Friday, November 28, 2008

Ka upa em ni???

Engtik atang khan nge kan veng Tleirawl zawng zawngin min U tak kha aw..??? Min u mai a ni lo a, min Au vek (Au Din min ti..!!!!)

Tun hma kha chuan thiante inahte khan kan ar nghal luh vel mai mai a, nu leh pate chuan min uksak teh chiam ngai lo, tunah erawh chuan Sabengtung bangla lut ang khup khupa ringin pen lut lo mah ila ngaih pawimawh kan hlawh ta riau a, "Enge ni ta,? " Pa ber emaw Nu ber emaw hian an lo ti vat thin a, pawihai awm lo phei chuan lenchhuah that ngam pawh a ni ta zawk lo a, hei vang hi ni maw kum a tam deuh hi chuan kan lo taptawm ta deuh chawt mai a lo ni.

Tun hma kha chuan thimhlima thiante ina han chuankai zeuh pawhin ti dekin inah kan haw a, Khawnge I kal veng veng ti-a zawhna kan tawng ziah bawk a, tunah erawh zan dar 12-ah pawh haw mah ila chhungte hian kalna hi min zawt si se tawh lo a, tlangval 2/3 pawn min thlah raw sek sek, kawngka luh dawnah thawm nei deuh khut khut pawh ni ila an ngaih thalo tawh chuang lo. Tu emaw ber nen hi chuan han ti ve tak tak se ni tur tih ngaihdan te pawh an nei a ni mahna.

Tunhma kha chuan thalai thil tihkhawm leh inkhawm reng rengah khan Midum zinga suahdur nei te ber ang maiin kan thu zum reng mai thin kha a ni a, tunah erawh tihkhawm let let a awm tawh chuan ka ta emaw ti tlat tawh, a meizanghlaptu bera tan loh chuan awm thiam tawh tlat lo.

Tun hma kha chuan Sawmna Card reng reng khan min huam tel ngai meuh lo kha a ni a, tunah erawh tunhma-a lehkhathawn awmna thin lukhamhnuaite chu mahni puala Inneih sawmna emaw Man ei tura hriattirna tih te chuan a thlak zo tawh a, hma taka mut leh hma taka thawh chu kan thiltihthat awm chhun a ni a.

Tun hma kha chuan ei tura min chhawp ang ang kan eiin kan in mai kha a ni a, chawhmeh sawisel phei chu a tina tin eih chi a ni lo, tunah erawh chawlhni sa hmeh tur pawh mahni duh zawng zawng kan lei mai a, a siam danah lah duh dan danin kan siam a, min rilrempuilo an awm leh chi dang kan siamsak leh mai a, mahni tawka siamrem theih loh pawh a awm tawh lo. Nu-te an awm loh pawha Vawk hralhna man lo tel thei kha kan ni tawh tlat a.

Tunhma kha chuan thiante nen engkim kan ti tlangin kan nui za a, Cinema te pawh kan en ho ngai kha a ni a, tunah erawh an fa-te birthday lawmna-ah min sawm zur zut hlawm ta mai, hetih hunah tak hian buaithlak chang a awm thin. An faten min Nu ang nge min Ni ang tihah hian kan buai ta thin a, thenkhat ka in Ni tir a, thenkhat chu ka in Nu tir ta hlawm bawk a nih kha.

He thil inthlakthleng hi engtik atang chiah khan nge ka chungah a lo thlen tak kha aw… ka ngaihtuah let thei tawh lo e, ngaihtuah buai ting tang lo mai ang.

Ka la upa lo e, ka kum a tam ta deuh tih mai a ni.

Khawnge leng ang aw, leng rei ta sa sa
Leng zel ang aw, leng tar law law ang
Tu kan phu lo tu’n min phu hek lo
Hraileng awi lovin hm hm hm hm hm hm…

16 comments:

  1. A va mawi em... Ramdin!! A nalh lutuk. A tawpna hi a fuh bon tawp. Ka ngaihtuah chhuah ni awm tak a ni ka ti!!

    Tun hma, tun hnu kan ti,
    Nangin tun i ti fo.........

    Leng der der la, hei aia mawi hian ziak zel mai teh lem!

    ReplyDelete
  2. @Lalzairem, ka hming chanve-in min ko suh.. i fa-ten engtinnge min koh ve dawn?

    ReplyDelete
  3. Bawihpuii'n A-ni Dindini a ti ang che....

    ReplyDelete
  4. I va tihlimawm thin ve Dini....
    "Min u mai a ni lo a, min Au vek (Au Din min ti..!!!!)"
    Kan campus ah pawh kan fa u ber Sarah hi a nauten "Au/A u" an tih avangin campus vai naupangho chuan "AU" an ti vek mawle!!!

    ReplyDelete
  5. A u Din,chutin ngaihthalo mai teh suh,tunlai khawvel ah chuan maw ran zawng zawng hi kan khuahkhirh vek tawh a,chuvang chuan bawng pawh a in ah chaw an pe mai tawh a,chutiang zelin bawngtar pawhin luangno a zawng lo a,a awmna hmun ah an pe mai zawk thin tawh a lawm,a duh lai lai a lo la thlang zui mawle,kei pawh a hma kha chuan kan veng zawng zawngin min pa vek hman mawle,tlai chhinchhiahna ka pel hman tep ani

    ReplyDelete
  6. I in sawi dan chuan Torch light te pawh i nei hrang thlap tawh tih a rin theih a, mahse naupng emaw i nih kan la ti reng tho!! I awmna lamah kha chuan tuman leng tar tih an hre miah lo vang che!!! Naupangte si a ro thap reuh ngawt mai an ti vek chein kan ring!!

    ReplyDelete
  7. @ LeaszRalte - Han in Au vel hi nuam ve deuh asin.

    @Chungsiara - Chuti luangno chu ka lo sakuh ser nghah tawp mai dawn tihna mi?

    @Kiamlova&Puii - Torch Light ka hmang chhe hnem tawh lutuk a, tunah chuan Maglite (tereuhte chi hi) ka hmang tawh. haha

    ReplyDelete
  8. Comment khi chhiar chhiang leh deuh la,(luangno chu a awmna hmun ah an pe mai a mahse a duh duh a lo thlang vel a,)an pe tawh a pek tawh sa ho kha a duh lo a nih chu

    ReplyDelete
  9. @Chungsiara- Tlanchhe chungin an pe ang a, a petu khan a la leh nghal daih a ni chiang mai...

    ReplyDelete
  10. A U...hehe

    I thlawk thei tep tawh hial lo maw? j/k

    tak tak a hei kei pawh final yr han thlen chhoh meuh chuan min u ta sup sup mai..a nawmna aiin a nawmlohna a tam mah zawkin ka hria :(

    ReplyDelete
  11. Ziak ngaihnawm leh pek hle mai au Dini nge nge chu. Ka lawm e kan ti hial teh ang. Ka tawng ve tur te i rawn ziak a, keipawh mi in U min tih hma hian nupui neih vat vat tum teh ang :)

    ReplyDelete
  12. Thu ziah i van thiam ve, i tawngkam chheh vel a tang ringawt pawh hian U nih hlawh awm reng i nih hi te lo ti vel ila..he he.
    I thu hman dan atang hian inzirna tur ka nei nual mai, ka rawn leng lut fo ang.

    ReplyDelete
  13. Luliana
    thlawk thei tep tawh e, kalkhawmna reng renga min U sup sup chuan intih LAL ve hle tawh mai tur. "Tui min lo suah teh" tih ang reng thupek hi chhakchhuak fo ila U nih man a awm ngai. :)

    illusionaire
    Ngaihnawm i ti chu ka va'n lawm. U nih hnu ngeia nupui neih hi a manhla zawk ania, mipa tan chuan...

    Puibawiha
    I ti lawmawm e, tunah chuan naupang deuh bulah "I kumin ka kum hi han sem teh, a vawi engemaw zat a chhuak ang" tih vel hi kan intihtheihna a ni mai mai tawh mawle.. lo leng fo rawh, ka link nghal jeih che..

    ReplyDelete
  14. I u nen in hmel a inang hle mai.

    ReplyDelete
  15. Malsawma
    Ka U i hria, a va fair lo ve, ka hre ve che em???
    Lo leng lut ziah rawh aw..

    ReplyDelete
  16. Min hre lo ang, nia ka rawn leng lut ziah ang. I thuziak chhiar a nuam khawp mai. Vawiin tlaiah i u te Inah chaw kan ei leh dawn.

    ReplyDelete

Followers