Monday, August 2, 2010

Kar awl hnawh khah.

Thu thar teh chiam han hlui tur che u ka nei hran lo, ka sawi tawh ang khan, kar hnih kal ta chhung kha Auditor IHQ atangin ka mikhual a, atan ka in pumpek a ni ber a, Zirtawpni-a ka thlah liam, In ka thleng chiah chu ka chauhzia ka hrechhuak chauh a ni, Inrinni leh Chawlhni chu ka inkhawm zuai tih bak chang dang kân lo-in ka chawl nileng a ni ber e.

Heti taka min tibuai tu chu in hmu ve duh hlawm ngeiin ka ring a, tlem azawng thlalak ka'n hlui ang che u. Inrinni khan City tour te kan neihpui a, kan kal kual nasa ve fe a, a chauhthlak ve hle.

He Rel lem hian khawpui chhung kan han suartluan reuh a nih kha, City tour train an tia, a hma-in ka la hmu ngai lo a, kan kal ve tawp, 'tiang hi a lo ni a!!! Boogie 2 chu a nei ve ran a, seat hi hnawhkhat ta vek ila, mi 200 chu kan leng mai awm e, chutih laiin keini group, mi 4 leh American nupa chiah kan timing-ah hian kan awm a, kan kual ve ta vauh vauh a.


Kan American nupa 2 chuan a laklawh laiin min chhuksan zui - kan ticket hi nilenga vahkual nan a valid avangin duh hun huna chhuk a, lawn leh mai thei a ni a, anni pawh hian chawhnu lama lo man leh mai turin min chhuksan a ni - chuti chuan mi 4 chu guide chuan min hruai ta zel a. Mi tlemte hruai kual chu Hit vak lo-in a hria nge ni kan guide chuan, "in duh chuan in chhuk ve thei ania, kan round leh hunah kan rawn lam leh ang che u" a ti fo teh fahran leh nghal, kei lahin ka duh bik bau lo, a phakar reuh tlat a, chawhnu lamah tih tur dang kan nei ve tho bawk si. Kan kalna hnuhnung berah phei chuan "Hun a tlem tawh a, kan tlai si, in fangkual hman tawh lo" min ti a, ka ngaihdan ni bik ta hek lo, "E, va bei fair lo ve, tiangte chuan kan pawisa chawi man a awm lo e mai a, nidangah pawh ka hmang tawh miah lo ang che u, ka thiante pawh ka hrilh ang" ka ti, kan guide chu a nuih a za khawp a, "anih leh, minute 8 vel va kal rawh u" a ti, kan han fang kual leh ta hram a nih chu, kan let leh chuan, "ti kha chuan min hmang leh thin ang chu ti raw?" a lo ti a,"kan la ngaihtuah ang chu" ka tihsan.

(National Museum kawt)


Kan ni hnuhnung ber zan hian Dinner min treat a, kan lawm hle, mahse ei tur kan chah sual nasa khawp mai. Kan kal hma-in "enge kan ei ang, kan thianten enge an eia i rin" tiin min zawt sa diam a, "ka hre lo le, enge niang aw, CS te nupa chuan Bawngsa an ei ngei ang a, Colonel Deise chuan sa hring a ei duh lo a , a pasal chuan arsa a ei mai thei a" ka ti zut zut a, "nih chuan enge kan ei ang" a ti, "sangha kan ei dawn mawni le" ka ti a, "Nia, chah hmasa la, i ei ang ang ka ei ang" a ti ve diam. A hmun kan thleng Seafood lam kan han en kual den den a, sawi lawk ang ngeiin CS te nupa chuan beef steak chu an lam ta ngei, kei chuan chakai leh kaikuang tel deuh nuai kha ka duh a, anin Chakai a ei duh si lo, sangha ni-a kan hriat pakhat kha atan kan chah ta, a lo thleng chu "hei enge?" kan ti he haw, Squid a lo nia, a ban vel kha Octopus a ang sia, Majora chuan "Enge, octopus a mi?" a ti a, ka nuih a za si, nui put put chungin "Ni lo, Lula a nih hi" ka ti a, "a tui lutuk, hei ka ei turah pawh a tel hi" tiin ka thleng ami chu ka thai lang a, a ei ve ta poh a, a rilru a nuam zat lo aniang, a tuk thlengin "Nizana ka ei kha Octopus ti raw?" a la ti fan.

Major Francis hi mihlim thei tak mai a ni, Auditor e ti lo chuan rin aiin a tawh pawh a khirh lem lo a, mi inngaitlawm leh tawng duh tak mai a ni a, kan ti ti leh luam thin a, mikhual pawh a nuam khawp mai.

16 comments:

  1. Buai i ngeih a nih hi, i hmelah a lang e. Chakai ka duh lutuk, kaikuang pawh. Chengkawl, tuikep ka duh lutuk lo -Octopus phei chu ka duh loh ka ring.

    A karawl hnawhkhahnaah hian i lang no surh mai. 'Vauh vauh' i hmanna hi ka hriatthiam loh zawng a ni tlat pek!! Comment khat nak laiin, sawisel tur ka'n hmuh kher chu le!! :D

    ReplyDelete
  2. A ngaihnawm hle mai. In tour guide te atangin, IHQ auditor te leh nangmah thleng hian in chimawm tlang vek a lo nih hi. Ha ha haaaaaaa!!!

    ReplyDelete
  3. Lengzem chanchnbu phek 53 na i awh khat vek ani a

    ReplyDelete
  4. Nia,, fair tak zel in le, pathian rawngbawl tih vanga zai dawh zel bik te chu a chi loh reng reng ti raw? In chaw ei chu in puar meuh lo ang a..

    I report ngaihnawm khawp mai.. Reh rei deuh bawk a.

    ReplyDelete
  5. Mi buaipui theia kan dam hi a tha. Mahse tawngkam i hman nalh loh pakhat a awm, "A tan ka inpumpek vek a ni ber e" tih hi. Negro pachal tana inpumpek vek chu, Kei Mizopa hi ka lo ip deuh zawr mai mawle,Tak taka, i ziak naihnawm khawp mai, Kar awl hnawh khah nan mai mai pawh heti hi. rawn vawrh zel teh.

    ReplyDelete
  6. Zaia - Nia, Audit lai hian kan intuituah a, ei tur tha tha kan ei a, kan ei phu tawkin kan thawk leh si lo a, kan thau mum kung zel mai mawlee.... :D

    Vauh vauh hi maw, hriatthiam loh tur a awm lo, a thluk sangin lam la, a dik a ni mai...

    Thiama - mi chimawm deuh bulah hi chuan han chimawm ve deuh hlakte hi a chakawm thin alawm.. hahaaa

    ThaiBoy - phek 1 chauh maw??? :P

    b-buata - chu chiah chu mawle, kei chu ka puar a, kan thiana khi chu a puar lo mai thei ni :D

    Te-a - Khati zawnga ngaihtuah in awm ka ring rengah... ka hman luih a nih kha deuh teh ngata.. mipa te hi in thikthu han chhe zawr zawr se, hmeichhia hi kan hlim ngai.. :-)

    ReplyDelete
  7. Annu chu ka hrilh lovang nitin office kawngah kan kalho naa. In Audit zo chu a awk chhuak i ang awm e. In accounta a lungawi leh awi loh ka lo zawt ang e.

    ReplyDelete
  8. In post fuh khawp mai model zat mai a lom han tan tak tak chuan.
    Helam khawpui tam zawkah chuan bus fare hian ni khat a daih thin .Hman deuh chang chuan nileng kan chuang thei a khaw chhung services hrim hrim ah chuan.

    ReplyDelete
  9. Kar awl chu i rawn hnawh khat ngaihnawm hle mai hotunu chu. In thil tih leh nitin mipui te nen a in interact pui te pawh kan lo hriat phah ve zel a, i blog chhiar hi chu kan hlawk pui khawp mai.

    ReplyDelete
  10. I thil ei chu ka ei ve chak tunah tak hian! Seafood hi chu chi hrang tam thei ang ber mai hi awmkhawm treuh mai se, hrisel si, ei man hi awm hliah hliah!

    ReplyDelete
  11. I tittle chu a va sexy ve :-P I mikhual te chu an chhiat loh hlawm hi, khual hlen tur te an lo awm miallo a mawn le??? :-P

    ReplyDelete
  12. I nu Nu-in Thlalakpui tur thlan a thiam a ti che. I in post nasa thei si...tute emaw thlala tur sawi ang maiin i lo atensan auh zel a ang...ha.. haa....

    ReplyDelete
  13. i ti ti chu a ngaihnawm hle mai, thian bula ti ti ang maia i ziak chhuak thiam hian chhiar a tinuam thin a ni

    ReplyDelete
  14. Kiamlova, Puii - haha, an nu chu hrilh mahla, a pawiti vak lo ang, Lotus atangin an Nu hming ka zawng hmu a, a hming ka hria chu mak a ti teh asin!!!!

    hmingtea - tah pawh khian ka lang YOUNG tho a ni maw??? :-)

    illusionaire - Hotupaboss chu i ti lawmawm thin e, keini blog tlawm takah te i rawn dik dak ve thin a hahaha... lo zin ve ta che.

    Jerusha - Nia ti raw. Mahse ka awmpuite hi an mawl thei ania, Chakai te hi ka hriat loh an ring a, I ei ve thin ami? te hi min ti zawmah a, Chakai meichher chhit dante hi kan hrilh lo chauh zel mawle.. :-)

    Alejendro - I ngai dâm thei e mai aw... Mikhual hi 1 chauh lawm male.. khual hlen chi pawh ni lo, a haw chak a za zek zek a..:D

    ZL - hahaaa... Sap ho tih dan ka thik tawh a, thla lak dawn chuan en ran zel tawh.. lan that a awl ber :D Kan Auditor hi a thla ka laksak a, a thim, la tha leh rawh a tia, Nangmah hi i thim hrim hrim a, lak en a har ka ti tep a ni lolzzz

    Fela - i ti lawmawm hle mai, tute emaw anga thuziak thluaithlum dum hi ka mi sa lo khawp a, ka ti ti phungleng ziah leh chawr mai thin alawm.. kan ti ti a ni ber e :P

    ReplyDelete
  15. A va nawm hmel ve aw...len kual hi chu a nuam hrim2 alawm.

    Seafood hi chu a tuiin a thianghlim bik.

    ReplyDelete
  16. Hyderabad Zoo-ah pawh Train, naupang chuan theihna hi a awm a, kan kallai khan sikul naupang ho hi an lo chuang a. An hmuhnawm reuh khawp mai.
    Thudangalai chuan mikhual thlengtu tha deuh i nih dawn hi.

    ReplyDelete

Followers