Friday, April 24, 2009

A bilha tho lo!!!

Kan naupan laiin Ka nu hian Bekang a um thin a, a bei uluk ve thin khawp mai. Kei hian bekang hi ka duh thin viau, a pum pumin ka hmawm thin.. !!!

Vawi khat a bekang um chu vawkchaw chhumna-a ur lo-in Electric Heater-ah a ur alawm mawle, heater kha a on tlaivar zak mai a, a engti teh lek nge ni, a um sual tlat mai a, Mei tak taka ur a nih loh vang nge a tuam fu lo nge ni, a bilhah a tho lo tlat. A uih dan kha a dik ta tlat lo mai a, a tler riau a, ei hleih theih pawh a ni lo, paih dawn chuan uiawm angreng bawk si kha, a rep ro ta ringawt a. A rep hnu paw'n Um tha pangngai rep chu a tluk lo nasa.

Thil Um chi reng reng hi uluk a ngai khawp a, Zu bilhte pawh bilh sual a awm ve fo ni awm tak a ni. Zufang chanchin, a siamdan vel hi kan sikul kal lai khan kan zir thin a, a tui hmel hi ka ti khawp mai thin a, ka ei chak thei hle. Vawi khat chu Sesawnga ka awm laiin thian pakhat hnenah "Zufang ka ei chak min lo siam chhin teh," ka ti a, a ram riah na-ah a siam a, min rawn hawnsak alawm mawle. Chu pawh chu a bilh sual a ni ngei ang, a kha hlur mai a, chini telh rawh a ti a, chini ka telh pawh chuan ka beisei ang reng rengin a tui ta lo, ka zufang ei chakna pawh a reh vek, ka ei nawn ta lo reng reng.

Kan ramah leh khawtlangah te, chhungkua-ah te hian thil diklo tam tak kan hmu fo a, dem tur kan zawngin mawhchhiat tur leh mawhpuh tur apui hi kan ngah thin hle. Hengte hi a bilha tholo ani ve thei angem le.. ni ta se siam that dan a awm hlawm angem???


13 comments:

  1. Khawvel tikim tu anni mai alawm, bilh tho lo chu anni dawn emawni le. Juda Iskariota pawh kha bilh tho lo nilo in siamtu ruat sa ani mai alawm.

    ReplyDelete
  2. 'A bilha tho lo' tih tawngkam hi kan hmang fo a. Mi thenkhat hi chu, vawi tam tak camping an luh hnu pawha tha thei lo, (Pathian hmuhah chuan kan hre lova, mihring hmuh chinah tal pawh) a ngai bawka let leh thin an awm, hengho hi a bilha tho lo an ni thei mai em?? Ka chiang lo.
    Engpawh nise, kan khawtlang leh chhungkuaa thil thalote hi 'a bilha tho lo' han puh ngawt chu a 'general' chuan a dik lo deuh maithei lo maw, hotunu??

    ReplyDelete
  3. dem tur kan zawngin mawhchhiat tur leh mawhpuh tur apui hi kan ngah thin hleHei chu Mizo zingah changlo pawh, mihring zia hrim2 ni maiin ka hria.Eden huan atang tawh daih khan chhut let theih ang chu :) Mahni atang theuhva insiamthat tum chuan theih mai tur chuan ka ngai.

    ReplyDelete
  4. Hengte hi a bilha tholo ani ve thei angem le..

    Ka hre lo tak tak :)

    ReplyDelete
  5. A tlanglawn thei ang berin a bilha tho lo chu thil a tir/a bul atanga a nih dan tur ang ni lo tihna a nia. Ram, khawtlang leh chhungkuate hi thil an nih loh avangin a dik famkim lo a.

    Amaherawhchu, khawtlang leh chhungkuaa kan chindan thalo leh hmuh thin thil thalo te chu a bilha tho lo a awm thei ang. A remedies erawh ngaihtuah zui peih te tan!

    ReplyDelete
  6. ka chunga mi hian ka soi tum ang deuh chiah a soi avangin ka soi thuilo mai ang.... mahse bekang a pum puma ilo hmawm chu thil dik ani dawn em ni :)

    ReplyDelete
  7. hman deuh khan mi pakhatin chanchinbu ah "chhul chak lo nau hrin" tih lam deuh a rawn ziak a. Mizorama kan Pathian thu inzirtir dan hian kan nitin ethic a hneh lo lutuk hi kan sakhaw puithiam ho chhul chak tawk loh avang a ni thei angem ti zawngin thu a rawn ziak a.I sawi tum point nen hian a inhnaih viau.

    Tin, Mizo nula ngat lehkha ziak (article style) thin hi ka hre tam lo khawp mai. I genre pawh secular deuhin Pathian thu i rawn zep zeuh thiam a. Thangthar tan chhiar hahthlak ngun lo a, tha ka ti khawp mai. Han ziak zel rawh khai...!

    ReplyDelete
  8. Lehlawks...I blog hming ang deuh hian tun aia i "inner" zawk han phawrh belh zel teh.

    ReplyDelete
  9. a bilha tho chu a thlum tui a, mi pawhin an nghei thei lo. A uih tui a, bazarah pawh hralh a kal.

    A nihdan tur ang ni ta lo hi abilha tho lo chu a ni mai lawm ni. A nih dan tur anga nih hi a tawp lamah a theih ngawt loh va, a bul atanga a dik chhoh zel a ngai si a.

    ReplyDelete
  10. Bilh sual hi a awm a, tuna i tarlan ang chi Bekang leh Zufang hi bilh sual (Eng emaw dik lo awm palh vang) a ni a. Tawngkama "A bilh a tho lo a ni" tih hi chu, a hawn hun hmaa hawn emaw, a bilh a thawh hmaa khawih chet emaw hi a ni a. Entirnan, nausen chu a pian hun hmaa a pian a tul palh tlat chuan a sawngnawi phah ta thin ang deuh hian, kan society leh khawtlangah pawh hian kan dinhmun insiam nghet hmasa si lo va khawvel media kan luhchilh nghal ta mai hian kan hnam nun chu a bilh thawh hmain min hawn sak a ni ber ang chu. Siam theih theih erawh a nih ka ring.

    ReplyDelete
  11. i blog a comen na ah hian tlang vetheilo tlat mai a coment tlem pe ve duh a,bekang leh zu fang vel chu mihring nen chuan tehkhin chi loh ang a k ti deuh,heng te hi chu a thoh fuhloh chuan siam that leh ngaihna awmtoh lo a,mihring te hi chu a bilh a tholo kan tih tam tak tehi chu a hnu ah an that leh theih phian thin hi mole kan ti ve nih chu.

    ReplyDelete
  12. Thiante u-
    Ka ningnel hle mai a, ka ngaihtuah ang pawhin ka ziak chhuak thiam lo a, chuti chung chung chuan in ngaihdan in rawn sawi a, ka lawm hle mai. A bilha tho lo hi thil tam tak a awm thei a, tin, thil tha lo kan tih zawng zawng pawh hi a bilha tho lo chu a ni vek kher lo tih pawh in comment atangin a chiang e.

    Engpawhnise, kan ram, khawtlang, kohhran leh chhungkua-a buaina awm thin hi kan vei takzet chuan a siamthat dan chu a awm hlawm ngei chuan ka ring.

    ReplyDelete
  13. Muhil thophang pawhi a bilha tho lo a ni em?

    ReplyDelete

Followers