Thursday, March 11, 2010

Inkhel ila...

Kan naupan lai chuan inkhelh hi kan han hrat ve khawp a - football a ni ngei a, a chang chuan a bladder a keh a, kan pet thawp sut sut thin - khup paw hrutin chawlhni tlaiah ngei kan inkhel a, ball boot te nei hek lo i le, a chang phei chuan ke zungpui pem nen nuan, khup pilh hret hrutin thim thut thut-ah bâl takin chhungte chaw ei lai ngeiin, Ui ei ru ang zul zul-in In-ah kan lut thin a nih kha maw..

Chuti taka inkhelh hrat e ti lo chuan inkhelh thiam vangin India ram-ah a hmingthang hle ti-a sawi tur erawh chuan vawi khat mah ka tel chuang lo, vawi khat erawh chu Chaltlang Hockey Club hmingin Tu emawni memorial-a Champion Team-ah kha chuan ka tel ve zeuh tak e, tin, College kal laiin ka inkhel nual bawk, vanneih asiamin Champion team-ah tel thei phian zel.

Tun hnu-ah erawh inkhelh chu sawi loh exer’ lak tak ngial pawh peih tawh bau lo, a en lamah ka ram tang ta thung a ni ber ang chu. Hetia English Premier League tihte, Champions League tih leh World Cup, European Cup tih vel en kan han hrat chhoh hnu hian khel lo-in ka en ve ziah a, a phuk aphak erawh ka hre lo-in ka luhchilh thuk teh chiam lem hlei lo.

Club hrang hrang-ah hian ka hriat theih tirh atangin Arsenal hi ka’n tan ve ngawt a, an bul bal erawh ka hre lo nasa, ka ngaihven em em lo bawk, ka lo tan ve ringawt thin, an Boss Arsen Wenger vang pawh hi a ni mai thei a ni. Vawi khat pawh Arsenal Jersey ha-in ka chhuak a, tlai thim dawn tawha ka haw chu mi pakhat nen kan intawk a, ani chuan hnai set sawta min en pahin “Nimin-ah kan hneh che u” a rawn ti ngawt pek a, a hma ni khan Manchester United-in Arsenal an hneh a lo ni a, ani pawh kha a tang thin awm tiah tiah ngawt mai.

Vawiin chu ka damsam mang loh vangin office ka thulh a, TV report ka en mai mai a, Champion’s League-a Arsenal-in FC Porto 5-0 a an sawpna report an lo chhuah mek pek a, an va hneh tiah tiah ve ka ti a, ka club te an ni bawk a, ka lo lawm ve leh viau a.

Inkhelh hi a mak ve ngawt mai, mahnin khelh hi chuan kan khel tha viau ni hian kan inhria a, midang khel en erawh hi chuan, “Awi, khi nawi nawi khi, a che thei thlawt lo a nih khi, ngatinge an thlak loh le..” ti hian kan lo phun kan lo phun ve ngawt thin. A kotlang-a awm hi kan thiam zaw ber thin awm asin.

Kan hringnun hi he inkhelh ang hi niin ka hre thin. Khawvelah hian Pathianin chhan neiin min dah a, Goal pahnih kan nei a, chutah chuan min khalh goal tumin nitin mai hian tha leh chhia chu keimahni-ah a inbuan thial thial reng a, kan Referee lah hi a ham strict nasa mai si a, tlema pen hlek pawhin a rawn ri fiak thak mai thin a nih hi.

Thenkhat chuan yellow card pawh kan hringnunah hian kan lo hmu nual tawhin a rinawm. Tha ni-a lang, mite hmuha mawi taka lang pawh hi chhungril tuiek tlat a awm theih a, Sawrkara hnathawka, hlemhletna leh eirukna tinreng zak kep chungin hlim takin chawlhni-ah Bible zak zehin kan chhuak leh thun thun a, sual tlenfaina hmangaih tui kan tana luanna chu kan zawng a, chawlhkar tluana kan tihsual chu Chawlhni vawi khata sukfai tumin kan hman hlel a, a fai mawh khawp ang.

Kristian Nula tlangval te chuan sual langsar lo tak puanhnuai chungin chhun engah tumah zah lo-in kan leng za dial dial a, nulat tlangval hlimhlawp leh nawmsip bawlna chu hnawl phal chuang si lo-in Kohhranah a kul ataiin kan inhmang a, hei vang hi a ni ngei ang thalai zingah Kohhranin Dan thianghlim a tih anga innei an khat theih em ni..

Infiammi ni lem lo pawh he kan khelmual zau pui maiah hian kan inkhel nuai nuai chu a nih ber hi, tu emaw chuan a ti fuh ang a, ti fuh lo fe fe pawh kan awm ngei ang, chuvangin a tlai hma hian fimkhur tak leh fel fai tak hian i inkhel teh ang u, kan khelh nalh loh viau chuan kan Pathian hian Red Card pe-in min hnawtchhuak hlauh dah ang e...

18 comments:

  1. Kei pawh ka tleirawl tirh a trang in inkhelh, ,football khelh ka hrat em em Maj Dula te ho nen poh kan inkhel ho trhin a .Ka lian deuh 2 a in khelh khelh ka thiam chho leh a .Tunah erawh chuan in zeuh zeuh chiah ka thiam tawh hma ka sawn ve hle lo mo .

    ReplyDelete
  2. Inkhel chiah i la :) Yellow card vawi 2 hmuh nawn chuan red card a ni mai

    ReplyDelete
  3. Vawi thum corner penalty! kawngkawi rem leh remlohah in inkhel ngai em? Bang in pet per avangin in nei tupa thinrim chuan in ball a sat ding awl awl ngai em?

    Comics bu in in chawi ngai em? In ball pet laklawhlaiin in rap thep ve sut thin em? Mizo kan nia pet tur a siam kan ni. Pet ngailo hi chu....

    ReplyDelete
  4. Ka mumangah vawikhat ka pet goal a, chu bak ka khelh ka hre lo, football chu. Hockey erawh chu sorkar tiangkawm kan neih hma, mau bul hman lai khan ka khel ve zeuh zeuh.

    Volleyball erawh ka tui khawp mai, nuam pawh ka ti.

    Ramdang football aiin local football ka tuipui a, ka en peih zawk bawk.

    ReplyDelete
  5. Yellow card leh red card context chu i va rawn hmang thiam ve hotunu, nang nge nge. Ziak tha khawp mai. Nia, min red card chauh pawh hlauh tur a nilo, kan aia tha zawkin min substitute daih ang tih te pawh a hlaawm a lawm. Chuvangin a tha thei ang bera khelh reng a ngai.

    (Arsenal fans ho hian tiang context hi kan nunnah kan lo inzirtir thiam a nih hi. :-) Gunners for life!)

    ReplyDelete
  6. A tawp chu van khar mawi e...(ziakmi tih tak ah....)

    ReplyDelete
  7. Keuh thlu nalh leh pek ve aw! Red card rau rauvah khiti lam red card hmuh hi hlauh viau tur a lo ni!

    ReplyDelete
  8. hmingtea - In zeuh zeuh khan in tak tak-ah a hruai lut leh hlauh mai ang a.. buai viau ang e??? I thiam zel turah ngai ang.:)

    Dave - Nia, inkhel ila

    sawmpuia - vawi thum corner penalty chu kan ti ve thin, a fet thlak ngawtin ka hre mai hahaha, inkhelh hma-in rules te chu kan sawi sa thlap zel mawle... :-)

    Fela - Volley ball i thiamzia chu a hretu te kan ni e.. :) Badminton pawh kha i thiam viau lo maw???

    illusionaire - Gunners for life.. teheeee
    substitute nih kha chu kan duh bau lo thin a nih kha mawleee.. hlauhawm fuuu ni!!!

    Anon - ziakmi.. awi ka thi... haha i ti lawmawm e

    faka - nia ti raw, sunday school hming lama awm aia pawimawh khilama hming an lam hunah kan awm lo ang tih hlauhawm alawm..

    Alejendro - lo tel ve hram hram teh, inkhelh i thiam em kha, kan lamah i tang dawn nia :D

    ReplyDelete
  9. Uar laia uar chungchuang, thlaha thlah fel hmak ka ni, thlìr pawh hi ka thlîr vak tawh ngai lo!

    Tisa insawizawina thatzia Paula'n a ziak hial a; chu aia insawizawina tha zàwkin min fuih nghàl. Intlànsiak chanchin pawh a ziak ve, pakhatna chiah kha làwmman latu a nih thu a ni thung.

    Tùn hmain tlàn miten intihsiakna tak tak an thlen/beih hmâ chuan an ke leh kàwngah te thil ritsak an khai hnawk thìn; mahse, intlànsiakna tak takah chuan min tihnawk thei apiang paih thla tùrin min fuih ta thung.

    Paula BOXING thiam ve dàn kha ... mi dang va hnek lovin, below the belt lam ni ve lo bawkin, "mahni leh mahni ka inhnek" a ti heu mai! Kan sakhua hi a danglam bìk a ni ber e.

    Hebrai Lehkhathawnah "kut uai thla leh khup zawi" a tihte dinhmun chhiat nawi nawi tùrzia kha ... Boxing leh Karate, Ultimate Fight vèla ban an phartîr zàwk hi chu an chak nge nge ... Las Vegas-a an inbeihna RING ngei ka va hmuh phei chuan tha zat thar ka chàk ve viau ...

    Lallukhum vuai thei mah kha dawng tùrin an lo bei nasa thìn, vuai thei lo hi ngawrh a lo ngai zàwk thung ta!

    I thuziak a ngaihnawm, i Zotawng thiamzia hi ka awt ... ka chhiar nawn lai tlar bìk a tam mai!

    ReplyDelete
  10. chawnghilh - nang meuhin ngaihnawm i ti thin hi ka lawmna a ni e, hetianga nangnin in han sawi hian ziah leh zel chakna min pe-in min ti phur sawt thin a nia...

    Ni e, taksa sawizawi hi a tul hle a, chutiang bawkin kan rinna pawh hi sawizawi fo kan mamawh bawk, i comment hi a namai lo, sermon tham zet a ni e...

    ReplyDelete
  11. A ngaihnawm leh pek mang e! Kei pawh inkhelh chi hrang hrang, Football, Badminton, Tennis, Hockey, Volleyball thleng hian ka khawi ve nual a, nuam ti ve em em si hian engmah thiam tak tak zu nei bik miah lo ia! Naupan laia thingtlang khuaa mau khelkawm leh Zawngtah tang suih mum hmang ngeia kangpui zau laia Hockey kan han khel khu rum rum mai thin te kha chu aw...ball chawh thiamah ni lo, vaivut chawh khukah kha chuan World level chu kan ni ve ngei ang!!

    I thu ziak tawp lama i han khung luh dan lah chu a va nalh teh zaih ve!! Inkhelh zawng i lo thiam a nih hi! :)

    ReplyDelete
  12. a va han tha em! he tiang deuh chiah hian football nen a kan hrinnun teh khin thalai inkhawm a ka sermon tur ka lo in buat saih ve nasa mai a, mahse le, KTP Bial conference ah Leader kal chhuak turin min sawi khal daih, ka hawi hai teh a sin mahni kohran a sawi leh tur pawhin a tih chi si loh a, thu dangin kan in buatsaih leh ta anih kha.....

    He tiang thuziak thiam te chu i in thup rei thei hle mai a

    ReplyDelete
  13. Rin aiin i lo ti mi zek anih hi maw le, kei chu infiam hi ka ti ngai lo khawp mai. Kumli danah inkhel(FOOTBALL) hi ka en thin....

    ReplyDelete
  14. Games & Sports ka tih lohna a rei ta. A en lampang chu ka peih fu, hman chang apiangin. Insawizawi nan erawh walking ka nei nasa, chak tak takin ka kal thin. Arsenal fan ka ni ve, he club ka ngaihsanna chhan chu an chak/chaklo emaw an khel hi a mawi a, attacking game an khel hi hmuhnawm ka ti. Hei vang hian ka tan chuan 'hnehtu' an nei reng.

    I ziak tha, tuna i post pawh hi. Referee thenkhat chuan 'fault' thenkhat an hmuh hmaih avangin card pe lo mahse, kan Pathian hi chuan a hmuh hmaih ngai lo tlat. Min zirtir tha hle mai.

    ReplyDelete
  15. Keimah - ihkhelh hi chu a nuam ve alawm, a engamah thiam em em lo mah ila. Mau khelkawm te pawh kan hman ve nasat thin kha mawle... I ti lawmawm i lo leng lut a, kan phuisui sawt mai..

    muana_hmar - I sermon chu sawi tho rawh, in rilru a in ang tihna a ni mai alawm.. thu ziak hi thiam a har khawp, i lo ngaihlu a, ka lawm hle mai.

    bta.hnamte - hahaha.. i lo ring chhin ngai reng reng em ni? kei pawh tunah chuan kum li dana inkhel en hi a ni ta deuh ber mai

    Thiama - I ti dik chiah, Referee thenkhat hi chuan hmuh hmaih an nei ve fo mai,hmuh hmaih ngai lo Pathian hma-ah hian khelh fimkhur chu ngai tak a ni...

    ReplyDelete
  16. E khai! Hman loh chhungin in lo va inkhel nasa hlawm ve! Thlan tla phungin in lo khel hlawm a ni maw??

    Tih tak emah chuan kei pawh College kal laia football-a Gold medal la ngat ka ni a (Subsitute pawhin la ve vek hek!!) sawi tur nei lo pawh ka ni bik lo. Middle School-ah pawh Kolasib North Zone tana Hockey khel tura thlan ka ni ve a, mahse ka khupkawi tak maiah an vua a, tiangkawm ka lek chhunzawm lo nghal :D

    Captain, lehkha i thiam thei tih chu ka hria, heti ema Mizo tawng i lo thiam hi ka hre ngai lo. Khawii atanga i zir nge??

    ReplyDelete
  17. Zaia - E khai thianpa, va reh ve, i va buai awm em em. I awm loh chhungin thlan sa phul kaiin kan lo inkhel alawm..

    Inkhelh chu i ti vak lo tih ka hre reng, mahse i en peih ve tho alawm..

    Mizotawng chu nangma hnen atanga ka zir bak kha ka zir belh chuang hleinem.. :-)

    ReplyDelete

Followers