Enge ka tih tur...????

Tlai khat chu ka thenawmnu, thiannu ni bawk, nitina inhmu a, ka nuihpui thin hi a lokal a, kan ti ti a, Damdawiinah nu pakhat (HIV positive) a tlawh a, a lo haw chiah a ni, chu chuan a rilru a uai rit hle a, engemaw vei nei tih hriat takin ni dang angin a rawn tawng bawrh bawrh lo.

Eng eng emaw kan sawi hnu chuan a rilru tak tak chu a rawn phawrh ta a, “Captain, thil pakhat theihnghilh ka duh deuh mai a awm a, mahse ka theihnghilh thei si lo a, ka tawngtai thin a, a chang hian thiante zingah ka awm a, ka hlim a, mahse a hnu rei lote-ah ka hrechhuak a, ka rilru a hah leh thin a..” a ti a, a thil vei chu sawi chhuak chiah si lo-in a tap ta hlawp hlawp mai a, tihngaihna ka hre lo kher mai, a lungchhe zualpui reh hun chu nghakin ka thu ngawi reng a, a hnu-ah chuan a han inhrufai deuh a, a la tawng thei chuang lo. “Ka tawngtai ang aw..” ka ti a, a lu a bu ringawt a, tichuan, enge ka tawngtaina chhan tur pawh hre lo chuan ka han tawngtai ta ringawt a… Ka amen chuan a rawn inthingharh deuh a, “Naktuk-ah ka hrilh ang che” a ti a, “Ni e, I duh hun hunah min hrilh dawn nia, ka inpeih reng e, eng pawh nise, I chhungkua emaw, I mamal thil emaw, I Nu chungchang emaw pawh nise, tawngtai zel la, theihnghilh tum tlat lovin, I harsatna chu hmachhawn zawk la, I hneh thei zawk ang ka ring” ka ti ve luam ringawt a.

Naktukah ka hrilh ang che a tina-a a sawi ta tho a. A Unaunu HIV positive a lo awm hi a lo ni a, a unaupa pakhat lah Johannesburg-ah kum 5 chhung awm tawhin engtinnge a awm pawh a hre lo a, chumi ni-a nu pakhat HIV positive a tlawh chuan a unaunu tawrhna chu a ti hrechhuak thar leh a lo ni a. Chutah a nu-in a rawn phone a, a nau chu a damlo hle a, ei tur pawh an nei lo a ni tih a rawn sawi a, pawisa thawn tur a nei bik si lo.

Han hnem ngaihna ka hre lo hle. A dik tak chuan counseling hrim hrim pawh hi ka tih ngai loh tak mai a ni a, a dinhmun lek phei hi chu a harsa leh zual.

Eng ti turin nge min beisei ni ang? Ka lakah chuan engmah a beisei ka ring hran lo, a harsatna min hrilh ringawt khan engmah puih theihna ka nei si lo a... Tichuan, ka lo tawngtaipui zel ang che tiin kan inthlah ta ringawt a.

He mite chauh hi an ni lo. He ramah hian mi harsa, dinhmun khirh taka ding, chhuah ngaihna awm chai lo hi engemaw zat an awm a ni. Chung mite tan chuan enge tih theih ka neih le..?

An ei tur pe dawn ila, vawi khat chaw ei mai a tawk si lo, pawisa pe ila kan inpe seng dawn si lo. Tawngtaisak ringawtin an puar si lo. Hna thawh tur neiin inhlawhna siamsak thei dinhmuna ding lo ni teh reng pawh ni ila, anmahni kha hnathawk thei dinhmunah an ding lawi si lo.

Hei vang tak hian UNAIDS te, WORLDVISION, TEARFUND, NGO hrang hrang, hetiang mite enkawl tur hian an awm reng alawm, annin an hna chu thawk teh se tiin han thlahthlam dawn ila, a tam zawkte hi hetiang enkawlna dawng pha chuang lo an la ni leh ta zel si.

Hetiang dinhmun khirh tak mai hmachhawn lo-a ka awm ringawt pawh ka vanneih ziate ka inhre chhuak thar leh a.

Vawiin thleng hian “An tan hian enge ka tih theih ang?” tih hi ka inzawhna ka chhan theih si loh chu a la ni reng a nih hi.

Ka D rim..!!!!

Puma Zai pakhatah chuan heti hian a awm a….

“Lamkawiah Thingsiri par lo tla e
Ka chhar dawn lo zaiin ka pel mai dawn e
Ka D rim reng reng a nam lo e”

Eng rim nge ni ngai???

Thlangdar hi a rimchhe hle a, kuta khawih phei chuan kutah a nam reng thei a, silfai vat a ngai thin. Kan naupan lai phei chuan mita a zunkhum chuan mit a del thei an ti thin, tak a nih leh nih loh erawh ka la fiah lo. Phivawk pawh hi a rimchhia an ti, mahse a rim ka la hre miah lo.

Makpazangkang pawh hi a rimchhe rap, a rah hi inkhualtelem nan hian kan hmang fo, (Kan naupan laiin..) chhang lem atan hian a tha si, a rimchhe bawk si a, kutah a nam rei thei hle.

Bermai hi mihringin an ei tawhah chuan a rimchhia ka la tih ber pawl a ni, a uih thang nghur mai a, ei chu sawi loh a rim ringawt pawh ka ter thei lo.

Thil rimchhia rau rau-ah chuan Mihring rimchhia hi ka ngaihtheih loh tak a ni.

Rim hi chi hrang hrang a awm a, ka awmna rama mite (Mihangho) hi rim danglam tak nei an ni a, (tu huatthu suh-ah) thlalak-ah hian an rim hi lak tel theih nise ka ti thin ngawt mai, theih chu nise blog-ah hian ka han tarlang tel chhuai chhuai tura..

Mahse a theih si loh a, thla lak a hnehin sawifiah pawh a harsa lam a ni e.

A chunga ka sawi rim hrang hrang ang khi a ni lo, an rim hi a mak a, sawi thiam theih pawh a ni lo, zakkha rim ni chiah si lo, rim tler deuh hi an nam tlat mai a, a bikin a hang zual bik hian an nam nasa zualin ka hre thin a. An vun hi a hang a, an pianhmang pawh hi a danglam ve hrim hrim mai, heng danglamna hrang hrang hi chu thla han la ila, a lang mai thin a, chhungte leh thiante pawh ka thawn a, an hmelhmang chu an hre mai. Mahse rim mawlh hi thla lakah a lang ve thei tawh si lo, hei mawlh hi thawn tel ka chak thin.

Vawi khat chu ka office bang motor-a ka lut chiah hi Driver a lo thu a, a rim a lo nam nasa lutuk kha ka luak tep a, glass ka hawng nghal sawk sawk a, ka mualpho lo hram.

Uisathiam hian rim atangin hnu a chhui thin a, mihring pawh hian rim atangin thenkhat chu kan inthliarhrang ve thei a, thenkhat chu an perfume hman atangte, shampoo atangte, aftershave leh sahbon rim atangte pawhin kan hre hrang thei a, mahse chung mite thliar hrang thei tur chuan hnar fin a ngai ve khawp mai.

Isaaka’n a fapa Jacoba mal a sawm khan, "Ngai teh, ka fapa rim hi LALPA malsâwm ram rim ang a ni (Gen. 27:27) a ti a, keini hi eng rim nge kan nam ve le...????

A chang chuan Setana hian kan duhzawng tak hmangin thlemna-a lut turin min thlem fo thin a, Lalpa malsawm ram rim nam lo thil tam tak kan tih phah thin a nih hi.

Chutiang hun kan thlen chuan heti hian I zai thin ang u

“Lamkawiah thingsiri par lo tla e

Ka chhar dawn lo zaiin ka pel mai dawn e

Ka D (Isua) rim reng reng a nam lo e”

Grrrrrr...!!!!!

Khualzin mi-te hian an vawi khatna-ah emaw engtikah emaw chuan chet chhiat chang hi an nei vekin ka ring, an sawi lo mai mai aniang. Thufingah hian, “Mi aa pawh a ngawih reng chuan mi finga ngaih a ni” tih leh “A hmui a chip chuan remhria-a ngaih a ni” tihte a awm a. Thufing tih takah a thu a fing hi ka ti thin khawp a, ka kan an hnem poh leh mahni kan inmualpho mai ting a ni tih hre mah ila kei chu hei ka thil hmuh leh hriatte, tawnte hi sawi lo-in ka awm thei lo a nih hi.

Ka Kenya zin kha khualzinphur thlawhna lian ve tawk tak Boeing 737-a thlawk ka ni a. Mite chu intichangkang takin an vei suau suau a, kil khatah kei chu ngawi rengin ka thu a, gate an hawn veleh an intlar sup sup a, ka tho chhuak ve thalh thalh a, thlawhna lianpuiah chuan kan lut diah diah a, kawngka chu an kharphui a, kan thlawk chhuak tan ta.

Boruakah kan kangfel ta tihah chuan ka zun chhuak chu zung turin ka phei dek dek a, ka thutna hi a hmalam deuha a awm avangin hmalama Toilet hman tumin Puanzar awm chu ka keu dek dek a, Executive class ho thutna a lo ni a, an lo awm khup a, ka kal tlang phei den den a, toilet amaw tiin kawngka-te lo awm hmasa ber chu ka’n hawn rawp mai ale… Cabin Crew thawmhnaw ho chu a lo in khai tuar mai a, an thawmhnaw bawm ka hawng lek lo niin. Ka khar rang kher mai. Airhostess pahnih chuan min lo hmu reng a, an lo nui a, toilet chu a dawt chiah kawngkhar zawk a lo ni a, ka lut ta a.

Ka chhuak leh lam chu hostess pakhat chuan “I tih leh hun chuan fimkhur tawh rawh aw, chuti lo chu chhuahna kawngka I hawng ang a, I tla daih mai ang” tiin min lo fiam a, an nuih chu a za ve khawp mai. Kei pawhin nui chungin ka chhang liam ve ta mai mai a. A hnu-a an thil rawn sem thleng chuan kan la innuih a.

Airport kan thleng chu kan tam deuh a, ka chhuak hnung khawp a, Terminal ka luh ve chuan an lo intlar put tawh a, hnung tawkah chuan line awm sa chu ka han chhunzawm ve ringawt a, kan tawlh hma zel a, hmalama thu intar chu ka hmu thei ve ta, TRANSIT tih hi a lo ni kuau a, ka hma-a mi chu “Connecting flight I nei em?” tiin ka zawt dek dek a, ani chuan a lo nei Nigeria kal tur a lo la ni, Ka line a dik lo tih ka hre nghal, an hrui zam hnuaiah chuan ka kun ket ket a, ka chhuahsan ta daih a. Arrival pangai chu ka va zawng hmu ve leh a. Immigration-ah lah chuan ka passport an en a, ka hmel an en leh a, Indian i ni maw? min ti sek a, Ni e Ni e ka ti a, I hmel chu a Indian lo an la ti cheu a. Ka hmel hian kawng hrang hrangin mi tam tak atibuai fo reng a ni. (Ka nui)

Ka haw lamah lah tlemin flight an delay a, Maputo Departure chu Gate 3 a ni a, ka thu ve ran a, ka pum nuamlo inthiar ngai leh ta tlat mai chu kan hmalama kawngkhar inhawngah chuan ka lut phei a, ka va inthiar, ka let leh chuan kawngkhar chu TALA lian tawk hian an lo kalh daih mai, kawngkhar chu ka sawi a, ka thutna hma-a thu Pakistan pa pakhat chuan thawktute a ko a, min rawn hawnsak leh ta a, “Use upstairs next time” a ti a, next time a awm tawh awm lo e mai a ti rilru thruai thruai chungin ka aw liam ta mai mai, dik tak chuan ka kal hma lawk pawn midang an lut zut zut ka hmu reng a, chuvanga kal ngam chauh ka ni a, ka kal tak avanga kalh kher kha ka ngaihdan a ni bik hlek lo. Hahahaaa

Mozambique kan thleng chu Mahni ram thleng teh chawk ka inchan ve deuh a. Ka che chukchu tawh bik lo. Mahse Mingo tam tak an che chhe ve thung, Immigration-ah chuan National, Foreigner, Foreigner Resident tihte a intar a, Foreigner Resident tihah chuan Confi' takin ka intlar vang a, ka hnung leh pek hle mai a, mahse engemaw chen hnu-ah chuan ka hma-a mite chu tlar dangah an insawn ta pheuh pheuh a, an line an hai ve ni lekin. Foreigner lamah chuan an pakai ta teuh a, kei chuan ka hma phah ta phian a, chung mite chuan min thlamuan hle, mi pawhin engkim an lo hriat bik awzawng loh hi ka ti vel ta mai mai.

Can yaaa..... ????

Lam ang ka lo let leh ta e, kha chen Kenya cham hnu-in. Hei hi maw ka blog ve te chu.. Tlawh loh run ram a va iang ve... Chhiartu lo lut apiangte kumthar chibai ka buk a che u..

Post hmasa lama ka sawi lawk ang khan ni 17th Dec '08 tlai Dar 6 velah Kenya (Can yaa..??) airport chu ka thleng ta ngei a, Major Bula te chhungkua-in min lo hmuak, kei duh tawka mahni tawng ngei maia tawng thei ta chuan kaikuangin Nu leh Pa-te khua chu nuam singkhaw a ti ang mai khan nuam ka ti lutuk a, Airport leh In inkar chu darkar 1 vel motor-in kan tlan a chumi chhung zawng chuan ralte vahai no la ang maiin kan phul phei a, thusawi kan inchuh hi a ni ringawt.

In nuam tak, Compound zau tak, hring dup maiah an cheng a, kei akar khuallian thlenin min thleng a, an fa-te lah an Kenya kal dawna naupang chumchiap te te kha Nuthlawi rai rual zet an lo ni tawh a, an felin Nu leh Pa thu an awih em em mai leh nghal a, an chhungkaw bula awm a hahdamthlak tak zet a ni. Ka haw tum hunah ka haw thei lo a, ni thum zet ka cham chuang a, chuti chung chuan hlim takin min la mikhual zel a, ka vawklallen a ni ber e. (Hmarcha um, a ro, Soda leh thil dang tam tak min pe teuh zui..)

(Mapuia, Bula, Dennis )


Ka kal chhan ber Krismas erawh Mizoram anga ruai han theh hluaite an tih lemloh avangin kan awm darthleng vel ta mai mai thung.

Tichuan, ni 27th Dec khan Mount Longonot, tunhma-a tlangkang lo awmna tlang sang takah lawn turin kan inpuahchah a, Picnic tur ang hrimin ei tur hrang hrang, sandwich, Coke, thingpui, noodles leh tui tih vel chu kan inkeng im em a, haw thlak huna ei turin kan ei tur te chu Motor-ah tlang bulthutah chuan kan hnutchhiah vek a, kan zinga kal tawh leh chinchang hre ber tur kan nau Mapuia lah chuan in ril atamin in tui ahal ang, tui keng rawh u pawh ti si hek lo le, kan ar kawhchhuah ve tawp mai a nih kha.

(Hetia a lan ai hian a sang a nia, a khu em em bawk.)

Tlang bulthut atanga kan han tan chu kan la phur vei surh surh viau, kan lawn sang telh telh a, awm-ah thaw a leng ta mang lo, tui a hal tan, ni sa bawk nen, Mal lah chuan hnung lamah min pawt tung tung tawh mai bawk si, tlang chhip chu kan thleng zo angem tih chu kan in zawt ta reng mai.
Keini a hmeichhe pahnih phei chuan tlang zawl deuh pakhat kan thleng chu hetah hian kan lo nghak mai ang che u kan ti chuai raih tawh mai a, mahse Pa berin chawlh a remti mang lo a, kan han inchhawm chho leh ta a, hmalam han thlir chhoh chuan huphurhawm riu reu tak mai hi a ni a, U Manuni chau lutuk kal peih tawh lo chu, “Hma lam khi en lo-in I kalna lai chauh kha en la, kan thleng ve mai ang” ti te chuan ka la tawng thlamuan vei lawi a, kan tlangval pahnih Mapuia leh Dennis-a te lah chu a thlun chhuak ang nal nal-in an ding chho a.Helai khuar hi tlangkang awmna lai tak chu a ni a, a kalkawng a hahthlak a, a zau em em mai a, tlang-in a hual pup a, hei hi a zawh chhuah vek theih a, keini chu kan chauh em avangin kan kal kual ta lo.

Tlang zawl kan han thleng ve meuh chu kan chau lutuk a, kan thu hnawk a ni ber e, kan thlen hma-a lo han thleng hmasa Mihang nupa, tui leh biscuit nena lo chawlte chu tlawm leh zah pawh sawi loin tui in tur ka’n dil chawt mai a, anni chu an lo fel khawp a, tui bakah biscuit pawh chu min pe a, tui pawh chu kan duh tawk kan in bakah bottle te-in min la pe leh zel a, khatih lai tak kha chuan dum hle mahse an hmelte kha Angel hawl thlak ang velin kan hmu a, kan lawm zia thu-in kan hril seng lo, “khawvela tui tui ber” kan in a ni ber. Rei tawk fang, hahdam taka kan thut hnu chuan kan haw thla leh ta a, haw lam chu a zia ta viau a, keini phei chu kan tlan thla ta deuh pur pur a, hnungah U Manuni rawl tawh lutuk chu tiang nen a rawn inkhawh kar thla auh auh thung a. U Bula’n a rawn chhawm thla zel a, muang marin dam te chuan an rawn thleng thla ve ta a.

Tlang chhip atanga kawng lan dan...

Ni 29 Dec chuan Nairobi National park kan kal leh thung a, luh man a lo to lutuk a, a chhung kan lut lo teuh hle. U Bulate chhungkua 5 kei leh Driver nen an Kenyan Shilling 7000/- chuang teh meuh kan han chawi teh reng a, kei leh naupangho phei chuan to em mai kal lo mai ang kan ti tawh a, kan hotupa ber U Bula chu amah en ang a lo ni lo, a rilru a lo lian ru riau a, kan ti tawh laklawh a ti ve tlat a, kan kal leh ta poh a, nuam chu kan ti leh ta zek a. he hmun hi a zau kher mai a, motor-in kan tlan kual a, ramsa chi hrang hrang kan hmu phei zel a, thla kan han la leh ang mawlh mawlh bawk a, chawhnu her zetah kan haw leh ta chauh a ni.





Shopping center hi an nei nuamin a zau hlawm hle a, hmun hrang hrangah kan kalin kan bazar vel a, mi tam takin Korean emaw Chinese emaw min ti zel a, min pawmdan ang ang chuan kan awm hmiah hmiah mai a, Korean emaw min titute dawrah chuan ka hming chu Kim a ni a, a chang chuan Meble-i te ka ni bawk thin a, U Manuni chu ka Nu emaw ti tawk an awm a, ka Nu ka tih lahin an awih leh si lo, kan va nui nasa thin tak em awwww...







Mount Longonot-ah chuan thing mak deuh a awm a, lawn chak leh ta tlat mai a, thei tak maw..

Thiante puihna zarah engemaw ti ti-in a chungah chuan han ding thei leh ta mai...

Thlalak hi eizawn nan hmang ta ila.... Kenya-a ka lak ringawt pawh hlawkna tham fe chu a ni mai {Ka hralh theih viau chuan,... :) }

Kenya East Territory Headquarters - Nikum kum tawp maia an sak zawh an luah hlim hlawt a ni, a class a sang khawp mai. Thansparency an duh vang ni maw, partition wall-te pawh glass deuh vek an hmang mai.

Kenya khawpui Nairobi chu...



Kenya, Bird's-eye-view