I zai ang aw...

Engtik lai mahin zaithiam ti-a sawi ka ni ngai lo nachungin Zaipawl ah hi chuan ka tel ve chamchi a, nuam ka ti bawk a, mak deuh mai chu contralto hlir ka la sa zui. Zaipawl member mahni duhthu-a inpek a nih loh a, a thlana an thlan thin pawhin, thlan hi ka ni ve ziah thin, hmanlai nula fel an sawina “A alto hruaitu a ni” an tih thin ang mai khan hun engemaw chen chu zaipawl-ah hian ka lo alto (Contralto) ve tawh a, zaithiam lem lo mah ila, zaipawl chu kan pawlh mawi ve tho a, ka zaipui ten min rin berah te pawh min neih ve hial thin a nih kha.

Mozambique ka awm chu zai lamah hian keimah rau rau-ah ka tlahniam hle, hlabu hi ka keu ta meuh lo a, Solfa phei chu thiam dang awm hek lo le, ka en ngai ta lo reng reng. Chawlhni inkhawm kan han zaite hi a kel rawl a kel rawlin, key hran nuaiin kan han zai mai thin a, ka thlen tirh kha chuan ka mangang viau thin a, tunah chuan ngaiah ka neih leh tawh. Mizoram lama solfa dik taka, part hrang hrang nen mawi taka kan sak thin ang pawh kha helai-ah chuan an duh lai laiah an ti kuai thla a, a then an lo kuai sang bawk a, han hruai dik tum pawh hian keia awrawl chhe zet hi chuan a hneh ngang thin lo a, a chang chuan an sak dan chu dik lo a ni tih hre reng chunga han zawm maite pawh a awl thin. Tuikuk Pathian siam theih loh tihte pawh hi min ti hrechhuak thin. Ka u Tuikuk ho zinga a thawh thin lai pawh khan, ‘Anmahni zirtir tura kal si hian an tihdan hi kan entawn kan entawn mai a, buaithlak khawp mai’ an ti thin, tiang deuh chu a ni, mihang ho thil zirtir tum chu, beidawnna khur thuk taka tlak hlum a hlauhawm mah zawk thin.

Vawi khat chu kan CS te nupa ka inah an lo leng a, ka hlabu (Mizo hlabu Tonic Solfa awm) ka entir a, he hla hi I sa thiam em? Tiin hla pakhat ka entir a, ani a lo phur pherh nek a, “khawmaw hetiang hi alawm ka zawn ka zawn, helaiah tumah Solfa en thiam an awm si lo a, ka hmu zo lo a, ka lo copy teh ang” a ti ta hial a, a hla hriat ang ang chu, “chumi hla chu a awm em?” tiin min zawt a, a lo awm remchang hlauh zel bawk a, kan han keu a, kan han sa dun vei ngal ngal chu, Solfa ka lo bahlah tawh zia ka inhmuchhuak chiang ngei mai. A kuma kum en tawh lo ka ni bawk a, modulator ka bo nasa lutuk a, ka nuih a za zawk, ani pawh chuti tho, “ngawi rawh, Office ah hlabu hi lo keng la, ka lo Xerox ang a, chuan Officer ho kan zirtir dawn nia, a part kim ngeia sak ka duh a ni” a ti a, a phur surh surh khawp a, “In lama mahni a zir ka duh” a ti a, a copy ta nghe nghe. Kei pawh chuan nakinah amah pui roh hian midang zirtir tura min tih takin ka ti a, ka Hlabu chu ka han keu ngial a, awiii, a va beidawnthlak tak, d r m f.. atanga in en that leh a ngai nasa khawp a.

Tunhma-a, s d l f m d r... s d l t d’r’d’ ti-a kan au zuap zuap thin laite kha a ngaihawm ngei mai, hetia tonic solfa ah pawh ka buai chuan Staff notation phei chu ka theihnghilh vek tawh hial ang ka ti rilru a, ka hlabu dang ka keu a, ka hla thiamsa atangin ka inzir tha leh vel.

Hei hi maw lo ni hringnun an tih ang maiin, kan hringnun hi zirlai a ni reng mai, thil thar kan hmu, kan hria, kan zir a, kan hriatsa hi kan theihnghilh then leh mai bawk a, theihnghilh thei lo ta ila, mihringte hi kan turu viau ang nge, a buaithlak viau ang le tihte ka ngaihtuah ta mai mai a.

Engpawhnise, solfa dik emaw dik lo emaw, "Ka aw neih chhun lo mawi tawp se, ka tih hle hi Chawimawi nan" tia fak hla siamtuten an lo siam ang deuh hian a pawimawh ber chu Pathian faka zai hi a ni e, Amah chawimawi nan chuan eng ang pawhin zai ila a lo tha vek e, kan zai chhan ber Krista hriatchian hi thil tul ber zawk a lo ni. I zai zel ang aw...