Thursday, January 15, 2009

Grrrrrr...!!!!!

Khualzin mi-te hian an vawi khatna-ah emaw engtikah emaw chuan chet chhiat chang hi an nei vekin ka ring, an sawi lo mai mai aniang. Thufingah hian, “Mi aa pawh a ngawih reng chuan mi finga ngaih a ni” tih leh “A hmui a chip chuan remhria-a ngaih a ni” tihte a awm a. Thufing tih takah a thu a fing hi ka ti thin khawp a, ka kan an hnem poh leh mahni kan inmualpho mai ting a ni tih hre mah ila kei chu hei ka thil hmuh leh hriatte, tawnte hi sawi lo-in ka awm thei lo a nih hi.

Ka Kenya zin kha khualzinphur thlawhna lian ve tawk tak Boeing 737-a thlawk ka ni a. Mite chu intichangkang takin an vei suau suau a, kil khatah kei chu ngawi rengin ka thu a, gate an hawn veleh an intlar sup sup a, ka tho chhuak ve thalh thalh a, thlawhna lianpuiah chuan kan lut diah diah a, kawngka chu an kharphui a, kan thlawk chhuak tan ta.

Boruakah kan kangfel ta tihah chuan ka zun chhuak chu zung turin ka phei dek dek a, ka thutna hi a hmalam deuha a awm avangin hmalama Toilet hman tumin Puanzar awm chu ka keu dek dek a, Executive class ho thutna a lo ni a, an lo awm khup a, ka kal tlang phei den den a, toilet amaw tiin kawngka-te lo awm hmasa ber chu ka’n hawn rawp mai ale… Cabin Crew thawmhnaw ho chu a lo in khai tuar mai a, an thawmhnaw bawm ka hawng lek lo niin. Ka khar rang kher mai. Airhostess pahnih chuan min lo hmu reng a, an lo nui a, toilet chu a dawt chiah kawngkhar zawk a lo ni a, ka lut ta a.

Ka chhuak leh lam chu hostess pakhat chuan “I tih leh hun chuan fimkhur tawh rawh aw, chuti lo chu chhuahna kawngka I hawng ang a, I tla daih mai ang” tiin min lo fiam a, an nuih chu a za ve khawp mai. Kei pawhin nui chungin ka chhang liam ve ta mai mai a. A hnu-a an thil rawn sem thleng chuan kan la innuih a.

Airport kan thleng chu kan tam deuh a, ka chhuak hnung khawp a, Terminal ka luh ve chuan an lo intlar put tawh a, hnung tawkah chuan line awm sa chu ka han chhunzawm ve ringawt a, kan tawlh hma zel a, hmalama thu intar chu ka hmu thei ve ta, TRANSIT tih hi a lo ni kuau a, ka hma-a mi chu “Connecting flight I nei em?” tiin ka zawt dek dek a, ani chuan a lo nei Nigeria kal tur a lo la ni, Ka line a dik lo tih ka hre nghal, an hrui zam hnuaiah chuan ka kun ket ket a, ka chhuahsan ta daih a. Arrival pangai chu ka va zawng hmu ve leh a. Immigration-ah lah chuan ka passport an en a, ka hmel an en leh a, Indian i ni maw? min ti sek a, Ni e Ni e ka ti a, I hmel chu a Indian lo an la ti cheu a. Ka hmel hian kawng hrang hrangin mi tam tak atibuai fo reng a ni. (Ka nui)

Ka haw lamah lah tlemin flight an delay a, Maputo Departure chu Gate 3 a ni a, ka thu ve ran a, ka pum nuamlo inthiar ngai leh ta tlat mai chu kan hmalama kawngkhar inhawngah chuan ka lut phei a, ka va inthiar, ka let leh chuan kawngkhar chu TALA lian tawk hian an lo kalh daih mai, kawngkhar chu ka sawi a, ka thutna hma-a thu Pakistan pa pakhat chuan thawktute a ko a, min rawn hawnsak leh ta a, “Use upstairs next time” a ti a, next time a awm tawh awm lo e mai a ti rilru thruai thruai chungin ka aw liam ta mai mai, dik tak chuan ka kal hma lawk pawn midang an lut zut zut ka hmu reng a, chuvanga kal ngam chauh ka ni a, ka kal tak avanga kalh kher kha ka ngaihdan a ni bik hlek lo. Hahahaaa

Mozambique kan thleng chu Mahni ram thleng teh chawk ka inchan ve deuh a. Ka che chukchu tawh bik lo. Mahse Mingo tam tak an che chhe ve thung, Immigration-ah chuan National, Foreigner, Foreigner Resident tihte a intar a, Foreigner Resident tihah chuan Confi' takin ka intlar vang a, ka hnung leh pek hle mai a, mahse engemaw chen hnu-ah chuan ka hma-a mite chu tlar dangah an insawn ta pheuh pheuh a, an line an hai ve ni lekin. Foreigner lamah chuan an pakai ta teuh a, kei chuan ka hma phah ta phian a, chung mite chuan min thlamuan hle, mi pawhin engkim an lo hriat bik awzawng loh hi ka ti vel ta mai mai.

11 comments:

  1. Experiance i va nei tha em!! Kum 70 i nih meuh chuan i khabe liam chang hian then leh rualte i la khawm fo dawnin ka hria...tun apngin heti hi a nia...a tha khawp mai...i thlalakah hian volley player i va ang ve...

    ReplyDelete
  2. Ziak zel rawh a ngaihnawm thei em mai. Kan tawn ang hi ziak ve mahila, kan ziak ngaihnawm thiam ve si lo... Mingo nih vanga che tha vek tura dah hi a dik lo nasa. Keini ho hi kan fel daih zawk. Kan tawng pawh an thiam ve lo, keini chuan an tawng pawh kan thiam zawk.

    ReplyDelete
  3. Iva che thing ve han ti ngawt dawn ila, chutiang tawng tawh vek chu kan ni si a. Chuvangin kan dem lo che, lam a hla em alawm. Engtinnge i hriat vek reng ang. Pu J Manliana pawhin A thanglura BL pas hlim kha a cho sual ve asin. Lurate hi BL ka pass in ti a, ka theihnghilh zat pawh in hre dawn a maw ni le ava ti. Pu Lura chuan Nanga mi butu theihnghilh zat tunge maw hre seng roh ang le! a lo ti a, a dang ve chiang asin.

    ReplyDelete
  4. Kum thar chibai nawnleh lee,
    Hei i ti i tia ka ramfan bu tih chhuah bak chu hmabak dang a awm tawh a monle,i blog a mi hi chilh khawmla Editor Pu Fela edit tir a publist tawh mai chi nih tawh mai hmel,i thlalak erawh chu lei duh an la awm mai ang chu maw?

    ReplyDelete
  5. I chatchhiatna kan lo hlimpui leh ta ! :-)

    Ngati tak nge mawn le, i kal vel leh TALA lianpui chuan an lo kalh kher le aw :-)

    Thlawhna ka chuan ve hmasak ber tumin, ka daikal a, a tleuhna ka hmet kha, a ri ring ta vuk vuk lutuk kha ka phu chiang kher a sin :-) Hmeh loh tur ka hmet ta emaw ka ti hman.

    ReplyDelete
  6. Haha! Chhiar a nuam zel e! Chet thatna ai chuan chet chhiatna hi a ngaihnawm duh zawk deuh zel a lo ni..

    ReplyDelete
  7. Nia ziak zel rawh khuareiah i la ngai dawn asin. Chet that ai chuan chet chhiat hi ka hre rei a, nuam ai chuan hrehawm kan tawrhte hi kan hre rei zawk thin. Baktawng nu pakhat pawhin, "Kan naupan lai chuan se kai hi kan lo hmuak a, saikangthai hmunahte kan tlu lut a, a nuam tak tak asin aw!!" a ti asin.

    ReplyDelete
  8. LeaszRalte
    Volley mai ni nang, games hrang hrang play ve nual thin asin kan vanglai chuan.
    Kum 70-ah chuan kan SA RIH nulh mai an tia sin
    Kan Middle school kal lai pawhin ka thawnthu chhiar hi thiante bulah ka sawi chhawng thin a, an ngaithla thap thin zuk nia....

    ZL
    Chu chiah, kan thiam ang thil tam tak hi an thiam bik miah lo.. haha

    Kiamlova & Puii
    Chu chiah chu, a chang phei chuan "A then pawh kan hre thei lo" tih han sak khum ngawng ngawng hi a chakawm thin asin.

    thupui
    Kumthar chibai le... Editortupa chu be tha deuh ila that dawn chu. Ka thlalak hi hralh a kal vek loh hmel tlat, tunlai chu Celebrity hi an tam khawp a...

    Sekibuhchhuak
    Hahaha... kei pawh a rawn hip na lutuk kha min hip tel ang tih ka hlau thin alawm..

    Zaia
    Nia tiraw, han chet chhiat rap rap hian sawi tur a ti tam ve a, nuam ve deuh asin

    Fela
    Thil tha tam tak hriat reng tur a awm lai hian chet chhiatna hi hriat rei a awl khawp mai.

    ReplyDelete
  9. I zin kawngah hian ka thil duhloh leh trih ber chi hnih i tawng ve ve tlat mai. Zinkawnga kawthatloh leh inthiarna hmun (mi ramah leh nghal)-a kalh hnan nih hi. Rawn chhanchhuaktu che Pakistani pa hnenah hian lawmthu sawi i ba nasa a nih hi. A khabe hmul sei tak kha (a neih chuan)vawikhat tal khuih sak rawh!!

    Hei tunah pawh i bad experience atangin thil i thiam leh treuh alawm. Thil reng reng hian kan dawnsawn dan azirin hlutna an nei zel a nia.

    ReplyDelete
  10. Thiama
    Kei pawh ka hlauh ber ka tawng a nih pek hi. Kan tho hma lutuk phengin In lamah ka inthiar hman ta lo atin lawm.

    ReplyDelete
  11. He he he.....Thlawhna atang chuan i lo tla tak tak ange aw :)) Kolasip Training na hmunah 'Syllabus' a telh vat tur a nih hi :)

    ReplyDelete

Followers