Monday, September 26, 2011

Ti leh tawh ang e..

Mahni blog-ah pawh Ar khual ang deuhin ka ti leh dek tawh mai, aizawl thlen meuh chu thil a danglam lutuk a, blog lam pawh ngaihven a har talh talh hle mai. Tun atang chuan regular deuha update leh zel theih ka in beisei.


26th July-ah Mozambique ka chhuahsan a, chawlh hmangin London ka teihawi kual nghal a, Londona ka thleninte an fel lutuk a, min duat bawk sia, cham hlen mai pawh ka chak rum rum laiin haw ngei a ngai leh bawk si, ni 12 Aug-ah chuan Heathrow airport atangin India ram ka pan leh ta vung vung a, mahni ram han thlawh luh chu a dan a dang zar zar khawp mai.


Aizawl ka han thleng chu Nu leh Pate khua chu nuam singkhaw kan ti a, ka leng ta ziai ziai mai a, blog lam reng ka hrechang dawn lo a nih hi.


15th September ah hna ka tan ve leh ta a, rin ai takin a lo buai leh theih a, chawlh a zo a, mawng vawm ba ang seka phet a ngai leh ta.

Tuesday, July 12, 2011

Ruih theih chi hrang hrangte

Poli-tricks nge Po-lie-tics nge Politics tih pawh kan ngaihtuah ngai lem lo, naupan laia MLA inthlanpui awm dawn apianga political party hrang hrang inauhkhum thin dan leh an inchirhtheh tawn dante ka rilru-ah a lo lut mai mai a, khang lai khan a phuk aphak kan hrethiam tak tak lo-in kan lo uipui-tuilian-thlir ve mai mai thin kha a ni a.

1989 kha ni ta-in ka hria, MNF ho campaign khan an ramhnuai mite film an chan kha an chhuah thin a, kan kawt kha kawn zawl nuam leh zau deuh a awm avangin kan kawtah khan screen lianpuiah an chhuah thin a, narrator khan thiam tak maiin, "Kan pasalthate chuan remna leh muanna duh avangin ui tak chungin an silaite chu an tung ta" tiin a'n sawi a, ramhnuai mi lubuk tak tak khan uluk leh dim takin an silai kha an han tung a, chutah a tawp lamah zaithiamin "Zoram hmangaihtu Lalpa, kan ram hmangaihtu Lalpa, Kan ram hruaitute hi min pui la, i Lalna puang chhuak rawh" tih hla kha an han sa ngei a, a pui kan ti thei teh e. Keini naupang chumchiap mai mai pawh kha kan mittui te chu a hnâm ve sawk sawk a, vote -te phei lo nei tawh ila chu MNF kha kan vote chiang ngawt ang chu.

Khatih lai khan "MN ka sawi thei lo, zoram hi kan ram a ni" tihte,

"Tlaitla-in lenkawl khua a lo thim hian,
Riakmaw sirva leng iangin,
Riahna run kan vai tuk loh ram daiah
Piallei hmun rem kan bel e"

tihte chu kan be pui ve awl awl a, hriat erawh kan hrethiam tak tak lo. Party hla chu ka pa khan inchhunga sak a remti lo bur a, keini chu Neutral kan ni a, party hla sak ve vak vak loh tur a ti a, naupang a thu chang inkhualtelem chang chuan kan sa fo tho.

Party dangte lah an lo diau bik awzawng lo a, "Zoram thim chhah ber su kiang turin, Zoram Congress lo chu an awm lo" an lo ti ve zel a.

PC lah chuan,
"PC kan ni e, kan lawm a sang tual tual
Kan hlimin kan lawm kan ram ngeiah hian
Foreigner kan duh lo, ram pek kan tum hek lo
Kan pek sa pawh lakkir leh hi kan tum zawk a ni" an lo ti, tute nge Foreigner an tihte kha kan hrethiam ngai der lo.

An party office-a mi pakhat thusawi ka la hriat reng chu "Eng anga kutphah hlai pawh rawn kalpui mahse kan bukna hian kan lo buk zel ang a, an tling thei lo ang" a ti lauh lauh, PC ho symbol kha Patla a ni miau a!

Eng thil pawh hi a ruihchilh pawl hi awm zel a ni a, zu chauh hi emaw ruih theih kan ti mai thei a, a lo ni hauh lo, RUIH a nih tawh chinah chuan thil tha tak pawh hi a tha lo lamah a chhuak zel ni awm a ni. Politician te hi ram hruaitu tura Pathian ruatte an ni a, dik leh fel taka rorelin Pathian tih chungin ro an rel tur a ni kan ti thin. Mi hlemhle leh dik lo te an awm thin avangin ramin a tuar a, eirukna leh hlemhletna chuan hlet nasa tak chhuahin kan Mizoram zimte-a mizo, uihum lekte hian hmalam beiseina pawh nei thei lo lekin kan innekchep -in kan in the thu tawh chu a ni a, hmabak thlir chuan tu emaw Pathian thu sawi ang maiin "A pikin a pik chun" hian a hriat tak tak thin.

Politics tuinu-a inbual laklawh tawh hi chuan vawk tuihawka inbual ang maia silfai har a ni hial ang, mi dik tam tak awm thin mahse, mi dik lo an awm thin avangin politician te hian dem an hlawh fo thin reng a ni.

Ruih tih takah chuan Kohhran pawh hi a ruihchilh theih ni awm tak a ni, kohhran thenkhat, an kohhran ni ve lo chu Vanram pawh kai miah lo tura inzirtir te an awm a, Kristian theuh theuh kan rin dan hi a intum pel-inpul hlawm a, ti sual a mual mual pawh kan awm mai thei a ni. Engpawhnise, kohhran ruihchilh a, thlarau meuh pawh ruihchilh hian pawlah leh kohhranah rah tha lam aiin rah tha lo a thlen zawk chang a awm thin, hei hi ven fimkhur a tul a, kohhran hruaitute an pawimawh hle a ni.

Zu hi mi tam ber chuan In thiam a pawimawh, khap kher a ngai lo an ti, mahse in thiam an tlem bawk si. In tam chuan ruih theih a ni a, zurui nge nge hi chu rilru a fim lo a, rui lo ai chuan buaina siam pawh an sam zawk, hei vang tak hian zu hi a tha lo a ni ti-a sawi theih a lo ni thin. Zu khap lo-a in thiam tur chuan mizo te hian inzir chu kan la ngai deuh niin a lang.

Ruih nei reng reng hi chu an nu phût vek a, pangngai takin an nung thei thin lo. Politics a ni emaw, Kohhran emaw, Zu emaw pawh nise, RUI a nih tawh chinah chuan a buai nak thin.

Hetih lai hian Ringtute chu zu in leh rui buaia awm lo tura zirtir kan ni a, chhuna awm anga mawi taka awm turin Tirhkoh Paula'n min zirtir. Chuvangin politics leh kohhran te pawh hi ruihchilh lo a, min siam tha tura hman chi a ni e.

Sunday, July 3, 2011

Ziak mite hi

Lekha chhiar peih tak hi chu ka ni kumkhua a, a ziak lam ka timi lo thung, ziah tumna em em pawh ka nei ngai lo, kumtinin Diary erawh ka nei a, ka ziak peih mual mual thin viau. Tunlai, computer kan hman uar hnu leh internet a awm hnu hian lehkhabu chhiar lam hi ka hlamchhiah nasa ta hle, blog leh website hrang hrangte duh hun huna chhiar tur a lo awm tak vangte pawh a ni mai thei.

Thuziak hi - thawnthu, article, hlahril pawh nise - a famkimlohna lam hi hmuh a awlin a langsar fo a, sawisel a nuam a, han ziak ve dawn ila tlar khat pawh ziah tur hre lo hlei hlei hian sawisel tur kan hmu hnem fo. Ziakmite hian an va bei nasa in an lo va thawkrim awm em, rilru te pawh an va seng nasa awm em tihte hi tunhnaiah ka ngaihtuah thar.

Thuziakmi ni tur hian huaisen a ngai ngawt ang - Mahni irawm chhuak leh mahni ngaihdan mite hriat leh chhiar tura han tlangzarh chu insit a na duh ngawtin ka ring, a chang chuan thudik puanzar hian nghawng thalo leh rah duhawm lo tak a ziaktu chungah a thlen theih avangin huaisen taka thu dik lailan chu a har hle thinin a rinawm, chanchinbu mite hian he huaisenna hi an mamawh hlein ka ring.

Thil chik mi nih hi a ngai tak zet ang. Mite chhiar tura ziah ngam ve tawh ting si chuan thu lawilo leh dawt ngawt chu ziah mai mai chi ni dawn hek lo, an thil tawn apiang mai chik leh dilchhut taka zawh keuh keuhte a ngai thin dawn a, thu dik leh belhchian dawl an ziah a ngaih avangin an thil ziahah an chian a ngai a, a fik afak an hriat a pawimawh. Hemi tur hian kalna lam apiang, hmuh leh hriat apiang chik taka belhchian a ngai, tha leh zung, rilru leh ngaihtuahna tam tak an sen a ngai ngei ang.

Hman deuha Vanneihtluanga Malaysia zinte khan an shopping mall kha engtia zau nge tihte, an street pakhata dawr awmzatte kha a hre thlip thlep a, chu chuan a thusawi dang pawh kha a ti awihawm ve hranpa tlat. Keiin kan veng chhung, nitin ka kaltlang kawtthlerah hian dawr engzatnge awm pawh ka lo hre der lo.

Mi dilchhut takte hi ka ngei zawng tak an ni fo thin, an tana tul lo tur an zawt hnem hian ka hre thin, mahse dilchhut na na na chuan an hre hnem leh nge nge thin chu a nih hi, ziaktu tha leh hlawhtling tak ni tur chuan mi ngei hlawh deuhte pawh hi a lo ngai ta'ng. Lalhmingliana Saiawi pawhin a tia lawm, "thawnthu ziah tum chuan tunlai tleirawlte rilru leh an nunchan te hi hriatthiam a ngai thin si a, Bus-a chuante hian dilchhut tak takin thil ka zawt thin a, thenkhat chuan Tar hur te pawh min lo ti ta ve ang" a ti. A ni duh khawp ang.

Hriatna tha tak neih hi a pawimawh hle, mahni rau rau pawh hi intihhmasawn theih ni awm tak a ni, thil chhinchhiah reng mi chuan hriat reng pawh a awlsam deuh nge nge. Chik tak, dilchhut taka zawhchhuah tawh sa kha ziah dawnah theihnghilh ta tlat ila a ho duh ngawt ang. Chuvangin ziak mi chuan hriatna tha tak a neih a ngai hle.

Taimak hi tih makmawh a ni, kan Bible-ah ngei pawh "Taimak kawngah chuan thatchhe suh u" tihte hial kan hmuh hi. Ziakmi hlawhtling tak chu mi taima tak a ni ngei ang tih ka ringhlel lo. Tawngka-a inhlan chhawn ngawt hi a famkim mawh hle, a hun laiin ziak ta thlep thin ila, chanchin kimchang kan nei ni mai tur hi kan chiang lo leh tlat thin, thil pawimawh tak pawh kan theihnghilh hmin thak thak thei tlat. Ziak mite hlutna hei hian a tilang chiang hlein ka hria. Pu C Rokhuma hi ziaka thil chhinchhiah peih tak a nih hmel, kumina ruahtui tla zat te hi a chhinchhiah a, rial a tla em, eng tiat nge, ruahthimpui a sur em tihte thil te tham te nia kan ngaihte a chhinchhiah a, kum 10 hnu-ah sik leh sa awm dan kum 10 chhung a khaikhinna a ziak a, kan chhiar duh leh hle.

Tawngkam bungrua-ah hian hausak a ngai khawpin ka ring, mitin hian tawngkam bungraw hman bik deuh hi kan nei vek a, a tawngkam atangin hei chu chumi ziah a ni maw te kan ti thei thin. Thenkhat tawngkam thiam tak, tehkhin thu nen dak hlarha ziak thei an awm laiin a then chuan bung deuh nghutin an ziak a, a ngaihnawm thova. Mizotawnga ziak a nih chuan theih hram chuan mizotawng veka dah thin hi a tha hle, chhiar pawh a hahdam bik. Tin, ziak tura intintuah ve tawh ting tang si chuan tawngkam bungraw mawi leh tha zawn leh thlan thiam pawh a tul hle.

Thil ngaihtuah leh ngaihruat thiam mi nih hi ziaktu tana pawimawh tak pakhat a ni, unau thawnthu sawi pawh a dang an ti mathlawn lovin, a ziaktu azir leh tawngkam hman azira thu pakhat rau rau pawh ngaihnawm bik riau a awm thei thin, ziaktu chuan a chhiartute lungawina zan a chhawpchhuah a ngai a, thudik ngau ngau ziah tum mah se, a ngaihnawm tur zawnga thu leh hla a rem chhuah a ngai thin, chu chuan ngaihtuahna leh ngaihruat thiamna a neih a pawimawh tih a ti lang, hei hi thil namai a ni lo, thawnthu ziak a ni emaw thil thleng chanchin a ziak a ni emaw ngaihnawm taka ziak tur chuan ngaihtuahna sen a ngai hle thin.

Ziakmi nihna hi mahni inpek chawp mai chi niin a lang lo, midang, a chhiartutena an pek tur ni awm tak a ni. Ziakmi han tih hian chanchinbu-a open letter in thawn zur zut lam emaw, tute political party emaw sawi chhia a, a dang fak emaw vak lam kha a ni lo a, Ziakmi tak tak chuan quality a nei tur a ni. Ziak mi tia inchhal ve si, an thuziak chhiar peih miah lohte hi awm thei tak a nih hmel e.

Chuvangin, ziakmite hi kan han sawisel ve leh chiam thin na-a, a nihna takah chuan mi ropui tak an ni e.

Monday, June 6, 2011

Dawn chang ni hian ka ngai Nunhlui liam hnu.

Ti leh hluai teh ang, rilru-a a lan chang changin. Nunhlui liam hnu hi dâwn kir mai loh chuan koh kir rual ni tawh si hek lo, tah hian lunglen hnemah dah leh ang..

Pitar putar, nu leh pa tam tak hi zawt ila an nuna hun hlimawm leh ngaihawm berte hi an naupan lai tiin an chhang furin ka ring thin. Keini tak ngial pawhin lunglenna chhan tur kan ngah ve em hi maw!

Thingtang kuai rual kan nih atangin mizo hmeichhia in an tih thin ang hi chu ti kim ve vekin ka inhria. Ka nu hi nu azawnga mizo nu ber mai, kut âwl ngai thei hlek lo a ni mauh mai a, kan âwl ber ni pawhin a puan tah tur la kan hlum tal thin. Hahchawlh pahin la hlum rawh u a ti hmiah zel. Chuti a nih loh vek chuan sikul chawlh leh kar tawp chawlh hi chuan ram lamah êm nen kan in um liam ziah a, kan thawh a tlem emaw a tam emaw, kan tih theih awm tawk hi min thawhtir tur a hre ziah leh nghal. Unau zinga milai nih vang emawni, hruai chik takah min neih nghe nghe.

Ka Pa thianpa Pu Thangkhuluaia hian êmte, hnang sin taka hlaiin nalh deuh maiin, te fel at mai hian min tah sak a, chu chu ka phur liam ve ziah, ka Êm-sin chu a nalh em avangin feh pawh a phurawm deuh sawt thin nghe nghe. Thiante nen kan han kal ho bang bang a, annin paikawng pangngai lian tak tak an phurh laiin kei chuan ka êmte ka phur bam bam thin a, nuam ka ti thin teh e..

Haw dawnah phur kan han siam a, Vaimin, fanghma, hmazil leh thlaifur chi hrang hrang, a lian tha tha phurh kha ka chak ve a, ka bei vum ve viau thin. Haw kawngah “I phur chu a rit em?” tiin min han zawt a, “Rit lo, a khin” tiin ka chhang tlat zel zu nia. Mahni phur rit tih chu ka hreh deuh ni tur a ni. Chuti chu ni mahse, in ka thlen hi chuan ka phur hi a phai thei hle, kalkawngah a rukin ka nun min lo chhawk a, ka phur a lo la then zeuh zeuh thin a lo nia, Nu hmangaihna hi chu a lo mak teh e!

In kan han thleng a, inti FEH tak maiin, chhungte tui lum sa-in kan han inbual phar phar a, kan phurh hnem leh hnem lohvin kawngro a su tawh lo, thlai phur hawtu kan ni tawh tlat a, in nghaktute chuan phur an han phawrh a, hahna zawng zawng theihnghilhin hlim takin Vaimin te chu kan rawh puak pawp pawp tawh mai thin.

A chang chuan Inrinni hian thiante nen Tumbu khawrh turin kan inzui liam ve leh hluai thin, tumbu hi thil tui chu a ni hran lo hle, mahse han veh vel hi a nuam ve hranpa a, a khaileng kan hmu a, kan han fik hmawk mai a, a lum tawp tawp a, a hnai-ah lei leh hnahthel ro a bet duh si, a ban duh bawk si, kut a bal duh thin teh e. A hmuam hmuh fuh chuan kan lawm thei hle, changel erawh a hek deuh, kan kih hnan tawp zel si a. Lairawk tumbu han hmuhfuh hnem deuh tum hian a nuam kan ti thin, lairawk hi chu a phak lo bik tlat a, a tui kan ti bik thin.

Tumbu khawrh hian Aidu hmuh fuh hlauh chang a awm thin a, a lawmawm thuah hnih thin, a sentil han mal malh malh phei chu a nuam dangdai ve riau, Aiduria hi a tui mah zawk na-a.

Mautuai khawrh erawh chu thil namai a ni lo thin, mau hung tha deuh kan han hmu a, mautuai a awm chuan kan han thutchilh chat a, a hmun a hnawn deuh chuan thosi leh vaihmite, thomitchhaih chenin min rawn vir nghal luih luih a, mautuai mê nen thak hiah nen, kan inhiat vual tet tut a, puan a lo mê tawh thin bawk nen, kan meng phelh phung mai thin a, hmai vung burin kan haw ta thin kha ania.

Naupan lai khan Gas tih vel a la awm lo a, kum 13 ka nih hnu chauh niin ka hria gas kan neih ve kha, chu pawh a to hle a, kan hmang zen zen lo, Diakkawnah Pu Ruata te dawrah Rs. 57/- a ni thinin ka hria, thing nen kan hman kawp reng tho thin. A chang chuan khawnvartui stove kha kan hmang thin a, chhem hlum a har thin ngei mai, a chhin hlumna kan lei hnu-ah erawh chuan kan chhin hlum ta hmak mai a, a awlsam ta hle, mahse a rim a chhe duh hle.

Chutia gas a la van em avang chuan thingphurh chu hmeichhe hna ber a ni a, hun awlah thiante nen kan phur ve thin. Daihnai-ah thing kawi chhe te te kan han fawm a, in kan thleng a, chhungten “In va phur tha em em ve, thuro a tap ang a..” min han tihsak a, kan lawm ve em em thin. Thing ding ro tha tak hmuh fuh tum phei chuan a hlimawm ve hranpa duh khawp.

A chang chuan mauhakah mau ro mai mai te pawh kan phur a, dai hnai te a ni a, hun a duh rei lo a, chawhnu lam school chawlh remchanah te pawh a phurh mai theih zel a, kan chhek hner hnur thin, amaherawh chu mau hi a alh hluai a, a rem leh duak a, a vam ve tawh si lo a, tuah a hek bik thin.

Mau phurh hi fimkhur a lo ngai khawp mai, vawi khat chu kan mau phur kan chawl hahdam a, kan han kal leh tur chu ka u-in a phur a han kuai a, mau atang chuan Rultuha a rawn dak lawr vang mai a, kan te nasa teh e, rawn kal remchang mipa tleirawl ho-in an rawn that a, chuta tang chuan mau phurh kan tih ta riau.

Vawi khat chu Serchhip kan awm laiin ka u leh kan thiante 3 nen hmeichhia hlir Sakhisih ngaw lamah thingphur turin kan chhuak a, kan kal hla bawk a, thingzai ho thing phaw tha tak tak kan hmu a, kan ek teuh a, kan hlim hle. Hlawhtling inti takin kan haw a, thui vak lo kan kal hnu chuan Hauhuk an rawn hualreu ta vak vak mai, atu-amah khan Hauhuk hualreu lo la hre ngai hek lo I le, kan hlau ta khawp mai a, bak lengin kan tlanchhia, a hauhuka pawh chu khawiah nge an awm kan hria a ni zeng lo, kan tlan tawp mai a ni. Kei leh ka thiante 2 chuan kan thing phurh lai chu kan keuh a, kan Êm chu kan khai lawp lawp mai.

Thui tawk fang kan tlanchhiat hnu chuan kan veng tlangval kebai, kan ngei thin deuh mai leh a thian pakhat sapel tura chhuak hi kan tawk hlawl mai a, kan thla a muang suai suai nia.. Ramsa hram kan hria tih kan hrilh a, anni pawhin an lo hre ve reng a, kah an tum a lo ni, Hauhuk a nih kha an ti et a, a hlauhawm loh, tikhan thlamuang deuhin haw rawh u an ti a, kan mi ngei deuha pawh chu kan ngei loh phah ve ta deuh. Haw kawngah chuan kan hmuh theih ang ang thing kan fawm tha leh ta ringawt.

Tum khat chu Kolasib kan awm lai tho hian ka Pute khua, thingtlang leh chhawngah kan zin a, ni khat chu an chúl-ah kan feh a, ka Putea fate ho nen kan ni a, nuam kan ti phian mai a, tih tur bik em em nei pawh kan ni lo a, kan feh chak kan feh ve mai mai a ni.

Lo kan thleng a, bawkbawn leh samtawk tang rahte leh a chi tura an zuah lian pui pui hmin lek lek tawhte chu kan lo ta vek mai a, bawkbawn chang deuh deuhte chu hei chu a lian tha lutuk tiin kan lo vek a, a hnu-ah ka Putea fapa te an lo thleng a, kan bawkbawn lawh sa te chu a chang lutuk tiin thlam tlaitlanah chuan an theh chhuak zung zung mai a, kan haw teh e.

A hnu-ah chuan pangbal leh kawlbahra te kan cho e kan ti a, a bul kan hmuh chu kan bawhzui zel a, tlema bawk lil lel tawh chu kan vaihma vek a ni ber a, kan cho mai a ni lo a, a laih hian kan lai a ni zawk, kan hai vung terh turh mai a, kawlbahra chawhna te chu a kaw rel rul mai, tlaia in kan thleng chu kan râl atanga min hmutu te chuan “Vawiin chu in lovah Sanghal a chhuak emaw kan ti mai a!” an ti a, an then tha hlawm mai. Keini lah titha kan inti ve em em si a.

Hetiang hi kan naupan lai hun tam ber kan khawhral ve dan ania, dai hnaia sava veh leh thang kama kan vah kual dante, tawlailir ke tur thingtuai kan sah leh kan tawlailir siamte zawng zawng pawh ziah tham fe chu a la awm ngei ang.

Wednesday, June 1, 2011

JUNE

Vawiin June ni 1 a ni ta vuah mai. 2008 March 19-ah Mozambique-a rawngbawlna bul tan turin ka thleng rawih a, a mi chengte eng ang nge tih leh eng tawng nge an hman tih pawh ngaihtuah lo lekin ka arkawh chhuah ve tawp kha a ni a, Airport-a kan han tum chiah khan buaina namen lo-in min hmuak nghal, Portuguese an lo hman avangin Immigration ah ka tang tep, min hmuaktu 1 a rawn lut a, min rawn chhanchhuak ta hlauh a ni.

Kum thum awm tura ruahman ka ni na-a kan hotuten thla thum dang min awmpui leh rawh an tih avangin June 2011 hi ka awm pumhlum leh dawn ta a ni, ka term pangngai ang kha chu nise April thla-a haw thei tur kha ka ni a.

Tichuan ni 1080 vel awm tura inbuatsaih kha ni 1200 vel lai chu ka awm dawn ta a ni.

He rama ka awm chhung hian thil hrang hrang ka zir chhuak nasa khawp mai, dawhtheihnate, hmangaihna te - he hmangaihna hi nula tlangval inhmangaihna lam chu a ni lo ania - rinawmna leh huaisenna te kawng hrang hrangin Lalpan min zirtir a, a chang chuan beidawnthlak tih ngawih ngawih chang leh hlawhchham let der nia inngaih changte pawh a awm ngei mai.

Amaherawh chu ka kal hma atanga a rawng bawl tura min thlangtu leh min kotu kan Pathian hian nitin a rinawmna leh a hmangaihna hi ka nunah a tharin a lantir reng a, ka tan a rinawmna hi chhiar sen rual a ni lo. Zawlnei Jeremiaina "I rinawmna a ropui e, Lalpa chu ka chanpual a ni, ka nunna-in a ti a" a tih ang mai khan, Lalpa hi ka chanpual a ni a, midang ai hian min hmangaihin min enkawl bik em ni tih chang ka nei fo thin, nimahsela, chutia Pathian chungchang sawi chu a fair lo ang tih ka ring "thlei bik nei lo Pathian" a ni si a.

Engpawhnise, dam taka ka hun tawp thlenga min kaihhruai avang erawh chuan Lalpa chu ka fak a, he kum thum chhung hian natna hrehawm leh damdawiin luh ngai khawp harsatna vawi khat mah ka tawk lo a, ka hna avang leh thil dang vang ni lo, mimal harsatna leh dammawh hritlanna avangin chawlhni inkhawm vawi khat chiah ka thulh a, office erawh ni hnih ka thulh thung.

Mi tam tak khawvel hmun hrang hrangah Missionary hna thawkin hmun hrehawm tak takah an awm a, chung mite nena han intehkhin rualah chuan ka inngai lo. Thenkhat dang erawh mahni pawimawh hna dang thawkin an kal chhuak bawk a, chutiang zinga pakhat ve mai chu ka niin ka inhre thin.

He rama ka awm chhung hian mite tan malsawmna ka ni em tih pawh ka inzawt let fo thin a, min tirtu tan hian ka thawk nep hle pawhin ka inhre thin, nimahsela ka theih tawk ka tih ve erawh mal min sawmsak ngei tih ka ringhlel lo.

Haw tura ka han inbuatsaih takah chuan lung te pawh an ti leng ve deuh roh a, kal leh tawh ngai lo tura inngaihna hian min ti hrehin ka lungngai! Hmalam thlir erawh chuan ka phur a, mahni ram ngei, mahni tawng ngeia han ti ti suam suam hun tur ka suangtuahna mitthla ah a awm reng.

Thursday, May 5, 2011

A Aw B Hla.

Naupan laia A Aw B kan zir dan hi a awlsam ang reng ngawt mai, kan sa zet zet a, thiam a awl bik riau. Nakinah thangthar ten an lo hriat ve nan leh kei ngei pawhin ka theihnghilh loh nan helaiah hian ka'n dahtha ang e.

Sikul ka luh tirhin, mikhual ang ka ni a
Ka pawl min siamsakin, ka hming an han ziak a
Mak ti awm tak maiin A ka han ti phawt a
Lungleng awm tak maiin Aw ka han ti a

B ka han sa ta a, chhawn tur van vei vei nen
Ka kawibawm min ti ngai, kan tualzawl nuam tak nen
Ban hma loh phei hi chuan Ch ka lam ka lam thin
Ei tak tak si lovin D hmun ka thleng thin.

Phul emaw ka lo ti, E a ni awzawng lo
F ka lam phei hi chuan a lo awzia ta zawk
G ka lam phei hi chuan vai rim a nam rum rum
Aieng awm si lovin Ng ka tih tak chu.

Hahchhiau chhuak awm takin H ka han ti a
Zungchala kawk zelin I ka han ti chiam a
Mal rawl teuh ang maiin J ka ti thel thawl mai
K a kal si loin thui tak tak ka kal.

Lo zir hmasa te hi L ngawt ka tum ta a
Lum ti awm tak maiin M ka ti em awm mai
N lovin ka zir thin dangnal hnu-ah phei chuan
O ka ti o o thin vawn ka tum vangin

P kianga ka awmin ka Pu pawh ka hre thin
R ka lam erawh chuan kan sumhmun ka hre thin
S ka lam erawh chuan ka saisik seih seih thin
T ka lo thleng ta a, ka ti ti ta thin.

Vai ral kian hnu pawhin T ka ti leh dek thin
U kianga ka awmin ka lo uang em em a
Khuai lamte pawh zirin V ka ti veng veng thin
Z ka lo thleng ta a, ka chhiar zet zet mai.

I kir leh ang u, vangkhua-ah
Nu leh pa unau thenrualte lawma'n

Sunday, May 1, 2011

A her chhuak leh ta.

Thing delh loh, lung delh loh nafam chu Pathian zarah pianchamphaphak ka lo thleng leh ta reng mai. 'A tam tawh e mai' tia paih then ngawt chi lah ni hek suh, lawm taka lo dawnsawn leh mai kha kan tih theih awmchhun a ni.

Kumpuilingleta kan nghah, Tlumtea thlir taka dingdihlipa kan thlir thin, naupan lai phei chuan a tluka hunpui duhawm leh nuam awm thei chuang tawh lo tura kan ngaih, kawr thar, thawmhnaw mawi neihna hun remchang, hnianghnar taka ruai kan theh mup mup thinna, Nu leh Pa lungleng thei deuhte pawhin lunglen hrikthlak na atana an vauchher ber pawh Lal pianchamphaphak lawmna a nih hi maw.

Naupan laia upat kan chak vak lai khan eng vanga puitlin vat chak viau thin nge kan nih le? Puitlingte ah khan hmuh kan nei a, duh duh ti thei nia ngaihna lian tak kha kan nei ve hrim hrim a ni ngei ang, an kum ang zat kan han thlen meuh chuan Naupan lai kan thlir kir leh lawi si!

Kum apun ang zelin bûk pawh a lo rit ve chawpchilh a, intihcher te chu tum enah pawh kan en tawh chiah lo a nih hi. Darthlalang hma-a han din chang hian lungawina hmuh tur a vang thin.

Thenkhat chuan kum 30 kai chiah hian hringnun bul kan tan an ti a ni awm e. Kan dam chhung hun hi a rei lo a, Mosia chuan Chakna avangin kum 80 a ni thei a, nimahsela, a reina chu thawhrimna leh lungngaihna mai a ni a lo ti a. Mi tam tak naupang te te-a thlanmual liam ta te ngaihtuah chuan kan Nunna vawngtu leh kawltu-in pian champha vawi khat dang dam taka min hruai thleng leh hi lawm viau tur ka ni.

He hringnunah hian lungawi lohna leh kim lohna te, duhtawk loh riauna te a awm fo a, kan phunnawi fo thin. Nimahsela kan tawn apianga lungawia, tuarna pawh malsawmna tia dawnsawn zel theihna hian he khawvela kan damchhunga kan nun chu a tinuam mai a lo ni.

Thursday, April 21, 2011

Ka sumdawng ve

Tlem lai deuh khan Solomon’s Cave ah thawmhnaw dawr kan nei thin a, Krismas dawn hi Buh lu chuh lai ang maiin sumdawng zawng zawng mai an hmanhlel vek thin. October emaw November thla hian bungraw la turin theihna lam lamah an intir chhuak sung sung a, Bangkok, Hongkong, Kolkatta, Kalimpong, Katmandu lam thlengin an chhuak suau suau thin.

Ka unaute ho chu bungraw la in kil tin kil tang an hrut a, kei pawh a sakhaw rawngbawltu ber ni mah ila thahnem an ngai bawk nen, ka kut awl chu an hmu thei der lo, Katmandu lamah kal ve mai teh min ti a, kei pawhin unaute tang em em a, lo awl reng chu tiin mi zui tur tha an awm bawk a, an hnung zui a, bungraw hawn tawp tur chuan ka arkawhchhuah ve ta rawih a.
Zarkawt atangin Sumo-in Guwahati kan pan a, Guwahati atangin Rel-in Siliguri thleng, chuta tangin Bus-in Katmandu kan pan leh a, kan zin chau hneh hle.

Katmandu chu zing khawvar rual in kan thleng a, Hotelah kan invawm lut rawih a, kan inphihfai, kan inhnawhpuar a, bungraw zawng tur chuan kan phek chhuak ta. Dawr nghak ngai lo ta chu bungraw kal tur leh tha ka hre lo khawp mai a, kan kalpui U Ungtea chuan “Madin, nang enge I ngaihdan, enge I lak dawn” min ti a, “U Puitei tih ang ang a ni mai” ka ti zel a, U Puitei chuan min tihpui ta vek a. A B.Com graduate ber kha bungraw thlan kawngah chuan ka lak tlak loh ber a! Pawisa chhut vel thu-ah erawh ka tangkai ve hlauh, Indian Rupee leh Nepal Rupee kha 1.6-in khatih lai khan a inthlau a, thil man an sawi apiang kha ka lo convert zung zung thin a, chutih kawngah chuan ka tangkai ve hlauh, ni lo phei se chu Lota nupui chikhawn ding reng ang maiin ka laktlak loh ang.

Katmandu ah bungraw duh ang kan lak zawh hnu-in Carrier kan ruai a, keini chuan bungraw nghak turin Dulabari kan pan thla leh ta thung. Kalpuite an zei bawk a, bungraw lak leh dawr velah harsatna nei lo-in kan tluang khawp mai. Dulabari-a kan bungraw nghah pah chuan kan bazaar kual leh a, kan tei nasa fu mai. Tlai lamah chuan kan kalpui Mafela nen Siliguri lam pan turin kan inhawl chhuak a, thian dangte chu bungraw thawn tur carrier zawngin an cham a, keinin Siliguri lamah a dawn dan tur kan lo va chingfel hmasa dawn a ni, kei chuan rucksack tereuhte ka ak a, cue case ka hawl chhat chhat bawk, Mafela chuan bag lian vak lo a ak thung. Cycle Rickshaw in Nepal ramri chu kan kan a, Ramri-a custom duty te miin an hlauh theih nen keini lah chu tuman pip e pup e pawh min ti hlei lo, tuma tihbuai lohin ramri kan pel fel der a, ka cue case te chu rawn hmu fuh na se chu an man duh ngei ngei tur a nih vei nen.

Siliguri pan tur Bus chu ramri-ah kan chang a, Mafela lah kei aia la naupang ve leh chhawng, chinchang hre bik vak lo kha a nia, U Ungtea’n Pani tanky bulah in chhuk ang a, Hotel room hnih in book dawn nia a ti a, chutiang chuan Pani Tanky chu kan rin zawn ta.

Kei lah motor ka la rui zui, Siliguri khawpui chhung kan lut tawh, traffic jam lai takin tukverh-ah ka’n luak puat maia..h., pawn lama awm vai ho chu an thinrim teh e, min rawn melh raw raw hlawm a, kan tlan liam san ta daih a..

Hotel chu kan zawng hmu ve ta mai, room pahnih kan la a, pakhat chu bungraw thuhrukna tur, pakhat kan awmna tur a ni. Dulabari-a kan bungraw thiar tur chuan thiante chuan carrier an ruai a, bungrua chu chumi nileng chuan hotelah kan lo nghak ta a. An rawn thleng chhawr dawh ta ut ut reng mai, a lo thleng hmasa ber a lo thlen chuan ka hawihai ngei mai.

Kawngka an rawn kik a, kan hawng chu vai ngal ria zet pahnih hi an lo ding zum reng a, Mr.. ni em an ti, aw kan ti a, hei bungrua a lo thleng an ti a, room ah chuan an lo lut a, Ip tereuhte bak an nei si lo a, bungrua chu an la rawn la lut turah ka ngai a. Anni kan carrier chu an han inphelh ta ale… An chawnte chu thawmhnaw hlir hi an lo tawnbet khat tlat a, pheikhawk chu bag-ah muk em em hian an lo hnawh bawk a, kawr an hakthuah chu an hlip teuh bawk a, an pahniha an han inphelh zawh chuan Air bag pahnih chu a khat ti tih der a! An chhuah veleh keinin chu bungrua chu kan room pakhatah chuan kan sawn leh ta vek a. Room pahnih kan lakna chhan pawh kha kan Carrier te khan sual an chhuah hlauh chuan Custom ho hnenah min hekin kan room kha an lo kawhhmuh hlauhthawn thu-ah a lo ni a..!! Ven ngai apui a lo va tam em.

Bungrua chu a rawn thleng nileng a ni deuh ber a, an chhuah veleh hmanhmawh mangkhengin Mafela nen chuan room dangah kan lo sawn nghal char char a, kan hah ve hle mai. Tlai lamah kan thiante pawh chu an lo thleng ve ta a, kan bungraw dangte nghakin a tuk chu kan cham a, chumi pahin chung bungrua zozai chu engtinnge Mizoram kan luhpui ang tih ngaihtuah a la ngai cheu.

Siliguri-a sipai hmunah kan va kal ta a, Mizo sipai chhuti, Zoram lam haw tum an awm em tih kan ngaichang a ni, an lo awm hlauh chuan an bungraw zingah kan thawmhnaw chu kan thawn ang a, thawn man kan chawi thung ang, haw remchang an awm loh pawhin Guwahati thlenga bungraw thiara inhlawh duh tawk chu an awm ve reng thin, chutiang chu kan zawng a ni. Vanneihthlak takin kan hmu ta hlauh.

Bungraw thawn tur kan hmuh hnu chuan Hold-all, sipai ho hman ang, an bungrua ni-a ngaih theih tur leh thingrem lian tawk kan lei a, thingrem chu rawng dum kan hnawih vek bawk. Tah chuan kan buangruate chu kan rem ta a, kan inrem tlaivar thak a, zingah chuan kan zinkawng kan chhunzawm leh nghal. Kan bungraw min kensak turte chu Rel Station ah kan va chang a, kan bungrua chu kan thawnfel a, keini pawh kan chuang ve nghal. Guwahati chu him dam takin bungrua ten en kan thleng tar up mai, thaw khat chu a veng.

Guwahati – Aizawl hi a hautak leh dawn mang e, thawlhna-a phurh rual loh bungraw rit kan hawn si. Sumo kan la a, bungrua zawng zawng vawikhata phur duh an vang em em leh nghal a. Aizawl kan panna kawngah chuan ka kalpui U Puitei hnenah chuan “Hetiang hrepa sumdawn mai chu, Aizawlah hian thil hi to deuh mahse a awm hliah hliah, risk a sang si, ven tur tam si, in hah si. A thlep thum pawh chhiar se, a awm hluah hluah” ka ti a, u Puitei chuan, “Chutiang chuan mi hnenah pawh sawi zel rawh.” a ti ringawt.

Heta tang hian a ni sumdawnna hi tih mai mai a lo ni lo e tih ka hmuhchhuah ve tak ni.

Monday, April 18, 2011

Chhangchhiat ka zir!

Thian thenkhatte chuan ka thenawmah Zimbabwe lam mi an rawn awm thar tih kha in hre mai thei. DC ni turin an lokal a, portuguese an la thiam ve loh avangin inti thiam takin tawngte ka lehsak vel vei thin a, an lo thlen hlima lo dawngsawngtu leh an in leh lo buaipuitu ber ka nih bawk avangin kan khawsa ho nasa ta hle.

Fa pahnih, mipa kum 9 leh hmeichhia kum 14 mi an nei a, anni pawh an vengva phian a, ka in chu an Inpui ang deuhah an neih chawt a, an bungrua a lo la thlen kim loh avangin ka TV an rawn en awl lo a, Movie an duh duh an thlang a, zan dar 10 thleng rak rakin, chhunah lah School an la kal loh avangin ka inah chuan an lo sapa tal thin. A naupang zawk hi a kawlhrawngin a'n harh khawp a, a bulah chuan Tuirini zawng pawh a thu hle hle mai thei a ni. Ka u fate ho, naupang rual ka kawikhawm thin ai mahin he mipa naupang pakhat hi a tawrhhlehawm zawkin ka hria.

Tlai ka office ban veleh in atangin a rawn chhuak nghal a, I In kan tihnawk lutuk tih chu min lo welcome na tawngkam hmasa ber a ni fo. A sawi ang ngeiin In ka'n lut chu Thlipuiin a nuai ta emaw tih mai turin a lo hnawk nuai a, hah hnepa office atanga haw e ti lo hian In tifel reng rengin ka hmanhlel leh thin, han hau chiam dawn ila thian dang kawm tur an la nei chai si lo a, an khawngaihthlak ang reng bawk si.

Ei rawng ka bawl leh, purun chan ve phet a lo tum a, tomato a lo rawt thul, puan ka suk leh darthlalang nawhfai a lo tum ve zel a! Puan ka nawh lahin ka drawer zawng zawng a lo hawng a, make-up a lo khawih kim vek a, ka bawm, hawn theih chi zawng zawng chu a hawng kim vek tawh. Duh lah chu a ngah em em mai, hei hi min pe rawh a ti zo vek, Ngatan nge i tih a? han ti ila, thil tha deuh ka siam dawn te hi a ti ringawt zel a.

Nu, fapa pahnih/pathum nei hi an lo va buai thin awm e tih min ngaihtuah tir ta vel mai mai.

Tuesday, April 12, 2011

Buh tuh hla

Benvawn fengin kawltu chawi la
Ngur hnemtu sawmfang mal za
Tuhin mualpui liam zel ila
Lawm te u, sir sawn phei ru
Tang ula cheh khata thlak zelin
Kan ral mi u lawm lungrualte chhing turin

Kan engkim tur, kan silh leh fen,
kan hak, kan khim kan ei tur
Tiakin to la, ka Lawmi nen lungrual ten kan veng ang che
Chhungtin kan lawm nan thang del del la
Kan vangkhawpui sakhming tisang turin

Chhim leh Hmar, Thlang kawl a lo hnim e
Chung vanrial pawh rum mahse
Virthlileng khuang ruahsur hnuaiah
Siali, Vuaia phang lovin
I bei zel ang eng siaua chun leh zua
Hrinhniang lunglawmna ber tur a ni e

(a phuahtu ka hre ta mai lo, naupan laiin kan sawi thin, rilru-ah rawn lang thut a, ziak vel mai mai.)

Wednesday, March 30, 2011

Intihhmuh.

Mizote hi thil intihhmuh ching tak kan ni ve hrim hrimin ka hria, hnam dang hi engemaw an an ang ni, ka hre lem lo a.

Damdawite hi thiante chawh chawt chawt kan ching, natna in ang ni-a kan hriat chu Kei pawh ka ei a, a tha, ei ve rawh te kan ti ngawt zel a, kan chawh loh vek pawn kan zawt tal a, kei tak pawh hi damdawi lam hriat engmah nei uk lo hian sawi mai mai ka ching khawp, sim daih chi a ni.

Zuk leh hmuam pawh hi chuti tho, thianten an ti liam liam a, tih ve mai kan ching a ni awm e. A bikin Mipa hian meizuk hi Paa riau-a hriatna an nei a ni ta'ng, High School naupang, mei zuk ching an tam riau. Kan High School kal lai-in mipa ho hi chawlhlawk veleh an tlan chhuak a, Tuizem bulah mei an zu ru thin a, an bial luih a, a khu luih luih thin, kan Miss-in a hrem hlawm, Tuizem hal in tum em ni? a ti a, an nuih chu a za ang reng hlawm khawp mai.

Incheina hi kan intihhmuh thin langsar tak pakhat a ni bawk. Thianten pheikhawk nalh deuh an nei a, neih ve kan duh zel. Kawr chi dang deuh a rawn chhuak a, a design kan entawn a, thui ve zel kan tum hlawm. Kan nulat laia Levenday puan an tih mai thinte kha nei phak lo nih a va hrehawm tak em ve aw... Tunlai nula, tleirawl te hi chuan korean style an in tihhmuh mek niin a lang.

Internet leh Blog - Kan lo changkang telh telh a, mizote pawh internet kan hnimhnai in kan hmang nasa tial tial a, mahni pual-a blog, website etc siam thei apui kan tam ta, kan intihhmuh hneh leh pek khawp mai, mahse regular taka update thei chu ar chil zat lek an ni leh lawi si, internet khawlai hi kan va tihnawk hneh tak em! leh peka.

Facebook - Facebook mawlh mai hi a chang chuan ka nuih a za thin, rin loh tak tak hi an rawn lang nawlh nawlh a, kan va chhangchhe tak e aw.. Min rawn invite chawt chawt a, han accept ila hnara khawn ang maiin an bo leh thin si, active viau ila, i va hman awm ve kan inti leh lawi bawk si, ka tan chuan chanchin hriatna leh lam hla thian kawmna tha tak a ni a, tha chu ka ti ang reng viau tho, mahse ka ti mah mah em aw chu ka inti deuh, Hmanni pawh ka nau thian pakhat-in min rawn bia a, FB-a chat vel hi i inhmeh lo e.. min ti, enge ka inhmeh niang aw.. tih erawh min ngaihtuah tir thung a!

Hetiang hi a ni e, tunlai ka rilru a awm mai mai chu. Tirhkoh Paula erawh chuan Timothea hnenah khan " I naupanna tumahin ngainep suh se; thusawi kawngah te, chetze kawngah te, hmangaih kawngah te, rinna kawngah te, thianghlimna kawngah te ringtute tihhmuhtu ni zawk ang che" a ti. I Tim. 4:12

Thil tha lam intihhmuh hi i teh tum ang u.

Sunday, March 13, 2011

Ka tunlai boruak tawn

Pathian zara dam te-a han awm hi chuan eng eng emaw hi kan tawng kan tawng mai a, tihian awmhmunah tunhnaia ka thil tawn thenkhat ka'n hrilh leh mai mai che u 'nge.

Thalai ho hla zirtir - Ni 19-20 March hian kan Territory lawmna pahin Territorial Congress kan hmang dawn a, kan inpuahchah nasa ve hle, chumi atan chuan thlalai ho hla ka zirtir e ka ti a.

A tu amah Solfa thiam awm hek lo le, ka vai hma vek a ngai a, a ni hmasa berah chuan Soprano leh Contralto kan bei phawt a, a hnu-ah chuan tih dan tha deuh ka ngaihtuah chhuak a. Contralto leh Tenor chu ka aw ka record a, hla zirna ah chuan Lap top nen ka thawk chhuak ta rup mai a, Tenor leh contralto chuan ka aw thun chu an lo Bethel pui laiin Soprano leh Bass lam ka lo buaipui ta thung a, a tih chi phian mai.

Chutia rei tawk fang an pil vang vang hnu chuan kan in kokhawm a, kan han zai ho ta. Ka aw thun aia Key sang hretin ka la a, Contralto chu an buai ta tlat mai, Tenor ho sawn kan part an sa ve an rawn ti, Tenor chu a malin ka zaitir a, an sa dik si, Contralto chu kan tihtir leh a, an buai ta tlat. Eng dang a ni lo, a key ka san vangin an man lo kha a lo ni a! A key chu ka thlak leh ta ringawt a, chutah meuh chuan an sa dik ta awl awl a..

Judge tenau ah ka tang - Vawi khat chu kan thawhpui pakhat hian "Capt, Beauty hnenah thil sawi duh ka nei a, i awm laiin sawi ka duh a, i hman em?" a ti deuh kher a, eng thu leh hla nge a sawi duh pawh hre hlei lo-in "Hman e" kan ti satliah a, tichuan ka room-ah kan kal a, Beauty chu a ko a, kan pathum chuan kan thu ta tham a.

Celeste chuan "Capt, tawngtai phawt rawh" min ti leh a, "Eng atan nge ka tawngtai ang a?" ka ti hu a, ani chuan, "kan tan hian" ti leh mawl tawp a, ka tawngtai ta poh a, thiam a har hle. Kan Amen chu a sawi duh chu a sawi ta.

Anni pahnih chu a hma deuh khan an lo in the thu deuhin an thu leh hla a lo in bakkaih deuh ni awm a ni, Celeste chuan Beauty hmel atangin a thinrim tih hre si, enge a chhan chiah hre si lo khan hriat chian a duh a lo ni, a zawt ta vel a, Beauty lah chuan "Ka thin a rim hleinem" tiin a lo pha tang kawh tlat thung, ani lahin, "Tunah ka thinrim lo i ti mai mai, a hun lai kha chuan i hmel leh chezia, tawngkamah i thinrim tih a lang reng a, midang pawhin, Enge a awmzia, an ti sup sup alawm" a ti si, an inhnial ta char char mai a, ngawi rengin ka lo ngaithla tawp.

Thu ngai an sawi an sawi a, an thu a inhmu thei dawn ta lo-in ka hria a, a hnu-ah chuan "Ngawi teh u, in sawi ngai hlir in sawi mai a, tawk rawh se, hei in sawifel tawh a, Beauty pawhin ka thinrim lo a tih hi, duhtawk tawh mai rawh u"ka ti a, dik tak chuan Beauty chu a naupang zawk bakah anmahni ka hriatchian ve ve avang leh an thusawi ka ngaihthlak atangin a thiam lo zawk tih ka hre mai a, Celeste lah chuan "I bula awm dan tur hi ka hrethiam lo, a changin i tha em em a, a changin i tum kawh leh tlat a, engtik huna biak tur che nge, engtika pehhel tur che nge ka hrethiam lo" a ti, kei pawn chu chu Beauty laka ka rilru put dan leh ka hmuh dan chiah a ni a, mahse sawi ve hun a ni lo.

"Celeste, hei leh chen min hre tawh a, ka nungchang chu hrethiam turin min zir ta che, min hriat chian chu a hun tawh alawm" a ti. Chuta Beauty chhanna chuan min dek zawk, ka tawng ve lo thei ta lo, "Beauty, tuna i chhanna kha tawngkam mawi lo tak a ni, khati zawnga tawng tur kha i ni lo. I aiin a upa zawk a, 'Ka nungchang zir rawh' tih ai khan 'keimah hi in adjust ka ngai a ni' ti zawk tur i ni" ka ti a, dik tak chuan ka ngei deuh hle.

Chutia ka tih takah chuan Beauty pawh tlemin a dul deuhin a lang a, a hnu deuhah chuan an in tha then ta a, thian tha tak erawh an ni kumkhua lo ang tih a lang reng.

Misual ka tawng - Nimin tlai maia thil thleng kha a ni. Helai ka awm hnu hian thil duhawm lo hi ka tawng lem lo hle, ka teihawi tam loh vang a ni pakhat a, tin, ka chhuahvah hian mahniin ka chhuak ngai lo, ka In atanga vei lam phei chu a kuma kum ka kal tlang tawh lo, ding lam hi ka office kawng, kawngpui leh bazar vel panna a nih avangin chulam bak chu ka kal meuh lo.

Ka thiannu a lokal a, min thlah rawh a ti, Bus stop lam, peng ding lamah emaw a kal dawn ka ti a, ka zui hnawk hnawk, vei lamah a kal ta si, helam hi ka kal tam lo teh ania, ka rawn kal thui duh lo, keimahin let a ngai dawn si, ka ti sa reng a, kan ti ti a, kan kal zel a, Field kan thleng a, football an lo khel, an awm luih luih, ka rawn kal duh tawh lo ka ti a, kan inthen, keimahin ka let ta hnu hnu.

Dan pangngaiin China, chhing chhi chhia,.. tih vel, chinese ni awm taka an hriat chuan min lo aukhum leh vak vak hlawm, ngawi rengin ka kal hmiah hmiah a, nakin deuhah chuan mi pakhat hian min rawn pel thuak a, ka hma-ah chuan a kal a, min rawn thlek zuk zuk reng a, ball a pawm tut nghe nghe, a sam a phiar kak sur bawk. Min beih a tum deuh ni-a ka hriat avangin kawngsir lehlamah ka phei a, nu pahnih lokal mek bulah chuan ka va kal, chutah chupa chuan an local language sanghana chuan engemawni a sawi a, ka hrethiam lo, a tawng pah chuan min en tih pawh ka hre reng, mahse ka en duh lo lui a, ka kal hmiah hmiah a. Ka chhan loh avang chuan a thinrim emawni, ka hlau niin a hria nge, a pawr tulh tulh a..

Portuguese in a rawn tawng leh a, ka chhang duh chuang lo a, tawng thiam lo awmin ka awm tlat, nakinah chuan English a rawn hmang leh, "Fuck you, i will fuck you, you know that, i am a violent man, i will come to your house tonight" a rawn ti vak vak, a tawng ring ropui si, chhang miah lo-a kalsan mai ka tum laiin, ka lam chu a rawn pan hnai a, "I pa hnenah ka rawn sawi ang, ka sual ania..." etc tiin a rawn au, ka thin tertek a chhuak leh ta zak mai a, a rawn kun hnai bawk a, ka en let ve ang kel kawl a, "stop talking to me like that" ring tawkin ka ti a, ka beng bulah chuan "Fuck you." a rawn ti leh.. "i va zakthei lo ve a, kalsawn vat rawh" ka ti tuar a, chumi hnu-ah zawng a let ta hnu hnu a.

Wednesday, March 2, 2011

Bial fang ang u aw..

Mahni lo maha buai ve nak lai hian Blog update hi a bata bat ni-ah kan ngai ve bawk si, thu leh hla lama tuihnang mi nih loh phei chuan hawi hil mai a awl khawp. Chuta chhapah hmun hla tak takah kan zin kual ve leh bawk thin nen. Tun tum update pawh hi bial ka'n fanpui lawp lawp mai teh ang che u.

Division account enfel turin ni 19th Feb, ah Maputo ka chhuahsan a, tawng ka thiam that loh avangin Hotute hnung zui lo chuan mahni-in ka zin chhuak ngai lo a, tun tum chu thih leh thih tiin mahni hna pawimawh a ni bawk nen, ka arkawhchhuah ve tawp mai a ni a, a zamawm duh thin hle.

Patling pui pui, Heti hian ziak rawh kan ti a, thuawih takin an ti ve mai thin hi a vanneihthlak thin ngawt mai

Hetia han zinkualina a kaihhnawih pakhat chu Sermon a ni a, hanthawk ringawta tum tlak theih ni hek lo le, chawlhni-ah inkhawm a ngai a, a hminga tlawhtu nih chuan thusawite a chawh leh zel a, hetah tak hian buaithlak a awm leh thin. Hlauhthawn lawk ang ngeiin Thingtlang lamah chuan tawng lettu an awm lo a, loh theih loh avangin Portuguese-a thusawite a ngai leh thin a, chu chu an local language Bitonga te, Tchena te'n an han let leh thin ania, a chanve pawh an hril zo lo tih hla hi kan hrechhuak vung vung thin, ka thusawi kha hrethiam hlawm tak maw aw.. te ka ti leh hnuhnawh.

A sawi chu ka sawi ve ngei!


Han inkhawm hian mi thahnem tak lo kal se kan duh rual rualin an thahnem poh leh rim a na a ni leh thin si, hnar han hup mai te pawh a chakawm rum rum thin, in chibai nan Bianga fawh an uar viau leh nghal a, ner reng chunga biang insik a awl hle, a mawi lo hle thung si. Khua a lum a, an thlan hluam phei chuan kan han in chibai zo hi biang hrukhulte a ngai thin. Hmun pakhata kan inkhawmna-ah phei chuan Biakin bang dap, lian lem lo takah naupang 80 vel leh nu leh pa, thlalai te nen kan in êk beng a, rim a tak tha khawp mai.

Naupang ho hi an thu bit teh mai ania..



Thinghlim hnuaiah Lunch pawh kan ei mai
He mite ho hi an buaithlak teh asin, thu ka sawi a, kan DC chuan an tawng, Bitonga-in a let dawn a, ka thusawi dawn chuan Portuguese hrethiam miah lo in awm em? in awm chuan ban han phar teh u.. ka ti a, an ngawi thap, in hrethiam vek a ni maw? ka ti a, Aw an ti dual, chuti chu Portuguese in ka sawi ang a, Bitonga a leh a ngai dawn lo tihna ni maw? ka ti a, Ngai.. an ti leh si!!


Kan Mizo pi/pute khan thangthar hla phuah tur a phuah zo tak ngial dawn tiin Pi Hmuaki kha a nung chungin an phum a, kha kha mizo thawnthua a nung chunga phum kan hriat chhun chu a ni awm e. Chu pawh hmanlai thil a ni a, tunlaiah chuan a thleng tawh awm lo e. Mozambique ah hian thil mak tak tak hi a thleng chawk a, an puithuna leh serh leh sang avang te, dawi thil avang te a ni thin. Nhamaxaxa hmun kan tlawh a, thingtlang ve tak mai a la ni a, helai hmunah hian Nu pakhat a nung chungin an lo phum a ni awm e, a hming Luisa a ni. He nu hi khawtlangah pawh pawimawh ve tak, Kohhranah pawh pawimawh leh challang ve tak a ni. Hman deuh lawkah a pasal a thi a, a chhungte dang pawh natna neuh neuh nei leh thihna hial tawk tunhnaiah an awm zeuh zeuh a, Luisa chu Dawi thil hmanga a pasal leh chhungte chu tihlum niin a chhungte chuan an ngai tlat a.

Nhamaxaxa, a nung chunga mi an phumna chu.


Nikum December thla kha a ni awm e, Luisa chu a fate leh a pasala chhungten an dawp ta a, ani chuan Dawi thil a lo hmang reng thin a, hun rei tak a lo ti thin tawh a ni tih a inpuang ta a, chuvang chuan a chhungte chuan chumi ni la la chuan a Nung chungin an lo phum hmiah a nih chu. An phum hnu chuan an thenawm khawvengte hnenah thil awmzia sawiin Luisa chu an phum thu an hrilh a, annin Police an pun a, Police te chuan hemi ni vek hian a thlan chu an hai leh a, a lo ti fel der tawh a ni.

Wednesday, January 26, 2011

Mumang.

Chaltlang-ah hian pa lar ve tak mai, a tial thawl ve lampang, lenvah taima zet mai hi a awm a, kekawr tight tak mai ha-in a kal tah tah thin. Chuvang chuan a hmingah Dotighta an ti a.

Zan khat chu a mumangah an veng nula hmeltha kha a lo khuaikhem ni tur a ni, a hlim khawp mai a, a tukah amah chu a hmu a, a chhaih vel.. " Nizan kha.." a ti, nula lah chuan hrethiam der si lo a, "enge nizan?" tiin a zawt let a, ani chuan "Ehh... hre lo der velah.." a la ti hram a ni awm e. Mumang na na na a tak emaw a ti tlat a, chu chu a mi an lohna tak kha a ni si.

Mumang hi a mak khawp a, thenkhat chuan kan thil ngaihtuah deuh hi kan mangphan thin an tih laiin ngaihtuah miah loh, hriat miah lohte kan mang nawk nawk thin bawk si. A chang chuan ka manga ka hmuhte hi, Hetiang chiah hian a takah a thleng tawh, hei hi ka hre tawh a ni tihte ka nei thin. A chang chuan thil lo thleng tur ni-awm tak, kan mangah kan hmu a, chu chu Kelchal mangman tiin Upa te chuan an sawi thin.

Josefa khan a chunga thil thleng tur kha a kelchal mang man a ang khawp mai. Thuhriltu chuan Mumang a tam poh leh thu lawilo a tam a lo ti a, hla siamtu lahin Zingah mumang a lo ral thin, kan in ang rintlak loh a ti bawk a, mumang hi an sawi ho viau.

Thenkhat chuan kan mumang hi kan hre reng a, a sawi pawh kan sawi leh vek thei thin, a then erawh chuan kan ngaihven lem lo a, sawi pawh kan sawi ngai lem lo. A tlangpuiin zing ka harh hi chuan ka mang hi ka hria a, a hnu-ah ka theihnghilh leh mai thin. Kan college kal laiin kan thiannu hi mang sawi a uar khawp a, zingah Tuition kan kal thin a, haw kawng tluan hian a mang a sawi thin a, kan thianpa pakhat chuan a tlanchhiatsan a, a um dawr dawr a, a hrilh hrep zel :D mangneiin kan tih phah.

Miin ka mang a ang riau mai an tih hian, a mumangah chutiang thil chu a hmu tawh a, ka mang a va ang ve a ti tihna a ang hle mahse chutiang chu a ni miah si lo, ka mang a va ang tak em kan tih hian kan rilru a buai a, harsatna lian tak kan tawk tihna a ni. Engatinge ka mang a ang kan tih kher thin le. Kan mangah kan buai vak vak thin vang emaw ni dawn le..??

Ka USB Modem ka ti bo a, ka online thei lo... ka mang a ang tak zet a ni.. :D

Monday, January 17, 2011

The High Council 2011

Salvation Army-in High Council ti-a kan sawi thin hi Council dang anga active reng a ni lo a, General thlan dawn apianga Chief of the Staff kaihhruaina hnuaia siam chawp zel a ni. He Council-ah hian active officer, Commissioner rank nei zawng zawng leh, Territorial Commander leh Territorial President of Women Ministry post chelhtu apiang te an tel thei a ni. Rorel khawl dang angin he council hi a function chhunzawm ngai lo a, General thlan zawh veleh tiam chin awm lo-a khar leh mai thin a ni.

High Council hi 1904 khan General William Booth-an a din tan a, chutih lai chuan Genral tang lai te chuan thih thak thleng an chelh mai thin. Zawi zawiin tih dan a danglam ve zel a, tunah chuan General tang laiin kum 70 a tlinin emaw, General Office kum 5 a luah hnu-ah General thar tur thlan a ni ta zel a ni. General ni mek Shaw Clifton chu 1, April 2011 zanlai atanga a retire dawn tak avangin amah thlaktu tur thlang turin he High Council hi 21st January 2011 hian United Kingdom, Sunbury Court-ah an thukhawm dawn a ni.

He High Council memberte hian Council member ami emaw, Officer tawh phawt chu General atan an nominate thei a, heng nominate te hi nikhat chhung inngaihtuahna hun pek an ni a, an pawm emaw pawm lo emaw, Council-ah an thlen a, an pawm a nih chuan General tura Candidate a ni ta a ni. He General Candidate hian zawhna siamsa chi hrang hrang 40 vel a chhang a, a nupuiin 6 emaw vel chhan tur a nei ve bawk. Chungte chu an chhan bakah thusawi tur an inpuahchah bawk a, boruak a tang tawh hle thin a ni.

Candidate te chuan an zawhna chhanna te chu chhiarchhuakin thusawina hunte an nei a, an thusawi tur hi tuk bik awmlo, duh lam hawi hawi sawi theih a ni a, amaherawhchu, midangte thusawi an copy mai mai loh nan, a hma-in an thusawi tur hi ziakin an dah sa thlap thin a ni. Heng inpuahchahna hrang hrang an tih zawh hnu hian member ten secret ballot in vote an thlak ta thin a ni.

Vote hi chhawng 4-a thlak a ni thin a, chhawng khatna-a 3/2 vote hmu nghal an awm chuan chu chu tlinga puan a ni a, chutiang hmu an awm loh chuan chhawng hnihna vote an thlak leh a, heta tang hi chuan vote awm zawng zawng zatve an hmuh a ngai thung, chuta tling an la awm loh chuan vote hmu hniam ber apiang kha an chhuak zel tawh a ni.

He High Council hi London-a Sipai pawl hmun pakhat Sunbury Court an tihah chuan an nei thin a, International Headquarters atangin anmahni puitu tur mi thahnem tak an kalkhawm thin bakah, volunteer engemaw zat anmahni pui tur hian an inpe bawk thin a, khawvel hmun hrang hrang a kalkhawmte hi a then chu tawng leh chawp ngaite pawh an ni bawk a, tawng lettu erawh chu an awmna room-ah awm ve a thiang lo a, room dang atangin an let thin a ni.

Candidate an neih hnu-a vote an thlak dawn ni hian an awmna pindan puanzar chu zar phui vek a ni thin a, General thar an thlan chhuah hma chuan pawn lam atangin engmah a hmuh theih loh. Inthlan a zawha General atana vote hmu sang ber thlan tlin a ni ta tih hriat a nih veleh Sunbury Court-a an thutkhawmna pindan chu mipui hmuh theih turin puanzar an hlip ta a, pawn lama an thu ngaichanga lo awmte chuan room chhung hmuh theiha hawn a nih veleh General thar kan nei ta tih an hre thei thin a ni.

Kumin High Council ni 21 January atanga neih turah hian mi 109 an tel dawn a, Mipa 52 niin, hmeichhia 57 an ni. Heng member chhuanawm tak tak zingah hian mizo 5, Commissioner Lalkiamlova, Commissioner Lalhlimpuii, Colonel Lalzamlova, Colonel Nui leh Colonel Lalngaihawmi te an tel ve a ni.

Pathian hriak thih ngei, heng member kalkhawmte hian an thlan theih nan i tawngtaipui ang u.

Sunday, January 9, 2011

Khuhhawnna - Victoria Falls

Chutia Colonel Varughese te in kan thleng ta chu zing lam dar 4 a lo ri der mai a, dar 8-a tho turin kan mu ta dial a, Dar 10a.m. ah Christmas hmangin kan va inkhawm ve zuai a, chubak chu in lamah kan tlingtla ta.

South Africa airport-a ka thian chhar nen khan kan in be pawp a, ka ticket tur pawh a lo tifel diam, mihang ka tawn tawhah chuan a rintlak pawl tak a la ni ve tlat. 27th Dec chuan Victoria falls lam panin kan thlawk ta a.

Business class - Chawpchilh taka book a nih vangin ka ticket tur chu Economy lo awm tawh lo, darkar 1 vel lek thlawk kha Busibess class min lo book sak a, a va zialo teh reng. Pawisa ka chawi nghek a, a rei lo ropui si. Service erawh a tha hle, a hma ni lawka South Africa Airport-a kan thinrim khumte kha an ni ta lo emaw tih turin Business ah chuan an awm leh si, ei leh in tur min pe reng a, mamawh min zawt reng, ka inti lal thang ve si lo a, ka ning zawk phian, Min thlahthlam mai mai teh u ka ti tep a ni. Business class seat 12 awmna-ah chuan mi 2 chiah kan thu a!!

Airport kan thleng a, Hotel kan pan nghal, thiante chuan thil ei an rawt, ka ril a tam an ti, kei lah thlawhna-ah khan fatlum duat taka duat kha ka nia, arbawpte kha kan khel vel a nia, ka ril a tam lo khawp, economy-ah chuan sandwich chiah an sem lo niin.

Kan thlenna Kingdom hotel pang sir lehlam


Victoria Falls chu - 'Mosi-oa-Tunya' ti-a a ram miten an vuah (Smoke that Thunders) hi Scottish Missionary leh explorer hmingthang David Livingstone a hmuh hmasak ber a ni e, an ti. Chutih laia an Lalnu Queen Victoria hmingchawiin a phuah a, a ram mite erawh chuan Mosi-oa-Tunya ti te pawhin an hre lar tho. Khawvela thil mak pasarih te zingah a tel ve ni-a ngai pawh an awm nual awm e, kei pawn a tel ve emaw ka'n tih ngawt pek kha. Khawvela tuikhawthla lian ber erawh a ni chiang, 1708mtrs a zau, 108 mtrs a sang a ni hem mai. Zambia leh Zambezi inrina lai velah Zambezi lui luangin a siam a ni a, a khawhthla ri hi a ring khawp a, a zu khawhthlak hnu a hu rawn let leh pawh a force a chak khawp a, a kam lehlamah chuan ruahsur ang mai a ni a, thla la-a kan han hnufual deuh bawk avangin min nan huh hman hle.

A khawthla lian ber lai
Zambezi river, Victoria Falls siamtu ber chu


A area hi zau takin an hung a, luhna gate lian siamin chutah chuan ram dang mi tan US$30/- a ram mi tan US$5/- an lo khawn a, phunchiar ta na na na chu ka kalpuipa bulah chuan "An va ti fair lo e, ramdang mi tan an ti to bik" ka'n ti leh pek a, ani lah chuan awlsam fe-in "Ram danga kan kalin kan chawi hnem ve thin tho alawm" a ti duh lek a, dik vei phian bawk si.

Falls thlirna tur hian View point an siam thliah thluah a, awlsam takin a thlir mai theih a ni. Ram pahnih inkara awm a nih vangin he Falls hi Zambia leh Zimbabwe hian an inchuh deuh roh thin a ni awm e, he mite ram inkarah hian ram awl thui fe mai a awm a, No Man's Land tiin an vuah a, a piahah chuan Lei thui zet an dawh a, chu lei lai takah chuan ramri an siam a ni.

Bazar Ni - Ka kalpui te chuan a hma tanga an plan vek tawh avangin ni 28 chuan Botswana lam an pan a, kei INDIAN passport humtu hian VISA ka'n mamawh leh pek a nih kha, nawhchih taka visa neih theih ni hek lo, Botswana lam an kal chhungin Victoria Falls khawchhung velah ka lo tam tal mai ang tiin kan inthen a, hmelhriat tumah nei bawk si lo chuan lawm lo ten laitual ka leng hne hne tih ang maiin, mahniin bazar vel chu ka hrut kual ta nghek a, a khua a zau lo bawk a, ka fang chipchiar hman leh pek kher mai.

He dawr hi an hawn rei theih hmel ngawt asin :-)


Kalna apiangah Khawi atangin nge i lokal tih min zawt ziah a, kei lah chuan "Kingdom Hotel atangin" tih hlirin ka chhang a, an nuih a za thei hle, an mi zawhna tak ka chhang lo tih ka hre reng, a chang chuan Harare atangin ka lokal ka ti bawk, ni miau hek. Indian ka ni ti mah ila, an awih leh dawn chuang lo a, ka inham buai peih vak lo bawk a ni.

Dar 12-ah chuan dawr ka lut kim deuh vek tawh, tlai lamah sunset cruise ka ti ta thung. Mahni chauh lo deuh nen kal ila chu nuam tak tur a ni.

Helicopter - Helicopter hi ka la chuang ngai miah lo a, kan chung ah chuan a thlawk kual pup pup reng a, Victoria Falls an en a lo ni, hnial rual loh-in ka chuang chak leh ta em em mai a, zanah chuan, "Naktuk chu Helicopter chuang ang u" ka ti a, kan thian Japanese pa chu a lo phur khawp mai, pakhat erawh chuan "Thih ka la duh lo" a ti deuh ngauh thung, a hlauh vang mai mai a ni, "Kan thih leh kan thi tlang ang chu" ka ti a, a ngam chuang lo. Thianpa Tanaka nen kan chuang ta vut vut a, boruak hip a sangin a thiang vuk mai, nuam tak a ni. Hnuai lam lah chu a lang chiang em em mai si a, Pathian pawh hian min chhuk thlir a ni awm si a, a hmu chiang viau ang tihte chu ka ngaihtuah mai mai a. Kham lo takin minute 10 emaw vel kan chuang a, thlate kan la nual bawk. Helicopter ti veltute hi an zei khawp mai a, kan chuan dawn khan shooting kan han nei hmasa te te a, Falls vel video an neih sa nen an mix a, min entir leh ta a, in duh chuan a lei theih ania, an ti zaih, mahni lan vena na na na chu kan duh leh ta vek a!!

Thil dangte pawh - Official-a zin ka ni lo na-a ka thlenin te hi an fel a, ram khat Chief Secretary ve meuh an ni bawk a, programme an lo siam duah a, awl ni nei lek lo-in ka inhmang khat ve tlat. Ni 1 January ah Territorial Commander in expatriates a inah lunch a kilpui a, min sawm ve, a fel khawp mai.
2nd January hian Warren Parks Corps min tlawhpui a, thusawina hunte min pe nghe nghe, Corps lian tak mai an ni, an zaiin an lam tui thei hle, Blanket lian tawk min present nghe nghe.
3rd January-ah ka thianten min rawn lam a, an in lamah zanriah tuihnai tak min buatsaih sak. Hemi te hi 2009 khan Mozambique-ah an rawn awm zuai a, an pa hi professional pilot a ni a, Mozambique airlines a rawn pui zuai a, chutih laia inhria chu kan ni a, min lo la hre reng a, an fel hle mai.

Ka thian Maureen te In.. an han bei lian khawp a..!


4th January - Headquarters min fankual pui a, an nei changtlung in a pui khawp mai, chumi zawhah Balancing rocks enin kan kal kual zuai zuai bawk.

- Thlalak ka upload peih tawh rih lo, in tan pawh a ninawm zozai ang, Facebook lamah ka dah teuh bawk si :-P

Friday, January 7, 2011

Khuhhawnna - Zimbabwe zin thu

Nikum chhung zawng khan South Africa zin tumin ka hmanhlel a, VISA ka hmuh mai theih loh avangin ka pamtul ta thak a, Christmas tal hmang turin ti-a rilru ka siam meik laiin Lalpan kawng dangah min hersak a, Zimbabwe lam Visa ka hmu hlauh a, ka kal ta zawk a ni.

Zimbabwe hi British ho awp thin a ni a, April 8, 1980 khan an independence a, an Politician te corrupt lutuk leh rorelna tha lo avangin an economics a tlachhe nasa hle, 2009 atang khan lei rem an rap tan dek dek chauh a ni, an pawisa te phei chu a'n hlu lo khawp a, zillion dollar note te an nei vel a, 2009 atang khan US Dollar lah South African Rand an hmang a, tunah hian anmahni pual Currency an nei lo, USD nge ZAR an hman ang tih an inbuk vel mek niin a lang.

Mingo ho-in an awp chhung hian an ti rethei viau niin an sawi, Mihang kal phal lohna area te a awm a, tuna khawpuia an chenna hmun tam tak hi tunhma-a mihang kal phal lohna hmun a ni. A ram leilung a hausa a, sum leh pai tam tak thawk chhuak thei tur an nih laiin, mingo ho-in a hmun zawng zawng an pumbilh vek a, a ram neitu zawk chu hnathawkah bak an chhawr ngai lo a ni awm e.

Tuna President Robert Mugabe hi nasa taka ram tana bei leh dotu a ni, tualchhung indona nasa taka beitu a ni, politics avangin kum 10 chuang lung inah te pawh a tang a, indo a lo tawp a, ram chhunga a lo luh hnu chuan pasaltha chawimawina dawngin mipuite thinlungah a tla na hle a, Prime Minister hmasa ber a ni nghe nghe. Nimahsela, thuneihna leh lalna duh luat avangin a lalram hi midang a kian phal lo a ni chek ang, 2008 inthlan-ah pawh tling lo chungin a tling a, mipuite rikrap, tualthah leh pawngsual thlenga a mite an chet avangin an vote lo ngam lo a ni ber mai. hei hian a ram chhungah chhiatna nasa tak a thlen a ni.

Chuti taka an politics leh economy a chhe chung pawh chuan Sap ho sulhnu avangin a khawpui indin dan a felfaiin a nalh a, a nuam phian lawi a, a ram chhungah Ndebele leh Shona chu an local language ni mah se, saptawng chu an Official language a ni a, an zirna a tha a, sapram based vek anih avangin naupang te te pawh saptawng an thiam em em vek a, tar kiring pawh an tawng nalh hlei hlei.

Ka zinkawng chu - Mahni sum senga chawlh hmang tur ka nih avangin ticket tlawm ka'n zawng phawt a, a tlawm na na na chu a lo tha lo thin khawp mai. Maputo - Johannesberg zing dar 7-ah ka pan a, dar 9:30am chu J'berg - Harare a ni, thlawhna an lo delay ta pang mai. Transit ah chuan kan han in report ve sasawi a, Board-ah lah chuan Harare - Indef Delay tih an tar kuau reng. Air Zimbabwe a thlawh tum ka ni, South African Airways a thlawk turte chu an kal zung zung a, keini erawh dar 1:30pm ah rawn ngaichang rawh u min ti ta lek a.

Dar 1:30pm ah chuan ka va kal dek dek a, enge chanchin ka ti a, kan thlawhna chu a thlawk dawn nge dawn lo engmah an hre chiang thei lo, an phone a, Zimbabwe lamah meeting an nei mek a, chumi zawhah chuan a hriat ang an ti. Pilot ho an strike lo ni lek-in! Nakin deuhah chuan boarding pass min pe a, tlai dar 7-a thlawk tur an ti.

Zing dar 8 velah Jo'berg thleng tawh, tlai dar 7-a thlawk chhuak leh tur chu hun hi ka han ngah em em khawp a, airport chhungah chuan sum nei lem hlei lo-in ka vak kual ta chiam a, vawkhniakzawnthla ang chu nise, ka hniak chu a chiar dup ngei ang.

Rina loha ui buk sa - Thinrim deuh, engmah tih theih si loh, lunghnur deuh reuha ka vah pur pur reng lai chuan mi pakhat hian Hello hi a rawn ti pawr huar mai a, ka han hawi chhuak chu "Japanese i ni em?" tih zawhna ka dawng chawpchilh nghal a, ka ni lo chiang kuang tih ka sawi pawhin a awih lo a, passport phawrhin kan in hrilhfiah tep a ni. Chu mi chu Zimbabwen, kum 10 chhung Japana hnathawka awm tawh, Holiday hmanga haw tum a lo ni, Japanese ang min tih avangin min rawn be tawp a lo ni a. Kan ti ti ta a.

Victoria Falls kal ka duh a, ka thlenin turten min hruai theih loh thu leh Hotel a full vek tawh thute ka sawi thuphung a, ani chuan Kan kal dawn asin, mahse kan thlawk dawn a, ticket kan la vek tawh a, i duh chuan ka lo ensak ang che a ti teh hlauh a. Ani chu SA Airways-a thlawk tur a ni a, Harare-a in be pawp turin kan inthen ta a.

Zan atangin zingah - Kan thlawhna lah chu a reh vung vung mai, departure gate chu chauhthubarawhah kan han pan ve a, Dar 9-a thlawk turin an lo tar leh tawh, dar 9 a lo ni a, 11 an ti, an tawlh zel mai a, passenger chu kan mangang hlawm tak zet tawh. Dar 11-ah chuan gate an hawng a, kan thlawk mai dawn emaw ti-a kan hlim hle laiin thlawhna pana Bus kal hmasa zawk chu Passenger zawng zawng nen a rawn let leh. Counter-ah chuan kan awmkhawm a, an han âng hlawm tak tak mai ah... kei pawh thinrim engphiar mah ila, ka aiawh lal hma-ah a ding tih ang maiin ka sawi duh tur ve ang zawng zawng chu Nu pahnihin an sawi zo vek a!! "Manager ko thla rawh u, nangni aia thunei, a lal chin kan hmu duh" tiin counter duty te an ankhum, a thenin "Kan pawisa min refund rawh u" an ti thul, kan ri luih luih mai.

Thlawhna pakhat chu pilot strike vangin passenger tel lo-in a lo thlawk haw a, thlawhna 1 zawk khawl lam felloh vangin an repair an ti, thla a va han muang lo tak. Dar 12, zanlaiah chuan thlawhna kan lut ta, lung a dam kim chuang lo na-a kan thlawk chhuak ve ta poh a, dar 1:30am, Christmas Ni-ah Harare International Airport kan tum chu a hma-a thinrima ang phiar phiar ho khan kut an beng leh ta dar dar a.

Airport-ah chuan Colonel Wilfred Varughese te chhungkua-in min lo hmuak, Col Premai- ka hmu thut chu tah te lam lam a chhuak dawn, India mi, Kerala lam an ni a, India ah chuan kan hran teh reng nen, mi ramah zawng unau inhmu ang maiin kan lawm a ni. Zan dar 9 atang khan min hmuak-in airport ah an lo awm a, kan thlawh mai loh avangin haw lo-in min lo nghak reng a, motorah te an lo mu mai mai a, immigration kan kaltlang meuh chuan dar 3 a ri thuak tawh a, kan haw nghal par par a, zing dar 4, 25 Dec 2010, Christmas ni tak chuan In kan thleng ta a nih chu....

Followers