Wednesday, March 2, 2011

Bial fang ang u aw..

Mahni lo maha buai ve nak lai hian Blog update hi a bata bat ni-ah kan ngai ve bawk si, thu leh hla lama tuihnang mi nih loh phei chuan hawi hil mai a awl khawp. Chuta chhapah hmun hla tak takah kan zin kual ve leh bawk thin nen. Tun tum update pawh hi bial ka'n fanpui lawp lawp mai teh ang che u.

Division account enfel turin ni 19th Feb, ah Maputo ka chhuahsan a, tawng ka thiam that loh avangin Hotute hnung zui lo chuan mahni-in ka zin chhuak ngai lo a, tun tum chu thih leh thih tiin mahni hna pawimawh a ni bawk nen, ka arkawhchhuah ve tawp mai a ni a, a zamawm duh thin hle.

Patling pui pui, Heti hian ziak rawh kan ti a, thuawih takin an ti ve mai thin hi a vanneihthlak thin ngawt mai

Hetia han zinkualina a kaihhnawih pakhat chu Sermon a ni a, hanthawk ringawta tum tlak theih ni hek lo le, chawlhni-ah inkhawm a ngai a, a hminga tlawhtu nih chuan thusawite a chawh leh zel a, hetah tak hian buaithlak a awm leh thin. Hlauhthawn lawk ang ngeiin Thingtlang lamah chuan tawng lettu an awm lo a, loh theih loh avangin Portuguese-a thusawite a ngai leh thin a, chu chu an local language Bitonga te, Tchena te'n an han let leh thin ania, a chanve pawh an hril zo lo tih hla hi kan hrechhuak vung vung thin, ka thusawi kha hrethiam hlawm tak maw aw.. te ka ti leh hnuhnawh.

A sawi chu ka sawi ve ngei!


Han inkhawm hian mi thahnem tak lo kal se kan duh rual rualin an thahnem poh leh rim a na a ni leh thin si, hnar han hup mai te pawh a chakawm rum rum thin, in chibai nan Bianga fawh an uar viau leh nghal a, ner reng chunga biang insik a awl hle, a mawi lo hle thung si. Khua a lum a, an thlan hluam phei chuan kan han in chibai zo hi biang hrukhulte a ngai thin. Hmun pakhata kan inkhawmna-ah phei chuan Biakin bang dap, lian lem lo takah naupang 80 vel leh nu leh pa, thlalai te nen kan in êk beng a, rim a tak tha khawp mai.

Naupang ho hi an thu bit teh mai ania..



Thinghlim hnuaiah Lunch pawh kan ei mai
He mite ho hi an buaithlak teh asin, thu ka sawi a, kan DC chuan an tawng, Bitonga-in a let dawn a, ka thusawi dawn chuan Portuguese hrethiam miah lo in awm em? in awm chuan ban han phar teh u.. ka ti a, an ngawi thap, in hrethiam vek a ni maw? ka ti a, Aw an ti dual, chuti chu Portuguese in ka sawi ang a, Bitonga a leh a ngai dawn lo tihna ni maw? ka ti a, Ngai.. an ti leh si!!


Kan Mizo pi/pute khan thangthar hla phuah tur a phuah zo tak ngial dawn tiin Pi Hmuaki kha a nung chungin an phum a, kha kha mizo thawnthua a nung chunga phum kan hriat chhun chu a ni awm e. Chu pawh hmanlai thil a ni a, tunlaiah chuan a thleng tawh awm lo e. Mozambique ah hian thil mak tak tak hi a thleng chawk a, an puithuna leh serh leh sang avang te, dawi thil avang te a ni thin. Nhamaxaxa hmun kan tlawh a, thingtlang ve tak mai a la ni a, helai hmunah hian Nu pakhat a nung chungin an lo phum a ni awm e, a hming Luisa a ni. He nu hi khawtlangah pawh pawimawh ve tak, Kohhranah pawh pawimawh leh challang ve tak a ni. Hman deuh lawkah a pasal a thi a, a chhungte dang pawh natna neuh neuh nei leh thihna hial tawk tunhnaiah an awm zeuh zeuh a, Luisa chu Dawi thil hmanga a pasal leh chhungte chu tihlum niin a chhungte chuan an ngai tlat a.

Nhamaxaxa, a nung chunga mi an phumna chu.


Nikum December thla kha a ni awm e, Luisa chu a fate leh a pasala chhungten an dawp ta a, ani chuan Dawi thil a lo hmang reng thin a, hun rei tak a lo ti thin tawh a ni tih a inpuang ta a, chuvang chuan a chhungte chuan chumi ni la la chuan a Nung chungin an lo phum hmiah a nih chu. An phum hnu chuan an thenawm khawvengte hnenah thil awmzia sawiin Luisa chu an phum thu an hrilh a, annin Police an pun a, Police te chuan hemi ni vek hian a thlan chu an hai leh a, a lo ti fel der tawh a ni.

13 comments:

  1. Portuguese i lo thiam tawh bika nuam awm. Min la zirtir ve dawn nia; har ngawt ang thumal pakhat pawh ka la hre lo, mahse sapho hian an tawngah an la lut leh teuh tho ang.

    Biak fawh khi tha fu ni, i fawp let ve ngei ang chu.

    Khi, an duat hle mai che, mahse an ngo lo.

    I blog i update-a a nuam e. i reh vang vang a a khawharthlak.

    ReplyDelete
  2. Ka tih thin loh dan takin, vawikhatah ka'n chhiar zawh nghal vek chu le!

    Class i kal tha peih lo chung pawha thu sawi nana i hman theih khawp i thiam thei chu mak ka ti hle mai. Khawvel tawng lar zingah hian Portuguese aia har hi a awm ang em aw? Pu Seki-a te tawng pawh hi a har an ti viau tho.

    Pi Hmuaki kha chuan Luisa-i angin dawi a hmang ve lovin ka hria. A chanchin a dangdai hle mai.

    ReplyDelete
  3. An rim mawlh chu khawlumah phei chuan, naia neih ahar viau dawn anih chu. An biakin a tha lemlo, mahse khitiang khi ka awh zawk chang atam ta.

    Mahni kut kawih ngeia an sak anih phei chuan, tha lehzual. Mizo kohhran tam tak ten kan tihsual deuh fo nia ka hriat chu; biakinte kan sak sak zung zung mai thin a, anmahnin harsa taka an thawhchhuah ngei hi nitheise chu atha berin alang.

    Anih loh chuan, engngemaw hleka, kohhran lian zawk ( dintu ) an pun vat zel fo.

    ReplyDelete
  4. mission field chu buh seng tur ala tam awm cher cher hle mai maw..capt!

    ReplyDelete
  5. E capt lunglen thlak ve le.An rim chu a ther ve ngawt hlom ang chu.An hmui a lian bawk a han in fawh chuks nan a that hmel hlawm ropui si a.

    Maj U Dula dam mo in nu unau te ho an dam tlang em.

    IC mama blog ka coment thei lo.

    ReplyDelete
  6. Luisa-i chu christian ni reng si in dawi lam thil a lo pratice ru reng tihna ni maw? Van chi loh ve. Kan dinhmun ang te te hian Setana hian mi hi a tibuai a. Luisa pawh sum/power corruption, drugs tihvel nilo, an culture leh beliefs lama a weakness, dawi thil ngatin a thlem ve nih dawn chu.

    ''kan pi hi a ngo e'', an ti ve laih² dawn nih khi! :-)

    -bmw

    ReplyDelete
  7. Rp - thiam pawh ka la inti hleinem, a tulna hian a ur thlu hrim mai pawh a. Sap tawng thumal hi an hmang teuh zawk a, mahse a lam dan a dang thin a.

    Zaia - class kha ka kal tha lutuk ringawt :D a hun chhung a rei lo e tih mai a ni. Portuguese hi a har tih laih laih chu a ni, ka rawn pemsan tep tawh e.

    Sekibuhchhuak - Nia, local material hi an theih ang angin an lo lakhawm ve thin a, mahni kut ngeia sak hi chu Hei hi ka ta an ti ve nge nge alawm. A then chuan a bangah brick an lo hmang ve a, mahni tawka thil lo lo tuak ngah tawhte hi Headquarters atang chuan a chung kan khuhsak thin. :-)

    dula - nia, seng tur a la tam khawp mai, i favah rawn thawh ve la.. i nei hriam deuh ang a :P

    hmingtea - nia, an rim chu a na khawp mai. Amama blog hi kei pawh ka comment thei lo, a hawng lo aniang e.

    bmw - nia, Luisa hi a ti mak ngawt mai :( Setana hi a fing khawp mai, kan panna hi a hre chat chat zel chu a nih hi.

    ReplyDelete
  8. Buh seng tur an la tam bawk si.....Lalpan awmpui zel che rawh se.

    ReplyDelete
  9. Nung chunga inphum hi a hrehawm ngawtin ka ring!

    Chuan Luisa-i chuan a pasal leh a chhungte thihna chu ama tihah a pawm thlap tihna em ni?

    ReplyDelete
  10. Irene - thank you. dam zel maw, i reh veng veng mai a, khua i ti har khawp mai. Engtiknge naute i neih dawn a?:D

    ReplyDelete
  11. luliana - dawi thil a hmang tih a inpuang a, an thihna chhan chu enge ka hre tawh bik lo, dawi hi an ring khawp mai a, kei chuan ka ring em em hran lo a... I blog lam a va reh ve.

    ReplyDelete
  12. Chulai tak chu a mak ka ti ve mai mai a. Dawi khan a tih thih tak tak a ring ngam chiah si lova, engngemaw vang tak chuan an thi ve ngei chu a ni bawk sia...

    Ka blog chu kan update ve khiah kha... :P

    ReplyDelete

Followers