Wednesday, March 31, 2010

I Pe nge I La???

PEK tih lam hi tunlai chu ka rilru-ah a la riak laklawh tlat, ka'n sawi chhunzawm leh law law teh ang, Thir chu a lin laia den tur an tih kha maw..

Hmanlai-a kan officer hmasa-te hlawh la kha a buaithlak awm thin ngawt asin, an awmna Corps-in Headquarters-ah pawisa ba an neih chuan an hlawhah an deduct sak thin a, cash counterah hian an awm rei thei, an hlawh han la te pawh kha "I pe nge i la..?" an ti fiamthu thin a ni awm e.

Chaltlang Ruam Veng kan awm laiin kan thenawm nu pakhat, upa ve lam tawh thil hre thei zet mai, sawi liam puat puat mai thin hi a awm a, tarte e ti lo khan Nula Tlangval in ngaizawngte hi a hre thei em em mai a, thlalai duh zawng, an ti ti leh an nundan te, Drug Addict te, an chhungkaw khawsak phungte hi a lo hre teuh thin a, mak kan ti thei khawp a, Engtinnge thil hi heti em ema a hriat le, kan ti a, kan thiannu pakhat chuan “A thawnchhuah zat a la lut a nih hi”a ti et a, a sawi awmzia chu amah pawh a tawng duhin zawhna a zawt hnem a, a sawi hnem bawk a, a bulah pawh miin thil an sawi hnem a, thil a lo hre thei em em hi a lo ni a.

Computer hmang kan tam ang bawkin Internet hmelhriat leh hmang pawh kan tam a, thiam lutuk loh pawha tih ve nawk nawk theih dan a lo awm zel bawk a, a sakechek keini ang duang pawhin kan luh chilh ve nasa ta hle a, luhchilh thuk poh leh a dang hriat chakna min pe a, ni danga kan hmelhriat ngai loh leh hmel pawh kan hmuh ngai miah lohte nen inhriat theihna rem chang min siam sak a, mahni-a awmte tan hlei hlei hian a lo tangkaiin khawhar te pawh nasa takin a hnem a, a tangkai ngei mai. Heti zawng hian ka ngaihtuah a, he internet khawvelah pawh hian thian kan duh anih chuan keimahni ngei pawh inpek a ngai a ni tih a lang chiang hle.

Mi tam takin Blog te siamin kan rilrua thu awmte kan han ziakin kan han tarlang a, thiante leh hmelhriat lem lohte pawhin tha an lo tih ve zawng anih chuan comment te pein min lo chhiar sak ve a, hei hian rilru a ti hlimin phurna nasa tak min pe a, ziah zel chaknate, mahni inrintawkna thlengin thiante fuih na azarah kan lo nei ve thei a, hei hi hmasawnna ropui tak keima tan phei chuan a ni ngei mai.

Hetih lai hian miin ka blog rawn lut se, ka thuziah te rawn chhiar ve se ka duh a nih chuan midang blog-ah te pawh ka len luh taimak a, an thuziahte ka comment sak leh ka hlutsak te a pawimawh em em a ni tih ka hmuchhuak zel a, hei hian thawnchhuah zat lakluh tih hi min ti hrechhuak a, kan Pathian thu-in “Pek chhuah chu pun lehzualna ani”a lo ti ang hian, kan chet chhuah hnem poh leh a let leh a tam mai thin a lo ni.

Tui tling reng chu a thianghlim thei lo ang hian luang chhuak tur kan lo ni a, Pathian kan rinna kawngah pawh hian che chhuak a, mite tana thawk tur kan lo ni e, mahni awm hmuna awm mai lo-in hmun hla leh khawhar zawkah te kal a, mamawhtute tana thawk chhuak tu nih hi a pawimawhin kan mawhphurhna liau liau a lo ni. Kan thawh theih leh tih theih erawh a in ang vek lo tih chu hriat sa a ni a, kan kalna hmun pawh a in ang vek thei lo, amaherawh chu kan tih theih zawn theuhah rinawm taka thawk zel tur kan lo ni e. “Miin a theh apiang chumi vek chu a seng dawn si a” Galatia 6:7b

22 comments:

  1. Pe rawh u ti chuan pekin in awm ang an tih kha maw.
    Ka block ah hian chhungkua 8 kan awm a (steps in trawm bik)kan u hian a hnathawhna hmun a trang hian thlai hi a rawn hawn trhin a kan ei sen loh tur hi kan trhenawm te chu kan sem ve trhin a an lawm khawm trhin mai.
    Kan trhenawm te pawh hian thil pek pawh min pe chamchi ve bawk.Mak ve tak chu mingo vek mah nise chi seh eng i lo fahran te pawh min ban in kan in ban tawn vek thei nia maw le.
    I ziak thiam in a trha in a dik ka ti ve pah reng (sawm lam sawi dan)

    ReplyDelete
  2. Sipai Pawl Officer ho hlawh chungchang i ziak dawn emaw ka ti hman zet a, mahse i thusawi tum tak ka chhiar thla zela i tehkhin na a tha thlawt e. "Easy Come, Easy Go"....Malsawmna hi Pathian in a pek theih bakah Setana pawh hian a pe thei, mahse phuba leh nunna chungah zawng Pathian kut ani e.

    ReplyDelete
  3. Pe tam apiangin pek zel tur an duh an ti thin. Kan Lal Isua, kan tana a rawn in-pekna; kan tana athiha a thawhlehna ni lo thleng tur hian, i rawngbawlna -ah Lalpa malsawmna lo thlen thar mawlh rawh se!

    ReplyDelete
  4. I rawn pe tha e.
    Easter Chibai le!!

    ReplyDelete
  5. I pe a, kan lo la a ni e. Ziah tur hre lova kan hawi kan hawi laiin, ziah ngaihnawm a harsat dan tur te, hetiang chu engtia ziah tur nge tihte kan ngaihtuah chhung hian i lo thaikawi zet zet zel mai. Min ziah zawh khalh takngial dawn, a nung chunga phum ve mai chi i ni :P

    ReplyDelete
  6. I Pe (Tuai) nge i La (Nula) i rawn ti dawn emaw ka ti a, thilpek leh lak lam a ni daih mai! I hawl zau leh mang e. Kan Officer-te hlawh atangin blogging world-ah. I ziak tha lutuk.

    ReplyDelete
  7. hmingtea - i ti lawmawm ve pah reng mai.. haha i sawi takah chuan kei pawh ka thenawmte hian mi ban an ching khawp a, thingpuife thleng hian min rawn dil thin nia, a hmeithai zawk zawk hi.. hahaha

    chhangte_ll - nia, ka thusawi tum nen a in rem em a, ka han sawi ri mai ania, "phuba leh nunna chungah zawng Pathian kut ani e" i ti dik chiah.

    Sekibuhchhuak - i loleng lut leh thei maw? i va rial rei ve.. i mi duhsakna vangin ka lawm e..

    dr_feelgood - nang pawh chibai mawlh mawlh le, nangni chu ruai nen Good friday te kha in bei vel a ni maw?

    Zaia - hei, phum chi nang le, Naua te u, nauhaia te u, tha te te khan min chhilh rawh u ka ti ang a, i hlau viau mai tur asin... :P

    Thiama - Tuai lam chu ka hrut chak loh lam tak a ni rih, rilru-ah chuan a awm riai ruai hahaha.. i ti lawmawm e.

    ReplyDelete
  8. Ka chang duh tak mai thu tha takin i rawn ziak chhuak vek a chhiar anuam hle mai...

    "The more I give away, the more comes back"

    ReplyDelete
  9. I'n sawi takah chuan ka pek ai hian ka lak hi a tam zawk mai awm mang e, te ka ti! Mi hausa nazawngin an pe tam chuang lo va, pe nasa te hi mi hausa an lo ni zawk... tih te ka ngaihtuah ta zel a... A ngaihnawm satliah lo leh hle mai.

    ReplyDelete
  10. Ka chhiar chhuak dap mai, a chhiar a nuam hle mai, mahni nihna haider lui talhin thenawmpa mizia ah hmehbel a khaikhin lui talh chungin kan chhiar talh zel chu ;)

    ReplyDelete
  11. Network khawvelah chuan give and take a lawm tiraw :-) I thuziah ka ngaihtuahna lo lut ta chu Mizote tribal society kan nun hlui chawhmeh insuah tel tel te, chhiatni thatni a kan han inlawm thin te hi. Mihring kan changkang a kan inhlat telh telh hian ka hre thin. Sa tui hnai tak pawh hi thiante emaw chhungte min kilpuitu an awmloh chuan a tuidan tur ang takin a tuizo miahlo a sin.

    Mahse i sawi hmasak nu tawngduh deuh give and take dan khi chu ka duhlo :-)

    ReplyDelete
  12. Irene - a va lawmawm em, i duh lai tak a lo ni ve chu.. i lo leng khat riau mai..

    faka - a dik asin, mi hausa satliah hian an pe nasa chuang miah lo, sum ngahte hi an rilru a hausak ve a ngai khawp mai...

    amuana - hahaha, i chhiar chhuah hrim hrim chuan a tha a ni mai, a tawk... :)

    sawmpuia - ka sawi chhuah nu pakhat khi kei pawh a zia chu ka duh chuang lo, ka han tehkhin ve mai a ni e, khitiang letling hlauh khi ka niin ka hria, thil ka hriat loh danah.. haha

    ReplyDelete
  13. Hotunu chu aw, a tawpa blog a comment (visitors) nen i rawh compare khi chu i va han ziak thiam tak e aw. Nang nge nge. Chhiar pawh a hlawk khawp mai i blog hi chu.

    ReplyDelete
  14. illusionaire - hotupa chu i va ti lawmawm thin ve, nangni te hi alawm khitia ka sawi inrintawkna te min neih tir thin tu chu... Aizawl lam chu nuam bawk maw????

    ReplyDelete
  15. Pe pawh ka pe Lak pawh kala ka Haihawt ve tho

    ReplyDelete
  16. Lak aiin Pek in lukhawng a nei zawk an tih kha. Lak aiin Pek hian mihring te zu ti hlim thin zawk a maw le, kan phak tawk tawk ah.

    Rilru a ti thar khawp mai.

    ReplyDelete
  17. @Anon - mi pangngai i ni a nih chu...

    ADavid Ralte - Ni e ti raw,pe theia awm hi a hlu bawk alawm.

    ReplyDelete
  18. (midang blog-ah te pawh ka len luh taimak a, an thuziahte ka comment sak leh ka hlutsak te a pawimawh em em a ni tih ka hmuchhuak zel a)

    Hmsss..ka blog i lo leng ve thei..tin comment nen...:)

    ReplyDelete
  19. @EPISTEMOLOGY - ni tuk eee... i blog chu ka lo leng fo alawm, ka tawng tam lo mai a ni :-)

    ReplyDelete
  20. Hotunu, Aizawl chu nuam e. Ka haw leh tawh Mumbai khaw lum ah :(

    ReplyDelete
  21. illusionaire - chuan kar hla D chu i sa ngei bawk em, Mumbai khaw lumah chuan..???

    ReplyDelete
  22. :P Chung tiang sa hman ka ni lo, ka buai lutuk :P

    ReplyDelete

Followers