Friday, September 10, 2010

Awi.. awi.. awi..!!!

Darthlalanga mahni sakruang ngunthluk taka han bih chang hian lung hi a awi thei mawlh thin lo, hmazawnga in en hi chuan zia ve viau thin mah se, a nâk pek zawnga han en hian Dul hian hma a hruai lurh mai thin a, a manganthlak thin ngawt mai. Nula a pumpa hetia Dul hmahruai kan nih reng chuan hmelin puak a ti lo nen, Tiam tlat e tih ni a awm thei dawn tak ngial lo tiin in tih cher ka'n tum ngial thin a, a harsa lam hret a ni. A chang chuan Ka dul kiar hi awm lo se chu ka thau deuh hi chu pawi lo mawle tiin ka inhnem ve leh ngawt thin bawk a. A hrim hrimin ka búkte hi a rit lutuk reng reng, ka weight pawh hi tih hniam a ngai a ni.

Hmanni lawkah BP ka check a, a lo sang vawh vawh khawp mai, exercise lak chu tih makmawh a ni ta. Ka thian pakhatin Gymnasium ah ka kalpui ang che, a ti a, hun engemaw chen kan tum tawh hnu-ah kan khaihlak reng a, kan ti hlei thei lo. ni 9 tlai lam khan kan va kal ve ta teh poh a. Ka pian ahnu lama ka vawikhatna a ni.

A hmasa berin Cycling min tihtir phawt a, minute 15 chhung tur an ti a, chet chak a har hle mai, chak deuh hlek rawh an tih pawhin ka thei tawh lo hei bak ka ti zel a, minute 15 a rei duh ngawt mai. Ka zo chu hrui min pe a, zuanna tur, Inhruizuante lek lek chu naupan laia kan tih than a ni a, huphurhawm loh viauin a lang, ka han ti dawn a, ka zuang thei ta der lo, a hma-a ka lo cycling nasat avang khan ka ke a zâwi tlat a, ka tlu thlawrh. Minute 10 chhung zuang rawh min ti, chawl chungin ka zuang a!!!! Minute 10 chhung chuan hah namenin ka hah lo. Hahthikulin ka zo hram a ni ber.

A hnu lehah chuan ban exercise kan ti leh, thil rit deuh mai min pawhtir a, vawi khat.. vawi hnih... vawi thum... a bak chu ti leh thei tawh nang.. awi, awi, awi... van beidawnthlak tak. Min kalpuitu chuan, "I tih theih loh chuan tilui suh, a hmasa ber hi chu a har thin a nia" a ti a, ka pawm khawp mai.

Ka tha te chu a khur der der a, ka zawi ruih mai, ka luak a chhuak nghulh a, ka mit mengte chu a fiah lo ruaiin, ka meng phe ruai mai a ni. Bathroom ah ka lut a, ka luak thei bawk si lo, chhuatah chuan ka thu thlawrh a, chau hmel pe chhe ve chiang ngawt mai. Heti em em hian a ni maw ka lo fit loh le, College kallai te khan kan inkhel ve nasa thin a, racing ah pawh Gold medal te ka lo la ve thin kha a ni a, rilru chuan a la zuam khawp mai mawle, taksa hian a lo tlin tawh awzawng lo.

Mizotawnga Insawizawi kan tih hi a dik ngawtin ka hria, taksa hi a zawi loh-a a khawng tuh chuan hnathawh leh thil tih hi a lo har em em mai a ni, taksa ti zawi a, ti hahdam turin kan sawi zawi fo a ngai a lo ni.

Friday, September 3, 2010

Buaina râl a lian.

September ni 1 zing ka tho chu tuk dang ang bawkin Office kal turin ka insiam mawlh mawlh a, khua a lum tan tawh avangin chet vel pawh a peihawm ta lo hle mai. Ka thiannu-in min rawn call a, 'In veng lam boruak enge, hei kan veng lam chu a buai lutuk a, kan rawn kal tlang thei lo mai thei a ni' a rawn ti a, 'ka hre hleinem, eng boruak nge' tiin pawnah ka chhuak a, boruak chu ka va thlithlai a, mipui chu an lo phu sup sup tho a, motor tlan pawh ka va hmu, lungmuang takin, 'engkim a pangngai e, kei pawh office ka kal dawn' tiin ka thiannu chu ka hrilh a, ka insiam chhunzawm a, office tur chuan hun pangngaiah kan chhuak ve leh ta mai a.

Thui tak kan tlan tawh tihah chuan kan hma lam chu a buai tan ta, midang chu an in turn a, an let ta zung zung mai, kawng an dang chu lo niin, keini pawh chu kan let a, kawng dang atangin eng tin tin emaw office chu kan thleng hram, kan staff te erawh kawng lakah buaina tawkin an let leh hlawm a, office thleng chu kan tlem hle.

Chhun lamah chuan boruak a tang chho ta telh telh a, Finance Council kan nei a, kan zo fel dar 12:30 velah chuan kan staff te chu haw mai rawh u tiin kan hawtir a, keini kan la awm hnufual deuh chu buaina ral lianin min dang ta thap mai, pawn a chhuah ngam ta lo, silai a ri ta ul ul mai a, thiante kan phone kual a, Office ah khan riak mai rawh u, boruak a tha lo lutuk an ti. darkar 3/4 chhung lek chuan mi 4 lai chu an lo thi hman der a, mi 11 lai an hliam bawk.

Kan han in en chiang chu mi 9 office-ah kan lo la awm a, Foreigner vek kan lo ni!!!! kan OC te nupa Brazillian, CS te nupa Angolian, Principal te nupa leh an fapa Argentina lam, kei Indian, ka thiannu Zimbabwen.. a khawtual mi chuan hetianga an buai changa a buaithlak zia an hria a, a then an lo kal lo a, a then an haw hma vek.

Tlaiah chuan muangmarin haw kan tum a, ti deuh takin kan tlan haw, kawnglaiah chuan lungtum leh thil dang motor danna turin an lo dah thluah a, Motor ke an hal alh hluah hluah bawk a, kan tlan lai chuan motor chu an lo vawm bawk.

Motor tang laklawh dang pawh an awm a, kan innghakkhawm a, Police motor a rawn tlan a, engemaw chen chu min thlah. Police motorin min letsan hnu chuan hmun pakhat, duty awmna-ah kan chawl lawk a, chutih lai chuan tleirawl rual hian min beih tumin min rawn pan ta mai, lung vawm tur an rawn keng a, an rawn tlan hul hul a, Police ho chuan silai hmet puakin tear gas an vawm khum a, an darh leh ta ham ham. Ke-a kal mai chu him zawka kan rin avangin ke-a kal mai kan tum tawh lai chuan Police motor a rawn tlan a, kan awmna hmuna duty te chuan kha kha zui nghal rawh u min ti a, chak tawkin kan lim chhuak ve ta a, kan veng chu him tak chuan kan thleng ta hram.

2008 February khan hetiang thil hi a thleng tawh a, Oil, Tui, power leh ei tur chi dang man sang chak lutuk vanga mipui thinrim tawngkhawng-in an lungawi lohna an lantir a ni ber a, Cabinet Emergency Session ko-in an han thukhawm ve chuk chuk a, President Guebuza chuan tlai lamah Radio leh TV lamah te thu sawiin, "Sawrkar chuan thil man tihniam turin theih tawp a chhuah ang" chu a ti na-a engmah Solution a awm loh avangin mipui an lungawi thei chuang lo, ram chhung mamawh 30% chauh Mozambique hian a thar chhuak a, a bak zawng chu lakluh vek a nih avangin he harsatna sutkian hi thil namai a ni lo.

Tun kum hnih kalta chhunga thil man san dan hi a namai lo hle, Chhangthawp tlawn khat man pawh 25% dawrhin a sang a ni, hei hian mi rethei zawkte dinhmun a nghawng nasa hle. Chutih laiin minimum wage chu 2550/-mt chauh a ni thung si. Chu-a-chhapah Politician te eirukna leh hlemhletna nasa taka an inhnamhnawihna mipui lamin an hre bawk si.

Hmanni deuha ka thiante nena kan inhnialna ka hrechhuak zawk mai, "Guebuza tunah in duh lo a, in sawisel a, nangmahni thlan tlin ngei a ni si" ka tih kha.

Motor dan nan kawngpuiah motor ke an hal nasa hle, bawlhhlawh leh thing leh lung lian pui pui an dah bawk.

A tuk-ah pawh chuan tumah pawn chhuak lo-in kan tawmin ta thap, kan veng lam tlangval ho chuan buaina chawh chhuah an chak khawp a, kan in kawtah an inhawrkhawm lut lut reng a, kawngpui chhuah an tum, Police-in an lo nawr let, annin lungin an vawm, an innawr chawhma thak a, police ho chuan a vanvawr zawngin mipui rikrap nan silai an hmetpuak leh thawr thin. In dang reng na na na chu tih ngaihna dang vak an hre lo nge tlai lamah chuan an darh ta hram a, hetih lai hian veng dangah erawh chuan an la buai hle tho.

Followers