Tuesday, July 20, 2010

Suih-tung-tu-rut..

Hrui suih hi suih dan hrang hrang a awm a ni awm e, a then chu nghet taka thil phuar nante, a then thil phihawh nante, suih mawi hrim hrim te pawh a niang chu. Suih tak ngeia suih chu a nghet a, phelh mai mai pawh a har, suihtungturut hi chu a hmawrah hian han pawt ila a phelh leh mai thin.

Ka naupan laiin la kan phiar thin a, ka nu la chhum zawmkhawmin puanbu lemte siamin puan kan tah thin bawk, suih taka suih hi ka thiam lo a, suihtungturutin ka suih a, a dûk leh zur zur a, a manganthlak thin hle, puan tah khawn a tla tha thei lo a, a chang phei chuan tah a chhuak hial thin. Ka nu suih lah a nghet thei hle si a!!! A hnu chuan suihtaka suih min zirtir ta a, a nghet ve ta hle, han pawt vak vak mah ila, a nghet ting ting a ni mai, suihtungturut kha chu a hmawra pawh hian a phelh tlat zel.

Mizote mahni-a la an deh thin lai khan nula nungchang tha leh tha lo en nan an la deh lai an chik thin a ni awm e, ka nu sawi ka la hriat reng chu Tlangval thenkhat an thiannu an rimin a la chhum an lo khawl ruk sak a, an haw pahin Sumah an dah a, a lo tam tham deuh aniang, a zing buh deng turin a hmu chu a zak hle a ni awm e.

Nupui pasal inneih hi hrui suih nen hian an tehkhin teh chawk bawk a, suihtak chu a nghet ang bawkin inneihna hi chu nghet taka suih a ni tur a ni. SA Officer pakhat pawn Nu pakhat hnenah "Suihtungturuta ka suih mai mai, in innei rei ta zek mai" a ti fiamthu a, ani lah a nuihza khawp, inneihtirtu lam ai chuan a inneia te an pawimawh zawk daih bawk a ni.

Tleirawl chhoh laia ka thian kawmte pasal an nei vek tawh a!!! A then chu an inthen leh tawh hial (:P) Kan thiannu pakhat chu naupangte-in a High School teacher a nei vei a, fa 1 an nei chauh tihin a tlan hnu hnu, a nu chuan "I haw tawh lo ang" a ti a, ani chu lungleng leh si niang a rukin a haw leh, a nu thinrimin "I haw rau rau chuan i lo haw tawh lo ang" a ti leh thung, mahse a hnu rei lote-ah fa 2 an neih hnu-in a haw leh tho, an inthen hlen ta nghe nghe. Pakhat leh thung chu a pasal kha a tlangval laia Zu in thin pawha a hriat loh, fa 2 an han nei a, rui thei em em ta mai, an buai thei khawp a, nikum ka haw khan ka hnenah a lo sawi koh koh a, "Tihian ka tuar tang tang ang a, ka fate enkawl thei ni-a ka inhriat hunah a awm dan hi a sim loh chuan ka then nal nal ang" a ti bai bai mai, buaithlak hlawmin!!

Nupui pasal inneih hi hun rei lote atan mai ni lo-in dam chhung atana intiam an ni a, a nuamah leh a hrehawmah, hrisel leh bawrhsawm pawhin ti-a chham vek kha an ni a, an han innei ta cheng a, an ze thup thin lo lang chhuak an tuar zo lo fo thin. Hmeichhia hi kan pawimawh khawp mai, pasal neih hnu-a nun thlahdah, inchei tha duh mang lo, Nu te te inchei vurte chu tih rilru pu-a inthlahdah, pasal te tana iaiawm tak tur an awm nual mai. Hei hi tih loh tawp tur niin ka hre ve mai mai. Mipa lah hi nupui nei reng chunga nula hmeltha hre riau an awm bawk a...

Chuvangin ti hluai teh ang.. nupui/pasal neih chuan Suihtungturut ni lo Suihtak ngeia neih tur a ni e. Engkim huama nei an ni si a.

(Auditor ka mikhual a, thu leh hla pawh ka nei hlei thei lo, ka hunawl remchangah ka han ziak zuai a ni, a chung pawh a hawl fai zo ngut na maw chu???)


18 comments:

  1. Audit chunga in ziak zuaite pawh hi, a suihtaka suih ang charh ani tho zela; belhchhian a dawl em em zel tho mai.

    Thil suih ngheh leh nghe loh chu a hrui a zirte pawh niang :-P Vawikhat pawh kawmthlang theihai kung sang deuhvah pipu kan suih a. Kan inthen lawp lawp hlawm a. Kan cousin santha deuh mai an uaive ta a, a then thui lai tak chuan a ri tuarh a, a chhat ta hmawk mai a!! A lum thui viau lehnghal. Pipu atanga tlak phei chu an phut duh an ti kan tia. A nuih a za lo teh a sin! Suihtak ngat khan kan suih ve sia :-P

    ReplyDelete
  2. A va ngaihnawm e. Ka chhiar chuak dap. HE thu hi vawina kan nau pakhat nupui nei tur nen kan sawidun topic tak a ni pek a. Mizo te hi kan tihsual lian tak pakhat chu nupui/pasal naupang luttuk a kan innei hi niin ka hria. NUlat/tlangval khamlo kan tam em mai. Pahnihna ah chuan chawm zo lova nupui pasal nei kan tam ta luttuk hi. "Nupui neih chuan indan pui ngam tur" ka pa hian a sawi ngun khawp mai. Pathumna, Nupui pasal kan neih hian- ka kawppui awm mi a ni em? tih thlir chunga inneih a pawimawh. Ka sawi thui luttuk ta

    ReplyDelete
  3. Suihtungturut mai maiin i ziak tawp dawn emaw tia.. Suihtak ngeiin i zo e. I ziak mai mai dawn emaw tih pawh hian a tawp han thlen hian i lo suihnghet phian zel. "Ka han ziakzuai" te in ti vel maw. Tiang a nih dawn chuan hun nei lo chung paw'n lo ziak zuai zuai zel teh khai...

    ReplyDelete
  4. Inneihna chu Pathian zawm ania. Pathianin a zawm tawh chu mihring then mai2 theih chu ni lo reng ani.

    I ziak tha khawp mai. Ka thianpa ka chhiar tir ve nghal e.

    ReplyDelete
  5. Hrui suih hi scout ho khan an zir thin a sin.Mizoram ah chuan truck driver (handle man)atang a chhuak ho hian hruisuih hi an thiam ve phian.Tin vawk sa ser ho te pawh hian an suih nghet thei zek.
    audit chung mai mai pawh in thiam phian mai.

    ReplyDelete
  6. A theory chuan hre hnehsawh hle mai maw? Han practice ve tawh la enge i an kan lo thlir ang e aw! Ha ha ha. Marriage councellor atan i that dawn hi.

    Ziak tha lutuk.

    ReplyDelete
  7. Nupui pasal inneihna hi 100% a ngaihthain a tih tak tak theih dawn em maw ni le tih tur chi a ni. Tleirawl at laia neite hian hrehawm leh thil dangte pawh an tuat chhuak huai zawk fo.

    Dr. James Dokhuma sawi ka hriat reng chu, 'suih-tung-tu-rut hi tuma zirtir ngai lovin kan thiam mai a, suihtak erawh hi chu zir fe a ngai a ni' a ti a.

    A dik ngawt mai. Tun thleng hian suih taka ka suih dawn hi chuan ka thiam loh zawk, ka khawr zawkna ang hian ka suih a, a lo suih tak zawk thin.

    ReplyDelete
  8. Tlangval pakhat chuan nupui a nei dawn a, inneih inkhawmah thutiam pastorin an chhiar a - 'A nuamah pawh a hrehawmah....' an ti a, 'A hrehawm viau chuan ka thei lovang' a ti tlat pek a ti. Tunlai hian khingpuite damlohna benvawn neih avanga in chhuahsan a lar hle an ti, a pawi thin hle mai.
    Tunlai hian nula pasal neih hmaa Marriage counsellor kan nei zauh zauh a ni lo maw- Zaia. Thil hi a danglam nasa tawh a a awm lo chuang lo a nia.

    ReplyDelete
  9. A tha thin dap dap e. Office hna hi i thiam anih hi. A kar awl hnawh khah dan reng a tha mai. Finance dept. hi chu in tul thei viau vek a. Thenkhat phei chu in lama thawh tur pawm haw tawk tawk thin te pawh an awm an ti. Nang zawng audit lai pawhin hetiang hi i ziak hman a nia! I fakawm e.

    A taka i suih hun ah(ala thleng chek anga!!!) suih tak ngeia suih turin duhsakna ka hlan a che.

    ReplyDelete
  10. a va han tha em!.. Buai chung chung pawhin he tiang tak a thu tha min la chhiar tir thei zel hi a lawm awm khawp mai...

    ReplyDelete
  11. Sekibuhchhuak - a hrui azir chu a ni ve khawp ang. Pipu suih phei chuan.. kei pawh ka tla thum tawk tawh pipu atangin, mahse a nuam ve e, pipu uai hi chu...:D

    vana - sawi thui hi a pawi reng reng lo ania, lo tuihnih deuh duah kha duhthusam zawk alawm... Indanpui ngam tih hi a pawimawh ka ti kei pawh, indang kher mah suh se, puitling taka engkim hmachhawn ngam phawt ni ta se a tha ang..:-)

    b-buata - haha, ka ziah hmasa ka save emaw ka tia, a lo in save lo zui, buai teh reng nen Hit lo khawp mai.. :P

    irene - I Pual deuh ania, he post hi chu, neih ve mai i tum tawh sia... ka han fuih che a nih hi .. hahaha.. Inneih tawh chuan ngheh chat tur ania.. !!!

    hmingtea - Scout ho hian an zir nasa thin ni e, Lawng sipai ho hian suih dan bikte an nei bawk ni awm a ni, Vawksa ser ho chuan Hnang mai mai pawh an suih nghet thei fu mai ni e..

    ReplyDelete
  12. Thiama - a kim lo-in kan hria tih ang vel a ni, Theory chuan a awl khawp mai mawle, fa enkawl dan tha pawh kan sawi zuah zuah thei ania.. Marriage Counselor chu ka ni tawh alawm, i thiannu Mary pawh a pasal neih dawnin kan counseling nasat kha.. hahaha.. a practicable em, a hmang tangkai ta em tih lah hriat ni suh, inneih tukah a rawn nui chhuak vur vur mai sin..!!!

    Fela - Tleirawl at laia inneih thut hi then chuan an hit fuh ve tho mai, sawi thiam a har a ni e.. a Inneia te an pawimawh ber ang chu..

    Kiamlova, Puii - hehe, hre mak thei ve sia...h, nang chuan "I va pen tha duh lo ve" tihte pawh i hriat kha.. Tunlaiah chuan Inneih hma hian Pastor/Officer hian Counseling chu an nei tlangpui tawh alawm, midang rawih pawh a ngai kher lo e :-)

    ZL - Ka lawm e, Kan tiamah Suihtak ngeiin kan la ti ve ang chu.. han ti ve ngawt ila.. Office hna chu tuipui hian a lo zia ber mai. "Do what you love and Love what you do" an tia lawm.

    Muana-Hmar - i ti lawmawm e, lo chhiar zel teh. Bookmark pawh nalh khawp mai.

    ReplyDelete
  13. Varte hman ni ah i kum leh tih ka sawi vangin em ni tleirawllai thla i profila ah i rawn advertise tak noi...
    Maj Dula blog ka lut fuh ka coment theilo min rawn biak ta che.
    Vai Raja a ang ka ti khawp mai.

    ReplyDelete
  14. hmingtea - lolzzzz... ka rawn dah YOUNG telh telh ang. Major Dula chu a Raja alaw, Guwahati-ah a awm a..

    ReplyDelete
  15. I va ziak tha teh lul em! Dr Thiama te sawi ang deuh hian a "Practical"-in han suih chiah phei la chuan thu ngaihnawm tak tak belhchhah tur i ngah dawn mang e! Beiseina nen kan lo thlir reng che a nia!! :)

    ReplyDelete
  16. van ziak tha em2, inneih hi ka la experience loa engtinnge ka tawn ang k hre lo naa, suihtungturut ai chuan suih tak ngei chu tha k ti takzet pathian leh kohhran hmaah thu kan tiam a, sum leh pai tam tak kan seng a zanah a hnar ring thei lutuk ka mu theilo tih vel vang mai2 a kan ho leh thin hi chu a pawi ani, aizawlah hian nupa inthen an tam khop mai, a bikin naupang tea innei te hi an inthen leh hmain ka hria, a pawi ka lo ti ve ngoih2 thin hmelhriatte an nih phei chuan.

    ReplyDelete
  17. haha... chhiar a van nuam dup dup ve, a flow a kal tha tlats. Zin ho ila, kan hmuh inang reng pawh i sawi chu a nawm hmel bik thei hial dawn ka ti :)

    Suihtungturut ka hriat dan chu, suih tak ni lo zawnga suih, bawk nulh ang chi hi. Suih tak ai chuan a nghet lo duh deuh, a inang thove.

    Suihtak a neih hi, nupui pasal, Mizo ten kan zir a ngai zual in ka hria, Sap ho phei phei khuan an mamawh ni hmiang/!!!!

    ReplyDelete
  18. keimah - practical-in hman zan ka mangah ka suih.. hahaha, ka mi duh vak lo a la ni zui, tap chungin ka lawi vel a.. ka thu ziah hi ka ngaihtuah lutuk a ni mai thei a ni..

    jay-me - a nia lawm, thiante'n an nei sup sup a, nei lo bik nih chu kan mawl hmel ta riau a, mi thenkhat lah hian "thiante i tluk lo" min la ti zui leh nghal a, a chang chuan "pasal neih chu thil ropui ta lua-ah in ngai emaw ni le?" ka ti leh thin.. mahse thil ropui tak chu a ni bawk si... ti raw?

    David Ralte - nia, suihtungturut chu kan bawk tawp zel alawm, ngheh mawh tak a ni. Kan la zin ho dawn em niang?

    ReplyDelete

Followers