Wednesday, March 3, 2010

Tawngtaipui ngai..

Nizan chu ka mu chiah tihin ka phone a rawn ri a, ka han en chu ka thenawmnu a lo ni a, tap deuh tuau chungin "Capt. Come to my house" a rawn ti tawng a, sana ka en a, dar 10pm a ri chiah...

Ka thenawmnu Regina chanchin hi ka post hmasa lamah pawh ka sawi tawh. A fanu Irene (tunah kum 11) hi kum 5 vel a nih tang khan Thin natna khirh deuh mai an hmu chhuak a, a thaw te a hah a, an buaipui em em thin. Mozambique-ah an enkawl a, Hmanrua an neih that loh avangin Brazil emaw France emaw-a kal turin an râwn a, sum an neih loh vangin an ti puitling thei si lo, a natna hi tihdam theih loh hial niin an sawi a, enkawl erawh chuan engemaw chen dam thei tura ngaih chu a ni.

Kan hotute hi Brazillian an ni a, anni puihna azarah nikum October thla khan Brazil an kal thei hlauh mai a, engemaw chen an enkawl hnu-ah March 16, 2010-a zai turin January thla khan hlim takin an lo haw a. Irene pawh a tha niin kan hria a, kan lawm hle.

Mahse kar hmasa atang khan a rawn chau ta deuh thut a, zirtawpni-a a nau nen an infiam lai chuan a tlu ta thut mai, damawiin an pan nghal a, amahah engmah puhmawh tur an zawng hmu lo, a lû na a ti em em a, a taksa a chau bawk, engmah a ei thei lo a, thut pawh a thu peih lo, a mu deuh ta chawrh chawrh mai a ni.

Tichuan, nimin (3.3.2010) khan damdawiin an panpui leh a, a chau hle a, a thawk a mumal lo hle bawk, Intensive care-ah la lutin oxygen pe-in an lo enkawl nghal a, a nu leh pa-te chu room-ah an lut ve thei lo a, pawna nghah chawrh chawrh ai chuan tiin zanah an rawn hawsan ta a ni.

Keini chuan an riahpui ringin an in lam kan va kal ta lo a, call kan tum lahin a tlang thei si lo, chutih laiin ani mangang chuan min rawn call ta tawp mai a lo ni.

Ka va kal chu amahin sitting roomah a lo thu a, a pasal Beira a lo inbual mek, "In rawn haw dawn lo turah kan ngai a, kan lokal lo a" ka ti a, a tawng thei lo, a bu nghat ringawt a, nutling meuh rawl chhuaha han tah chu, Ruang awm em si lo a inthiam lo ve deuh nge thutthlengah chuan vanvadakin a thu a, a mittui a tla zawih zawih reng mai, engmah a sawi thei lo, kei pawh chuan sawi tur ka van kher mai.

Beira inbual zo chu a lo phei a, kan ti ti thei ta nual, ani sap tawng a thiam si lo, an chanchin a han sawi pawh sa tah chhuak pek ang chauh mai hi ka tan chuan a ni a, amaherawh chu Pathian hi a tha khawp a, kan hriatthiam dan tawk tur zel chuan engtin tin emaw kan inbe ve zel thei a, atawpah chuan Pathian kuta nghah mai loh chu tih theih kan nei lo, aman engkim a hria a, i tawngtai leh phawt mai ang tiin ka tawngtai a, Regina pawh chu eng han sawi thei hek lo le, I tan chawlh hahdam a tha e, Irene a awm lo rau rau bawk a, mu hahdam rawh ka ti a, thuawih takin room lam chu a pan ve ta mai bawk a, tichuan ka tinsan ta a ni.

March 16-a zai tura inbuatsaih mek an ni a, ni 12 March-a Brazil lam pan tur an ni, Irene dinhmun a that loh viau chuan Doctor te chuan an zai ngam dawn lo a, tin, khualzin thei turin a taksa a tha tawk angem tih chu kan venthawn ber a ni bawk. Tun ang dinhmuna a awm reng chuan Brazil lam pan pawh a huphurhawm hle a ni.

Chuvangin tawngtaipui an ngai a, a nu Regina tak pawh hi a ngaihtuahawm khawp mai. Tawngtaina hian thil a ti thei a, Pathian kutah kan nghat tawp mai a ni, chhiartu zawng zawngte in fianrial tawngtaina-a lo hre ve turin ka han ngen che u a ni.

9 comments:

  1. Thinlung a tawk hle mai. Regina awmdan tur chu ka hriatthiampui i ring ngei ang. [http://zaitea.blogspot.com/2008/10/ka-fanu-dam-lo.html] Vawikhat tal chu ka lo tawngtaipui ve ang e.

    ReplyDelete
  2. Ni e. pathian thu thu ni e....lo tawngtaipui phot ang.

    ReplyDelete
  3. Ka lo tawngtaipui nghhal e.

    ReplyDelete
  4. Irene te reuh chu a hmel a that nen, a khawngaihthlak hle mai. Hepatic coma a nei nge Meningitis? Kan lo tawngtaipui e. A nu leh pa pawhin Thlarau Thianghlim awmpuina leh thlamuanna an neih ngei theih nan.

    ReplyDelete
  5. Zaia -
    Nia, keini hi chuan kan hrethiam vak lo zawk, i ti lawmaw e, i lo tawngtaipui a

    Anon -
    thank you

    Thiama -
    enge pawh ka hrethiam ve lo, mahse tunah chuan a tha deuh a, a thluaka bawk awm an hmu thar leh a, hei hian a lu a ti na vak a niang.. a khawngaihthlak khawp mai

    ReplyDelete
  6. Hmm...lungpawp sa emawni le ? "Pianglo ngaiin kan tap lo" an ti alawm le, Hotunu. Tawngtai na ah kan lo hria ange.

    ReplyDelete
  7. chhangte_ll
    i ti lawmawm e, pian tirha awm chu a ni mai thei e, ka hre thui vak lo chu lam chu..

    ReplyDelete
  8. In His healing hands ... because of Calvary and the Empty Tomb ... Irene, you are in His care!

    ReplyDelete
  9. chawnghilh-
    so true, she's getting better now.

    ReplyDelete

Followers