Thursday, December 4, 2008

Ka Krismas ve!!!

Khawi nge, Zawng hnuhnung ang luap luap-in thian thenkhatte'n (abikin thianpa Zaia) Christmas puala a bua chhuah tham teh meuh an ziah tawh lai hian Damparengpuia ka krismas hman ve chanchin hian i'n sik-hawng ve dawn teh ang hmiang...

A rei tawh ang reng khawp mai a, thangkhat lian zet a ni tep tawh mai. 1996 khan Damparengpui lamah ka u Evangelist Teacher-a a awmna hmun a nih vangin awmpui turin ka kal a, Krismas te a hnai tawh bawk a, hman nghal law law a, kumthar erawh chu Aizawl lama hmang turin thiante nen chuan kan invai liam a, mahse thil pakhat ngaihtuah kim loh ka lo nei a, chu chu Damparengpui kal chu "Aiawt luh ang" a ni tih hi.

Khatih lai kha chuan MST bus hi Marpara leh N Kawnpui kal a awm a, anni an khah viau chuan motor dang phe zeuh pawh beisei tur a awm lo, a chang changa Pioneer motor pawl rawn tlan thin chu a ni mai.

Damparengpui chu Bru (Tuikuk) khua-ah chuan a lian ve pawl tak a ni a, in pawh a tam ve phian a, kar hnih khat han awm chuan an tawngte ka zir vel a, nuam ka ti viau a, “Mai cha ha de” han tihte, “Mangka ham doh”, "Khak chang ha” “Khrouh kaham de tong” tihte chu ka duh hun hunah ka pik liam a, pitar te te hi an lawm phian zel a.

Krismas Bawng tur chu thlalai leh patling ho chuan Tuirum ami an zu kai a, zan rei tawh-ah an rawn thleng chu kawtchhuah-ah kan han hmuak teh reng a, ka peih lo kher na-a In lama mahni-a lo awm kha ka peihlo zawk mah si..!!! (A chhan chu an awmna quarters hi daideng deuh, ramhnuai nena inri a nih vang mai ani) Pu Vuana (L) khatih laia CSM khan hma a rawn hruai a, Pu Nunmawia (Tunah CSM) te nen, kan ri thla luai luai mai a, Sa ei tur hmu ngai lo, an sa ei hnuhnung ber chu nikum Krismas a niang tih ang vel kha an ni bawk a, krismas-a sa ei tur bawng an rawn kai lut ruau ruau mai chu ropui danglam tak mai hi a ni a, Pu Vuana chuan intithu zet mai hian zai tur a ti a, kalkawngah Bawng chu a hma-ah an khalh a, a hnungah ET ho nen naupang nen, a kel rawl a kel rawlin an han zai ta reuh mai a..h kei pek kha ka nuih a za leh tlat pek a, ka nui huah huah maia, ka u-te pawh an nuih chu a za, mahse an nihna (ET) nen han nuih vur vur chu inhmeh lo an ti a, an nui lo mai mai a ni tih ka hre reng.

Krismas chu hlim takin kan hmang a, zaikhawm a ngai reng mai kha ka nin tawk a ni leh, in-ah mahni-in han awm dawn ila a zahthlak bawk si...!!!! (Heta zahthlak ka'n tih ber hi chu thil dang ni lo-in sanghar vel a ni ber)

Zaikhawmna inah chuan thutthleng pawh a awm hran chuang lo a, dap chhuatah kan thu thluang diai mai a, chhuat chu a tliang hneh hle. Kan hla han sak te reng reng kha a pianna lam ai mahin a thihna hmun kan thlir ngun zawk a, a chhan ber chu Krismas hla kha an tawngin nei tam hek lo. Krismas zaikhawm khan :

O angsa ma ia, O ang sa rung ia (Aw ka sawi thei lo,aw ka hril thiam lo)
Nini uainsohmoh kau no (A hmangaih a va mak em)
Thumo thumo angsa ma ia a sukhe (Thukna2ka sawi theilo min hmangaih)
Angno hiau mo (A va mak em)

tih kha an lampui dawrh dawrh a, ropui deuh chu a ni. Ruai kan theh a, Bawngsa bakah Changel hi vawksa nen an bai a, a thak hle a, mahse a tui khawp mai. Arsa hi maitai nen an kang bawk.

A ni hnihna kha sa-te kan la nei bawk a, ruai I nawn ang u tiin an han rel chawpchilh a, an ruai theh dan hi mahni chaw theuh ken a, ruai theh na-ah sa sem a ni mai a, a hautak lo phian a. Ruai nawnna chu chawhnu dar hnihah an ti a, keini pawh In atangin hmanhmawh lem lo-in dar 2 velah chuan kan han kal ve ta a, “Bakin phingphihlip a rep thei lo” tihte chu nepte hi a ni ringawt, ruai theh zo chu kan tawk ta sup sup mai a, a hmun kan han thlen chuan an lo tin kim tep tawh. Hahahaaaaa.....

Ka tum lawk angin Kumthar chu Aizawl-ah ka hmang dawn, a ninawm em mai tiin ni 28 dec-ah haw tumin ka in fam nasa mai a, Buhfai, bal, hmunphiah tih angreng eng eng emaw hawn tur nen Bapui tuai loh ang tuamin ka inbawk thluah a, ka Buhfai dahna chu Paihte ruksai an tih mai, green bag lian deuh mai kha a ni a, thil dang nen kawtchhuah lamah min thlah a, kan ri cho luai luai mai a, mahse chumi ni chuan Marpara Bus (MST) a lokal lo, ka thinrim hle, kan haw leh ta hna hna a, a tukah chuan pangngai te-in kan in ak chhuak leh a, ka bag vel chu a rih em avangin kawtchhuah hnai deuh Malawma te inah kan chhawp chho a, chumi ni chuan Bus chu a kal ngei, mahse a khat hneh lutuk a, kan bulah chuan a thawi pawn an ding duh eih lo, an tlan liam puat a, thingtlang kan awm laia Minister kan hmuah thin lai ang vel kha a ni. A phe vuai ringawt. Kan haw thla leh ta poh a. A tukah chuan Pu Sawma ET ve tho, a fa-te nen haw an duh a, kan han chhuak ho leh ta a, MST bus a awm loh pawhin motor dang remchang apiangah kal ang tiin Pioneer motor pawl pawh nise ka kal ang tiin ka tum ka ti ruh nasa mai a, mahse “gari krui de,” (Motor awm lo) tih chu bangah kan ziak rang vel ta mai mai a ni.

Kan haw thla leh chu Pu Sawma uang pheng chuan pitar ho hnenah chuan, “Khrouh kaham de tong..” (In lo dam em?) te a ti a, kan nui thla ta vak vak ringawt, a tuk chu 31st a nih avangin eng motor mah beisei tur a awm lo tih chiang sa a ni a, kumthar chu hman a ngai leh dawn tih hriat sa reng. In ka thleng chu vui hmui hi ka pu hnur mai a, Pu Sailova (ET ve tho)-in ral atanga vui hmui pu bura ka haw min hmu chu in ka luh hma-in ring tawk hian, “Ka naute saw, ka khawngaih lutuk, ar ka talh dawn,” a lo ti lawng lawng a, tlaiah chuan ar chu a talh tak tak a, a inah chaw kan ei zeih.

Kumthar chu bet vak lo-in ka hmang leh ta poh a, kum a thar rual rualin bus hmasa berah ka haw ang ka la ti fan. Khati em em-a haw ka chak kha Damparengpui ho leh ka U-te tana ka ngeiawm dan tur kha ka ngaihtuah lo reng reng, Tleitirlungmawldawntawii ka ni ngawt. Kumthar-ah chuan MST pawh nang lo-in Pioneer ho truck pawl ngei chuan West Phaileng thleng kan han chuang chho reuh mai a nih kha, W Phaileng-ah chuan Marpara Bus a lo ding a, tawt lutuk chungin kan inhnawh lui, ka la rui zui. Dam te chuan In chu ka thleng ve ta, Krismas leh kumthar ka hman tawhah chuan ka hman rei ber la ni ta hialin ka hria.

12 comments:

  1. Ngaihnawm leh hle mai Captain :)

    Dap chhuat tliang vel i sawi khian ka lung han tileng ve ngawt a. Hmanlai mizo in dap chhuat, a chung di, dai riai mai te ka hrechhuak.

    Ruai nawn pawh chu an van awlsam ang reng ve maw le! :)

    ReplyDelete
  2. Ka nauvi hi kum lamah hian i sensitive riauvin ka hria! I thuziak chhiar a nuam thin khawp mai. Bru hi i lo va thiam ve! 'Mang kaham douh', "bari khakchang ha", "achui thangnai nouh aw" tih vel bak ka hre mang lo va, ka chenchilh chiah lo bawk nen. ET in i thawk ve tawh emaw tih mai awl a nih hi... tumkhat tlawh chanchin ziak mai siah chuan thil i vawng hnem hle mai. U Ama hi chu hmanna hmun a kil zawh poh leh an la serious-in ruai nawn te hi a awl a ni mai lo maw ka ti. Manipur lamah chuan kumthar an ban fo mai; Lamka chhehvel khawte deuh thenkhat chuan. January thla laihawl te pawh an hawlh dawrh chang a awm bawk. An zai tui thei thin khawp mai leh nghal.Nikhat a tiak leh mai ai chuan a manhla nge nge ngei ang.

    ReplyDelete
  3. "A chawia chu
    A mong a pa
    Jesi le chini raja se
    Jesi le chini raja se"
    tih bak hi Bru hla hriat ka nei lo kei chu.

    Ngaihnawm ti taka ka han chhiar chu le. A sei si a, chhiar chhuahsak loh chu tiin ka tlawmngaih chhiar vel a, para 3-na ka chhiar thlen chuan a ngaihnawmnain mi man ta tlat reuh a, ka chhiar chhuak ta parh asin.

    ReplyDelete
  4. Captain,
    He i post hi fuh lutuk. Keini ang khawthlang lam mi tan i rawn ti a ni maw? Aizawla college ka kal lai khan Kawnpui(W)MST Bus khan kawngchhiat vangin Damparengpui thleng chauhte kha a kal thin a, Jampui thleng mai loin Damparengpuiah te kan riah chang a awm thin, thosi tam thei hle. Tin, Damparengpuiah hian free clinic ropui tak neiin kan riak tawh bawk. He hla i rawn thurchhuah hi Bru version hian a thuk/ril zawk-
    "O angsa ma ia, O ang sa rung ia
    Nini uainsohmoh kau no
    Thumo thumo angsa ma ia a sukhe
    Angno hiau mo"
    -han tih dap dap mai kha chuan Taibawngpa te pawh kha an mittui a far zawih zawh thin kha a ni a, kan ramthim thawktu hmasate min ngaih thar tir hle mai.

    Thanks for the nice post. Tuma mui. Mang kaham dau!

    ReplyDelete
  5. Lungleng taka chhiar tumin thut hmun ka rem tha sauh sauh va, a chanve vel ka chhiar lai chuan nuihza dawn dawn mak ti ang reng bawi si, chutah he thu hi ka chhiar thleng chiah chu ka nui chhuak hawk, "“gari krui de,” (Motor awm lo) tih chu bangah kan ziak rang vel ta mai mai a ni."
    Tichuan kumin Kristmas chu lungleng lo takin ka hman ve theih mai dawn hi.
    I thu ziah chhiar a nuam thin ngei mai.

    ReplyDelete
  6. A ngaihnawm lehpek hle mai..i khawngaihthlakawm angreng bawk sia :D

    Keichu thingtlang lam zin chhuah hrim hrim hi nuam ka tih zawng tak ania. Ka tet lai atangin ka pa duty hi ka zui fo thin. Mas hman chhuahna tur te pawh hi awm sela chuan ka hreh miah nang :)

    ReplyDelete
  7. Damparengpui i tikhawngaihthlak Bilkhawthlir pawh Aiawta luh ang a ni deuh tho asin! Anni chuan khaw dang leh tu dang ngai lova, lal piang lawma an chai lamtual a ni ve tlat. Dini blog a mi ni lo ta se, a ziaktu chuang lo bawk se, tu ziak nge nia kan rin ang le. Thenkhat chuan Pu K C Lalvunga an ti ang a, thenkhat chuan P L Liandinga an ti ang.

    ReplyDelete
  8. Tha leh hle mai.
    Kar khat vel Bru zingah ka khawsa a, Basi, Kruih de, uuuuu para thangnai tih bak ka hre lo!! I va hre hnem thei em em ve!?

    ReplyDelete
  9. Ninety six vel chuan kan la naupang viau na a,ngaihnawmin lunglen thlak hle mai mahse i lunlen vang a hre rei niloin hrehawm tih vanga hre rei i ang,Bru tawng chu ka hreve lo naa a then hi chu i phuah belh a ang,a hnu vel ah pawh i zuk kal leh ani lo maw i hre tam e mai,i post loh pawh hi i la hre teuh ang.

    ReplyDelete
  10. Sekibuhchhuak -
    Khawlum tak tak phei chuan dap chhuat tliang hen hunah hian chhuat awng bihin mu ila a zia ber asin...

    Zl-
    Kau Bru (Bru tawng tihna) hi ka basa ngam ve hrim hrim alawm, thumal eng eng emaw chu ka hre nual -
    'U Ama hi chu hmanna hmun a kil zawh poh leh an la serious-in ruai nawn te hi a awl a ni mai lo maw ka ti' - a dik chiah. Tin, sawi tur a ti tam ve alawm..

    Fela -
    Nangni ang thu thiamin ngaihnawm i'n ti chu ka van intithei tak.
    "Achawi Achu" tih hi Pi leh Pute tihna niin ka hria, chuan Jisu le chini raja se tih hi Isua chu kan Lal ani tihna vel a ni lo maw?

    Thiama -
    Nia, khawthlang lam kha chu buaithlak thei chiang e.. Bru hla ho kha sak a nuam thei khawp mai.

    Nung paw douh

    Puibawiha -
    Haha.. thank you. Krismas hi chuan lung hi han leng phawt se a dik mai.

    Bru ho zingah hian Krui (Awmlo) tih hi a lar khawp mai, Rang krui (pawisa awmlo), Moi krui (Chawhmeh awm lo), gari krui(Motor awm lo) tihte hi nitina thil tawn a ni.

    Luliana -
    Thingtlang hrim hrima Mas hman hi chu a nuam a, mahse, "I beiseina zawng zawng pawh a beidawn hnu-ah chuan eng mah hi a nuam thei tawh lo"

    Zl-
    Bilkhawthlirte chu silchar tlangdung a ni sia,motor a tam ang chu ka lo ti a.
    KC Lalvunga,PL Liandinga... awi i ti zahthlak, anni te nena Tul khata thil chi rual ka ni nem le....

    Zaia-
    Ka basam ngam ve hrim hrim alawm...
    Upara thang nai... an uuuuuuuuuuu rei dan azir hian a hlat leh hlat loh a hril ruih asin..

    Chungsiara
    Kan thil hriatrengte hi hrehawm tih vanga hriat a awm a, nuam tih vanga hriat reng a awm bawk a, Rengpui hi chu hrehawm tih vang pawh chu ni fahmiang.

    kau Bru hi maw ka post bak hi ka la hre teuh, i thiam ve duh chuan ka la zirtir ang che...

    ReplyDelete
  11. I blog tloh chua a manhla ngei mai.....Ka zirtir che anga tawngkam mawi tak2 i ron phuhchhuak hian min ti lawm hle bok mai....mahse Bru tong i thiam em2 dan hi chuan ngaih a ti tha chiah lo mang e oooo..!!! Haw i chak em em chhan eroh hriat chiah a chakawm hle mai, i chhungte i ngaih vang chu a nih hmel chiah loh khop mai..!!

    ReplyDelete
  12. thari-
    I fel ka van ti tak e awwwww... dam reng tur i ni.

    Bru tawng ka thiam pawh chu in ngai pawimawh hlawm hle mai, engemaw chen han chenchilh chuan a hriat ve mai alawmmm... ngaih that lohna tur a awm lem lo e.

    Haw ka chak chhan pawh eng dang a ni law.. tum loh anga ka awm vang a ni ber mai.

    ReplyDelete

Followers