Monday, July 5, 2010

Nawngsawhnawh..

Tunlai chu kan inkhel hah bawk a, hahchawlh nan hmanlai thil, ka rilru-a riak reng thin ka'n sawi mai mai teh ang.

Kan la naupang hle, 1986-7 bawr vel kha nita-in ka hria Nongsohnoh lar em em lai kha. Kan hlau thei khawp mai a, naupang tap thlem nan nawngsawhnawh in a man ang che tiin an sawi thaih thin.

Chutih lai chuan Kolasib-ah kan awm a, kan in awmna chu a fal ang reng hle na-a, tuilut kawng a ni bawk, mi feh kawng a ni bawk a, ram kal tur hian an rawn paltlang nasa thin, a chang chuan chu kawng chu a lun ve viau thin bawk.

Tlai khat chu nu pakhat feh hawng hi hlau thlabarin a rawn tlan haw a, thaw hlawp hlawp chungin tuilut vel-a a kal laiin mi mangang thlabar au rawl a hriat thu a rawn sawi a, “Tuilut-ah heti mai hian maw ka thih dawn, ni tla tur ka va ngai em..” a ti niin a sawi. Mite chuan nawngsawhnawh in tu emaw a la ta ni ngeiah an ngai a, an ngaihven hle, chu achhapah Tuilut ah ber kher leh nghal a ni vei nen. Tuilutah mangang au thawm an hria tih chu kar lo-ah a khaw khahin a khat a ni mai, tichuan, tlawmngai-in chu mi mangang chu chhanchhuak turin leh nawngsawhnawh chu man ngei turin Tuilut lamah chuan tlangval leh pa valai deuh, kal thei tur ni-a inhria chu an tlan thla ta zut zut mai a, chutih lai chuan khua a thim tawh a.

Mi chu an rawn pung khawm tam zel a, thenkhat hmanrua engmah keng lo-a rawn tlan chhuakte chuan kan thingkhawna thingfak chu an rawn phawi chawt hlawm bawk. Ka Pa Aizawl kal rawn haw hlim hlawt pawh chaw a bar sawk sawk a, iptepui-ah Chempui dahin a chhuak ve nghal bawk. Nawngsawhnawh chu man a, mi mangang thlabar chu chhanchhuah ngei an tum ruh hlawm hle, Kolasib Venglai atangte pawh chuan an rawn tlan thla zut zut a.

Nakin deuhah chuan nawngsawhnawh hmu zo lo beidawng an rawn haw tan, keini unau chu kan veranda ah kan thu a, hlauthawng em em in mi lo haw chu kan lo thlir a, kan tui pawh a hek ngei mai, a rawn haw a piang chuan tui an rawn lam vek bawk si a, ka u chu tui sem reng rengin a lo buai hle.

Nakinah chuan val upa lam deuh hian tlangval pahnih hi an rawn khalh haw ta tak tak a, kan kawtzawl ah chuan an pungkhawm a, chu tlangval pahnih chu a laiah an dah a, an au lawng lawng a, an thin a rim hle, chanchin ti hian tlangval pakhat zawk chuan a sawi ta a.

An hming chu Vena leh Rammawia an ni. Vena chuan “Thingzai turin kan thiandun hian kan kal a, zu kan keng a, tlaiah khan kan in a, ka thianpa hian inawhhlum a tum der a, a rui lungpuam khan ‘Tuilutah heti mai hian maw ka thih dawn, Ni tla tur ka va ngai em..’ a ti a” tiin a sawi. Chumi au thawm chu nu pakhat khan a hria a lo ni. Anni pahnih lah khan anni vanga buai tih hre lo-in an mi zawn chu an lo phek zawnpui ve chiam mai a lo ni a.

Val upa te chuan an zilhhau a, tlangval thenkhat chuan han khawih deuh hlak an chak hle, an thum mam mam a, mahse an in khapdai thei ta hram, mipui ti ralkhel zawnga che tawh lo turin an vau a, an tindarh ta hlawm.

Khata tang khan nawngsawhnawh ka hlauh thinna hi a reh hmak a, tun thleng hian nawngsawhnawh kan tih thin kha eng tak ni maw? Ka la ti reng mai.

16 comments:

  1. Nawgsawhnawh hi Khasi tawng a ni lo maw? Rulpui lian zet mai betuho sawina ti a ka hriat hi a dik em? Rulpui tihlungawina atan naupang an hlan thin. Chumi atan chuan mihring ruk tur zawngin an thawk chhuak thin a sawi a niin ka hria. Tak a nih leh dawt a nih lam chu ka hre lo.

    ReplyDelete
  2. I blog ah hian ka lo OT lawks! ka email rawn thawn che kha i van chhang har tawh!!!! I reply ka nghahhlel tehreng nen :-(

    -bmw

    ReplyDelete
  3. zl - ni mai thei, i thawnthu hriat reng a chiang lo mai a, midang-in an sawi ve loh chuan awih tur nge awih loh tur pawh ka hre lo e a.. hahaha

    bmw - blog lehzelah i rawn OT a.. hihi..

    Ka mail ka check khat lutuk alawm, sorry. Ka rawn chhang tawh che e..

    ReplyDelete
  4. Pi Din,, Nongsawhnawh lar vanglai kha chuan kan hlau thin em kha ti raw, zep thu awm hek suh... Kan khaw naupang bo pawh Nongsawhnawh lak an ti a. Silai nen an zawng a,Mahse, an Thingremah a lo tang hlum a lo ni a.

    Nongsawhnawh hi Khasi ho chuan "Menshohnoh" a an ti. An hnen atanga kan hriat a nih hmel. Menshohnoh chu Rulpui (may be Devils) tana Mihring thisen te zawnsaktu, a ni a. Miin Rul a khawi tawh chuan Thisen an pek ziah a ngai a, an pek loh chuan an mahni a ei mai thin si a, chuvang chuan Thisen hi an zawng a, mi an that thin an ti.. He rul (Thlen) hian a khawitute chu an duhzawng (Pawisa)a pe thin a. He rul hi man tuma an tih chuan hmuhtheihloh in a bi bo thei bawk.. Tin, he rul hian Khasi thisen chauh a duh niin khasi chuan an sawi bawk. Hman deuh khan Mawlai, Shillong a Chhungkaw pakhat chu Zanreiah an Inah naupang tap, nging feih feih thawm an hre thin a, miten an zawh lah chuan engmah an sawi duh si lo a. Khawtlang chuan Thlen(Rul) an khawi a nih an ring ta a, an In chu an hal ral sak vek bawk.

    He Rul(Thlen, Menshohnoh)chanchin hi ka awih lo lutuk hian Khasi ho ka zawhchian phah fo thin a.. Kristian tha pui pui te pawn a awm ngei thu an sawi ve tlat,, hmu erawh an la awm bik lo a ni awm e...

    ReplyDelete
  5. Khasi ho khu Mizo te aia chanchintha hre hmasa an ni nang in Christian lo percentage sang tak an la awm. An Sacred Farest ( thing kih phal loh na ) te pawh khu environmentalists ho chuan an interest khawp an ti.

    ReplyDelete
  6. Oi!!!! He nu lerh zia hi, a Template lo thlak leh tawh.... Nawngsawhnawh hi kan hlau thei ltk.. :-P

    ReplyDelete
  7. Dini chu i hmel ai in i kum a la naupang ka ti deuh.Kan naupanlai 1986 ha ha .
    !973 bawr vel kan naupan lai in tuna tuitha veng ni ta belleilui kan tih thin ah khuan vai pakhat nawngawhnawh an tih mai)in Rampana (fam) a man tlat a .A u Kima an a va chhan a, Vaipa poh policein an man a khawtlangin kan en sup sup mai maw le.Kima chu Maj Fela te nen vengkhat an nih kha maj khan a hre chiang ve ngei in ka ring.

    ReplyDelete
  8. Nogsohnoh lar vanglai kha chuan,nu leh pate hian," Inhmelhhriat nilovin khawlaiah, chithlum-mum pek an tum che u chuan ka reng reng suh u" te kha an ti thin.

    Tak tak anih leh nihloh finfiahna kha a awm tak tak em le aw, in sawi tak ah chuan!

    ReplyDelete
  9. b.buata - kha naupang bo kha in khaw mi a lo ni maw, a chanchin tlangkamah kan lo hria a, an in bihruksiak a, thingremah a biru te an ti, khatih lai khan tak nge dawt pawh kan hre lem lo a !!!

    Engpawhnise, Nawngsawhnawh leh Rul hian inzawmna a nei chu a ni phawt mai :D

    dr_feelgood - nia, hman deuha kan thalai Shillong tlawh ho pawn an Forest chanchin kha an rawn sawi hlawm, ka lo ngaihven lutuk lemlo a..

    Alejendro - Oi!!! nangman min kai alawm, ka template chu nalh i tih loh chuan sawi rawh ka lo thlak leh ang :P

    hmingtea - nang zawng i letling e mai, ka hmel en aiin ka upa zawk asin mawleeee.. !!! :P I thusawi chu U Fela nemngheh lo nghak ang hahaha

    ReplyDelete
  10. sekibuhchhuak - keini pawh an ti thin, sweet-ah mutthilhna damdawi an telh a, an mutthilh laiin an hruaibo daih zel te kan ti thin.

    chuan motor horn pe tuar tuarte hi, naupang an ru a, an tap bengchheng khuh nan horn an ti ri kan ti thin.. hahaha dik leh dik loh hriat ni tawh suh..

    ReplyDelete
  11. "Nawngsawhnawh in a man ang che" ti a naupang min sawithaih thin tak kha mawle. Tunlai ah chuan a awm tawh lo niin a lang. Khasi lam origin a niin ka hria a, ka hre chiang vak ngamlo. Nawngsawhnawh vel avang hian kuhva ah sawhthing an dah thin em kha aw! ka chiang ngam vak lo.

    ReplyDelete
  12. capt,i sawi kum aia kum 1 vel hmalam ah,saiha ah nawngsawhnawh an man a,an sawisakna vung cher chur chung khan hrui in an thlung a,khawlai fan pui in an au tir a,police station ah an hlan a.an ni tak2 em tih erawh vawiin thleng in ka hre chiang lo

    ReplyDelete
  13. vana - kan chiang lo tlang chiang a ni ti raw?? tumah a fika faka sawi thei awm ta lo mai chu...

    avena - hei pawh chiang lo bawk hahahaa... kei aiin i hre hlui hret a ni maw??? :-)

    ReplyDelete
  14. Ha ha ha...Kan tlangval pahnih mai mai chu tihtur an va hrelo em, kan nu pakhat i lah hlauhloh tur a hlau vei nen :D

    ReplyDelete
  15. chhangte_ll - mi pawn an ngei alawm, kan tlangvala te hi, Nu 1 hi hmanhmawh tawkin a rawn tlan haw.. hlauh loh tur tih a hre lo alawm :D

    ReplyDelete
  16. This comment has been removed by the author.

    ReplyDelete

Followers