Monday, June 6, 2011

Dawn chang ni hian ka ngai Nunhlui liam hnu.

Ti leh hluai teh ang, rilru-a a lan chang changin. Nunhlui liam hnu hi dâwn kir mai loh chuan koh kir rual ni tawh si hek lo, tah hian lunglen hnemah dah leh ang..

Pitar putar, nu leh pa tam tak hi zawt ila an nuna hun hlimawm leh ngaihawm berte hi an naupan lai tiin an chhang furin ka ring thin. Keini tak ngial pawhin lunglenna chhan tur kan ngah ve em hi maw!

Thingtang kuai rual kan nih atangin mizo hmeichhia in an tih thin ang hi chu ti kim ve vekin ka inhria. Ka nu hi nu azawnga mizo nu ber mai, kut âwl ngai thei hlek lo a ni mauh mai a, kan âwl ber ni pawhin a puan tah tur la kan hlum tal thin. Hahchawlh pahin la hlum rawh u a ti hmiah zel. Chuti a nih loh vek chuan sikul chawlh leh kar tawp chawlh hi chuan ram lamah êm nen kan in um liam ziah a, kan thawh a tlem emaw a tam emaw, kan tih theih awm tawk hi min thawhtir tur a hre ziah leh nghal. Unau zinga milai nih vang emawni, hruai chik takah min neih nghe nghe.

Ka Pa thianpa Pu Thangkhuluaia hian êmte, hnang sin taka hlaiin nalh deuh maiin, te fel at mai hian min tah sak a, chu chu ka phur liam ve ziah, ka Êm-sin chu a nalh em avangin feh pawh a phurawm deuh sawt thin nghe nghe. Thiante nen kan han kal ho bang bang a, annin paikawng pangngai lian tak tak an phurh laiin kei chuan ka êmte ka phur bam bam thin a, nuam ka ti thin teh e..

Haw dawnah phur kan han siam a, Vaimin, fanghma, hmazil leh thlaifur chi hrang hrang, a lian tha tha phurh kha ka chak ve a, ka bei vum ve viau thin. Haw kawngah “I phur chu a rit em?” tiin min han zawt a, “Rit lo, a khin” tiin ka chhang tlat zel zu nia. Mahni phur rit tih chu ka hreh deuh ni tur a ni. Chuti chu ni mahse, in ka thlen hi chuan ka phur hi a phai thei hle, kalkawngah a rukin ka nun min lo chhawk a, ka phur a lo la then zeuh zeuh thin a lo nia, Nu hmangaihna hi chu a lo mak teh e!

In kan han thleng a, inti FEH tak maiin, chhungte tui lum sa-in kan han inbual phar phar a, kan phurh hnem leh hnem lohvin kawngro a su tawh lo, thlai phur hawtu kan ni tawh tlat a, in nghaktute chuan phur an han phawrh a, hahna zawng zawng theihnghilhin hlim takin Vaimin te chu kan rawh puak pawp pawp tawh mai thin.

A chang chuan Inrinni hian thiante nen Tumbu khawrh turin kan inzui liam ve leh hluai thin, tumbu hi thil tui chu a ni hran lo hle, mahse han veh vel hi a nuam ve hranpa a, a khaileng kan hmu a, kan han fik hmawk mai a, a lum tawp tawp a, a hnai-ah lei leh hnahthel ro a bet duh si, a ban duh bawk si, kut a bal duh thin teh e. A hmuam hmuh fuh chuan kan lawm thei hle, changel erawh a hek deuh, kan kih hnan tawp zel si a. Lairawk tumbu han hmuhfuh hnem deuh tum hian a nuam kan ti thin, lairawk hi chu a phak lo bik tlat a, a tui kan ti bik thin.

Tumbu khawrh hian Aidu hmuh fuh hlauh chang a awm thin a, a lawmawm thuah hnih thin, a sentil han mal malh malh phei chu a nuam dangdai ve riau, Aiduria hi a tui mah zawk na-a.

Mautuai khawrh erawh chu thil namai a ni lo thin, mau hung tha deuh kan han hmu a, mautuai a awm chuan kan han thutchilh chat a, a hmun a hnawn deuh chuan thosi leh vaihmite, thomitchhaih chenin min rawn vir nghal luih luih a, mautuai mê nen thak hiah nen, kan inhiat vual tet tut a, puan a lo mê tawh thin bawk nen, kan meng phelh phung mai thin a, hmai vung burin kan haw ta thin kha ania.

Naupan lai khan Gas tih vel a la awm lo a, kum 13 ka nih hnu chauh niin ka hria gas kan neih ve kha, chu pawh a to hle a, kan hmang zen zen lo, Diakkawnah Pu Ruata te dawrah Rs. 57/- a ni thinin ka hria, thing nen kan hman kawp reng tho thin. A chang chuan khawnvartui stove kha kan hmang thin a, chhem hlum a har thin ngei mai, a chhin hlumna kan lei hnu-ah erawh chuan kan chhin hlum ta hmak mai a, a awlsam ta hle, mahse a rim a chhe duh hle.

Chutia gas a la van em avang chuan thingphurh chu hmeichhe hna ber a ni a, hun awlah thiante nen kan phur ve thin. Daihnai-ah thing kawi chhe te te kan han fawm a, in kan thleng a, chhungten “In va phur tha em em ve, thuro a tap ang a..” min han tihsak a, kan lawm ve em em thin. Thing ding ro tha tak hmuh fuh tum phei chuan a hlimawm ve hranpa duh khawp.

A chang chuan mauhakah mau ro mai mai te pawh kan phur a, dai hnai te a ni a, hun a duh rei lo a, chawhnu lam school chawlh remchanah te pawh a phurh mai theih zel a, kan chhek hner hnur thin, amaherawh chu mau hi a alh hluai a, a rem leh duak a, a vam ve tawh si lo a, tuah a hek bik thin.

Mau phurh hi fimkhur a lo ngai khawp mai, vawi khat chu kan mau phur kan chawl hahdam a, kan han kal leh tur chu ka u-in a phur a han kuai a, mau atang chuan Rultuha a rawn dak lawr vang mai a, kan te nasa teh e, rawn kal remchang mipa tleirawl ho-in an rawn that a, chuta tang chuan mau phurh kan tih ta riau.

Vawi khat chu Serchhip kan awm laiin ka u leh kan thiante 3 nen hmeichhia hlir Sakhisih ngaw lamah thingphur turin kan chhuak a, kan kal hla bawk a, thingzai ho thing phaw tha tak tak kan hmu a, kan ek teuh a, kan hlim hle. Hlawhtling inti takin kan haw a, thui vak lo kan kal hnu chuan Hauhuk an rawn hualreu ta vak vak mai, atu-amah khan Hauhuk hualreu lo la hre ngai hek lo I le, kan hlau ta khawp mai a, bak lengin kan tlanchhia, a hauhuka pawh chu khawiah nge an awm kan hria a ni zeng lo, kan tlan tawp mai a ni. Kei leh ka thiante 2 chuan kan thing phurh lai chu kan keuh a, kan Êm chu kan khai lawp lawp mai.

Thui tawk fang kan tlanchhiat hnu chuan kan veng tlangval kebai, kan ngei thin deuh mai leh a thian pakhat sapel tura chhuak hi kan tawk hlawl mai a, kan thla a muang suai suai nia.. Ramsa hram kan hria tih kan hrilh a, anni pawhin an lo hre ve reng a, kah an tum a lo ni, Hauhuk a nih kha an ti et a, a hlauhawm loh, tikhan thlamuang deuhin haw rawh u an ti a, kan mi ngei deuha pawh chu kan ngei loh phah ve ta deuh. Haw kawngah chuan kan hmuh theih ang ang thing kan fawm tha leh ta ringawt.

Tum khat chu Kolasib kan awm lai tho hian ka Pute khua, thingtlang leh chhawngah kan zin a, ni khat chu an chúl-ah kan feh a, ka Putea fate ho nen kan ni a, nuam kan ti phian mai a, tih tur bik em em nei pawh kan ni lo a, kan feh chak kan feh ve mai mai a ni.

Lo kan thleng a, bawkbawn leh samtawk tang rahte leh a chi tura an zuah lian pui pui hmin lek lek tawhte chu kan lo ta vek mai a, bawkbawn chang deuh deuhte chu hei chu a lian tha lutuk tiin kan lo vek a, a hnu-ah ka Putea fapa te an lo thleng a, kan bawkbawn lawh sa te chu a chang lutuk tiin thlam tlaitlanah chuan an theh chhuak zung zung mai a, kan haw teh e.

A hnu-ah chuan pangbal leh kawlbahra te kan cho e kan ti a, a bul kan hmuh chu kan bawhzui zel a, tlema bawk lil lel tawh chu kan vaihma vek a ni ber a, kan cho mai a ni lo a, a laih hian kan lai a ni zawk, kan hai vung terh turh mai a, kawlbahra chawhna te chu a kaw rel rul mai, tlaia in kan thleng chu kan râl atanga min hmutu te chuan “Vawiin chu in lovah Sanghal a chhuak emaw kan ti mai a!” an ti a, an then tha hlawm mai. Keini lah titha kan inti ve em em si a.

Hetiang hi kan naupan lai hun tam ber kan khawhral ve dan ania, dai hnaia sava veh leh thang kama kan vah kual dante, tawlailir ke tur thingtuai kan sah leh kan tawlailir siamte zawng zawng pawh ziah tham fe chu a la awm ngei ang.

15 comments:

  1. Ka tuina hlir mai i ziah chu mawle, ka lung i ti leng lutuk. In khua (Kolasib a ni em?) te hi ka khua anga kalo en ve thin, Serchhip lah chuti bawk. I thu ziak te lah hian mitthlaah thil tam tak, hun liam tawh min thlir tir, ka lawm in lung ati leng mange!

    ReplyDelete
  2. A va han ngaihnawm e. I nu chu a taihmak hmel hle mai. Nu taima ke bula seilian hmeichhia, fel lo an awm lo, an ti. I ziak ngaihnawm thiam bawk a. kan naupan lai min tihrechhuak uaih uaih mai.

    ReplyDelete
  3. I lo va thawk nasa ve. Kei pawh matric atanga a chunglam zawng chu ramah vek ka result ka hria, zah tur nge pawh ka hre lo;

    i lung a leng a ni maw?

    ReplyDelete
  4. Varte Kei chu lo emaw leipui emaw nei lovin khawvel ka hmang ral dawn a nih tawh hi.Kawmthlang huan erawh kan nei kum tin thung.
    Chuti chuang chuan naupangchhia ka ni lai atangin ramriah hlo thlawh ka ti ve vek.
    Sikul chawl tawh hi chuan tuichhuahen kan kal ziah chengkawl tumbu kan khawrh.Ke in ram kawngah kan kalthin kawngpui la kal mumal hek lo.
    Kal lam kan phur hawng lam erawh sakawr neih chakin kan sep tui thei khawp mai.
    Diakawn a awm i nih ka ring deuh kan tet zual lai chuan thenphek ram ah te khan tartiang puin kan kal thin.
    Diakawn field khi a la awmlo vailui an ti thin tui kan chawi thin a chhak hall awmnaah khian Kawhtea lui a awm leh .
    A lunglen thlak hle mai.Ruat Gas a te keini pawh khawngvartui gas a tui san tak a khai chi kha kan hmang uar rap Kolasib gas awm hma.
    Capt Laltawnan a zawrh vak thin kha.

    ReplyDelete
  5. A ngaihnawm khawp mai. I nuin a enkawl dan che u i sawi hi ka duh zual. Bawkbawn lawh hian my dear-i nen min tinui nasa.1987 kum khan kan awmna a HLS in a lova fehah a sawm. Thlai rah vanglaia feh an ni a,bawkbawn rah tawh phawt chu a vaihma hmiah2! Mautuai khawrh hi awih deuhvah ka thiam ve. Ka tlu tur indawm dinna zawng hian a tuai ka vuan fuh palh hlauh zel!

    ReplyDelete
  6. Khai a.. Suangtuahnaa thlawhhma ka'n fan chiam chu.

    I lunglenna thu hian ka lung a tileng kher mai. I nu atang reng chuan taima lo chi reng i lo ni lo. Thil tam tak mi hriatchhuahtir ka ti, i thuziak chu.

    Kei pawh tum khat chu ka mau put lai mek, kaw pakhat atanga rultuha lu lo lawr ngõh ka hmu chu ka hlau kher asin le!

    ReplyDelete
  7. A ngaihnawm ka ti hle mai. Ka naupan hun lai ka ngai thar ve mai dawn alawm le.

    ReplyDelete
  8. H.Vangchhia - experience hrang hrang i ngah ve bawk a, i hre nual ang. Kolasib leh Serchhip chu kan awm reng thin a, kan khua tak tak chu a ni chiah lo..

    caribou - ka nu taihmakna hi chhawm a har khawp mai, ka tluk lo nasa rap..

    Rp Pachuau - thawk nasa thin teh reng mai.. i va zinbo rei ve le, hei kan lung a lo leng hman a nih hi.

    hmingtea - thenphek ram i rawn sawi chu lung i ti leng. Chemlui kamah te khan Nul kan nei thin a, tui kan cheng nasa thin, ka sawi tel hmaih a ni.. :D

    ZL - ka nu hnathawh dan chu in training laiin in hriat chian kha maw :-) Ka nu Nui chuan pangbal chawh pawh a thiam bik dawn loh chu..

    TS Khupchong - lunglenga kur kur mi chu ka ni lo na'ngin ngaih chang hi a awm thin alawm..

    Krista - Serchhip kan awm laiin Kristaroluahpuitua tih an awm asin, i hminga Krista tih hi i hming tak tak a ni ve em? :D

    ReplyDelete
  9. Eu, va ngaihnawm thin em! Pu Ruat-gas-a te zawrh laia a man te i lo la hre thlip thlep bik elo?

    ReplyDelete
  10. @Varte: Ka hming ang deuh an lo awm ve reng a nih chu a. Official tak chuan Krista Roluahpuia Khiangte tih a ni zawk maha mahse Khiangte lai hi ka telh duh ta lo a ni.

    I blog ka lo luh apiang hian Pi Sonia-in Prime Minister nihna a decline laia a tawngkam-'My inner voice' tih kha ka hre chhuak ziah.

    ReplyDelete
  11. A ngaihthlak a nuam khawp mai, kei pawh i thil tawn hi ka paltlang ve hnu a ni ve a, lung i ti leng thar hle mai,.. Serthlum huan leh Banhla huan kan nei ve thina, a nuam thei khawp mai, Lo erawh kan nei ngai chiah lo, naupan lai chanchin hi a hlimawm in, min ti lungleng tu an ni fo thin. Good post

    ReplyDelete
  12. in naupanlai a van nuam bik! Lo a feh, thing phurh tih vel hi vawikhat mah ka la ti ve lova...ka chak leh hnuhnawh.

    I u mai phurh a rul lo dak vauh chu ka rap eee! Kanidarin a camera man to in lo hmet se, a nalh phian ang a :-)

    -bmw

    ReplyDelete
  13. Zaia - gas man kha neih a har thin teh asin, chuvang ania thing pawh kan tuah reng tho ni. Kar lovah Rs.100/- a rawn ni thuai leh nghal a! :-(

    Krista - a lo nih tak chu a, Serchhip khua i ni emaw kan ti hman alawm le.

    Hmelthatea - Sesawngah khian huan chu kan nei ve thin, Serthlum leh Balhla pawh a awm ve nual, nuam ka ti na-a hnathawh tak tak erawh kan hman ve meuh lo chu nih hi.. Thank you.

    bmw - Naupan lai pawh i nei mumal lo aniang ka ti nang hi... hahahaa..

    Kanidari chuan Rul pawh a chhuah hmuhnawm leh vek ang, Kireuh reng a la nalh mai.. :D

    ReplyDelete
  14. I thuziak ka vawikhat chhiarna a ni a, i ziak thiam khawp mai. A chhiartu nih a nuam khawpin ka hira.

    ReplyDelete
  15. Hotunu i ziak ngaihnawm hle mai, kolasib hi ka naupan lai ka hmanna a ni ve a, lung a tileng zual.

    Diakkawn corps CSM thin Pu Dohneha te kha an la dam emaw chu le

    Thiante nena ram kal han nawm theih zia kha aw, chhungkaw harsatna leh buaina te khan min la enghelh ve mang si lova, rilru thawveng takin engkim mai kha kan ti thin kha a ni si a.

    ReplyDelete

Followers