngei dawn si a.. aw,... kan mipa naupangte kha ka lo phone hman ang tih a va hlauhawm tak em... Vala chuan Lengpui atangin tlaiah a rawn phur haw leh ta zel a, mite hi chu an va fel zozai tak em tihte ka ngaihtuah a, Pathianin kan tawngtaina a chhang a nih hi tiin ka NU erawh a lo lawm em em thung a, Kolkatta-a ka thiannu thung chuan Ka rinna a la chak tha a nih hi tiin Pathian a lo fak thung a.

Cohabitation leh Sex

Kan mizo pi pute khan thih hnu hun hi an lo thlir thui ve viau aniang, Mithi thlarau kalna tur kha hmun hnihah an then ve thlap a, Mitthi khua leh Pialral tiin. Mitthi khua chu mitthi zawng zawngte kalna tur leh Pialral chu mi chungchuang, Khuangchawite, pasalthate kalna tur niin an ngai.

Tlangval, nula ngai lo chu mitthi khaw kawtchhuahah Pu Pawlan sairawkherh lianpuiin a lo sai thin a, nula, tlangval ngai pawh a lo sai tho thin an ti. Hei vang hian Tlangval chuan Nula ngaih ngei a tum laiin Hmeichhia erawh chu a in veng hram hram thin. Hlate pawh an lo phuah hial ni awm a ni…

“Di neilo Pawlan a sai an ti
Fam mah ila min sai bil tawh hlei lawng e
Ka nemrang puan tial Ka Di zawnna” tiin.

He ngaihdan vang hi ni maw ka hre law, mipa-te hian hmeichhe ngai thei nih hi intihtheih nan an hmang fo mai, tun thleng hian a la ni em maw ni chu aw tih turin thil a thleng leh thin.

Mizote Kristian kan nih hnu-ah thil a danglam nasa viau a, Pialral leh Mitthi khua chu Vanram leh Hremhmunin a thlakthleng tawh a, kan pi pu-te sakhaw lama an ngaihdan tam tak kha Kristian kan nih hnu hian thlak a ni tawh. Nimahsela, a chunga ka han sawi Sex chungchanga kan ngaihdan thlak hi harsa kan tih ber leh Ringtute min ti thuanawptu vawiin thleng hian a la ni ti ila kan sawisualin ka ring lo.

Tin, “Hmeichhe finin tuikhur ral a kai lo..” an lo ti fo bawk, tunlaia Hmeichhiate, Thiamna leh Finna lama kan san tawh zia ngaihtuah chuan he thu hi chu sawi chhuah ziah tlak loh a ni tawh hial. Nimahsela, hmeichhiate hian atna riau hi kan la nei tlat mai ni awm a ni. Chuvangin mak tak maia bumthlukin kan awm leh mai thin a lo ni, hemi kawnga min veng thei chu kawng khat chiah a awm.

Pathian thu zawm aiin mahni thu-a kal mai hi kan tum fo thin. He thlemna hi fing tak maiin a thawk a, kawng tam takah chuan a dan ve tur reng ni-a ngaih mai pawh awl zawk khawpin leh thil pangai ni maia ngaihna a awm fo thin. Television kan en a, Magazine hrang hrang kan chhiar a, Nupa ni si lo-a hlim taka khawsa dun, Pathian duhzawng leh A thu kalh tlat si kan hmu fo thin, hei hian zawi zawiin khawvel mite nun dan nena min siamrem tirin, he thil hi Pathian mithmuhin a dik lo a ni tih ngaihtuahna kan nei tlem tial tial thin a lo ni.

I Korinth 6:12 –ah khan Tirhkoh Paula chuan. “Thil engkim tih ka tan a thiang a, nimahsela thil engkim tih a tha kher lo; thil engkim tih ka tan a thiang a, nimahsela eng bawihah mah ka inphal lo ….”a ti a. Kan nundan tam tak hi khawvel Danah chuan thiam loh chan phahna a tling lem lo pawh a ni thei e, nimahsela, Chungnungbera hmaihma-ah hian ka tlinpui zo angem tih kan ngaihtuah a ngai hle.

Mi thenkhat chuan, mipat hmeichhiatna (Sex) kan hman loh phawt chuan Chendun hian sum leh pai, tha leh zung leh hun hlu tak kan save a ni tiin an inthiam chawp ani mai thei, dikna chen pawh a awm ngeiin ka ring, amaherawhchu, Pathian thlir dan hi a pawimawh ber chu a ni tlat si a, Bible chuan Diabola dodal rawh u tiin min hrilh a, han chendun ngat chuan thianghlim taka nun dun tum ni mah se sual tihna kawng chu zau takin an hawng huau tihna a ni.

Hei bakah hian ngaihdan dik lo tak pakhat awm leh chu Kan innei dawn tho a, kan inhual vek tawh a sex hman hi a pawina a awm lo tih hi mi tam tak ngaih dan a ni bawk . Ka awmna hmun (Mozambique)-ah hian hei hi thalai tam takte ngaihdan a ni. Bible zirtirna-ah chuan Inneih hma-a inngaih chu thil dik lo a ni tih a ni. He thu-ah hian Pathian hian a ngaihdan hi a thlak dawn lo a, Mihringten he thu hi kan ngaih pawimawh loh avang maiin engtikawng mahin a thu hi a sut dawn nahek lo.

Nupui pasal neih hma-a sex hman reng reng chu Hmangaihna zauthau mai a ni, hei hian mi tam tak chu mi famkim nena Nun famkim chen turin ngaihtuahna a siam sak a, nimahsela hei hian a daih rei lo hle, an nihna tak tak an han inhmuh meuh chuan mi famkim lo, tlin lohna tam tak nei an lo ni ve tho thin si a, inlaichinna ziktluak chuan Pathian atanga chhuak Hmangaihna nena inbiakpawhtawnna leh inpekna tak tak a keng tel a ni.

Pathian hian kan thinlung ruak hnawhkhat tura mi dang zawnga van ruai turin min duh lo a, he kan thinlung chhungril ber ruak huai nia kan ngaih, hmangaih leh duh tak, kan thinlung hmunruak luahkhat tura kan zawn ruai lai hian Amah Pathian chauh hi he thinlung ruak hnawhkhat theitu chu a ni. Midang tumah rengin an thei lo, dik tak chuan midang tan phurrit kan siam mai zawk a ni.

Mi tu emaw I hmangaih tak zet a nih chuan, sex hmanpui mai emaw, chendunpui mai ai chuan chu hmangaihna tak tak chu ti thangliana, nupa in nih ngei theih nana tan I lak leh I nghah hram hram kha a pawimawh zawk. Tin, Hmangaihna hi thutlukna pawimawh tak mai a ni tih kan hriat reng a ngai, hmangaihna kawnga thutlukna kan siam dawn anih chuan Pathian duhdana engkim kan tih hi kawng tha ber chu a ni tih hi kan vawn reng a tul tak meuh a ni.

Nghilh loh Zuapa

17 March 1993, tlailam dar 5 vel a ni a, chaw kan ei tawh na-a khua a la thim lo deuh. Matric exam lai kan nih avangin ka U nen chuan khumah bawhzal mai mai pahin lehkha kan chhiar a, ni hnih kan exam tawh a, Mizo leh English, a tuk chu Physics kan exam ni tur a ni.

Chutia lehkha kan zir mawlh mawlh lai chuan Officer pathum hi an rawn lut hlawl mai a, ni danga rawn chuangkai ngai lemlo an nih avangin kan lo chiauau vat a, eng eng emaw an sawi luam hnu chuan an rawn kal chhan tak chu an sawi ta a. “I pa a bial fang haw lam Scooter-in an accident a, a na hle mai a..” an ti a, Damdawiinah an hruai ang a, biak theih lohin a awm ni turah ka dah nghal mai a. nimahsela an sawi tlang ta law law a, “An tlukna hmunah a thi nghal a ni” tih an sawi chu ka mang hriat riau ruai chauh a ni tawh.

Ka pa kha khatih lai khan Divisional Officer-in Midland Division-ah a awm a, bial fangin Sesawng leh CTI lamah an kal a, a haw lam chu Thingsulthliah-ah te chawl phei zelin Chhingchhip daiah an accident ta a lo ni. Zah pawh dawn lo-in kan tap nghal rawih rawih a, chutia thawklehkhata tap thawm awm ta chu thenawm khawveng an lo lut nghal vat a, kar lo-ah mipui chu an rawn awm ta sup sup mai a, thiante ho pawh an lokal a, keini unau chu tumah chiauau thei dinhmunah pawh ding loin kan tap reng ringawt a. Tichuan, a zan azana Aizawl pan tur chuan kan inbuatsaih a..

Tu te emaw hian Motor an lo buatsaih a, Ka Nutei ho-in Major N Thanga nen kan unau chuan zan Dar 9 velah Aizawl lam panin kan chho ta a ni.

Ka Pa ruang pawh chu an awmna Serchhip, Chhiahtlangah an phur phei a, chuta tang chuan YMA ho chuan "Khawiah nge a ruang hi dah I duh, I duhna hmun hmunah kan dahsak ang che" tiin ka nu chu an hrilh a. Ka Nu tan pawh thutlukna siam a har ngawt mai.
Aizawl Chaltlangah Kan pu-te an awm a, Chaltlanga a lu nghah mai ka duh e a ti a, tichuan a zana zan bawk chuan an rawn phur thla ta a. Keini Kolasib atangin kan chho a, anni Chhiahtlang atangin an rawn chhuk bawk a ni.

Chaltlang chu zanlai-ah kan thleng a, Ka pu-te inah chuan YMA an lo thu khat hmur mai a, ruang nghak mai an ni na-a an lo zai thup thup mai a, tu emawni hian An fate Kolasib atangin an lo thleng tih hi a sawi lawng lawng a, tichuan Ka Pa chu a lo la thleng ve lo bawk a, inhnuai lamah chawl hahdam turin min hruai thla a, Mu chawl ula, an lo thlenah kan kaitho dawn che u nia an ti a. Kan mu ta a, mahse ka muhil lo.

Inchungah chuan YMA chu an zai thup thup a, Sual thimah hian kan vakvai rei tawh lo ang tih leh Hla taka khaw dur leh ruahpui sur tih chu an hla sak ka la hriat reng ani, an zai thiam em em mai. Mu meng kar chung chuan ka ngaithla reng a, ka nu-te lah chu kalkawnga khaw tin deuhthaw chu an bialte an ni a, an lo hmuah hlawm avangin an lo thleng har em em mai. Zing lam dar 4 velah chuan an rawn thleng ta a, Ka pa ruang dai tawh chu kuang atang chuan an phawrh a, ka lung hi a awi mawlh lo. kan tap chel chul a, sawi tur a vang kher mai, ka nu ngei pawh chuan “Mate.,Ka hrilh ngam lo che u a, an lo hrilh tho che u a ni maw?” te a ti mai mai.

Dar 6am velah chuan Kolasib lamah exam turin min hruai thla leh ta a, exam chhunzawm chu kan duh lo a, kei phei chu ka kal dawn lo ka ti a, ka tang nasain ka tap nasa hle. Nimahsela, Pa pakhat (tun thlengin tu nge tih ka hre lo) hian, “Tunah exam lo ringawt ula in tan awmzia a awm lo e, hetah awm pawh ni ula i pa hi in kokir thei dawn chuang lo a, zu exam phawt mai rawh u, tlaiah in lo chho leh dawn nia” a ti a. Duhthlan tur dang awm chuang hek lo le, kan kal ta poh a.

Kolasib kan thlen leh chuan a tlai tawh hle, chaw pawh ei lo-in kan insiam sawk sawk a, exam tur chuan kan chhuak leh nghal a, darkar chanve zetin kan tlai na-a exam buaipuitute chuan min hrethiam takin luh min phalsak a, ka motor rui nen, tap nasa lu na nen, mu tha lo nen, ka luak chhuak chuan chhuah ka dil a, ka chhuak chu Brother Jose (Khatih laia St Johns H/S Headmaster) chuan min zui chhuakin a office-ah min hruai a, damdawi a laktir a, chu bakah ka paper leh ka thil zawng zawng chu a han lakthlaktir a, exam hall-ah pawh lut tawh loin a office-ah chuan min chhunzawm tir a, a fel ka va ti tak em ve aw.

Ka zo ka chhuah chuan thiante chuan an lo zo vek tawh a, pawnah chuan an lo ding vek a, ka zak ngawt mai, zah hleih theih ni bawk si lo. Sawi tur hre lo hian an lo ding ngawi nghiai hlawm a, kei pawn sawi tur ka hre lo, ka kal phei a, an bul ka thleng a, ka kal leh ta ringawt a, anni pawh chuan min zui ta vek a, tichuan kan kal ta zel a, Venglai peng kan thlen chuan min hruaitu motor nen kan intawk ta a, thiante nen chuan kan inthen ta a ni. Min lainat taka min zuitute kha vawiin thleng hian mitthla-ah an cham reng thin.

Diakkawnah Major Thanhranga te in-a chaw kan ei zawh chuan Aizawl lam kan pan leh ta a, tlai lam dar 3 velah Durtlang road, Bawngkawn kan thleng a, chiang em emin Chaltlang thlanmual chu a lang thei a, ka Pa chu an lo vui mek a, kan ding a, Bawngkawn atang chuan ka pa an vui lai chu kan lo thlir liam ta ringawt a.

Ka Pa kha mi hlim thei, kawm nuam, rualpawl thiam tak mai a ni thin, a zaidam a, awka vin a hmang khat hle. A thawhpui leh thiante chanchin a tha lo zawngin a sawi ngai lo. Keini ho hi ka nu ho hian rawl ring tak vek kan ni a, kan hmeichhe rual deuh bawk nen, han inbakkaih hluk hluk chang kan nei thin, chung hunah pawh chuan, “Vin vak vak te, ring tak taka tawng thinte hi a mawi lo ania, sim rawh u” tiin a sawi fo. Min dampui reng tura ka duh vei nen khan aw....

Pathian thu sawi a thiam hle, ka ngaithla kham thin lo, Pathian hmangaihna a hre chiangin Amahah a innghat hneh hle niin ka hria. Vawi khat chu naupangte ka nih laiin mi hla sak pakhat ka hre sual a, ka sa ve a, “Chhandam ka ni tiin uang mai suh..” tih hian ka sa lauh lauh a (Muang mai suh… tih tur a ni a..) Ka pa chuan rang lutukin, “Chutiang hla duk dak lo tak a nih chu, Chhandam kan nihte chu uanpui tur kan ni zawk alawm, sak fo chi pawh a nih loh chu…” a ti a, a hla thu chu a hnu-ah a dik ka hre leh chauh.

“Pathian hmangaihtu amaha ruat anga a kohvate tan chuan, an thatna turin engkimin a thawhsak hlawm thin tih kan hria” (Rom 8:28) tih thu hi lusun chhungte leh manganna, vanduaina tawkte kan hnemna thu a ni fo thin, nimahsela a tuartu dinhmuna han din chuan he thu hian min thlamuan zo lo fo.

He vanduaina kan tawh lai ngei pawha ka rilru-a awm chu he thu hi a ni, Mahse kan thatna tur a nih ngaihna ka hre lo.

Tihian ka ngaihtuah ta a, Engkim kan tawh apiang atang hian Pathian chuan kan tana tha turin rem a ruat zawk thin tih hi. Ka Pa thih kha kan thatna tura a remruat a ni ngawt lo a, nimahsela kha thihna kawrruam, lungngaihna kan tawh mek lai khan kan tana tha tur kawng min lo ruatsak zawk a lo ni.

Ka lungngaih mittui tla mah se
Ka tan a tuar na zawk
Ka pumin ka inpe ange
Chu chauh chu ka theih tawk

(vawiin hi ka pa Major Thangseia thih champha a ni a, awmna hmun a hla bawk nen, apualin tun tum chu ka han ziak a ni...)

Ka chesual palh hlauh... !!!!

Kan Pi Pu-te khan "Tuithiam chu tuiah an chesual a, thing thiam chu thingah bawk an chesual nge nge" an lo ti thin a, Hmeichhia erawh an chetsualna hi hmun rualrem leh Khumlaizawl te a ni duh riau.

Mahni chanchin kan sawi hnem poh leh keini ang mi tlawktlaw hi chu kan intimualpho mai ting chu a ni a, 'marawhchu lenna kar a hla em a, rualduhten ka chetsual thu tlangkamah in lo hre bawk nen, a chipchiarin helai hmun, duh duh ka sawi theihna-ah hian ka han tlangaupui law law ang e...

6th March 2009 kha Khawvel Pum Hmeichhiate tawngtaina Ni a ni tih thenkhat chuan kan hre awm e, kha Ni kha helaiah pawh Kohhran hrang hrangte inzawmkhawmin kan Biakinah tawngtai turin kan inbuatsaih a, office atangin thiante nen kan haw a, Biakin chu ka In bul mai a nih avangin "I inah Lunch siam ang u" an ti a, kei pawh ka phur vei surh surh viau.

Chutia kan buai chuk chuk lai chuan eng eng emaw lak tumin Fridge (Refrigerator) ka va hawng chu Coke bur lian bottle hi a rawn lum chhuak, chhuatah chuan a puak keh chhuai mai a, chhar tuma ka kut ka lek lai tak mai leh a puak chu a inrual a ni chek a niang chu ka kut dinglam zungu ah tak mai chuan a rawn per ta, a hik chuai hian ka hria a, thi chu a per nghal chhuai mai a, bangah nen, chhuatah nen ka kawr awmah nen coke bua nen chuan kan inchiahpiah ta nuai mai.

Thiante an rawn tlankhawm a, Damdawiin kan pan nghal. Kan veng damdawiin kan kal, thawktute lunch eiin an lo chhuak bo vek, hmun dang kan pan leh, thin hi a rim deuh tun mai. Aizawl angin Emergency roomah min hruai lut ang a, an thui chuk chuk mai turah ka ngai deuh a, a lo ni teuh lo, counter-ah chuan lehkha kan la te te a, ka hming min zawt kha chu ka hrethiam, ka Nu hming min han zawt leh kher a.. Engemaw chen kan han vahvaih kual hnu chuan min hruai lut ve ta hram a. Ka kalpui ber Beira lah chuan Motor park turin min chhuahsan leh daih a, min enkawltupa chuan kahhikna pawh hmang ta lem lo chuan Painkiller a spray thuak thuak a, a han thui ta reuh ale... a na ta khawp mai a, ka au chhuah loh nan ka kut na lo lam chuan ka ka ka hup a....!!!! vawi khat a vih khan painkiller hnathawh kha chu a zo vek tawh, vawi thum lai a thui ta mai a, vawi li a la tum cheu a, i ti leh dawn alaw, a ngai tawh a mi, thuina hmun tur pawh a awm tawh loh hi te ka lo ti vel a, a nih leh aw, ngai lo i tih chuan thui lo mai ang chu a ti sam ve leh et a. Beira tal kha chu rawn lut leh se thla a muang deuh tur hi a ni na ale.. rawn lut tange ti ta lo chuan pawnah min lo nghak veng veng a...

Dik tak chuan hetiang taka inhliam hi Pathian zarah ka nei khat khawp mai a, ka taksa-ah hian pem tenau deuhte chu nei ve nin nian thin mah ila, thui ngai ema hliam chu ka vawikhat neihna a ni a, chhungte hmuh phak loha hliampui kan tuar rup mai hi chu a manganthlak thin khawp mai. Mahse le, Pathian zarah mite hi an tha a, helai mihang ram rehah pawh hian min lainattu leh khawngaihtu hi min pe zel a, chhungkhat lainate hmu phak lo mah ila ka awmna hmun apiangah hian min thlahthlam lo ani tih leh min enkawl reng a ni tih hi a takin ka dawng leh a, lawmawm ka ti hle. Ka kut hliam chu ka lawm lo. Mahse zana ka han tawngtai chu mak tak mai hian ka kut damna tur dil ta lo chuan lawmthu ka sawi zawk ta hlauh a, kha bur keh them khan ka kutah mai per lo-in ka mit-te per ta se, a force kha a na ropui si a, ka mit te chu a del phah thei ani tihte ka ngaihtuah a, vannei tak chu ka niin ka inhre leh ang lawi a.

He ka thil tawnin a kaihhnawih thu lawmawm thenkhat chu:

THISUK ka nei lo a ni tih ka hmuchhuak, nei ila chu ka thidang chiang ngawt ang.

Kan hotute'n i frigde a te lutuk a nih hi an ti a, frigde thar lian tawk kan lei phah hlauh.

Thenawmten min insuksak vek

Rawng min bawlsak turin an rawn kal loh leh rawng bawlsa min rawn pe thin :)

Theihai buk hnuaiah

Theihai buk hnuaiah han tih takah chuan Zikpuii Pa lehkhabu ziah 'Kraws bulah chuan' tih kha rilru-ah a rawn lang zawk mai.

Malsawma'n a tleirawl ngaihzawng, nupui atana neih a duh em em Thanchhingi chu nu leh pa-te avangin a nei thei lo.. nupui fanau neih duah hnu-ah a tleirawl ngaihzawng nen an han intawng leh chu an tan khawvel a par leh a, thla eng-te pawhin awmzia a nei leh a.. Damdawiin kawta mi ri nuai nuai karah pawh Thanchhingi aw dar ri chher chhiai chu a hai ngai lo a, Theihai Buk hnuaiah te chuan an thu XXX tuar tuar ta mai..

Nimahsela, he thawnthu ngawihnawm tak hi ka sawi tum a ni law...

Nunna thing daihlim hnuaiah chuan
Min chawlhtir ve rawh aw, Lalpa

ti-a zai thin Mizo-te hi thinghlim hnuaiah chuan Inkhawm ngai tak tak ta se engtin nge kan tih hlawm ang le…????

Hmanni khan Thingtlang khaw pakhat Matola-ah ka thiannu nen kan inkhawm a, a lungchhiatthlak zawnga ngaihtuah chuan lungchhiatthlak tak mai hi a ni a, an inpekna lam ngaihtuah chuan kan tluk lo hle-in ka hre lawi si.

Biakin an neih loh avangin ni sa lutuk laka him nan naupang tezualte chu zing dar 7:30-ah Sundle School an lo neihpui a, dar 9 vela kan va thlen chuan an inkhawm chu an lo tui tawh hle. Kan han thut thlandaih hnu-ah chuan Inkhawm chu kan zawm ve ta nghal mai a, midang inkhawm tura lokal pawh chuan min rawn zawm ve nghal zel bawk a, naupang ho SS an zawh chuan puitling inkhawm chu kan tan chho ve zat a.

(Naupang-in S.S. an kai hmasa a...)

Theihai buk hnuai daihlimah chuan Inkhawm chu kan han tan ta phawt a, kan bei tui chho tan dawn viau tihah chuan ni chu a rawn sa tan ta tlat mai, thutna chu an her kual a, daihlim lamah chuan kan insawn phei ta dial a.. keini pawh kan hawi zawng chu kan thlak ve nghal a…

Hetiang hian thingbuk hlim lam apiang belin kan inkhawm chhung chuan vawi li emaw zet chu kan inher kual a, nuih chu a za duh angreng, anni erawh chuan an lo tihthan tawh avangin an nui lem lo a, a hlim lam lam chu an pan mai a ni.

(Puitling ho an inkhawm ve meuh chuan hawi zawng a danglam vek tawh a..)

Mihang ho hi an tih tawh lam chu ti ve vak mai chi an ni a, an han lamte reng reng hi an bei nasa thei khawp a, hetia pawna thinghlim-a inkhawm mai mah ni se, kan han zai chu hlim tak mai hi kan ni, an lam nghawng nghawng tho mai.

He hmunah hian puitling hming ziak chu 30 kan ni an ti a, hemi ni hian mi 26 an inkhawm a, 86% lai chu an inkhawm tihna ania, an tha thuai thuai khawp mai.

Keini ramah ni ta se, tihian thinghlim hnuaia inkhawm ngai ta se kan peih ang em aw, ka ti a, Biakin lian leh nalh tak tak kan neih ngir khup lai hian a chhunga inkhawm erawh chu a member ngaihtuah chuan archilzat emaw lek kan ni leh thin si tihte ka ngaihtuah a. Kan Mizorama mi thilphal leh nei deuh ten he hmun hi rawn hre fuh se, an Biakin sakna tur hi rawn pe thei hlauh se an va'n lawm dawn em aww..... tih ngaihtuah rauh rauh chungin ka haw ta hne hne a..