Sunday, November 2, 2008

INNEIH

Ram hrang leh hnam hrang hrangte hian mahni tihdan hi kan nei theuh mai a, tun tum chu kan ram (Mozambique) Inneih an sawngbawl dan hautak zet mai hi kan sawi ang e...

Dan tlangpuiin an Inneih hian ni thum a awh a. Zirtawpni-ah tanin chawlhni thleng an bei thin. Mizo in-a Man inhlanni kan tih ang hi anni chuan Lobolo an ti a, mahse an hmang nasa zawk mah. Mipa lam palai ang ve kha an lo kal a, gate an rawn luh dawn atangin thawm an rawn nei tan a, an zai a, gate-ah chuan hmeichhe lam chhungte chuan an lo chang bawk a, tichuan zai chungin in chhung an rawn lut a. A hma-in hmeichhe lam hian inneihna atana an thil mamawh turte list chhuakin an lo pe lawk vek a, hei hi an rawn keng a, suitcase khat tunin an rawn inbeng a ni. Chhuatah pher an phah a, manpui Mt 3000/- chu an han rem phawt a, chutah Mo Pa thawmhnaw, a Nu leh Pi leh midang thawmhnawte an han inpe leh a, chhuatah chuan an pharh zel a, an list en chung zelin an phawrh a ni.


Chutah hmeichhe lam aiawh khanan thil rawn kente chu a kim em tiin a check leh a, a kim ni-a a hriat hnu-ah Mo chu an ko ta a, mo dik tak ni lo a unaute chu an rawn chhuak hmasa a, hei hi kan duh a ni hleinem mipa lamin an ti ve thung, an han inhnial vel a, chutah Mo dik tak chu an ko chhuak ve ta a, a man chu puana funin an pe a, hei I man tur an rawn pe a, engtinnge I tih dawn le? An ti a, ani chuan Ka pa thu thu a ni e, ka pa ko rawh u a ti ve leh. A pa chu an han ko chhuak leh a, Mo chuan a pa chu a man nen chuan a va pan a, a hma-a thingthi-in a va pe dawn, a pa chuan Nangte chu hmeichhia Mo I ni a, engvanginnge I man tur I rawn ken, mipa chhungten min pe tur alawm a lo ti, Mipa lam atanga lokal pakhat kha a rawn kal vat a, a rawn dilpui a, chutah chuan a pa chuan a lo dawng thei ta a, i pasal te inah hian kumkhua-i awm ang em? tihte eng pawh thleng se he inah hian i rawn let tawh tur a ni lo a,i pasal bulah i awm reng tur a ni ti te-in a pa chuan eng eng emaw a lo hrilh a, man chu an inhlan fel thei ta a. An thawmhnaw tur chu an ha tawk hlawm em tih check turin room lamah an inhruai a, an han ha chin vek a, an tawk vek tih an hriatchian hnu-ah chuan engkim an tifel ta a, ruai kan theh ta mup mup a.


Mo leh Mo neitu thian hi kan tih dan anglo takin, Hmeichhia-in thian Mipa a dinpui a, Mipa-in Hmeichhe thian a dinpui thung a, kawng thenkhatah chuan a remchang zawk phianin a lang. Inrinni chu Vantlang hriatpuia Inneihna Ni a ni a, Sawrkar dan anga Inneihna a ni bawk.


Inneihna In an nei hranpa a, chutah chuan register marriage an nei thin. Hetah hian Innei tur apiang an kalkhawm a, an innghak thup mai a ni. Mo hruai motor chu a Mo hming inbelin an ding tuar mai a, pakhat an inneih zawhin midang an lut ve leh mai a, ralte vahai no la ang maiin a ri nuai nuai tawh mai a ni. A zo hmasa apiang an chhuak a, pawnah thla la-in an han ri leh hlut a, chutah park lam pang thla la turin an pan leh thin a ni. Inneihna-ah hian Zaipawl member 10 vel zel an awm a (Cartejo) an ti, an zai char char mai a ni. Thlalakna hmunah pawh neitu chan chang takin an zai reng a, an lam pah zel bawk a, heng ho hi an hah hle ang.

Hmun hrang hranga thla la-a kan kual fe hnu-ah reception tihna hmun (Salao) an tihah chuan kan kal ta a, he hmunah hian ruaipui kan kil a ni. Hetah hian Inneih Sawmna card kha ken vek tur a ni a, a chhan chu Card-ah khan kan dawhkan kil tur hming an ziah tel vek vang a ni, card keng lo chu luh an tum lo hrim hrim, kei pek chuan hre hek lo I, card ka keng lo a, mahse vanneihthlak takin Mo thianpa kha kan motor-ah kan phur hlauh a, gate-ah motorin kan lut a, ka tlang ve hram. Chumi hnu pawn mahni dawhkan hreta lo chu ka hawihai angreng dawn a, mahse buatsaihtute an lokal a, ka dawhkan an rawn sawi ta a, Milan a lo ni a, dawhkan hi hming hrang hrang an vuah a, Manchester, Barcelona, Chalsea, Milan etc tiin. Mo-te chu an thiante nen, zaipawl nen kan inrem fel zawh chuan an rawn ri lut leh ta chel chul a, kan lo ding vek a, chuan dawhsan an pan a, cake-te an zai a, cake zai zawh hian dawhkan tina an chhawpsa Champaigne an han tauh hawng ta hlawm a, a rik hian a ri pawp pawp mai a, an au dur dur zel bawk a, keini dawhkan chu officer ho min dahkhawm avangin zu an dah lo a, chhang an chhawp thung.

A tuk chawlhni-ah Biakin-a Inneihna kan hmang veleh thung a, mipa lam lawina kohhran-ah inneihna an buatsaih ve thin. Inkhawm banin mipa In lamah kan kal leh a, hetah hian ruai hnianghnar tak kan ei leh a, cake an zai leh bawk. Hun tawp lamah present pe duh tan hun an hawng a, a pe apiang hming an lo chhinchhiah zel a, pawl hming anih pawhin an insawi zel a, thianho pawh nise, hming putu an siam zel bawk. Zai leh lam chungin an rawn kal a, a ri leh nuai nuai mai a ni.

6 comments:

  1. A bengvar thlak hle mai. An man in hlan vel dan chu, an ti ki-kawi peih ve hle mai a:-) Mizo inneiha lawichal chanvo te pawh minti hrechhuak.

    Man ei tih vel te a awm ve lo ani maw? :-)

    An dawhkan hming vuah chu pui hlawm hel maia :-)

    ReplyDelete
  2. I uniform thlalak chu i inhmeh kher mai, Lukhum hian a timawi zual che. I la awm rei loh nen an culture inneih lamte thlengin i hre hman hle mai a (i tuipui lam ber a nih vang chu a ni lo ang a) a ngiahnawmin a bengvar thlak kher mai. Hnam dangte thil tih dan hriat hian rlru a tizau va, mi chi hrang hrang [awmthiam turin min pui bawk. rawngbawlna atan tangai tak a ni.

    ReplyDelete
  3. A ngaihnawm khawp mai..mo man khi a Rupia in engzat vel nge?

    ReplyDelete
  4. A ngaihnawm rualin ala kimlo ka ti ron ziahve tak vek ah,tin a tira kan ram inti ve ngawt khi 'ka helh deuh ka awmna ram'te tive tal laa,a bengvar thlak viau,rin aiin i kawl hrawn hmel i awmna ala reiloh ngaih tuahin

    ReplyDelete
  5. @Sekibuhchhuak - Man ei tih vel chu Mizo-in kan tih ang em chuan an thensawm lo na-a Pi leh Pu, laina dangte hnenah tlem azawng an pek bakah manpui 3000/- hi chhungkua-in ruaitheh nan an hmang ngei ngei a, an hmang zo vek zel tho.

    @Kiamlova & Puii - Thank you. Ka tuipui lam ber chu a ni chiah lo, mitthi sawngbawl dante pawh ka hre tho, ka la rawn ziak leh ang remchan dan azirin, an thih man pawh hi a to fer fer a nia...

    @Luliana - 1Mt=24USD, 1INR=40USD
    #3000mt = 125/-USD, 125/-USD=5000/-INR

    EI leh In leh thawmhnaw man an sen zawng zawng nena belhkhawm phei chuan Mipa lam hi an inseng nasa khawp mai.

    @Chungsiara - Thaikawi ringawt chuan a kim mawh a ni e,kim taka ziah dawn chuan a thui dawn bawk sia..

    Tunah chuan kan RAM a ni rih a... :)

    Kumin a lo chaldelh ta bawk a, ka kawlhrawng phian zel chu a nih ber hi, min sawm ve zel miau hek le... a nuam vei phian zel bawk.

    ReplyDelete
  6. Va ngaihnawm triah triah ve ku din...rawn ti zauh zauh rawh hetiang lam hi aw

    ReplyDelete

Followers