Thursday, February 19, 2009

India mi nih hi......

Ka tawn ang tawng hi an awm ve nual chu ka ring. Khawilo vah chhuah nikhua hian khawi ram mi nge ka nih tih hi ka zawhna tawn chamchi a ni a, Indian ka ni ti-a ka sawi apiangin an awih lo ziah bawk. Chinese emaw Filipino emaw ka nih ring an tam ber. Khawlai ka han kal te hi thenkhat hian China.. tiin min lo ko thin. Airport-ah takngial pawh ka passport an thlek vang vang hnu-ah Indian I ni maw? An la ti hram zel a, Sibut ti khawpa han chhip thlak ngheng tak hi an chakawm thin.

Indian ka tihin tuman an ring ngai lo a, Mizoram atanga lokal ka ni ti then ila, tiin a chang chuan Mizoram ka han sawi ve bawk a, an bo tulh tulh a, Mizoram chu khawia awm nge hrilhfiah leh tho a ngaih thin avangin India chu ka ti leh nge nge thin.

Vawi khat chu wholesale dawr lian zet mai-ah thil leiin kan kal a, a neitute chu Indian an lo ni a, ka thiannu chuan Hei hi Indian ve tho a nih hi tiin keimah chu min kawk a, anni chuan Indian tih takah chuan an ngaihven ve viau a, mahse Indian ka nih chu an ring ta tlat lo mai a, khawmaw I passport an ti hram a, ka pe lo chiang khawp mai, ka voter ID ka entir a, Ashoka pillar an hmu a, an awih ve hram, chutah an rinhlelhna tibelhchhah tur tingin Hindi ka la thiam lo zui. Kan han inhriatchian hnu chuan kan inkawm ngeih ta phian a, a hnu phei chuan Biryani te min rawn kensak vel a…!!!!

Kar kalta mai khan Finance Training, MANGO buatsaihah ka tel ve a, mi 18 kan niin ram hrang hrang an ni nawk a, UK, USA, Canada, Zimbabwe leh Mozambique te kan nih pawlh nuai a. kan chhun chaw ei lai hian kan ti ti luai luai thin a, a ni tawp bera ka thutpui pa chuan, “Midang ho khan Indian I nih an ring lo a..” a ti a, Ni e, ka ti a, thu dang deuh a sawi dawn emaw tih nak laiin, “An ti dik chiah, I anglo a lawm” zu la ti hram a…

Thil lungchhiatthlak tak mai pakhat tunhnai lawk khan ka tawng leh pek a. South Africa ram chhung ami Kruger Park tlawh kan tum a, ka thiante Brazillian pahnih leh Swedish pakhat nen. Mozambique ram chhung atang chuan kan chhuak mai a, S Africa kan lut tur chu ka passport a tang ta tlat a, S Africa chu ka lut ve thei ta reng reng lo mai a, Thiante chu Commonwealth Country an nih vangin Visa hran an mamawh lo a, kei INDIAN PASSPORT humtu chuan Visa ka mamawh bik a…!!!!!! Thina rim rawh tih hi a ngai hran lo, a thinrimthlakin a zahthlak ang reng bawk sia, Refusal letter an siam a, min thawn kir leh ta daih a, chutih laia ka rilru-a awm chu DEPORTEE tih hi zu ni teh tlat a… Mexican Deportee nen ka intehkhin deuh roh a, thiante chu kal tlang tho rawh u ka tih luih tlat avangin rilru bet zan lo chuan an kal ta poh a. Office atangin min lam tur motor an rawn tir a, South Africa border-ah chuan motor chu ka nghak ta ran a. CID leh Custom duty ho nen chuan kan inkawm ta vel mai mai a.

Kan pi leh pu-te kha khawchhak lam atanga thlang tla zel an ni tiin an sawi a, engtia Mizoram an thlen tak hnu a thlang tla zel ta lo nge maw an nih hlawm ni, hei India ram mi kan nih reng phah a, kan hmel leh zia, pianphung, nungchang, duhzawng (ei leh in leh incheina thlengin) a dang em em si a, tawng a dang nen. Kan duhzawng hi a Indian lo em em mai si a, engvanga Indian dang, vai kan tih maite hi haw em em thin nge kan nih le..? ti te-in ka ngaihtuah a.

Kan naupan lai lah khan Hindi kha kan zir tha duh lo a, Bari Bara Vaimawngkhak te kan ti vel mai mai a, tun hnu-ah pawh vai ram hmun hrang hranga kan han bazar ve nikhua pawhin an bazar tawng fahrah te te-in kan rak khum mai mai a, Lei duh leh hralh duh na na na chu kan indawr ve zel mai bawk a, tawng thiam tumna tak tak kan nei ngai lem lo kha a lo pawi a ni.

Englekhawle, hnam dang pasal ka nei emaw, ram dang passport ka nei emaw a nih ngawt loh chuan ka duh emaw duh lo emaw Indian chu ka ni kumkhua dawn a, chuvangin ka tih tur pawimawh tak pakhat chu Hindi thiam hi ni ta berin ka hria. India ka haw leh hun chu Hindi hi ka vaibel tih tluka thiam turin ka va han zir rua em!!! ti te-in ka insawh ka insawh thin. Ka hmel leh pianhmang-in India hnam dangte ang mah suh se, an tawng anga ka tawng zarh zarh theih phawt chuan min hmu Indian ve mai ang chu maw… INDIAN NIH TAK HI CHU…

Followers