Krismas thunawi..

"I'm dreaming of a white Christmas

Just like the ones i used to know.."

... tiin han zai bu ve tluk tluk thin mah ila, White krismas tak tak hi chu kan hre ngai lem hlei lo a, hmaaaan-ah, hman tak takah khan, Lunglei kan awm laiin khua a vawt khawp mai a, zingah hian Baze mual-ah vur a lo tla var ve iar a, chu chu vur tla ka hmuh chhun a la ni, chuti chung chuan Boney M hla sak White Christmas hi nalh ti em emin kan ngaithla a, kan kurpui ve duam duam thin a nih hi.

Kumin phei chu a White Krismas lo khawp a, khua a lum uap churh a, Celsius Degree 35 chung lamah hi chuan zai tui pawh a har khawp, chutih laiin zoram angin ruai theh leh zaikhawm awm ve hek lo rei lote kan inkhawm bang chu mahni In lam hawi theuhah ti ang maiin kan ruaipui tin dial mai leh nghal a, a khawharthlak dan a thuah hnih ngawt mai.

Vanneih asiamin kan hotu ten an in lama hmang turin min sawm hlauh a, chawhnu lam chuan ka va phei teh poh a, anni an lo inbuatsaih nasa a, present te min lo pe a, chaw te ka ei nghal bawk a, kan hlim ta phian, ka va tlailam um pawng par ta nghek a ni ber e.

Chutiang a nih avang chuan Zoram lama Krismas nawn ni, ruai theh ni kan tih ni 26 te chu in lama hna thawh nan ka hmang a, lunglen thulh thaka ka buai tak kha...

Chawlhni a lo thleng a, thiante nen kan han inhmu a, engtinnge i hman kan inti hlawm, ka khawhar chu an hlau ve tho a ni chek ang, naktukah kan leng dawn nia an ti a.

A tuk (28Dec) chuan min rawn sawm a, chaw eiin kan chhuak ve ta dam dam a, han chhuah takah hi chuan rei hi a lo awl khawp mai, traffic lah hi a maka mak hian a lo tawt thin a.

Ti hian ka ngaihtuah a, krismas hi mihring tung chho-a kal, mi ang pangngai chuan kan hmang reng dawn a ni a, awmna hmun a zirin hman dan erawh a in ang lo thei hlawm viau mai, thenkhatin nuam an tih em em laiin, thenkhat erawh lusun mangangin an awm a, thenkhat lahin mahni nuam tawlna ringawtin hun kan khawhral bawk a, nula thenkhat hmang nuam deuh lah a result thla engemaw hnu-ah a lo lang rawl nen.

Engpawhnise, a piancham kan lawm Lal Isua tana kan thinlung hawn mai hi hman dan tha ber chu a ni e, malin kan awm emaw, chhungte nen kan hmang emaw pawh nise Amah Isua nen kan hmang em tih hi a pawimawh ber chu a lo ni e. Hei vang hi a ni ang e.. "Thinlung a lamah hawn ila ro thil dang a ngai tawh lo e"te hial an lo tih le...!!!

A hlui thei lo!!

Naupan laia Krismas hman dan ka hriat theih hla ber chu Lunglei kan awm lai kha a ni awm e.

Urlawk zanah Nula Tlangval an zai a, tlaivar an tum ngei ngei thin, keini naupang pawh tlaivar chu kan tum ve eltiang, mi zaikhawmna bulah kan lo bu ve lawp lawp a, dar 11 te kha a va rei thei tak em.

Zingkarah khaw vawt tak hnuaiah peih lo zetin kan tho a, a chhan chu eng dang vang ni lo-in Krismas Bawng talh lai kan hmuh chak vang mai a ni. Khawlaiah kan thaw khu hlat hlat a, zing daifimin a bawh hnim te chu kan pal pel sur sur a, hnim hnaha dai khalte chu Vur tiin kan la teuh a, chutah Bawng an pheh thluk lai hmuh ngei tumin fatu ho bulah kan tlan a, chumi zawhah Vawk talhna lamah, vawk talhna-ah hi chuan kan awm rei peih ngai lo, a ril an phiar lai erawh hmuhnawm ka ti thei fu. Bawngsa an chan lai kan han en a, a tisa phu det det hi mak ti takin kan en reng a, kan hawlh de de thin.

Krismas ni-ah kawr thar ha-in kan han inkhawm ngei a, eng thu leh hla nge kan ngaihthlak pawh hre miah lo-in inkhawm ban hma-in chhuah phet kan lo tum bawk a, inkhawm banah chhangban, kurtai nen ngei mai kan ei ngei bawk.

Puitling ho chu an lengkhawm a, inti naupang fel takin zaikhawmna inah chuan kan han thu ve ren rawn na-a pawn lamin min hip nasat em avangin kan tlan chhuak leh thuai a, har mei khukna lamah kan in um kawi zawr zawr a, fatu ho-in thahnemngai taka sa an chawh sauh sauh lai chuan a kotlangah kan lo thu ve reng a, sa bel lian pui puite chu kan thlek dauh dauh a, ruai theh kha a phurawm thei riau.

Tlai lam a lo ni a, fatu ho chuan ruai siam tawh mai ila an han tih vel lai chuan zaikhawm ho chu an tui thar ta tlat mai, an la ri tluk tluk a, naupangin ei hmasa mai rawh se an ti leh ta nge nge, ka nu hi a ei hnuhnung pawlah a tang ziah zu nia!!!

Kum tam tak liam tawhin Krismas vawi tam tak hmang tawh mah ila, naupan laia kan krismas hman dan kha vawiin thleng hian a hlui tak tak thei lo, Kawrthar, inkhawm, lenkhawm leh ruai theh te hian Mizo te thinlungah thuk takin thu a la sawi reng a nih hi…

Ka Pasal tur..

Tunlaiin hmun tam takah, Hmeichhe chungchang hi a lang nasa hle a, a bikin internet hmangtute zingah pawh sawi hlawh ber pawl a ni hialin a lang, thenkhat phei chuan kan ning viau tawh mai thei, nupui/pasal neih chu sawi loh Ngaihzawng neih thleng hian kan mizo mipa te thikthu hi a chhe ta hle mai a, hei hian ngaihtuahna thui tak min neihtir ve leh tlat mai pek a. Ka’n ar mit tet khuan ve leh chiam mai ang e.

Mizo te hi hnam dang nena inchiahpiah ngai lo tak kan ni a, kan vela kan hmuh theih hnaivai Vai kan han tih maite phei chu kan ngai thei lo viau thin, Vun ngo ho Sap kan han tih maite erawh kan ngaisang leh phian lawi si.

Hei hian nupui/pasal neihna kawngah pawh chi inthliarna ramri thui takin min kham sak a, hmeichhia te tan lah awm thiam a har em em. Engemaw ti atang khan kan mizo mipaten ruihhlo an ching a, lehkha zir tha lo leh mahni pawh inenkawl leh inchawm thei lo-in rawlthar tam tak thlanmualah an liam a, chung zinga a vannei thenkhat erawh vawiin thlenga la dam an awm mai thei, amaherawh chu a hun laia lehkha an zir that loh avang tein ei tling lo-in an awm thung a, thenkhat chu tun thlenga mi duk dak mang lo-a chhuak ta an awm nuk ang.

1980 hnu lama piangte hi tlemin an vannei deuhin a lang, an nunah Drug-in hmun a luah ve hman lo a, mite chu zirna lamah an lo intlaksiak tan tawhin kan Zoram pawhin hma a lo sawn ve hret hret a, mipa fel tak tak an tam ta.

Tlema hranghlui deuh Nula zingah khan Mizo mipa neih tlak ka hmu lo ti an awm an ti thin, an hunlai kha chuan dik pawh a dik ta ve ang, mizo mipa, rui, zawi ngei nguai, ban puam lian tak, hnathawk tura rin tlak si loh kha an tam thin tlat.

Tunah erawh chuan kan changkang ve zel a, Ruihhlo hman ringawt hian hmasawnna a thlen lo tih leh ei tur a pe lo tih thalaite zingah hria an tam tial tial a, zirna lamah intlansiak nachang kan hre chho a, mi tam tak, zirna sang zawk bel turin Vai ram lamah an liamthla ta sung sung a, neih phak bak thleng pawha sen hnial lo-in zirna chu kan pan ta ruih ruih a, hei hi mi tam tak tan a that rualin thenkhatin kan chhiatpui leh ta niin a ngaih theih.

A bikin hei hian hmeichhia-te ah nasa takin a tha lo zawngin hna a thawk niin a lang. Phai lamah chuan ei leh in te a lo buaithlak a, rin aiin senso te a lo hautak bawk si a, thiante nen In inluahtawmte, han khawsak ho maite kha a lo awlsam a, thian in nel takte chu an han awm khawm ta reng a, chu chuan nghawng tha lo a rawn hring chhuak ve lo thei lo.

Thil reng reng hi a tha a awm chuan, tha lo in a zui nghal zat thin, a tha lo chu a langsar zawk ziah bawk. Chu chu mi tam takin kan hriat sa a ni. Mi fel tam tak phaia lehkhazir, mi hlawhtling tam tak an awm laiin a hlawhtling ta lo, zuzi leh mit ti mim zawnga khawsa te kha an lang lian zawk fo thin, hei hian a nawlpuiin mi zawng zawng kan tha famkim vek thei lo a, tha vek turin kan inbeisei thei lo tih pawh a chiang a ni.

Hetih lai hian a khawi lam zawkah nge kan awm tih hi mahni theuh in enfiah a hun. Kan chanchin a than dan hi a tha lam nge a chhe lam tih kan in enfiah ve fo a pawimawh. “Mi sawi ka pawisa lo, Ka Hringnun hi tu sawi phak a ni lo, ka duh danin ka awm ang, Zalen ka ni lovem ni?” tiin mahni awmhmunah lo tang kawh ve sateh thin mah ila, chu chuan nghawng tha lo a nei fo thin si a, thenawm hnam dang tlangval lo fawrpui lawp lawp kha kan ngaihin sual a ni lo mai thei, nimahsela chu chuan engnge a hrin chhuak kan ngaihtuah tel thin lo hi a pawina chu a ni.

Kan kawppui tlangvalte khan khawi lam mi nge kan nih tih kha an chhinchhiah ru ve kiau thin si a, ka hnampui nula chu keimah ang maia sihhnipah an ngaih ve phah ta vek mai thin, chu chuan keimah avangin ka hnampui nula te chu dinhmun hlauhawm takah a dintir a, Se hnuhnung vuak tuar an tih ang maiin, pawi sawi lo mi tam takin, pawngsual, chhaih nawmnah leh mualpho an tawk ta a nih hi.

Hmeichhe pawisawi hlei lo-in pawngsual a tawk a, kan ngawi bo thei lo, kan thin a rim em em thin a ni, hmeichhiate pawh hi kan in enfiah a hun, Misual ka tawng fuh nge ka awm dan hian a cho chhuak ve hrim hrim, hetia ka sawi avang hian mi thenkhat chu in thin a lo rim mai thei e, mahse ngaihtuah chiang teh. (Naupang kum tlinglo leh Pitar pawngsualte chu lo dahtha tai la.)

Vawi khat pawngsual case, court-a thubuai rem chungchang an sawi ka hre reng thin. Pawngsual I tawh laia I thawmhnaw hak han la teh an ti a, ani chuan Kawr ban bul, pan tak leh pawnfen chhing tak mai a rawn khai chhuak a, “E, pawngsual awm reng pawh I lo nih hi” an ti e an tih kha, tak tak a nih ka ring lem lo na-a thil ni thei awm tak chu a ni.

Kan incheina leh kan mizia hian thu tam tak a sawi a, tawngka-in pawngsual hi ka hua, kei chu nula thianghlim ka ni tiin kan vaupung ti lian mah ila, kan nun lama a lan si loh chuan thu va-uk mai a ni ang. “A niang I sawi mai, I sawi zawngin I nihna a lang e” tih hla ang mai a ni.

Hei hi I ngaihtuah chiang teh ang u. Pathianin Israel fa-te hnena dan tam tak a pek lai khan hei hi sawi tel a ni tlat nia.. Numbers 36:6 Zelophehada fanute chungchang thua LALPAN thu a pêk chu heti hian a ni, 'Tha an tih apiang nei sela, amaherawhchu an pate hnampui zinga mi ngei an nei tur a ni,' tiin

Pathian pawh hian a ngai pawimawh hle ni tur a ni, thupek khirh tak a pe tel tlat. Chuvangin Hnam dang nupui/pasal neih hi a tha nge tha lo tih sawia iak iak lo hian mahni pa-te hnam ami ngei neih tum ta theuh ila, Mizo hnahthlak kan nih chhung chuan “Hnam dang kan nei dawn lo,” lo zu ni reng a…!!!

A hmingah chuan..

Mihring kan lo pian chhuah phat hian min kohna tur atan kan nu leh pa-te emaw chhungten hming min phuahsak nghal vat thin. Chu chu midangte nena kan inhriathran theihna tur atan a ni a, Pathian ngei pawh khan thil nung tinreng, leia kal chi leh bawkvak chite leh boruaka thlawk chi a siam zawng zawngte kha Adama hnenah a hruai a, anin hming a lo phuah vek a nih kha. Adama erawh chu Amah Pathian ngeiin hming a phuahsak bawk a, chumi hnu-ah amah awmpui tur awm mi a siamsak chu a hnenah hruai lehin Adama chuan hming a lo phuah a, Evi tiin.

Hmanlai kan pi pu-te chuan Pathian an la hriat loh avangin an vela an thil hmuh emaw, an nundan nena inmil turin chumi hming chu an chawitir mai thin. Saikapa tia an phuah chuan chumi Pa emaw a Pu emaw chuan Sai an kap a ni thin. Tin, mi hausa deuh an nih chuan an sum neih leh dar emaw silai emaw an phuahchhan thin bawk. Darpuii, Sangkhawli tih velte. An hming atangin eng chhungkua nge tih a hriat theih thin hle. Tin, Lal hmingsak bik dan a awm a, chumite chuan Ngur emaw Sai tih emaw an hmang tel tlangpui a, chuvang chuan hnamchawmte chuan hming tha an phuah ngam lo a, Lal hming sakna dal lo an ti thin.

Kolasib-ah Pu Bawngleia a awm a, mak kan ti thei rap, Bawng lei (tougue) amaw kan ti thin a, mahse Bawng lei (Buy) zawk a ni mai awm mange tih ngaihdan hi tun hnu-ah ka nei leh a, chuti a nih chuan an hun laia bawng lei thei chu hausa tak an ni tih entirna daih a lo ni. Pu Bawngleia pa chu Thingrema a ni e an ti nghe nghe.

Pathian kan lo hriat hnu hian kan hming phuah dan pawh a dang ta hret hret a, Lal tih hi hmingah kan hmang tel tlangpui ta. Lalremruati, Lalchhanhimi, etc. emaw Vanlal.... tihte in.

Ka nu hi Laichhingi a nia, awmzia a awmlo hle hian ka hre thin. A lai (Navel) awmna hi a chhing viau aniang ti dawn ila, midang awmna ang bawkah a awm si. Tihian ka ngaihtuah leh ta thung a. Lai han tih chuan Laina, chhungkhat, vua leh vangte sawina a ni a, Chhing chu huapzo emaw khum tih nana hman a ni a, chuti a nih chuan ka Nu hming chu hming tha tak a lo ni reng mai.

Ka hming hi Zobawk upa pakhat Lianlunga phuah a ni a, Ka nu leh Pa-te Zobawk an awm laiin Sipai Pawl hian hma a sawn nasa khawp mai a, Baptist Kohhran chutih laia kohhran lian ve tak mai chu an rawn inlet vek a, an Biakin chawpin an rawn pem a ni awm e, chumi chawi chuan Ramdinthari a ti a, ka Nu chuan ka pian veleh Lalremruati tiin min phuah a, chutia Zobawk upa-in phuah chhan nei tha inti tak maia ka hming a rawn phuah avang chuan ka lai-ah hming chu pu lo-in Ramdinthari tih chu ka pu ta zawk a.

Ka hming hi a common lo bawk a, ka duh lo hle thin mai, ka pa hian a bulah LAL a telh thin a, a sei teh duah a, ka telh duh ngai lo, lehkha min thawnna ah hian a telh chawk a, ka ngei thei hle. Mahse min koh erawh chuan Mate min ti leh daih thung a. Thiante chuan Dini min ti ta zel a, ka hming phuahtu-in Zobawkah Ram in rawn Din Thar a ni ngawt alawm ti-a a phuah chhan bak chu ka hming hian awmze hran a nei lem lo hle. Ka hming ang pu ka hmuh hian enge an phuah chhan ni ang aw, ka ti fo thin, an tam lem lo.

Eng hming pawh pu ila kan nun dan hi a ni, lo pawimawh ber mai chu ni, Lalnunmawii KS tihte, Rinawma rukru tihte chu a inhmeh loh dan Rappuichungsanga Kawrchung Var khai ang vel a ni.

Lal Isua kha chu a pian hma hauhin hming awmze nei, hnamtin damna tur phuahsak a ni sa a, “Vawiin-ah hian in tan Davida khua-ah Chhandamtu a piang ta, Lal Krista chu” “A hmingah chuan Maka, Remruattua, Pathianchaka, Chatuanpa, Remna Lal” tih te a ni duah mai. A hming ang reng a mak, chak, ropui leh thiltithei chu a lo ni ngei e.

He Isua ngei hi hnam tin dam nana kan tana lo piang a ni a, kumin a piancham kan lo thlen leh dawn hian a hming awmze nei hi awmze nei lo-in liamtir lo ila kan tan Damna thlentu a tharin lo ni leh rawh se.

Hmangaihna chu...

South Africa International Transit-ah chuan ka next flight nghakin ka thu a, hun ka nei hnem bawka Lehkhabu chhiar tur la chhuakin thut hmun chu ka rem sauh sauh a, ka lehkhabu chu ka bih ta ngar ngar a. Chutia ka thut lai chuan ka bulah hian sap nu pakhat tar lam tawh, kum 50 chu a ni ngei tawh ang tih hi a rawn thu a, ka en thuak a, lehkhabu chu ka chhiar san leh ta a. Nakinah chuan chu nu chuan phone a hmang ta a, a tawng zet zet a, a pasal a bia a lo ni a, a han be zo chuan, “Bye, love you..” a ti a Tar kiring zet tawhin a pasal a bia a, Love you a la ti zarh zarh khan ngaihtuahna thui tak min neih tir pek a.

He thumal pathum lek, sap tawnga I LOVE YOU tih leh mizo-in KA HMANGAIH CHE kan han tih hi a ril dan chu a in ang rengin a lang. Thusawi awlsam tak erawh a ni hauh lo. He thumal tawite chhungah hian thu ril inthup thuk tak leh sei tak, dam chhung daih tur a inphum tel a, khawlaia zurui pai mai mai sawi pawh nise, thuhriltu ropui takin a sawi nen a ropui dan leh a ril dan a lem chuang awm lo e. Hei vang hian kan Bible ngei pawhin thu ropui ber tiin a lo sawi reng a nih hi.

Hmangaihna hi enge ni ti ila, sawifiah dan a hrang nuaiin a rinawm a, kan hun tawn leh kan tawn dan angin hmangaihna kan hrilhfiah dan pawh a dang nualin ka ring. Tlangvalin nula a han hmangaih tawh vek vek hi chuan a inhuam thui thei khawp a, Kawlthei kung pawha lawn thei uk lo khan, “Ngiat lang, Siar ka man nang che..” an han ti ve thla rawk zel a.

Nimahsela, Tlangvalin Nula hnenah,‘I tan chuan si-ar lak pawh ka huam a, lui kawr thuk ber leh tlang sang ber kaltlang ngai pawh ni se, nang hmu tur chuan ka lo kal zel ang, nang nen hian thihna chauh lo chuan min then thei lo ang’, ti zuah zuah mah se, ‘Zaninah ruah a sur loh chuan ka lo leng ang’ ti-a a thusawi a tlip leh si chuan a inhuamna leh thusawi zawng zawng kha thu va-uk mai a ni.

Hmangaihna hi mi hrang hrangin an hrilhfiahin a awmzia an sawi a, nimahsela sawia fiah mai chi leh tawp mai chi erawh a ni lo a, tawna fiah chi a nih hmel. Mihringin hmangaih a neih chuan thiltihin a zui a, Nula tlangval karah chuan chu hmangaihna chuan par a chhuang a, rah duhawm tak thlenin chhungkua an din thin. Chu Hmangaihna chu mi pahnih inkara thil thleng tur a ni a, pakhat ringawt hmangaihna chu a famkim thei lo nachungin mi pakhatin a hmangaih em em khan a hmangaih let ve lo tlat thei.

Hmangaihna dik chuan lei leh van pawh a thlunzawm mai a, tuilian leh ral hlauhawmnain awmzia an nei thei lova...nu leh pate hmangaihna leh duhsaknate pawh an tlanchhiatsan dawr dawr a, chutiang hmangaihna chuan engkim hi a siam rem a, kum leh khawsak dinhmun inang lote mai mai chuan hranna aiin thlunzawmna nghet a siam zawk thin

Mizote hi hmangaihna la na viau hlawm si hian Induat hi kan thiam hlawm lo viau niin ka hre thin. Han ngaihtuah mah teh. Kan hmanlai Pi leh Pute phei kha chuan nupa an nih hnu-a mi hmuha induat hliau hliau kha an tih zawng a ni bau lo mai a, “I bai chhuan a so, rawn vil rawh” te hi an ti khur khur a, inbiak bak hluk tur emaw an ti tlat thin. Hmangaih thu chu nulat/tlangval laia an inhrilh kha an duh tawk ta mai em maw ni tih turin an inhrilh ngai tawh mang thin lo. Nimahsela, inneih hnu hlei hlei hian In Hmangaih thu hi inhrilh tawn fo tur a lo ni.

Hmangaihna-a pawimawh ber mai chu mi pahnih inhmatawna an inen mai ni lo-in thil thuhmun an thlir dun emaw thlir dan in anga an thlir emaw hi a ni, Nupa ni ve si engtik lai mai pawha an inhawitawn loh a, Ashoka Pillar ang maia an inhnungchhawn reng chuan Nupa nun hlawhtling an nei ngai lo ang.

Vawi khat chu Hnahlana ka awm laiin ka awmnate fapa chuan Aizawl lam nula a rawn ru haw ve ngawt mai a, a pa chuan eng dang a sawi lo, “Hmeichhia hi chu in huai teh e, in pasalte chauh in hriatna hmunah pawh in kal dawr dawr mai a..”a lo ti. A ni tak a, Hmeichhia leh mipa, ni danga in hmu leh inhre ngai hleilo, han inhmangaiha, kumkhua-a chen dun an han huam zui hi a mak ngawt mai.Hei hi Pathian remruat dan chu a ni tlat bawk si. Thenkhat duh leh hmangaih em em nia in ngaiin an han innei ta cheng a, khawsa dun rei hleithei lo a inthen leh an awm chawk. Hei hian khawvel mihringte in hmangaihna chu a tluantling lo a ni tih a ti lang chiang hle bawk. Hmangaihtu dik tak thinlungah erawh chuan a hmangaih kha nei thei lo mahse ani chu hlim taka a awm phawt chuan lawmawm a tiin tha a ti a, “Ka thai chang mah lo la, khiangawi mi tawnah, Hmangaih lung i dum phawt chuan lawm zel tang e,” a ti thei thin a ni. Hmangaihna in mahni hma a sial lo tih ti diktu pawh a ni thei awm e. Amaherawh chu hmangaihna dik tak inhlan tawnte inkarah chuan rinhlelhna leh huatna in hmun a chang ve thei lo a, an inhmangaihna chu a par vul reng thin, tin, rinhlelha awm turin a hmangaih tak chu a phatsan ngai bawk lo ang.

He Hmangaihna vang hi a ni ngei ang Pu Vankhama’n “I sakhmel tawn changin thinlai a eng a, I sakhming an sel leh kawl ang ka hnim a..” a lo tih le…

Hetiang a nih lai hian a hmei apa-in tih tur pawimawh kan nei theuh mai, chu chu RINAWMNA hi a ni. Nupui Pasal te laka rinawmna vawng thei lo-in a hrinchhuah chu chhungkaw buai a ni mai.

Eden huanah khan Evi khan ama thutlukna-in Pathianin thei ei loh tur a tih tlat kha a lo ei ta mai a, a pasal chu a pe ve a, a ni lah chuan ihe loin a lo ei ve mai ni awm tak a ni. Kha thutlukna pawimawh lutuk, an Nun pum ti chhe vek thei thutlukna Evin a siam lai khan Adama kha khawnge a lo awm bo ni ang le? Ramhnuai pilril zawkah a lo inthiar nge ni ang a, ramsa dang ngaihvenin a lo tei bo nge, boruak thianghlim dawn tumin a lo tei hawi ni ang? Evi teh reng pawh khan engvangin nge a pasal tel lo-a thutlukna pawimawh tak mai chu a lo siam mai le? Nupa chu khawsa duna thil engkim sawiduna thutlukna pawh siam dun tur an nih teh lul vei nen.

Bible chuan Hmangaihnain a dawhthei a, ngil a nei bawk thin; hmangaihnain a itsik lo va; hmangaihna a infak lo va, a uang lo va, a che mawi lo lo va, mahni hma a sial lo va, a thinur duh lo va, sual lamah a ngaihtuah lo va; fel lohnaah a lawm lo va, thutak erawh chu a lawmpui thin a; engkim a tuar hram hram a, engkim a ring a, engkim a beisei a, engkim a tuar chhuak thin.…. a ti. Chu chu hmangaihna dik Kristianten kan nunpui tur leh kan nupui/pasal, u leh naute laka kan nunpui tur chu a ni e, chu hmangaihna chu Pathian atang chauhin kan nei thei ang.

Pathian hmangaihna hian engkim mai a lo huap zo a, hmangaihna ropui ber chu a ni ngei mai - Chuvangin he hla hian I lo tlip teh ang…

Pathian hmangaihna ropuizia, Thu leh hla-in a hril seng lo
Van aia sang aw a zauzia, Sual hmun thim ber pawh a thleng zo
Sual bawih ata lungngai mangang, A fapa a pe a
Boral fate muanna a pe, An sual a ngaidam bawk

Tuifinriat zawng hlo tui chang se, Ziakna atan thing zar tinreng
Lehkha phekah Van khi chang se, Ziaktu atan chuan mitin reng
A hmangaihna ziak dawn ila, A kang zo ngei ange
A leng dawn lo, a hlai tawk lo, An hril seng chuang lawng e

Chawlh hahthlak..!!!

Sap ho chuan, "Miin hna a thawh rim viau chuan chawlh a la ngei tur a ni" an ti thin an ti a, chumi chang chawi chuan chawl ve ila tiin Zoram lam panin ka thlawk haw ve vau vau a, mahse chawlh hman meuh chu rin aiin a lo hahthlak daih mai.

Ni 3 October-ah Maputo chhuahsanin zanlaiah Mumbai ka thleng a, Chhungte, Pa Rama, Nu Kawli Manuni leh Zomuana ten min lo hmuak, rei pawh awm lo-in Kolkatta lam-ah ka thlawhsan leh nul nul a, zanlai laia hah taka min lo hmuaktu te chu an zahawm duh ang reng hle. Kolkatta pawh tluang taka thlengin thiante nen chawhlui te kan kilho a, ka hlim tan hle, mahni rama awm ang maiin ka ri le lu tawh.

Ni 5 October chuan Zoram ngei-ah chuan ka han tum ta, a nawm dan a dangdai ngei mai. Mite chuan kumpui linglet mai ni lo, thangkhat lian lai pawh ani mai thei Zoram an chhuahsan a, kei ve chuan kum khat erh awrh ka chhuahsan hnu-ah ngai takin ka haw a ni a, Lengpui atanga kan han haw te chu, "E Khai, kan kawngte chu a lo zimin a lo va han chhe em!!!" ka'n ti tan pang a, a ni lah taka a kualin a zim si a, motor a tam ve si a, ni danga hlau eih ngai lo khan ka han hlau thar leh deuh vel a, hei vang hi a ni ngei ang sap lo kal thin ho hian Mizoram kawng an sawi nasat theih em em tiin kan ti ti chho bawrh bawrh a. Min rawn hruaitu Mafaka chuan, Hman deuha Sap ka hruai pakhat phei chuan a mit a hup asin a ti.

In kan thleng chu min hmuak tura an lo chhuahbo hlanin kan in chu an rawk chu lo niin. Gas bur 1, Consumer card 3, DVD player, Digital Camera, towel leh Bag te an lo la. Tui pump khawl pawh lak mai tuin Bag-a thun sa ap-in TV bulah a lo la in hung a, an hmanhmawh phelengin an la theihnghilh ta nge ni dawn ni???

Upa-in "Sawm thah ni-ah pawh vawi khat lungngaih a awm chawk" an lo ti mathlawn lo-in hlim takin In ka thleng chu kan ri chel chul ang chu tih nak alaiin kan thil Bo buaiin kan han buai leh rih a, tum lutuk loin Bawngkawn Police station-ah chuan kan han report a, anni lah an hmanhmawh lem lo khawp mai leh nghal. A ni hnihna velah kan inhnuai luahtu tlangval-in Digital Camera hralh an awm a, in ta a ni em va en teh u a ti a, thenkhatin an zu enzui chu a leitute chuan man to zawkin an lo hralh chhawng leh tawh a lo ni a, a pianhmangte an sawi danin kan ta ngei niin kan hria a, kan han zawng kual leh a. Police hnenah report-in a zuar hmasa bertu te inah chuan an han kal a, ani a lo awm lo, a Bialnu Kolasib-ah a zin a, a kal ve a niang an ti a, Police ho chuan nangman zu be chhin teh min ti, ka duh i-khaw si lo, anmahni chuan an zu be ta nge nge a, ani chuan Kan inhmu lo reng reng a lo ti si.

Kan misualpa chu ni 12-ah pawh chuan an la zawng ta zak zak a, tlai lamah chuan Aizawl lam-ah ni 8 khan an lo man daih tawh a ni tih kan hre ta a, thaw khat chu a veng deuh huai a, mahse kan thil ru-tu chu a ni ngei em tih zu fiaha zu dawp turin Police te chu an kal ang a, an zu ti fel mai ang chu tih laiin engmah an ti ta hlei lo a, vawiin thleng-in chanchin engmah kan la hre zui ta lo.

An hnu chhui tur pawh dik tak chuan keimahni kawhhmuh a ni a, a misuala ber an man hma-in Aizawl lamah an lo man tawh leh nghal nen, chumi bawhzui chu thil har vak pawh ni tawh lo-a kan hriat laiin engmah reng reng an ti lo chu mak leh hrilhhaithlak, thinrimthlak tak bawk si a ni. Bawngkawn Station lam kan biak lahin a case i\o Assembly-ah a duty an ti, amah puitu lah Darlawnah a zin an ti thul a mak thei khawp mai, Ka nu phei chuan, "Ka phone chhen dawn, an hmuhchhuah hma chu ka phone zel ang" a ti. Chung vel chu ka buaina pakhat a ni.

Thiantha leh chhungkhatten min lo ngai der-in chaw ei-ah te min han sawm ve a, a chang chuan kan thil bo vel chungchangah rilru pangkhing taka ka kal chang a awm a. chaw ei kham veleh thut pawh thu muang hman lo-a baklenga ka tlan haw chang a awm bawk.

Sunday-ah report pe tur leh thuchah sawi tur ten Corps hrang hrangin min lo sawm ve bawk a, ka chhuak reng mai bawk, kei akar thusawi hi tu tan mah malsawmna a ni lo ang tih hre reng chungin lawm tak-in ka kal zel a, vawi li lai chu thu pawh ka sawi tak kha. A hlimawmin a lawmawm khawp mai.

Ni 28-ah haw a lo hun leh ta reng a, dan pangngai te-in Mumbai chu zanlaiah bawk chuan ka thleng thla leh a, Nu Kawli leh a thuihhruaite ho, ka u fanu Manuni nen, kan nau Chhuansanga leh thianpa Zomuana te chuan min lo hmuak leh thap a, kar lo-ah ka tihdan pangngai bawkin ka thlawhsan leh ta vek hlawm a.

Mumbai atanga International flight-a chhuah hi a foreign ruih tawh mai hian ka hre thin, mi an tam ngang mai thin si, Kolkatta atanga connecting flight nei ka ni bawk si a, ka hnung hle. Ka hma-ah mi 1, hnungah 3, kan vaiin 5 kan la awm tihah chuan seat a full an rawn ti ta mai, a manganthlak leh ta khawp mai a, kan han buai deuh laih laih a, Mauritius lam kal turah kan thawn kual mai ang che u, Johannesburg chu dar 12-ah in thleng hman tho ang, an ti a, J´berg - Maputo flight chu dar 5pm a nih avangin ka hman tho turah ka in ngai a, Mauritius lam thlawhna ah chuan min beng liam leh ta a.

Mauritius kan thleng chu, J´berg kal tur thlawhna a lo inpeih leh ut tawh mai lo niin, keini ho chauh chu min lo nghak tawh a, hmanhmawh takin kan han in check vel leh zung zung a, security te pawh chuan anni kha tih hmasak tir rawh u an ti zel a, kan hming chu an lo lam lauh lauh tawh mai a, kan han in check fel a, Thlawhna bawkah chuan J´berg lam pan turin kan lut leh ta a, ka kalpui Sap nu pakhat chuan "Kan thiam loh a ni hleinem.. a pawi lo e" a lo ti ve bai bai a. J´berg kan thlen chuan dar 12 chu a ri chiah a, ka next flight chu ka nghak leh ta a, buaina dang ka la nei, ka bungrua kha J´berg thleng chauh an book thei si a, ngaihven ngei a ngai dawn a, counter ah lah chuan an la thu si lo, kal dawn tepah ka transfer fel thei ta chauh a, buaina a awm ang tih kha ka hlau sa reng a..

Rin ang ngeiin Maputo kan thleng chu ka bungrua a lo thleng ta hlek lo mai, hawihai rap, mahse midang 5 emaw vel lai pawh chu an buangrua a thleng lo a, next flight ah an rawn thawn a, lo nghak rawh u an ti, min hmuaktu te ka va zawng, ka va hmu mai lo, phone ka tum lahin ka Phone battery a ral thak nun pawh nung thei si lo, Security-ah chuan phone hman ka dil, anni lah an lo strick em em zui, phone hman an phal awzawng lo, mahse mi pakhat chuan hman tur kan zawnpui ang che a ti a, an office pakhatah chuan min luhpui a, thiante chu kan phone thei ta, anni lah inchung lamah an lo awm niin, an rawn chhuk thla ta vat a. Bungrua pawh chu dar 9;30pm velah chuan a lo thleng ta a, hlim tak chuan kan haw ta nal nal a.

In ka thleng chu Hauhuk kah thlak ang dera mut tum nak alaiin ka bungrua an lo theh thal kual nasa lutukin an ti silawng a, a ke a chhe deuh vek a, a huh hnup bawk si, loh theih lohin ka han phelh darh leh a, ka chau nen, ka mu chu ka mu tui ngei mai.

A tuk zing dar 7-a thiante rawn phone pawh ka chhang tha peih meuh lo a, dar 11-ah kan hotupan min rawn phone leh pawn ka la mu a, I la mu a ni maw ati pawh Aw tiin ka chhang hmiah a, "E khai, chawl hahdam rih rawh" a ti, kei lah chakai thi khai ang hnuang ka la ni mai "Ka chawlh hmang chu chawlh hahdam ka ngai a nih hi" tiin ka mu leh ta reng a.

"Chawlhna nuam Krista-ah
Hlimna kim Krista chu
Innghahna nei lote, innghahna a ni si"

tih hi ka sa ka sa pek a, Lal Isua ngeiin, "Nangni thawkrim leh phurrit phur zawng zawngte u, lokal ula, keiman ka chawlhtir ang che u" a ti a, Lal Isua-ah lo hi chuan Chawlhna tak tak a lo awm lo a nih hi tihte ka ngaihtuah kai ta zel a...

Khuangchawi thla...

“Zanin thlâ a êng hle mai
Kuli nan a tha, a hahthlak na-a
Thim aiin a nuam..”

Buai lai-a sipai puak phur ho khan khi hla khi an sa thin a ni awm e, puak phurh chu ninawm viau mah se thlâ a han en phung mai chuan nuam an tih phahin an hah a dam phah sawng sawngte pawh ni fahmiang. Khatih lai khan tunlaia kan Electric eng ang hi la nei hek lo le, an eng neih chhun bati siam chawp chu in lamah pawh an chhi tha phal meuh lo a, nula tlangval inrim pawh mei engah an inrim mai thin. Tlangval zakzum deuh phei chu mei engah thu ngam lo-in tuium hunna bul thim lai an han chuh a, nula bengvar deuh chuan.. “Khai, i awmna a thim e mai, kan hmu thei hleinem che, lo thu hnai ve rawh..” tiin tleirawl zakzum tak chu an ko hnai chawk bawk.

Chutih laiin German râl rûn turin tlangval rual chu an chhuak ta teuh mai a, an bialnu te an ngaih ve hlawm dawn teh lul vei nen, ziak thiam lah kha an la tlem nasa mai si, tlangval, ral runa kal lunglengte chuan an thian ziak thiamte chu an han ruai ve leh chhawng a, thiam leh thiam lo-a kutziak kawi ngil ngela a arthai chu nula chuan engemaw chen hnu-ah a han dawng ve ta a, a lawm ngei mai.

Chhun lamah hnathawka chhuak reng an ni a, thiante zingah lehkhathawn chhiar a rem si lo, losul haw hnu-ah mah chuan inleng haw rem hnu-ah lukhama a lehkhathawn dah that chu mei engah rem leh rem lo-in a han chhiar ta a, bih uluk a ngai thin ngei mai. Lunglen a hnem nge a tizual sauh tih pawh hriat thiam a har ngawt ta ve ang, hei vang hi ni maw he hla an phuahna chhan hi-

“I thaikawi bawngte kan lo hmu a
Puan ang kan zar der e, kan run in chhungah
Ngaihruatin lunglen a hril chang chang”

Hetiang hi an dinhmun a nih miau avangin an tan Thla êng kha a va pawimawh teh lul ngai em!!! October thla bial hi a eng bik a ni tihte pawh an lo hriat phah thlip thlep a, chu October thla eng ngei mai chu Khuangchawi turte pawhin thlahlelin khuang an lo chawi thin ni awm ania, hei vang hi ni maw Khuangchawi thla an lo tih le??? Chu thla eng chu lawmin a thim lai lai pawh an lo chuh ve thin ngei ang le...

Chung turni chu thlang kawlah liamin Chhawrthlapui êng mawi tak chuan khuang a rawn chawi a, a êng mawi no ngei mai, van lah chu a thiang kuk mai a, arsi a pe eng un mai bawk nen, chu Khuangchawi thla eng hnuaiah chuan mi awmthei deuhin khuang an chawi a, chawng an chen a, nula tlangval an chai a, nuam an tiin an hlim em em mai. Leng zawng an hlim tak meuh a, an khuangchawi hman nawm zia chu a kum leh vahsan lak lai pawhin a khaw ti ti tui ber a la ni ta zel lo thei lo.

Chu Khuangchawi thla eng no ruai mai lawm-a lam thin kan pi/pute chuan mual an liam zo tawh a, a hunlai hre phak thangtharte zingah kan awm ta lo. Nimahsela, vawiin thlenga danglam lo chu, chu thla eng ngei chu a la ni fan a, khua a thim zawh poh leh thla chu a eng mawi ting mai thin a lo ni..... He Khuangchawi thla êng ang bawk hi kan hringnun pawh hi ni thinin zu hria ia!!!!

Africa - A thim chhah lai!!!

Kawngpui, alkatra luan chu pensanin hnimbuk kara kawng tereuhte awmah chuan kan lut a, hnimbuk kan kal pelh chuan kawng atanga hmuh mai phak lohah khua a lo awm reng mai, he hmunah hian mi hausa ten khawvel hi ka ta emaw tia nuam tinreng an chen laiin mual eng hmu ve pha lo mi tam tak an lo khawsa ve mek a ni.

Kawng chu vaivut chhah takin a khat tlat a, kephah pil dawn dawnin kan dai thawih thawih mai, heng kawngah hian vaivut hian kal a ti harsa hle. Chu kawng ngeiah chuan nitin kalin, an duhtakte nen pawh an lo inhmu ve thin a, an hnathawhna panna kawng a ni a, khawpuiah leh khawdang leh an thenawmah an kal dawn pawhin he kawng tho hi an lo zawh thin. He kawng vaivut sen thurin a bawh khah vek hi an nitin chakkhai lam nana an hman rim ber a ni ve tlat.

Chhungkaw hrang hrang chu ram bial bik neiin in-te 4/5 emaw an sa thlih thliah a, chung inte chu zana an riah nan an hmang a, chaw erawh pawn lamah an chhum mai thin. Inleng an neih pawhin pawnah an inkawm a, inchhung chu an in hmuhpui tam lo hle awm e. Tin,Hmeichhia-in nau a neihin thla 3 chhung chu a naute nen pawnah an riak tur a ni an ti, duat ngai hmeichhe nausen pawm chu pawn-ah a mu a, a khawngaihthlak hle.

(Pawnah mei an chhem a, rawng an bawl mai thin.)

Naupangte chuan pheikhawk bun tur nei hek lo, an ke khir chat bir ber chuan vaivut an dai thawih thawih a, kelawnga kal a nih miau avangin rannung seh thei apui a tam a, hei vang tak hian Uihli sehna mai mai pawh a pan a, thenkhat phei chuan an thihpui hial mai. Damdawiin lian an khaw hnaiah a awm lo, Sub centre hnai ber pan turin km 12 emaw vel kal a ngai a, chapa(bus) chuan man Mt 20/- a ni, an han thleng ta teh cheng a, sub centre-a duty te chuan hetiang damdawi kan nei lo ti-a an lo hnar loh leh mi an tam, lo nghak rawh u tiin thingtlang atanga lokal te chu an ngaihthah em em mai a ni tih an sawi, an tan sum neih a harsat tehlul vei nen. Heng uihli seh atan hian damdawi an nei lo a, Baygon an tih mai Insect killer hi an spray thin a ni awm e, a na a chhawk em ni ti-a kan zawh chuan, “a thak lutuk tur a ti nep deuh a” an ti. “Hetiang in spray chuan vun tan hian a tha lo ang,” ka ti ve ringawt na-a a thlakna tur damdawi ka pe thei chuang si lo, an hman theih hnaivai ber chu insect killer kha a ni tlat, an hmang leh thin ang.

(Naupang ke, uihli sehna hmuamhma)

An thawmhnaw mai bakah an taksa a bal hle, han tawh nak alaiin hmuh nuam an ni lo khawp mai. Intihfaina turin Tui duh tawk nei miau hek lo le. Thenkhat chuan tuichhunchhuah an lai chawp a, hei hi Meter 20 chuangte kan lai an ti, a thuk khawp mai,mi nazawng neih theih a ni lo, NGO thenkhat chuan a laihna hmanruate pe-in hmun thenkhatah chuan Tui pump te pawh an siam, mahse hei hian khawtlang a chawm zo lo nasa, tuichhunchhuah pakhat hi chhungkaw engemawzatin an inhman tawm a ni.(An tuichhunchhuah laih hi a thuk khawp mai)

Power supply phei chu vana rah ang a ni, an mumangah pawh an la nei chhin lo ang, an transportation neih that ber pawh thirsakawr a ni a, a chhia repair thiamte hi an luck ve thin khawp mai. An tan HIV/AIDS chu a hlauhawm loh letling zawk, thil dang ngaihtuah tur apui an ngah lutuk tlat.

(An khaw cycle repairing workshop..)

Damdawi lam an nei chau bawk, invenna engmah nei bawk hek lo, Family Planning te chu hnai lo mai hi a ni a, an nawmchen vena awm chhun Sex chu dan rual pawh a ni lo, invenna nei hek lo le, kumchhirin fa an hring a, enkawl zo hek lo, chaw tha hmu lo naupang, ring rek ngit nget, dul kiar ling leng fa an nei teuh mai ani.(Hemite nupa hian fa 8 an nei, 2 dang an lo leng bo hlauh a ni)

He ram chhunga chengte nun hi a harsa, anmahni han kawm phei chuan an awki te hi a hniam chal mai bawk si a, an khawngaihthlak khawp mai. Chutih laiin mi tam zawk chu Pathian pawh hre lo, Pathian hming la lam reng reng lote an ni si. Ngaihtuah an ti thuiin hengte hi Pathian hmangaihte vek an ni si a, engvanginnge hetianga rethei tur hian a siam bik le tih mai palh awl a ni. Mi thenkhat ka kawmte chuan Africa mite hian Pathian anchhia an dawng niin an inngai ve tlat bawk. Eng tin tak awm zel ang maw le..????

"Thim chhahna lai ber pawh
A lo Eng thin,
A kutan an awm vek, Ama relin..."

Vanduai - Vannei ..

Kar khat chhung ngawt Seminar neia kan tawmbo hnu-ah ka han lang leh a, seminar report ziah a chakawm rualin a lungchhiatthlak lam hian tun tum chu bul ka'n tan teh ang. Ka chunga thil thleng hi in hriat loh ka duh lo ve..

Kan Seminar hi Maputo atanga Km 700 chuang hreta hla Volanculo Province a nei kan ni a, Ni 8th September zing lam dar 6:45 velah Maputo atangin motor pali-inzuiin officer 17 kan chuang a, motor hmasa ber dawttu-ah keini kan tlan a, kan tluang khawp mai, kawng chanve-a chhun chaw faka kan ding leh zun ram thiara kan din zeuh loh chu kan tlan char char a, Vilanculo pawh dar 5pmah chuan kan thleng ngei turah kan in ngai a.

Vilanculo chu minute 15 emaw vel lek tlan a ni tawh ang tihah chuan kan motor ke hma veilam chu a puak ta mai a, kawng sirah chuan kan leng phei chawn mai, driver chuan theih tawp chhuaha controlin kawngpuiah a kual lut leh lai takin a ke hnung veilam bawk chu a puak leh ta a, thawngaleivir nuai nawk ang mai hian kawnglaiah kan motor chu a vingvial kual ta a, driver tana control ngaihna awm miah lo-in a in freeturn tawp mai a, chumi hnu chuan a vang zawngin a tawlh ta ruak ruak mai a, driver chuan steering chelhin a veng tawp a, a bak tih theih a nei tawh lo, a vang zawnga kawngpui sir lehlam kan tawlh phei hnu chuan a back zawngin engemaw chen a tawlh leh ta a, a ke puahna a tanga meter 30 emaw zeta hla-ah chuan kan kalna lam hawi hu chungin kawng sir chep zetah rem lo zetin a ding ta hram a, a khu chum chum a, motor ke kang rim chu a nam chum chum mai a ni.

He thil thlen chhung hi mitkhap kar lek tak tak a ni, a rang khawp a, keini a chhunga chuangte chuan kan dinhmun hlauhawmzia kha kan ngaihtuah hman lo mai pawh ni lo-in engtin nge kan awm tih kha kan hre hman lo reng reng a, hlau thlabara awrawl chhuah pawh kan awm lo, kan ngawi thap mai nia!!!! Hlauh ngaihna pawh kan hre lo a ni teh chek a niang, kei phei chu a front seata thu ka ni bawk a, driver chu puih ka han tum ta dah a, steering chu ka lo vuan ve ran a, a sawngsawhlawt lem hlei lo a.

Kan han ding fel chu kan hnunga mite an rawn tlan khawm a, khatia kan han vir vel lai khan engtin tak awm ang maw tiin kan hnungah chuan dingin min lo thlir tawp mai a ni awm a, a then an lo tawngtai mawlh mawlh bawk a, kan hnung chiaha tlan Capt. Felix phei chuan, “Deus, Deus, ajuda.. Beira, Beira Cuidado..”tiin Pathian leh kan motor khalhtu Beira hming chu a lo lam kawp sek mai a ni awm e.

Kan chetsualna hmunah hian 2002 August 16-khan Officer rual an lo chesual tawhin mi pakhatin nunna a chan a, a hmun ngaia hetiang kan han tawng chu an thin a thawng hlawm tak zet a, kan dinfel hnu chuan Nu-ho phei chu an rawn tlan phei a, min kuah chung chung a, mittui tla chungin, “Deus é bom, Deus é bom” an ti mawlh mawlh mai a ni. Mipui an rawn pung khawm chak khawp a, kan ri nuai nuai a, kan awm dan an han sawi chu kan thin a thawng ve leh hnuhnawh khawp mai.

Motor ke-te kan thlak a, tawngtaina te kan neih hnu-ah kan tlan leh ta a ni. Hla-ah "Keinin vanduaina-ah kan ruat, a hmangaihna lantirtu" tiin kan sa thin a, a dik hlein ka hria. Vanduaina kan tawh na-a Pathian min venna leh humhimna kan tawn hi a ropui lutuk a, Pathian kutin min chhanchhuak a ni kan ti lo thei lo. Upa-in Vanduai-Vannei an lo ti thin a, chutiang deuh chu niin ka hria.

(Kan motor ke hniak ka hmuh hnu hian kan awmdan ka hrethiam ve chiah!!)

Buai ve tawk a ni!!!!

Vawiin chu mahni tawkah ka buai ve lutuk a, blog pawh ka update lo mai dawn emaw ni ka ti a, ka han lut hram a ni. Helama ka awm laiin saw lamin min ko a, saw lama ka awm laiin helamah puih an lo ngai leh bawk nen. Mawngvawmba ang sekin ka lutin ka chhuak a, a buaithlak khawp mai. Weekend nuam takin hmang vek mai teh u. Kar leh 8th - 15th September chhung zawng hian Seminar kan nei dawn leh nghal a, kan inhmu har leh dawn bawk si.

Vaukhanna.

Ka Fanu,

Misualin an sawm che chuan, zawm suh
“Hawh teh, nawm chen tumin i fawr teh ang,
A vang engmah awm lovin damlai par i chen dun ang
Tichuan, kumtluang runlum nuthai atan ka pawm nang che”
Ti-a an sawm che chuan zui suh

I par mawina a thliah hun-ah
Ani, i par zu thlum a dawt zawh hnu-ah chuan
Puan ang hnawlin lunglai a hersan che’nga
Lam ang let tura i koh a, tanpui i dil laiin -
“Zal tura min thlem lai khan
In runsang kai min tiam kha,” ti-a i ngen pawhin
“Thlemsam run sang kaipui ai chuan,
Thliah loh tleitir thaleng dang buan ang pawm nang e,
Tiin a chhang ang che.

Chutih hunah chuan inchhirin ban a pel ang a,
Luaithli nulin ruam tin fang mah la
A sawt tawh lo - "A tlai lu ta,"
Tiin lu an thin khum ang che.

I Thianghlimna leh Zahawmna chu engtika hman tur nge ni??
I Pasal khum laizawlah ngei le…

Prison-break

Prison-break hi hmuhnawm ka ti khawp a, nikum khan ka hre ve chauh nghe nghe a, a han tawp takah chuan season khatna atangin ka en nawn leh vel a, vawi hnih ngawt a Episode pum hi ka en chhuak, tunlai chu Aizawl local channel-ah mizotawngin an let a, an chhuah thin an ti, tunah an la chhuah em ka hre lo.

Alex Mahone hi tha ka han ti tlat pek a, ka tan thei khawp a, nizan phei chu amah ngei hian min rawn tlawh. (ka mangah ka hmu a!!!!) kan inah a lo leng a, a film kha ka mangphan pah deuh a niang chu mi-in an lo um a, ka lo thukru vel a, a va han buaithlak tak.

Tang tlanchhuak thian ho, Agent fing tak mai Alex Mahone-an an hnu a han chhui vel chu kawng engkimah hian a tlan khalh a ni hrim mai a, chutah a hnu chhuitu ngei buaina danga a inhnamhnawih lai tak mai leh a ni ngei pawh wanted a han ni chho a, SONA hmuna mi sual man tumtu leh a Man tumate an han tang ho leh thap mai kha chu a lungchhiatthlak ngawt mai.

Ziaktu ropui leh lar Shakespeare chuan kan hringnun hi Lemchanna dawhsan mai a ni tiin a lo sawi tawh a, he thu hi dik ti vak lo pawhin kan pawmpui vekin ka ring. Kan nun pum mai hi lemchan mai a ni a, kan chanpual a zawh huna thi mai tur, tawp mai tur vek kan lo ni, he khawvelah hian engmah kan luhpui lo a, kan chhuahpui dawn hek lo. He film-ah vek hian T Bag chuan “Mitin mai hi mahni nihna-in a phuar beh, saltang mai kan ni e..”a ti a, a dik hian ka hre khawp.

Kan hringnun lemchanna-ah hian saltang vek mai kan ni a, he sal tanna atang hian mahni-a inla chhuak thei pawh kan awm lo. Sual saltanna atanga min chhan chhuak thei chu kan Lal Isua chauh hi a lo ni e. Lincoln Burrows khan “Michael, min chhanchhuah hi tum tum suh, ka rawn chhuak dawn chuang lo, he tanina thih hi ka duh zawk e” tiin tan lo khawh fun mai se chuan thi leh thau pawlha chhanchhuah tumtu Michalea tan chuan a huatthlala ngawt ang chu.

Engmah ti thei hlei lo, sual sal tanna atanga chhanchhuaktu awm reng a, Isua hi ka ring duh lo, chhanchhuah ka ngai lo, ti hian ka tling ve tawk ani te hi kan lo tih khum mai thin hlawm a ni a, Isua tan chuan a na duh ngawt ang....

Zalenna Ni ropui

India mi, India rama piang leh seilian, a lei thatna eia nung thin ni si hian Indian History hi ka hre lo em em mai a, ka zak zawk thin. School kal laiin History hi engtik laimaha ka tui ngai lohna subject a ni mauh mai a, chuvang chuan High School kal thlengin History and Civics kan zir thin kha ka tih chhiat ber subject a ni tluan parh.

Tun hnu-ah inzir lehna hun a awm tawh lo a, Indian History chu ka hre tlem ta ngang mai, hnathawhna ten a lo zir lo nen. Indopui II-na leh Zoram buai te ka hriat pawlh mai mai a, thil pakhatah ka ngai thin.

Tunah, mi ramah ka han awm a, mahni ram chanchin hriat chian a tulzia te ka hre chiang deuh deuh a, Mizoram chanchin mai nilo, India ram chanchin sawi a ngai ta fo mai hi a mangthlak chang a awm thin.

India-ina British awpna atanga chhuak tura a beih nasat zia te chu zir thin mah ila a chip a chiarin ka lo sawi thei lo tawp mai, kan zir thin British East India Company, battle of Buxar, Dalhousie policy Doctrine of Lapse, Quit India Movement etc tihte chu ka hre thawi thiak thuak. Nasa taka an beih hnu-ah 15th August 1947 zanlai-ah India chu Independent Nation a ni ve ta tih chu ka hriat chin a ni mai e. He Zalenna ropui tak sual chhuak tura Mahatma Gandhi te Nehru te beihna chu sawi ve ting tang ila kan ti bawrhbang zo ang tih a hlauhawm avangin a hre zawkte kutah ka dah mai ang.

He Zalenna hi keini Zoram, India chhak kila awm te pawhin kan lawm ve kum tin a, a phuk a phak hre lo hi Zofate zingah kan tam viau mai thei ani tihte ka ngaihtuah mai mai a. Chutih laiin Power leh Water supply tak ngial pawh hnianghnar lo ram hi mahni awmhmun-ah, a kaw tawpah thau khawhin kan tang a, engmah intodelh hlei lo hi kan inla milian a, Chawngchilhi raitu Rulpui ang mai khan, “Min pawt min pawt mah ula, ka meiin kawl a chhun..” te kan lo ti thum ve dut dut lo maw le..?

Pi Lalsangzuali Sailo hla phuah hi ka rilru-ah a rawn awm a, hei hian kumin Independence Day chu ka han lawm ve nghe nghe teh ang, hla tha tak a ni e.

Vanhnuai khuavela thang mawi chuang
India ram zau hnam chitin lenna
Lungrual tein leng zel ila
Chi inthliar leh inchemharnate
Hnutiang chhawnin I pen zel ang

Tuanna mual zawng a dang
A then phaizawl mite
Thenkhat tlangram thlifim kara kan len lai hian
Biahzai ze hrang leh sa hrang bia
Zeize hrang kimtlang pawh dang mah i
Pumkhatin pheilai I khai ang aw

Pu Nehru biahthu ngai teh u
Huan zau pangpar chi hrang kan ni e
Huan pakhata to leh par za
A lei thatna eia nung thin chu
Mawiten kan par vul zel dawn e

Chhak thlang chhim leh hmara lengte
Lungrualten puanzar pakhat hnuaiah
Lainat tanpui thinlung pu-in
Rindan leh chet zia dang mah sela
Hmangaih remna Lal ber rawh se.

Ka chhui phak lo!!!

Mim ang pianga khawvel eng ka hmuh ve na kha a lo rei ta viau mai, mite angin kum 20 ka nih khan fa lo nei ta ila, ka fa pawh kum 10 lai chu a ni tawh ang. Khai... kum ka sawi leh ta.

Chutia him dam taka piang ve ta chu thing delh loh, lung delh loh ka lo seilian ve zel a, nu leh pa-te hnathawh avangin hmun hrang hrangah kan awm kual nasa khawp a, thian bulbal leh thian nghet pawh nei thei lo-in Zawhte no nei ang maiin kan insuan reng a, ka khawvel chu ka hmang kual khawp mai. Ka pianna chu Zobawk (Lunglei bul) a ni a, hmun hrang hrangah ka mur a ni deuh ber mai. He ka murna hmun hrang hrangah hian mihring dang ang bawkin mi chi hrang hrang ka hmu-in ka tawng ve bawk.

Tichuan, kum engemaw chen chu Khawvel-ah chuan ka ping pei kual vel a, a changin ka lawm a, a changin ka lungngai thin.

B.Com kan zir laiin Business Mathematics-ah theory in Computer hi tlem azawng kan zir a, ka thiam lo nasa mai, khata kan zir a ka la hriat reng awm chhun chu Arithmetic Logic Unit (ALU) tih leh Central Processing Unit (CPU) tih hi a ni a, a bak chu kan zirlai kha ka tangkaipui tak pawh ka hre lo. Khatih lai khan practical phei chu kan khawih miah lo.

Engemaw chen hnu-ah hnathawhna avangin Computer ka hnimhnai ve tan a, tunlai angin Computer zirna a la tam lo, tin zirna hun pawh kan nei lem lo, hnathawhna ah khan kan pu-in tlem azawng a hman dan kha min hrilh a, zo tawng a thiam lo em em zui, Mouse te kha ka vuan de de a, min han zirtir ve chuan mouse kha nghet deuhin hum rawh, a pawi lo, te a ti, hum dan tawk thiam a har ngei mai. Zawite-a ka tawlh de de amaw ka tih pawh-in a cursor kha a tawlh zut zut zel mai si, a chang-in khawiah nge a awm ka hmu mai lo thin, mouse hman mawlh mai kha a har thin ngei mai, chutih rualin short cut key ka la hre der bawk si lo. Account lama thawk kan ni bawk a, Exel ka zir hmasa ber a, ka buai thei hle. A chang lahin hriat loh laiin scroll bar lo hmet palh, hla tawkah a lo in scroll, ka hnathawh lai zawng zawng bo ta emaw tiin ka buai thin, Pu-te ko chul zel, an han scroll let leh a, buaithlak thei mep mep, tun hnu-a hetianga buai ka hmuh hian ka in hrechhuak thin. Buaina kha a ho thei teh e, a ho tih lah kan hre der si lo.

He khawl ropui tak hi mite chuan Computer World tiin an lo vuah dim diam tawh a, he Khawvel thar hmang hian thil ropui tak tak an ti a, hna ropui tak tak an thawk a, khawvel pawh tichhe thei khawp hiala hlauhawm nia sawi Nuclear Bomb te Atom bomb siam nante an lo hmang a, a va lo ropui tak em. Kei pawhin ka Khawvel Pahnihna ka ti ve mai.

Chutiang chuan mahni-in ka han arkhawthimdai chho ve nawk nawk a, risk lah ka risk hnem. Tun thleng hian zirna tak tak chu ka la nei ta chuang lo a, a tha lo ang reng khawp mai, nitin hriat belh tur a awm zel a, han luhchilh laklawh chuan a lo nuam khawp mai he khawvel hi. A ropui a, thil engkim mai ti thei hialin an sawi thin reng bawk a. Engkim mai hi a awm a, kut zungtangin hmehna tereuhte kan hmet a, khawvel dang dangah kan pakai zung zung mai chu a ni si a. He ka Khawvel Pahnihna ka hmelhriat tirh hi chuan a tangkaina tur angin ka la hmang thiam tak tak lo hle, tunah erawh kan hna tinreng thawh nan kan hmang ta mai chu a ni si a.

1998/9 vel bawr chho khan an han sawi hlauhawm khawp a, Khawvel a tawp dawn, Computer pawhin kum 2000 bak a hmu tawh lo an han ti chu awmhmunah kan lo thaw ve kawih kawih a, 2000 kum te kha nghahhlelh vang ni hauh lo khan tlumtea thlir takin kan thlir a nih kha, khawvel a tawp mai ring kha an tam em alawm.

Thenkhat lahin Computer ngei chu Sakawlh ang hialin an lo chhuah bawk. Nimahsela, a hriaten an han hrilhfiah a, computer-a date te chu an programme tha ang a, a awm leh mai dawn a ni an ti a, khawvel pawh chu tawp ta hlei lo, a kal ngaiin a kal buk buk reng a, a chhunga cheng te hian kan tlinlo a, nitin kan invui liam reng zawk chu a ni si a. Sakawlh tih pawh hi Ramsa hlauhawm, ki deuh ber bur, meng sen rem rum hmuh-a hmuh kan tum lai hian keimahni theuhah hian he sakawlh hi a awm zawk a ni lo maw, nitin hian he sakawlh kan chhunga awm hian min bei reng thin zawk a ni lo’m ni?

Chutiang chuan kum 2000 hnu lam te chu Computer chuan a lo la hmu thei nasa mai, a siamtute siam ang ang kha computer hmuh dan chu a ni mai a, a Khawl-a ai mah chuan a siamtu leh thununtu chu he mihring thluak tho hi a lo ni zawk si. Chu mihring ngei chu Pathianin duh taka a siamte kan la ni leh nghal, heng zawng zawng siamtu Pathian chu eng ang fakau-a ropui nge ni ang tih hi chhut chhuah rual a lo ni lo e…

I thiltih makte hi ka ngaihtuah chang hian
Hriatna famkim neitu thil tih a ni
Mihring finna chuan a hre zo dawn lo
A rilzia ka chhui phak lo.

Chhan loh aiah...!!!

Khaw pakhat Sundle School exam pawh kha an thiam lo lutuk a, ka-a chhang an ni bawk si.. "Tu nge Israel Lal hmasa ber?" tih zawhna kha Pitar pakhat khan "Chhan loh aiah Petera ti mai ang.." a ti, Pitar pakhat thung kha chuan a lo hre khawp mai a, "Saula.." a ti, a zawttupa chuan "Dik lutuk, mark 10." a ti hman tawh a, Pitarte chuan inti hre tak mai khan, "Paula an ti bawk" a'n tih leh zauh pek a, a mark hmuh sa a paih then phah.

Tunlai chu kei pawh hi Zawlnei da lam ang mai ka ni, ka khawro ru riau a, thu ziah ka tum ve lah hi a turh tlat zel a, blog pawh ka update hlei thei lo, chutih rualin rial rei ka hreh ve khanglang si. Naktukah ka update ang ka ti kar tluan a, Pachhe kumtiam ang maiin ka zu zi leh thin. Mi blog erawh ka tlawh peih dun dun fu, ka leng kual a, mi thuziak tha tak tak ka chhiar, an van ziak tha-in ziah tur an va hre tak em, hengte chu kei pawhin lo ngaihtuah chhuah awm te ka inti.

Tunlai taka ka dinhmun chu kan Zoram politics dinhmun nente hian ka in tehkhin deuh reuh. Sawrkar thar apiangin mipui hnenah engemaw an tiam a, an lal hun chhung a rei tawk lo nge an thu tiam an ti hlawhtling hman lo thin, tun sawrkar pawh hian eng eng emaw chu an tiam leh ngei mai a, ti hlawhtling tak maw..???? Laiking pawnpui tah tur ang mai hi a ni leh ang tihte ka ngaihtuah. Mahse Politics dinhmun nen em chuan kan in ang leh si lo a nih hi, tu hnenah mah engmah ka tiam ve hleinem mawle..!!!

A.. duh tawk phawt teh ang, tun tum chu Chhan loh aiah...

Chhimbâl...

Chhimbâl mawi zia hi chu kan hre theuh awm e, eng vanga Hmarbâl ti lo-a Chhimbâl kan han tih tlat na chhan hi ni ang tih erawh kan ngaihtuah ngai awm lo e, kei pawh ka ngaihtuah ngai lo, a chhan pawh ka hre lo a, tun tumah hian kan chhui dawn na hek lo....

Ruah a sur buan buan a, kar khat tawp maite khua a han cheng a, khawlai a diak pur mai. Naktuk chuan khua a tha tawh em ang chu kan ti tlai tin a, kut hnathawka eizawngte tan phei chuan a chang chuan a huatthlala thei hle ang. School naupangte tan lah school kal ti nuamlo rawih a lo ni bawk. Khawlai len a nuam lo a, hnathawh a phurawm loh a, in-a awm chawrh chawrh lah a ninawm riau mai bawk si. Thawmhnaw suk a ro thei na hek lo, chawmpangkar zawng zawng a hnawm churh a, thawmhnaw bal suk loh hlek lah a lo hmuar hman zel bawk nen!!! Chhûm a lo zing a, khaw hawi a tawi tuk mai, piah lawka tlangte pawh a fiah tawh lo. Hei vang hi a ni ngei ang Lalsangzuali Sailo chuan heti hian a lo phuah chhuah ni...

Zamualpui saw ka thlir reng laiin
Vanrang chhûmin a rawn tuam dul dul
Thang van zau leh sawmfang a lang lo
Puan ang hlih ka nuam e vanrang chhum zawng...

Chutianga ai ruah cheng kar khat ngawt mai han tawn hnu-ah tlai lama ni tlak hma deuhin ni a lo lang suar suar a, ruah chu a phingphisiau chauhin a sur a, nakin lawkah a reh fel ang tih hriat theih turin ni chu a rawn lang sur a, ni zung chuan thingkungte chu a chhuna, ni zung chu a lang kawkalh ta sung a, a mawi danglam em em mai. Ralkhata tlang lo langah chuan mawi tak maiin Chhimbâl a lo zam ta raih mai bawk a, chutah meuh chuan khua a tha tawh dawn a ni tih kan hria-in kan lawm em em thin a nih kha.

Ruah chuan khawlai bal chu a tlengfai a, chhum kara ni a rawn lang ta phung mai chu khawvel hi a fiah ta kuk mai hian a hriat a, thli thaw te chu a thianghlim a, boruak a tharlam ta vuk mai.

Khuangruahsur leh vanrang chhûm zawngte
A chhem kiang ta chhemdam thli lengin
Thang van zau leh khawtlang zawngte pawh
Fiara tui thiang ianga fimin ka hmu...

Nova hun laia ni 40 leh zan 40 ngawt mai ruah han sur tluk tluk mai kha chu a hrehawm ngawt ang, ruah sur satliah ni mai lo-in hremna ruah a ni leh nghal vei nen. Nimahsela, ruah a ban a, leilung a han lan hnu-ah chuan Pathianin lei tichhe turin tui ka tilet tawh lo ang tiin thu a tiam a, chu a thutiam tih nghehna atan chuan a zamtir ta a ni. He thutiam avang hi a ni ngei ang, fur khawchen laia Chhimbâl a lan chuan khua a tha tawh dawn e kan tih thin.

Genesis 9:13 Chhûmah ka chhimbâl ka zâmtîr a, chu chu kei leh lei kâra thuthlung chhinchhiahna tûr a ni ang, 9:14 Tin, heti hi a ni ang a, lei chunga chhûm ka zâmtîrin chhimbâl chu chhûmah chuan a lang ang a, 9:15 kei leh nangni leh tisa zawng zawng zînga mi thil nung tinrêngte kâra ka thuthlung awm hi ka hre reng ang; tichuan tui chu tisa zawng zawng tiboral tûrin a lo lêt leh tawh lo vang.(Chhimbâl :: 2007. Kan In, Chaltlang atanga ka lak...)

Vawi khatna...

Thil reng reng hi a vawikhatna awm lo chuan tih hlawtlin theih a ni lo a, chu vawikhatna chu a chang chuan a nuam emaw hlimawm viau thei a, thenkhat erawh hrehawm tak, han tih zui a nuam chho leh hlimawm chho a awm a. Tin, thil thenkhat chu a vawikhatna-a hlawhtling lo emaw tha vak lo, han tih nawn hnu-a hlawhtling ta leh tha chho ta te a awm bawk a. Hei vang hi a ni ngei ang, sap ho pawhin - "Thil hlawhtling nghal mah suh se, Bei la, bei nawn rawh.."an lo tih na chhan.

U Nula pahnih ka neih avangin kohhran thalai ah leh YMA-ah hian ka in hmang har khawp mai a, u-te ka ring chawt mai thin a, mitthi an awm pawhin thing ka khawn chuan ka hna zo-ah ka inngai hmiah a, In lama kal enah hian ka en lo thin. Vawi khat chu mitthi ina kal turin thianten min rawn sawm ve, dik tak chuan min sawm ve fo a, ka kal lo leh thin a, hemi tum hi chuan ka Ute pawhin kal ve tawh rawh an ti a, ka puan bih tur puan dum pawh min rawn pe, puan ka la bih ngai si lo, puan bih khera kal ngai hian min ti chak lo tel bawk a, kal tum lem lo-in ka thu reng a, kal a hun ta, ka che chang si lo chu kan thianpa pakhat chuan, “Tun bak chu ka sawm tawh lo ang che, I zah loh chuan lo kal suh,” min ti a, ka zak deuh a niang peihlo zetin ka zi chhuak ve ta hram a, puan lah chu ka bih nghet thei na hek lo, ka pen apiang hian a dul zel mai a, ka kawngah chuan ka hum khawm reng mai a, min ti chhangchhe khawp mai.

Mitthi in kan thleng a, mi an lo tam tawh, kan lut ve chu khuangpu hnung langsar tak mai-ah chuan thutna a lo awl, kan han inzep ve, keimah ber kha langsar ta viau hian ka inhre tlat mai a, mi lo thute chu a mal te te in han intawk ila ka zah bik dawn loh nen a huho-a an han thut tak hmurah chuan an zahawm ta em em vek mai a, khatih hun lai khan tuna ka zahtheihlohna zatve tal hi lo nei tawh ila zia deuh tur hi a ni na ale, a ni chai si lo.

Thutna chu kan tawlh kan tawlh a, a tawpah ruang bul hnaite-ah chuan kan thu ta lurh mai, keima biang ngei pawh chu ka hmu phe hlurh hlurh mai. Kan han zai a, zai rin tur nge zai zawih tur pawh ka hrethiam lo, mi mitthi in kal tirten,"Ka zak lutuk a, zai pawh ka zai ngam lo,”an tihte chu ka hre ve ang lawi si a, zah thupna tha ber chu zai deuh vak kha ni maiin ka hria a, hla lah chu ka thiam nasa mai si, zak lo awm takin ka zai ta peng peng a, duh aiin ka zai ring ta mah mahin ka hre nghe nghe. Ka kalpuite chuan I zai ring lutuk min ti a, ka zai loh chuan ngawi reng suh, zai rawh min ti bawk si, an va han sual tak em ve aw… Min bawl tel deuh bawk a ni.

Thingpui sem pawh chu in ngei ngei tur an ti leh pek a, chak lo chung chungin ka han in ve a, a hang a lo ni zui… eng emaw ti ti chuan kan tlingtla ta hram a, ka thil vawikhat tihna-a ka zah ber a ni hial mai thei a ni.

A hnu-ah chuan ka ngaihtuah a, ka u Zaui hnenah, “Mithi in han kal ringawt mai chu aw, a felthlak mang e..” ka ti ta ringawt a, ani lah chuan, “A felthlak tih nachang I hriat chuan I puitling ve tawh tihna a nih chu” min tihsan et a.

Furpui khawcheng...

Mizote’n sik leh sa hunpui kan then danah hian Nipui, Thlasik, Fur leh Thal kan ti a, heng zingah hian tu pawh mai hian Fur hi kan ankhum hnem ber mai awm asin.

Khawlaiah naupang an infiamin an ri chel chul a, Ui leh Ar-te pawh an tla sap sap mai, thawklehkhatah Van chu a rawn dum ta khuih a, chhum dum a rawn inzial tup tup a, Kawl a phe-in tek a tla a, khawpui a ri dur dur mai bawk, ruahthimpui a sur ngei dawn a nih hi tiin Nu chuan a fate khawlai leng chu haw hmanhmawh turin a au chul a, khawlaiah chuan thliin vaivut a len chum chum a, ruah a la sur tel loh avangin vaivut zingah chuan hnahthel leh bawlhhlawh dang a leng chum chum mai bawk.

Ran neiin an ran an ngaihven a, Arpui no hruai lawi tha duh lo neih phei chuan thin a rim tuk mai thin. Vawkte pawh an awm hmunah Ruahthimpui a lo thawk dawn ti niawm takin an nguk hrut hrut a. Ral khatah chuan Nu-in a fate a au lawng lawng a, Kelte pawh an be el el a, Bawng a lo bu ul ul bawk. Ruah sur chhungin inchhung a lum nuam lo palh ang tih hlau-in Nu chuan rapchungah chuan thing a ha mawlh mawlh a.

Ruah mal lian pui pui chu a rawn tla tan ta phuar phuar mai, hmanhmawh takin in tin chuan an kawngka an kalh nghet sauh sauh a, mahni in theuhah an tawmim ta diak a. Khawlai chu ruah chuan a ti huh tan ta a, kar lovah namen lo-in a rawn haw ta.

Zaleng naunawn run in chhungah
Taptual mawiin tuahmei an kil
Runlum nuthai hraileng awiin
Zate’n an bel kaina run nuam

He hun hi tu tan nge hrehawm ber thin ang le..

Khawlaiah chuan tuihawk a luang ta dum dum a, kal hleihtheih pawh a ni ta lo. Hetih lai hian thenkhat chuan natna tuarin khum an bel a, thawhah vei tan phei chuan natna a ti zualkai duh viau ang -

Awmlai vei laikhum bel tan zawng,
A sei a har tlaini len chu
Lamtluang zau-ah hawktui luang del
Laitual len zawng a har mang e

Hetih hun lai hian hmeichhia chu a awm mai mai ngai chuang lo a, inchhung sekrek khawih tur a la zawng hram thin a nih chu-

Lanu sekrek khawih bang ngai lo
Tahpuan khawn lai a rel ta e

Kei chu hetiang Furpui khawchen lai hian ka lung zu leng tlat thin a!!!!

Thawh belh r'u le..!!!

Ka post tur hre lo-in a hnuaia mi hi ka han ziak mai mai a nih hi chhiar dik han tum teh, a dang hria chuan thawh belh chur chur theih....

A ã a ã a, a ã hlen ta a ni.
I Ipte chu a ah-a ah ah a va itawm ve
Nang leh keiin mut mawh hnar mawha kan neihna na na na chu
Khualkamlova Khiangkawi ipte akin Kawlkulh khaw kawngkawiah a kal kual a kal kual.
Mo ho lo zo lo haw lo ko lo lo bo lo, Koro kawngbo lo ko lo lo bo lo.
A man to lo lo kha lo la rawh
Tui in in in in-in, in in in puar thin
Zãwng zawng zawngin, Zãwng zawng zawng ãwmna awmna awm an zawng a, Zãwng zawng zawngin Zãwng zawng zawng ãwmna awmna awm an hmu lo
Luiah ka nu ka hmuak ka khup ka nawt
Lungphek tha thler thlawr
Tlanga thing khi thli tha chhem thluk nge thili chhe chhem thluk
Tlang pangah pangang panga a bet
Thul hlui ka phur thul, thul thar ka phur thul
Ka pi chhi kan duh, ka pu chhi kan duh, kan chhung chhungin chhi kan duh
(Updated) Sipaibutukbunkalbungauhngauh - Joseph_L
(Updated) Thuro chho thlawk thla zap rang - chhangte_ll
Zu zawng zawnga zing zu zet zawng - chhangte_ll
Ka pu Buara buar muala Buarchawm bu hualna muala buar kung chu - Fela
Sakawr hur hawi her, lawi hur hawi her - Vaiva
Maimawm mawng mawm ka mawng mawm - Vaiva
Saw awmpawng awngrawp tawh zawk saw, khaw sawm sawn khawm dawrawn mawng pawp thawm tawh zawk sawn dawh tawh zawk rawh aw! - Faka
Vawkte vawkte Vawkte vawkteVawkte vawkte Vawkte vawkte - Aduhi (hahahaha)
Tlang panga pang panga pang pangah pangang panga a bet - illusionare
Sai sa seh sawm sa sawi sel sawi sel suh - Tawia Pachuau
Khita Thing ding ro khi thli tha chhem thluk nge thli chhe chhem thluk - Geminiboyz
Hmawlte ulh kawih hmawlh ulh kawih - Tawia Pachuau
Zemabawka Bawka bawkah Bawka a bawk a, Bawka bawka Bawka bawk chu Bawka bawkin Bawka Bawka bawkah bawk bawk suh a ti bawk a. - Kiamlova
Ka nu ka chhawk, luiah ka khup ka nawt ka nawt - Zaia

Ka piangsual em????

Hmanni-a ka kut ka tih palh an thuina chu ka en vang vang a, a ser kulh mai, “Chhe hei, ka piangsual zu ni ta reng a…” tiin ka ngaihtuah a, chutia ka ngaihtuah lai chuan Class VIII kan zir laia kan Mizotawng zirlaibu-a Mizo thufing kan zir thin kha ka rilru-ah a rawn lang zawk mai a..

# Uiin a luak a ei leh a, Vawk tuihawkah bawk a inbual leh thin
# Vawkpui pawh a vah a vah chuan ek thing a tawng nge nge
# Lampui chang khatah mi an be chhe ngai lo
# Thenawm do aiin khaw sarih do a thlanawm zawk
# Piangsual hmusit suh, piansualin tlai luat a nei lo

Salvation Army-te hian Fahrahte leh pianphunga rualbanlo te enkawlna hi kan nei hlawm a, Mitdel bikte enkawlna hi Kolasib-ah leh Kalimpongah kan nei a, Kolasib kan awm laiin heng Mitdelte bulah hian kan khawsa hnemin anmahni pawh ka hre chiang ve hlawm khawp mai, kan infiamin kan in chhawnchhaih a, pakhat hming mak deuh mai Lalrambuatsaiha hi a awm a, a hming vang hrim hrim chuan kan chhaih thin a, mitdel a nih vanga hmusita chhaih kan ni hauh lo a, a hming vanga chhaih mai kan ni. Naupangte kan la ni a, “Lalrambuatsaih, chatuan hmun ka chang ve ang a..” tiin kan zai khum thin a, a haw em em mai a, min um vak thin. Ani khaw hmu hlei lo-in min um kha hlauin kan tlanchhe nasa thei hle.

Mitdelte hi an khawhmuh loh vang hi ni maw, an hriatna dang hi a tha riau mai a, min hmu si lo kha kan awmna hi a hre thei em em mai a, vawi khat phei chu kan thiannu Thangpuii hi thing hmunah a dang chep tlat mai a, a mit khaw hmu mang hleilo kha a khap fuk fuk mai a, a phar duu mai bawk si, kan hlau hle, ani phei chu a tap pur mai a, “U Buat, kan chhaih tawh lo ang che...” kan ti chul a, min kalsan ta nge nge a. Chumi hnu chuan kan chhaih ngai tawh lo reng reng.

IITim 3:1-4 ah chuan ti hian kan hmu a, “Tin, hei hi hre rawh, ni hnuhnungahte chuan hun khirh takte a lo awm ang. Mi, mahni inhmangaihtu te, tangka ngainatu te, intivei te, chapo te, Pathian sawichhetu te, nu leh pa thu awih lo te, lawm nachang hre lo te, thianghlim lo te, hmangaihna pianpui nei lo te, huaikawmbawl te, hektu te, insum thei lo te, mi kawlhsen te, tha duh hauh lo te, vervek te, thuhnudawn lo te, inngaihlu te, Pathian hmangaih aia mahni lawmna mai hmangaih zawktu te an ni dawn si”

Taksa him pial, rualbanlohna nei miah lo-te hi a chunga Bible-in a sawi ang rilru pu khi kan ni thin, Mi thenkhat pianphunga rualban lohna nei miah lo mahse piangsual tlat mai hi an awm. Hei hi chu Rilrupiangsual ka ti mai a. Naupang pawisawi hleilo leh engmah pawh la hrethiam lo pawngsual chak tlat maite, mi thil lakruk chak tlat mai te, thiante zinga huaikawmbawl ching, Rotekawlasepa ang maia kawhmawhbawl ching tlat maite, an/kan awm thin. Tin, mi rethei chanai pawh laksak mai hnial lo, ka thatna tur a nih phawt chuan engmah ka pawisa lo ti ni awm taka lak theih apiang la duak duak mai duhte pawh hi awm theih ni awm tak a ni.

Chutiang-ah chuan politician leh rawngbawltu pawh kan bang chuang lo, mitin hi in enfiah kan ngai. Tisa-a piangsual ai mahin rilru piangsualte hi an khawngaihthlak zawk mah awm asin..!!!

Thopa zuanin aw..

Thil hrethiam har chi ka ni hrim hrim a ni mai thei…

Vantirhkohin Mari hnena “I rai ang a, fapa I hring anga..” a tiha Mari chhanna khan rei tak min tibuai.“Chung chu engtinnge ni ang, Mipa ka nei si lo..” tih tak hi. Vantirhkoh khan i rai ang a ti chauh a, Mari lahin Mipa ka nei si lo a ti leh lawi si a, Mari hian fanu a lo hring reng tawh nge mawni ka ti a, ka rilru hi a buai thei em em mai. PU ka zir lai ni ta-in ka hria ka u-te ti ti ka ngaihthla a, tleirawl pakhat nau pai, nau a pai tih pawh inhre lo chanchin an sawi, ka U thiannu chuan, "A mawl ve reng reng, a thlatin hunbi a neih loha Mipa a neihte chuan in rinhlelh nachang hriat ve mai awm.." a ti a, Mipa nei tih awmzia chu chiang em ema hrilhfiah ang mai hi ka ni.

Mizo upaten “Tumna a san leh tlakna pawh a sang” an tih hi ka hrethiam leh miah pek lo a. Tumna a san viau chuan an tlak vek vek chuan an tla thum tawk a ni mai tih lam zawngin ka lo ngaihtuah thin a, Tumna san pawh tlakna asang a, insawhnat a awl mai mai tih ang zawng-in ka lo hrethiam thin a, a lo ni ikhaw si lo.

Tupawh mai hian hmalam thlirna leh ruahmanna hi kan nei vek mai, mahni dinhmun theuh atanga thlir-in kan ngaihtuahna pawh a in ang lo nuai ang tih a rinawm. Ek tak ngial pawhin TUM chu a nei alawm, tu fa nge hmasawn duh lo awm ang a, tu fa nge hausak leh dinhmun tha-a awm duh lo teh lul ang.

Chu hmabak/hmathlir banphak tur chuan Tumna kha a san phawt a lo ngai reng mai a lo ni. Zirlai exam-in ka fail tho ang tiin lehkha zir duh tlat lo se, a fail nge nge ang. Kha zirlai tho khan “Khawnge, pakhatna ni turin kan bei teh ang” ti se, zirlai thiam lo tak pawh nise, Pakhatna a nih phak loh pawhin a exam tal chu a passed ngei ang. Amah Pu James Dokhuma thukhawchang ang deuhin "Paikawng pawh hi tui paih nana kan hman chuan a sawt lo viau mai thei, mahse a paikawng tal khan a fai phah nge nge thin"

Tun hnaiah Slumdog Millionaire tih India film a rawn lar hluai mai, kei hian ka lo en ve vat pek lo, ka han en ve a, chuti lua-a han lar em em tur anihna pawh ka hre vak hlei lo bawk. Naupang rethei lutukin thawklehkhata sum tam tak a han nei ta thut mai kha ataka thleng pawh nise hahipa sawi tur kha a ni hrim hrim mai. Mahse han ngaihtuah chian chuan zirtir nei tha tak chu a ni phawt mai.

Kha naupang/tleirawlte khan kei, mi rethei, daikil kara tu fa ar-ah loh hian hetiang game lian tham lutuk hi entinnge ka hmachhawn theih ang ti se chuan a hlawhtlinna a hmu tawp lo ang. Engpawh ti ila, kan hmabakah eng hna leh tih tur pawh awm se, huaisen taka hmachhawn a, tawn tlang zel tur kan ni lo'm ni, “Lo neitu thawk rim chu a rah chang hmasatu a ni tur a ni” tiin kan Pathian thu ngei pawhin min hrilh si a. Thopazuanin nge khupsukin kan zuan ang?

Thu puarpawleng

Tukin chu ka post ka enlet hlawm a, a van sei thei hlawm diah duah tak, tu pa sermon emaw ni se a ninawm ngawt thinin ka ring a ni.

Sermon sawi takah chuan, Pa pakhat sermon pawh kha a bei rei khawp mai a, darkar khat lai a sawi a, a ngaithlatu pakhat chu inah khan Vawiin chu eng thu nge in ngaihthlak? tiin an lo zawt, ani chuan Sual thu tih chauhin a chhang a, Sual thu chu engtinnge an sawi a? an ti leh, ani chuan A do-a do tur a ni awm e.. a ti ringawt e an ti. Darkar khat lai thusawi ngaithla si chuan sawi chhawn tur a nei chaurau khawp mai.

China dawr ka hmu fuh:
Hmanni lunch eia ka chhuak chu ka haw lam China dawr ka hmu fuh a, thawmhnaw nalh deuh deuh tlawm te te-in an lo zuar a, ka kual den den a, hun leh hai ka lo ngaihtuah miah lo a.

Nakinah chuan an nula pakhat hi ka bulah a lo kal a, Excuse me, a rawn ti, an chhun chawl turin dawr an khar duh chu lo niin, (Dar 1pm-ah an chawl a, dar 2-ah an hawng leh thin a lo ni.) ka han hawi chhuak chu thawktu zawng zawng chuan ding chungin min lo en thap tawh a, sorry tih paha chhuah mai loh chu hmabak awm tawh lo. Anni lah chuan Chinese i ni em? min la ti zui, a mihang ho-in min hai chu ka la hrethiam, anmahni chinese leh zelin Emaw, min ti chu mak ve tak a ni.

Englo lo chhuahna:
Hmanlai hian pa pakhat hian Sa Bel a ru a, a ei hma chuan a ek a chhuak ta tlat mai a, hmun pakhatah a bel chu a dah a, a ek san ta a, chutia a ek hlan chuan a sa bel chu a lo bo daih mai a, a thinrim hle. A han zawng chiam dawn a, ani pawhin a ruk ve tho ni bawk si, a ek hlan ber khera bo ni bawk si chu auchhuahpui ngaihna a hre lo hle, ti hian a rak ta chiam mai a ni.. “Tu nge helaia ka englo englo kha, ka englo hlanin lo englo, a englo duh ve leh englo ve se a ni mai a, mi englo sa lo englo te chu a..” a ti ta chiam ringawt a, chuta tang chuan ENGLO tih hi a lo chhuak ta ani tiin mithiam ten sawi lem lo mahse a nih hmel ve riau.

Thil tereuhte atangin...

Zan khat chu thlipui leh ruahpui a rawn thawk nghek mai a, kawlphe, tek leh khawpui ri-te nen a maka makin a thawk a, kan ram atan chuan a mak hle.

A tuk office kan kal chu le, chhe thei zawng zawng hi a chhia a niang tih mai turin kan chhe nual ta mai. Power supply kan nei lo, Kan internet line a chhe bawk, kan mangang khawp mai.

A siam thiamte kan ko, anni lah an rawn kal mai thei nahek lo, “Pawih hren kang mahin muang marin an tih kha..” tihte chu an hre ve ni awm fahran hian quotation an rawn fax te te a, chu chu keiin ka lo sign a, seal nena kan tih thlap hnu-ah kan thawn let leh a, tuna duh tawha thlam bang pin nghah te chu tih ang vel hi kan ni..!!!! chumi hnu-ah technician an rawn kal chauh teh reng aaa… hotute zinbo lai lo ni vei nen Khawte Lal ang maiin ka vir chuk mai.

Chutah, kan technician chuan a han en vel a, a that lohna a hmu mai ta lo tawp mai. Mechanic thiam tawp ang deuhin a khawih ngai a khawih a khawih mai. A hnu chuan a main switch ka ti mai a, a bawm pui ber chu hawn a ngai a ti a, kan han hawng dawn, chabi kan hmu ta awzawng lo mai a, chabi hrang hrang kawlkhawmtu kan hotu pakhat lah a zinbo, kan han phone, a awmna a hre mai bik lo, buai tau a tet a ni ta hawt mai.

Chabi lam buaipui tur midang kan ko leh, ani a rawn kal, kan locker chu sam te-in a rawn hawng a, duplicate chabi kan siamtir nghal bawk. Chumi hnu-ah chuan kan Internet chhiatna chu an zawng hmu ta hram a. Chabi tereuhte hi a lo va pawimawh ngai emmm.

He chabi ang chiah pawimawh deuh mai te reuhte ni si, thunun har em em mai hi kan taksa bung hrang zingah hian a lo bet tel reng mai, chu chu kan LEI hi a ni.

Lei hi a te hle na-a ven zawh a har riau mai, kan sawi duh loh tha tha min sawitir a, midangte chhiatna leh tlin lohna lai ringawt maite hi min sawitir a, a ngeiawm reuh ngawt mai. Thenkhat leili phei chu hmunphiah bul ang maia nal hi a ni a, thenkhat erawh chu khandaih ang maia hriam a ni thung a, khawi ngam a har ber ani ti-a tirhkohin a lo sawi hi a mak hauh lo mai.Chuvangin, Thuhriltu pawhin Pathianina i kal laiin i lei veng tha rawh a lo ti hial reng a nih hi.

Class IX kan zir laiin, “A spark neglected burns the house” tih kan zir thin a, Meisi ngaihthah-in in a tikang e tihna ni awm tak a ni. Chhungkaw pahnih chanchin a ni a, Ivana leh Gabriel te chu inthenawm mai an ni a, an pa-te ve ve an dam that lai chuan chhungkaw inngeih tak an niin, thil engkim mai tlakchham nei se an inban tawm reng a, an inpuitawn reng thin. Naupang-in inchhunga ro an rel chinah thil a danglam ta, Nu pakhat-in tawngkam a chhehsual avangin an phek buai ta vek mai.

Ivana monu chuan arpui tui lai a nei a, tuk khat chu an pal zuan khumin an thenawmte ram chhungah a tui a ni tih hriain a va kal a, “Ka arpuiin kan pal a zuankhum a, in huan chhungah a lo tui mial lo maw?” tia a zawh dek dek laiin, thenawm pitar chuan “Kan arpui pawh a tui mek a, keimahni artui lo chu kan khawm ngai lo, tin, thenawmah artui zawng turin kan kal ngai lo bawk..” tiin mei nei takin a lo chhang khauh mai chu, nu thin tertek a chhuak a, an inhau ta chiam mai, an inhau thui zel a, sawi loh tur tha tha an sawi chhuak ta, kar hmasa-a kan nghawngkawl in hawh pawh min la pe lo, I pasala pa pawh I chawm zo lo an ti thul. Inhauhna chu a punlun zel a, an inbe tha hlei thei ta lo, a tawpah phei chuan Ivana-te in chu Gabriela chuan a hal ta mai a, a khaw chanve lai a kan phah ta a ni.

Ivana pa chuan thil awmdan a natna khum atang chuan a lo hmu vek a, pawi a ti em em mai, Ivan enge ka hrilh che kha, mei chu a kan hma khan meisi hmet mit turin ka hrilh che a ni lawm ni? A ti lawm lawm mai. Ni e, nu pahnihte khan an tawngkam lo veng fimkhur deuh ta se chuan thil a danglam ngei tur hi a nia le..

He lei tereuhte hi kan ven zawh loh avanga thu tha lo pui pui kan chhakchhuah thin hian mi rilru engzat nge a tihnat a, mi pawi eng ang chiahin nge kan sawi thin tih hi mahni theuh in en chian a, fimkhur a tul hle a ni.

Keini aia chan chhe zawk ni-a kan ngaihte hi diriam leh cheksawlh kan ching hle thin, thil tha lo ti ni-a kan hriatte chu kan sawi chhe bawng bawng a, ar chuk tuilo khawpin kan chhuah a, kan theih dan kawng kawngin, kawngro a su emaw su lo emaw, kan hriat chin chin kan ramtha sawi hmiah hmiah zel mai chu a nih hi. Hetih lai hian enge keimah-ah a sawhkhawk lo thleng thei tih hi kan ngaihtuah tel a pawimawh. Vawiinah hian ka thianin Hmingchhiatna emaw mualphona a tawrh ang hi tuar lo mah ila, engemaw tawng thei reng kan ni tih hi kan hriat reng a pawimawh.

Ziaktu pakhat chuan “Thil diklo hmu thei tak ni lo la, chhuih leh pet zuitu ni bawk hek suh” a ti a, a tha khawp mai. Thenkhat chu mahnin thiam nei mang si lo hian mi thil tihsa lo sawisela ram tang tlat an awm thin, a thil sawisel ngei mai kha ti tha turin ruai ta ila eng ruai chu a ang bik lo mai thei si a. Chuvangin, he kan LEI tereuhte hi I veng tha teh ang u, buaina lian tham chawk chhuak theitu a ni si a.

Tawpsi..

Ziak leh chhiar ka thiam tantirh atangin lehkha chhiar hi ka hrat khawp mai a, ka unau dangte rawl tawp tawpa an zai lai pawh hian an bulah ngawi rengin lehkha ka lo chhiar mial mial a, mak an ti thin hle. Chutih lai chuan ka lehkhabu hmuh phak apiang mai hi ka Zawnghnahnemban chawt zel mai thin a, ka Pa lehkhabu bawm lah ka ching let hneh narawh, Class IV ka nih atangin Tirhkoh Paula chanchin, Mithianghlim Luka chanchin, Krista panna kailawn, An Danglamnate, A Lenlai nite, Sermona hman chi tehkhinthu, Bible hrilhfiahna bu hrang hrang, Sadhu Sandar Singh, Martin Luther King, Samuel Logan Brengle, Ka thlarau zin kawng, Tunlai Khawvel thlirna, Cotacomb martar-te, Ka Pa tiin ka ko ngam ta, Indona Thianghlim, Krista Pasalthate tih leh a dang lehkhabu thehlep te te pawh ka chhiar teuh mai ka hre seng tawh lo. Lehkhabu chhiar tur ka van viau chuan Bible (Thuthlunghlui) hi ka thawnthu chhiar hmiah zel.

Vawi khat chu khawi kawmkar atang emawni hian lehkhabu tereuhte, zawr zet, ung tawh tak, kawm pawh nei tawh lo, bul leh tawp pawh nei lo hi ka chhar chhuak nawlh a, ka han chhiar chu ngaihnawm ka ti em em mai a, a phek hmasa berah chuan…

“Bawihte tap suh, mi’n an hria ang che,” tih a ni a, bul awm lo, tawp pawh awm lo a nih avangin ka chhiar tanna a laklawh ang zetin a tawpna pawh chu a laklawh a. Eng lehkhabu nge ni-a engtinnge a tawp tih hrechiang chakin ka awm reng a.

Kum engemawzat liam hnu-ah he lehkhabu ngei hi a kim thlapin ka chhiar ta a, a ngaihnawmin lehkhabu tha tak a lo ni reng mai.

Pu Toma In (Uncle Tom’s Cabin) tih hi Harriete Biecher Stow-in kum 1852 –a a ziah tawh a ni a, Ka chhiar hmasak-a a intanna lai khi Pu Shelbyan sal naupang Harry-a loh theih loha a hralh avanga a nu-in a tlanbopui tur a siam lai vela a tawngkam a ni a, ka khawngaih em em mai, hnukulh teuhin ka chhiar a ni.

Tawpsi hi he lehkhabu hre pha chin chuan naupang bal leh ninhlei tehkhin nan an hmang fo thin. St Clair-an a cousin Awfeli (Ophelia) tana a leisak, I zirtir turin ka lei a tih kha a ni a. He nu-te hi ka lawm em em mai. A thu chu hetiang deuh hi...

Mihang hmeichhe naupang kum 8/9 vel tur hi a ni a. A dum chiang hle a, a mit chu a bial kal mai a, a de thiang rial mai a ni. A sam chu a theu re ru a, a kawh sung mai bawk a. Awfeli chuan a han be vel ta a..

“Kum engzat nge i nih Tawpsi”

“Ka hre lo, ka Pi”

“I kum zat i hre lo maw? Tuman an hrilh ngai lo che em ni, Enge i nu hming”

“Nu ka nei reng reng lo”

“Nu ka nei lo a, enge a awmzia, khawiah nge i pian?”

“Ka piang reng reng lo”

“Khatiangin ka zawhna min chhang tur a ni lovang. Fiamthu ka thawh lo a nia. Khawiah nge I pian a, tu nge I nu leh pate min hrilh rawh”

“Ka piang reng reng lo, nu leh pa pawh ka nei lo, tihian ka lo chawr chhuak ve tawp mai a ni”

Awfeli tan chuan beidawnthlak dawn hian ka hre thin khawp mai a, Tawpsi hi ka lawm reuh bawk si. Khum puan phah dan a zirtir laite hian a kutkawr leh ribbon-te a lo ru hman a, a kawrbana a rawlh luh chu a rawn lawr ta si, Hei naupang sual, I ru a ni maw? tiin a han sawi nawk nawk a, Ka pi, ka ru lo reng reng, ka kawrbanah hian a rawn lut ringawt a niang tiin dawt muhlum hlak chu a han sawi a... !!!! Awfeli beidawng mangang chuan engtinnge maw ka han tih ang che aw… a ti vang vang a, Tawpsi lah chuan, Ka pi, min vaw mai rawh, vuak loh chuan engmah ka ti duh ngai lo, ka awmna hmasate pawn min vaw thin a ti mai.

Chutia a pi Awfelin a vuak veleh chuan pawnah a chhuak a, a thiante ho bulah chuan Vawiinah ka pi-in min vua a, min vaw lo thei lo a ni tite-in a va sawi leh a, Mi hangte u, misual vek in ni, tupawh misual vek kan ni, mahse keini mihangte hi kan sual zual bik a ni, ka piin a ti te a ti a, a thiante zingah chuan a inuisalehlin a, a nui ver ver thin.

Tawpsi ang mihring hi a awm theih tak tak angem le tiin ka ngaihtuah thin a, khang hunlai, sal neia, mihangten nasa taka an tawrh hun lai khan naupang bul bal nei lo, an nu leh pa-te sala hralh, anmahni ngei pawh man tlawm zawka hralh, chhungkua pawh hmun hrang hranga awm darh hi an awm ngei ang tih a rin theih a ni.

He Pu Tawma In hian America ramah nasa takin hna a thawk réng bawk a, Civil War hial chhuah phahin a hnu-ah phei chuan Sal tihtawp a lo ni thei ta a, he lehkhabu ziaktu hi a ropui hle. 1862-a Abraham Lincoln-an Harriet Beacheri a chibai pawhin, “Ani-te hi maw he Indona ropui tak bul tantu chu?” a ti e an ti.

Tawpsi, naupang luhlul, bal bawk si chu naupang pakhat Eva, zaidam ngilnei leh Pathian thu-awih tak mai avangin a nun a inlet ve tlat mai. He lehkhabu ziaktu-in a tum bulpui ber chu ni chiah lo mahse, Pathian hmangaihna-in mihringte nun a tihdanglam theihzia hi Tawpsi nun a tang hian a lang chiang khawp mai.

Lei Ro Hlu

“Khawvela thiltithei ber chu engnge ni?” tiin inzawt ta ila, kan dinhmun azirin kan chhanna a hrang thluah awm e, ziaktu pakhat chuan, “Khawvela thil tithei ber chu HMEICHHE MITTUI ANI” tiin a ziak a, he thu hi kawng tam takah a dik viau mai. Mipa, inti paa ve tak mai pawh hi Hmeichhia-in mittui nena an thlem chuan an duap zul fo thin nia.

Hmeichhia hi Pathian kutchhuak, mipa kawppui atana siam a ni a, Mipa-in a rahbeh tur atan emaw a thunun atan ni lovin a thurualpui tur a kawppui, amah tanpui turin mipa nakruh atangin Pathianin a siam a ni.

Kum 1872 khan Julia Ward Howe chuan United States-ah Nute Ni hman a rawt a, hei hi a hmasa ber ni-a ngaih a ni. Kum engemawchen hnu-ah Boston khua-ah Nute Ni pual inkhawm a huaihawt a, Mary Tawless Sasseen Kentuckey-a zirtirtu chuan kum 1887 khan Nute Ni lawmna a siam bawk a. Chumi hnu-ah chuan Anna Jarvis Grafton khua-a mi chuan ram pum huapa he Nute Ni hmanna tur hian a campaign tan ta a, May thla chawlhni vawihnihna chu hemi ni pual atan hian a thlang a, hemi ni hian Carnation pangpar a kawrah a tar thin a ni.chuan NUTE Ni hi an hmang a, Andrew Methodist Episcopal Church-ah chuan Anna Jarvis-I Nu Pi Anna Reeves Jarvis hriatrengna atan NUTE NI hi an lo hmang ta a ni.He NUTE NI hi Ram pum huapa hman a nihna leh hriat tan a nihna chu May 9, 1914 khan a ni a, hemi ni hian US President Woodrow Wilson chuan Nute Ni chu ram pum huapa hman a nihna tur thu chu a nemnghet a ni.

He Ni bik Zoram lamah kum hnih ka hmang ta lo a, ka blog lamah ka han riam ta hret a ni.

Miss Universe emaw America President emaw khawvel mi thiltithei ber pawh ni raw sek sek, an bul tanna chu an Nu te vek a ni. Nu-te hi an hlu em em a, tlema nu pharvar deuh, fa-te enkawl tha lem lo ni-a kan ngaihte pawhin Pai lai hrehawm thla kua chu an paltlang vek a, nau hrin natna hrehawm an tuar vek a ni. Khawvel eng hmu tawh zawng zawngte tan chuan he nu tawrhna hi theihnghilh leh hlamchhiah chi a ni lo.

Ka Nu hi nu azawnga nu mawl ber pawh ni mahse ka tan chuan a hlu a, unau hmeichhia hlir pathum pian tawh hnu-a a palina ni tura ka pian pawhin (Mipa neih an beisei tawh hle a ni..) phunnawi lo-in duat takin min enkawl a, min enkawlna zawng zawnga vawiin thlenga ka lawmna ber chu Krista hriatna kawnga min hruai hi a ni. A chhan chu Ka naupan tet atangin tah belh leh zakzum ka ni a, chhung inkhawm-ah pawh tawngtai ngam ngai lo ka ni. He ka hun harsa hi paltlang turin theih tawpin, Nu-in an tih theih ang zawng zawng chu a ti vek a, atawpah chuan Bible chhiar ringawt lo-a tawngtai ka ngam ve ta a ni. Vawiin ni-a ka dinhmun min hretu leh ka tunhma dinhmun hre tu chuan ka tun dinhmun ka thleng hi mak an ti vek ang, mi zakzum leh tahbelh, tuallim lo, thiante zingah pawh inkiltawih reng mai kha Pulpit-ah te sermon a thlak ve ang tih chu tuin nge ring pha teh lul ang.

Chu mai a ni lo a, Pathian rawngbawl tura ka inpekna kawngah pawh khawvel thil ngaihtuah chuan hna sang zawk leh awhawm, hlawh pawh tam zawk beisei ve thei tur ka nih lai pawha rawngbawlna kawnga kal ngei tura min fuihtu chu ka Nu tho hi a ni a, tlema ka rilru hnual deuh chang leh hwikir mai ka duh chang pawha min fuih harhtu chu amah bawk a ni.Ka pa-in min boralsan hma avanga a chunga mawhphurhna rip tak mai lo tla ta hi mi tam tak chuan an tuar zo lo ang. Nimahsela, ani chuan Pathiana rinna nghat tlat chungin tawngtaina-in min enkawl seilian a,“A dam chhung ni lo rei se, a thawhrim rul ve ila..” tih hi kan duhthusam a ni reng fo na-a eng chen pawh min dampui mahse kan tana a thawhrimna hi chu kan rul seng chuang lo ang. Nu-te hi kan lei ro hlu berte an ni e.

"Leimi hrinhniang zingah,
Chun anga Hlu awm maw..?
Senlai chun chawi loh lengte zawng
Rairah riang an lo ni"

Kum sawmthum leh....

Lalawithawngpa’n..

Kan lenlai nghil nghiala D kan chhai
Sakhmel chul leh hai ang tar tur Awithangpa’n
Ka dawn khawl lung reng a awi thei lo,

a lo ti mathlawn lo-in, vanglai leh vullai hi chu a lo awm nameuh mai a lo ni.

Kan High School kal laiin kan Miss, kum 30 ral kai fe tawh hian, “In kumin ka kum hi sem teh u, a vawi engemawzat a chhuak ang,” a ti fo thin. Keini High School kai tantir, kum 13 emaw lek tan kha chuan sem tham feee hi a ni lah tak a, khatih lai khan amah kha kan hmu senior teng teng khawp a, mi hauh a thiam si, a nu lian si, kan hlau thei hle. “Nitin dawrawn-a phurh tham thu tha kan infah a, sunhlu hnaha fun tham pawh in hawn ngai si lo,” min han ti thin kha a nia. Tunah lah khatiang kum kha kan thleng chho tan der ta mai si.

Pasal nei ni ila, nu valai, nu naupangte tia sawi tur kha, neih miau loh vangin nula dam rei kan ni ta mai mai a. Kumte chu number mai mai ania pung thei alawm tiin han inhnem vel thin mah ila, hmel hian min phatsan tlat tawh, mitko leh hmui hmaiah upa sulhnu a lang tawh tlat alawm. Kum 30 ral han kai meuh hi chuan piancham pawh lawm ai mahin hei chen nula dam chu sunpui ang u tih zawk awm tak hi a ni tawh a. Hetih laia ka lo nin ve em em thin chu, a zo avai, a ngo a hang hian kalna lam apianga ‘Pasal neih I tum em?’ emaw ‘I nei dawn lo em ni,?’ an ti fo fahran hi a ni. Neih tur pawh kan hmu zo ve lo a nih hi tiin han chhang khawmawi ila, min zawnpui inpeih at vek hi an ni a!!!!

Tukin chu ka Birthday a nih vang pawh ni chuang lo-in International Labour Day a nih miau avangin Office kan chawl a, thawh hma ngai lo bawk a, mut kan am teh ang ti-a dar 10 vela thawh tum kha zing dar 4 atangin text message ka dawng tan teh reng a, a lawmawm khawp mai. (Mizoram lamah dar 7:30 ni duai tawh hek lee..) Thenkhatin min rawn call bawk a, ka awmna a hlat tehlul nen, mahriakten piancham ka hmang liam mai dawn emaw tih laiin thian bengvar tak tak, min theihnghilh lotu ka lo nei chu ka lawmna a sang khawp mai, zing hma takah min tiharh mah se ka ngaidam vek.

Kan dam chhung kumte hi Lal Davida chuan kum 70 a ni a, chakna avangin kum 80 pawh a ni thei, mahse a reina chu thawhrimna leh lungngaihna mai a ni a ti a, dam chhung ni chen viau ni-a inngaite pawhin lungngaihna bawk an seng leh thin. Hei vang tak hian Kan dam chhung ni chhiar dan thiam hi a pawimawh hle a lo ni, thihnate, natnate hi kan ta vek a ni si a, eng ang pawhin kan vanglai chu chen ila, he thihna hi kan tawh vek tur a ni, ka thi dawn lo kan ti ngawt thei lo, thawklehkhatah, thangawk ang phutin a lo thleng mai. Chuvangin Kum engzatpawh dam rawh I, theih tawp chhuahin inchhekarbawm vel mah ila kan tawpna chu thuhmun vek.. Feet 6, feet 3-a phumbo a, chumi hnu-a rorelsaka awm vek tur kan ni. Chu rorelpui hunah chuan thiam kan chang angem tih hi zawhna pawimawh ber chu a lo ni zawk e.

Englekhawle, Pathianin hei leh chen damna leh hriselna tha min pe-a min kaihhruai avang hian a hnena lawmthu sawi chu ka tih makmawh a ni tiin Pathian hnenah lawmthu ka sawi a ni.

(Updated... Ka birthday lawm dan tlem azawng ka'n thailang leh ang e.)

Ka thiannu Margarida-in Cake ka lo ursak ang che a ti a, chawhnu lam dar 2 velah thian dangte nen an inah kan va phei vang vang a, a lo bei tha khawp mai a, Cake lian tawk a lo ur bakah dinner a lo siam tel leh nghal a, puar el euha kan va ei tak kha. Thiannu Celeste-in puanthan nalh deuh min pe leh nghal. Lawm lo em em chu ka ni ta lo e.

A bilha tho lo!!!

Kan naupan laiin Ka nu hian Bekang a um thin a, a bei uluk ve thin khawp mai. Kei hian bekang hi ka duh thin viau, a pum pumin ka hmawm thin.. !!!

Vawi khat a bekang um chu vawkchaw chhumna-a ur lo-in Electric Heater-ah a ur alawm mawle, heater kha a on tlaivar zak mai a, a engti teh lek nge ni, a um sual tlat mai a, Mei tak taka ur a nih loh vang nge a tuam fu lo nge ni, a bilhah a tho lo tlat. A uih dan kha a dik ta tlat lo mai a, a tler riau a, ei hleih theih pawh a ni lo, paih dawn chuan uiawm angreng bawk si kha, a rep ro ta ringawt a. A rep hnu paw'n Um tha pangngai rep chu a tluk lo nasa.

Thil Um chi reng reng hi uluk a ngai khawp a, Zu bilhte pawh bilh sual a awm ve fo ni awm tak a ni. Zufang chanchin, a siamdan vel hi kan sikul kal lai khan kan zir thin a, a tui hmel hi ka ti khawp mai thin a, ka ei chak thei hle. Vawi khat chu Sesawnga ka awm laiin thian pakhat hnenah "Zufang ka ei chak min lo siam chhin teh," ka ti a, a ram riah na-ah a siam a, min rawn hawnsak alawm mawle. Chu pawh chu a bilh sual a ni ngei ang, a kha hlur mai a, chini telh rawh a ti a, chini ka telh pawh chuan ka beisei ang reng rengin a tui ta lo, ka zufang ei chakna pawh a reh vek, ka ei nawn ta lo reng reng.

Kan ramah leh khawtlangah te, chhungkua-ah te hian thil diklo tam tak kan hmu fo a, dem tur kan zawngin mawhchhiat tur leh mawhpuh tur apui hi kan ngah thin hle. Hengte hi a bilha tholo ani ve thei angem le.. ni ta se siam that dan a awm hlawm angem???