Thursday, April 21, 2011

Ka sumdawng ve

Tlem lai deuh khan Solomon’s Cave ah thawmhnaw dawr kan nei thin a, Krismas dawn hi Buh lu chuh lai ang maiin sumdawng zawng zawng mai an hmanhlel vek thin. October emaw November thla hian bungraw la turin theihna lam lamah an intir chhuak sung sung a, Bangkok, Hongkong, Kolkatta, Kalimpong, Katmandu lam thlengin an chhuak suau suau thin.

Ka unaute ho chu bungraw la in kil tin kil tang an hrut a, kei pawh a sakhaw rawngbawltu ber ni mah ila thahnem an ngai bawk nen, ka kut awl chu an hmu thei der lo, Katmandu lamah kal ve mai teh min ti a, kei pawhin unaute tang em em a, lo awl reng chu tiin mi zui tur tha an awm bawk a, an hnung zui a, bungraw hawn tawp tur chuan ka arkawhchhuah ve ta rawih a.
Zarkawt atangin Sumo-in Guwahati kan pan a, Guwahati atangin Rel-in Siliguri thleng, chuta tangin Bus-in Katmandu kan pan leh a, kan zin chau hneh hle.

Katmandu chu zing khawvar rual in kan thleng a, Hotelah kan invawm lut rawih a, kan inphihfai, kan inhnawhpuar a, bungraw zawng tur chuan kan phek chhuak ta. Dawr nghak ngai lo ta chu bungraw kal tur leh tha ka hre lo khawp mai a, kan kalpui U Ungtea chuan “Madin, nang enge I ngaihdan, enge I lak dawn” min ti a, “U Puitei tih ang ang a ni mai” ka ti zel a, U Puitei chuan min tihpui ta vek a. A B.Com graduate ber kha bungraw thlan kawngah chuan ka lak tlak loh ber a! Pawisa chhut vel thu-ah erawh ka tangkai ve hlauh, Indian Rupee leh Nepal Rupee kha 1.6-in khatih lai khan a inthlau a, thil man an sawi apiang kha ka lo convert zung zung thin a, chutih kawngah chuan ka tangkai ve hlauh, ni lo phei se chu Lota nupui chikhawn ding reng ang maiin ka laktlak loh ang.

Katmandu ah bungraw duh ang kan lak zawh hnu-in Carrier kan ruai a, keini chuan bungraw nghak turin Dulabari kan pan thla leh ta thung. Kalpuite an zei bawk a, bungraw lak leh dawr velah harsatna nei lo-in kan tluang khawp mai. Dulabari-a kan bungraw nghah pah chuan kan bazaar kual leh a, kan tei nasa fu mai. Tlai lamah chuan kan kalpui Mafela nen Siliguri lam pan turin kan inhawl chhuak a, thian dangte chu bungraw thawn tur carrier zawngin an cham a, keinin Siliguri lamah a dawn dan tur kan lo va chingfel hmasa dawn a ni, kei chuan rucksack tereuhte ka ak a, cue case ka hawl chhat chhat bawk, Mafela chuan bag lian vak lo a ak thung. Cycle Rickshaw in Nepal ramri chu kan kan a, Ramri-a custom duty te miin an hlauh theih nen keini lah chu tuman pip e pup e pawh min ti hlei lo, tuma tihbuai lohin ramri kan pel fel der a, ka cue case te chu rawn hmu fuh na se chu an man duh ngei ngei tur a nih vei nen.

Siliguri pan tur Bus chu ramri-ah kan chang a, Mafela lah kei aia la naupang ve leh chhawng, chinchang hre bik vak lo kha a nia, U Ungtea’n Pani tanky bulah in chhuk ang a, Hotel room hnih in book dawn nia a ti a, chutiang chuan Pani Tanky chu kan rin zawn ta.

Kei lah motor ka la rui zui, Siliguri khawpui chhung kan lut tawh, traffic jam lai takin tukverh-ah ka’n luak puat maia..h., pawn lama awm vai ho chu an thinrim teh e, min rawn melh raw raw hlawm a, kan tlan liam san ta daih a..

Hotel chu kan zawng hmu ve ta mai, room pahnih kan la a, pakhat chu bungraw thuhrukna tur, pakhat kan awmna tur a ni. Dulabari-a kan bungraw thiar tur chuan thiante chuan carrier an ruai a, bungrua chu chumi nileng chuan hotelah kan lo nghak ta a. An rawn thleng chhawr dawh ta ut ut reng mai, a lo thleng hmasa ber a lo thlen chuan ka hawihai ngei mai.

Kawngka an rawn kik a, kan hawng chu vai ngal ria zet pahnih hi an lo ding zum reng a, Mr.. ni em an ti, aw kan ti a, hei bungrua a lo thleng an ti a, room ah chuan an lo lut a, Ip tereuhte bak an nei si lo a, bungrua chu an la rawn la lut turah ka ngai a. Anni kan carrier chu an han inphelh ta ale… An chawnte chu thawmhnaw hlir hi an lo tawnbet khat tlat a, pheikhawk chu bag-ah muk em em hian an lo hnawh bawk a, kawr an hakthuah chu an hlip teuh bawk a, an pahniha an han inphelh zawh chuan Air bag pahnih chu a khat ti tih der a! An chhuah veleh keinin chu bungrua chu kan room pakhatah chuan kan sawn leh ta vek a. Room pahnih kan lakna chhan pawh kha kan Carrier te khan sual an chhuah hlauh chuan Custom ho hnenah min hekin kan room kha an lo kawhhmuh hlauhthawn thu-ah a lo ni a..!! Ven ngai apui a lo va tam em.

Bungrua chu a rawn thleng nileng a ni deuh ber a, an chhuah veleh hmanhmawh mangkhengin Mafela nen chuan room dangah kan lo sawn nghal char char a, kan hah ve hle mai. Tlai lamah kan thiante pawh chu an lo thleng ve ta a, kan bungraw dangte nghakin a tuk chu kan cham a, chumi pahin chung bungrua zozai chu engtinnge Mizoram kan luhpui ang tih ngaihtuah a la ngai cheu.

Siliguri-a sipai hmunah kan va kal ta a, Mizo sipai chhuti, Zoram lam haw tum an awm em tih kan ngaichang a ni, an lo awm hlauh chuan an bungraw zingah kan thawmhnaw chu kan thawn ang a, thawn man kan chawi thung ang, haw remchang an awm loh pawhin Guwahati thlenga bungraw thiara inhlawh duh tawk chu an awm ve reng thin, chutiang chu kan zawng a ni. Vanneihthlak takin kan hmu ta hlauh.

Bungraw thawn tur kan hmuh hnu chuan Hold-all, sipai ho hman ang, an bungrua ni-a ngaih theih tur leh thingrem lian tawk kan lei a, thingrem chu rawng dum kan hnawih vek bawk. Tah chuan kan buangruate chu kan rem ta a, kan inrem tlaivar thak a, zingah chuan kan zinkawng kan chhunzawm leh nghal. Kan bungraw min kensak turte chu Rel Station ah kan va chang a, kan bungrua chu kan thawnfel a, keini pawh kan chuang ve nghal. Guwahati chu him dam takin bungrua ten en kan thleng tar up mai, thaw khat chu a veng.

Guwahati – Aizawl hi a hautak leh dawn mang e, thawlhna-a phurh rual loh bungraw rit kan hawn si. Sumo kan la a, bungrua zawng zawng vawikhata phur duh an vang em em leh nghal a. Aizawl kan panna kawngah chuan ka kalpui U Puitei hnenah chuan “Hetiang hrepa sumdawn mai chu, Aizawlah hian thil hi to deuh mahse a awm hliah hliah, risk a sang si, ven tur tam si, in hah si. A thlep thum pawh chhiar se, a awm hluah hluah” ka ti a, u Puitei chuan, “Chutiang chuan mi hnenah pawh sawi zel rawh.” a ti ringawt.

Heta tang hian a ni sumdawnna hi tih mai mai a lo ni lo e tih ka hmuhchhuah ve tak ni.

8 comments:

  1. A thlep thum chu an hlep reng a niang sumdawng ho an hausa thei em mai!!

    ReplyDelete
  2. E heu hei zet chu(h) eng Conduct rule emaw ber chuan decipline tlak i ni e. Tak taka an phal mi in puten, ringawt ngawt a che.

    Lota nupui khi rawn intehkhin tawh suh Lota an awm hma chu, lolz.

    I ziak ngaihnawm, mahse takah chuan ninawm ngawt ang, ka peih zawng a ni lo; mahse dawt sawi chu duh ila ka thiam khawpin ka hria, ka duh lem lo mai pawh a.

    Dawt vawi engzat nge in sawi han report tel ta chee.

    ReplyDelete
  3. Veng tur a tam .Nia hmeichhia/nu/nula tan phei chuan an eng eng emaw te pawh veng a ngai tel bawk vei nen.

    Khatiang teh nuai khan a lawm sumdawn chuan tawn a ngaih thin ni.

    ReplyDelete
  4. A hahthlak hle mai. A tha heh zawnga a hahthlak bakah rilru a hah tel hi a hahthlak zual ngei dawn a. 'Min bum an tum takin,' ti a lo bum hmasak ngai bawk nen... a peihawm loh ka tih zawng tak a ni.

    Nang hi chu - hriat loha hleih pawh i nei lo a nih hi. I thil hriat lah hi i han hre chiang thei si a. Naupang tê e ti lo hian eng eng emaw hi i tawng thei bawk si. :D

    ReplyDelete
  5. ngaihnawm lehpek, in hotuten sumdawn an phal em ni! Nge an hrelo

    ReplyDelete
  6. daniel - nia, an lakna aia tlawma min pek pawn a thlep chu an la hlep tho ni lawmni? :P

    Rp Pachuau - dawt ka sawi miah hleinem, sumdawn hi dawt tel lo pawn a tih theih alawm. Vawi khat mi bungraw la ka zui ve dek dek chauh a, chutia hrem min tum mai le..

    hmingtea - nia, kan veng thum mai, kil tin kil tang..

    Zaia - Min bum an tum takin ti-a bum hmasak lolzzz.. i tih dan a nih duh hmel. Heti hian sawi ta ila, chuti chuan min hnial leh awm si a, heti zawng hian sawi teh ang.. tih vel i ngaihtuah thin haha


    Anon - Hei, kan hotute hriat lohin hei pawh hi ka ziak a nih hi.. ;) zawite-in

    ReplyDelete
  7. Thil reng reng hi mahni tuina leh tihthan zawng a awm a nih hi ti rawh..

    Aizawl hi alo thrang ve ta aniang, Solom's Cave pawh a hlawk nep ta deuh e an tih chu lee.

    ReplyDelete
  8. UIiiii i hlawk awmlo e mai, ti ve lo mai teh..

    ReplyDelete

Followers