Tuesday, October 22, 2013

Ram buai - as told by Mom



Kum 1966, ram buai lai khan kei chu kum 20 mi lek ka la ni a, School ka kal tawh lova, ram hna thawkin ramah ka riak thin a.

Ni khat chu Hmar Chaltlang daiah mizo leh sipai an in kap vak mai a, sipai ho thinur chuan kan khua Bukpui an rawn chil nasa ta mai a, chumi hun chu Buh tuh hun lai a ni a, ramah kan riak a ni a, chhun lai takah chuan kan khua chu a khu tur nguih nguih mai a, buh pawh tuh thei tawh lovin thlamah kan lut a, ramah chuan tlangau a rawn au a, khua-ah haw vek tur an rawn ti a, haw kan tum a, tumah khua-ah haw chhuah loh tur, sipaiin lo an rawn fang dawn an rawn ti leh a, kan kirleh tur chu khua atanga rawn kal, chhungkaw pakhat chhangchhe deuh mai hi an lokal a, khawiah nge kan bihruk ang an rawn ti a, Thlama bungraw awm zawng zawng chu Vau-ah kan thukru vek a, lo mawng lamah mi lo fal deuhah kan zu tawm ta mai mai a, zanah pawh kan muhil thei lo a.

Ramah chuan tlangau a rawn au leh a, khua-ah haw vek tur a rawn ti leh a, a zan azanin kan haw chhuak leh ta a, in kan han thleng chu in ding hmuh tur a vang hle mai a, kan in pawh an lo hal ral vek tawh mai si a, haw na tur kan nei ta lo a, mi In kang lo awm chhun leh Biakin leh School ah te an lo awm khawm hlawm a, tap ri leh tawngtai ri chu kan thawm hriat tam ber a nit a mai. Kei chu ram atanga mahnia haw chhuak hlei thei lote hruai chhuakin ram lamah ka kal leh a, sipai hmel chu ka hmu tam lem lo.

Khua an hal lai hian ka nu-te chu In lamah an awm a, sipaiin In an hal lai hian an buaiin an phili em em mai a, in chhung bungrua kan neih tha ve te chu thiar chhuah an tum ve na-a an hamhaih atalangin engmah an chuh tha thei lo a, ka nu pawhin kan thingrem lian chu phurh chhuah tumin a insiam a, hnam a bat a, vawk chaw a leihbua a, a bel a chawi chhuak ringawt a ni awm e. Tlaiah vawk an ril a tam a, chaw pek tur a nei lo leh ta si a, a buai hle. Thingrem lian pawh chu phur chhuak ta lo-in a kang ral ta vek a ni.

Kum tawp lam chuan buhte a lo hmin a, sengte a lo hun chho ta a, ram riah phal a ni si lo, kan lo lah chu km 6 laia hla a ni bawk si a, nitin kan feh a, buh phurh haw a ngai thin bawk si a, a hahthlak thin hle mai a, chuvangin In tin mai chuan in lama buh thlen nghal lo-in chhekin kan siam hlawm a, chutah chuan kan dah khawm hnur mai thin a ni.
Sipai ho chuan kan ar vulhte chu an duh duha min laksak an tum thin a, kei chuan ‘Ka phal lo’ ka ti thin a, hmeichhia ka nih vang nge ni, engtinmah min ti chuang lem lo.

Chung laia ka tawn hriata hrehawm ka tih ber thin chu Kuli kha a ni a, kan khua atangin motor kawng hnai ber chu Zanlawn a ni a, chutah chuan sipai hoin an bungrua te min dah tir thin a, a hrehawmin ahahthlak a, a ninawm ber thin, kan zawh loh phurin tap teuhin zan khaw thim hnuaiah kan kal thin a, a thim thin si a, engmah a hmuh theih loh a, midangte kan hmuh theih nan kan hma amite phurah Dumde kan dah thin a, thenkhat phei chuan hla an phuah fiam thin a –
Zanin thla a eng hle mai

Kuli nan a tha,
A hahthlak na-a
Thim aiin a nuam – ti tein an phuah thin.


Thursday, March 1, 2012

Kum Laklawh

Kumin hi ka tan kum laklawh a ni han ti phawt mai teh ang!

Kum a lo thar a, thlalai member lak a lo hun leh a, nula la ni ve ta nafam chu ka'n inziak lut ve leh teh poh chu a nia. Zaipawl member an ti leh a, a zai thiam ber ang hrimin ka'n tel leh ngawt bawk a, office hna lam a kiam chuang si lo, hna a tam duhin awl lai reng reng ka nei leh ta lo a, Blog pawh ka khawih hman hlawl lo ti-a phun phun, pachhekumtiam ang maia kumtharah chuan ti reng khan chhuanlam ngai bawk "Ka buai lutuk" tih chu kan chhakchhuak leh reng mai dawn a nih hmel hle mai.

Kum laklawh a nihna chhan han sawi tawh ila -
Kum laklawh ka tih zawk taka chu keima mihring kum zawk hi a nia!

30+ nih chinah hian thil hi a danglam ruih thin tih chu mi tam tak lo hriat hnu a ni. Thalai zinga han tal hi chuan kan lo chawhnu ruih tawh reng mai. Kan tunlai viau emaw tih laiin 20's ho-in awlsam taka tunlai hla lar ber ber maimitchhing diar diara an sak te chu hlabu en chut chut a lo ngai tan tawh tlat.

Justin Bieber kum 18 a tling ve ta an ti a, keini ang duang chuan E, kan lo ti ve satliah ringawt, Thalai Picnic tur an ti a, laklawh deuhin kan awm, kal ve em chu ni chiahin a lang lo, Ka buai kan ti liam leh mai.

Chutih rualin Nu-ho bula tal tur em chuan kan la in phal mang si lo a, Kohhranah pawh hian kan laklawh leh tlat zu nia! Chuvangin kan tana inhnemna awm chhun ber chu Puitling Sundle School hi zu ni tawh mai a! Tui vak lo pawhin kaikim lawmman lak tum ang hrimin kal tluk tluk ila han ti dawn ila, zin chhuah lo ngai ve leh thin bawk si..

Tunlai hian pa valai tih hi a lar viau a, ka tel ve mai dawn emawni ka ti rum rum a, anmahni lam erawh chuan min duh hauh si lo a...

Followers