Sunday, July 3, 2011

Ziak mite hi

Lekha chhiar peih tak hi chu ka ni kumkhua a, a ziak lam ka timi lo thung, ziah tumna em em pawh ka nei ngai lo, kumtinin Diary erawh ka nei a, ka ziak peih mual mual thin viau. Tunlai, computer kan hman uar hnu leh internet a awm hnu hian lehkhabu chhiar lam hi ka hlamchhiah nasa ta hle, blog leh website hrang hrangte duh hun huna chhiar tur a lo awm tak vangte pawh a ni mai thei.

Thuziak hi - thawnthu, article, hlahril pawh nise - a famkimlohna lam hi hmuh a awlin a langsar fo a, sawisel a nuam a, han ziak ve dawn ila tlar khat pawh ziah tur hre lo hlei hlei hian sawisel tur kan hmu hnem fo. Ziakmite hian an va bei nasa in an lo va thawkrim awm em, rilru te pawh an va seng nasa awm em tihte hi tunhnaiah ka ngaihtuah thar.

Thuziakmi ni tur hian huaisen a ngai ngawt ang - Mahni irawm chhuak leh mahni ngaihdan mite hriat leh chhiar tura han tlangzarh chu insit a na duh ngawtin ka ring, a chang chuan thudik puanzar hian nghawng thalo leh rah duhawm lo tak a ziaktu chungah a thlen theih avangin huaisen taka thu dik lailan chu a har hle thinin a rinawm, chanchinbu mite hian he huaisenna hi an mamawh hlein ka ring.

Thil chik mi nih hi a ngai tak zet ang. Mite chhiar tura ziah ngam ve tawh ting si chuan thu lawilo leh dawt ngawt chu ziah mai mai chi ni dawn hek lo, an thil tawn apiang mai chik leh dilchhut taka zawh keuh keuhte a ngai thin dawn a, thu dik leh belhchian dawl an ziah a ngaih avangin an thil ziahah an chian a ngai a, a fik afak an hriat a pawimawh. Hemi tur hian kalna lam apiang, hmuh leh hriat apiang chik taka belhchian a ngai, tha leh zung, rilru leh ngaihtuahna tam tak an sen a ngai ngei ang.

Hman deuha Vanneihtluanga Malaysia zinte khan an shopping mall kha engtia zau nge tihte, an street pakhata dawr awmzatte kha a hre thlip thlep a, chu chuan a thusawi dang pawh kha a ti awihawm ve hranpa tlat. Keiin kan veng chhung, nitin ka kaltlang kawtthlerah hian dawr engzatnge awm pawh ka lo hre der lo.

Mi dilchhut takte hi ka ngei zawng tak an ni fo thin, an tana tul lo tur an zawt hnem hian ka hre thin, mahse dilchhut na na na chuan an hre hnem leh nge nge thin chu a nih hi, ziaktu tha leh hlawhtling tak ni tur chuan mi ngei hlawh deuhte pawh hi a lo ngai ta'ng. Lalhmingliana Saiawi pawhin a tia lawm, "thawnthu ziah tum chuan tunlai tleirawlte rilru leh an nunchan te hi hriatthiam a ngai thin si a, Bus-a chuante hian dilchhut tak takin thil ka zawt thin a, thenkhat chuan Tar hur te pawh min lo ti ta ve ang" a ti. A ni duh khawp ang.

Hriatna tha tak neih hi a pawimawh hle, mahni rau rau pawh hi intihhmasawn theih ni awm tak a ni, thil chhinchhiah reng mi chuan hriat reng pawh a awlsam deuh nge nge. Chik tak, dilchhut taka zawhchhuah tawh sa kha ziah dawnah theihnghilh ta tlat ila a ho duh ngawt ang. Chuvangin ziak mi chuan hriatna tha tak a neih a ngai hle.

Taimak hi tih makmawh a ni, kan Bible-ah ngei pawh "Taimak kawngah chuan thatchhe suh u" tihte hial kan hmuh hi. Ziakmi hlawhtling tak chu mi taima tak a ni ngei ang tih ka ringhlel lo. Tawngka-a inhlan chhawn ngawt hi a famkim mawh hle, a hun laiin ziak ta thlep thin ila, chanchin kimchang kan nei ni mai tur hi kan chiang lo leh tlat thin, thil pawimawh tak pawh kan theihnghilh hmin thak thak thei tlat. Ziak mite hlutna hei hian a tilang chiang hlein ka hria. Pu C Rokhuma hi ziaka thil chhinchhiah peih tak a nih hmel, kumina ruahtui tla zat te hi a chhinchhiah a, rial a tla em, eng tiat nge, ruahthimpui a sur em tihte thil te tham te nia kan ngaihte a chhinchhiah a, kum 10 hnu-ah sik leh sa awm dan kum 10 chhung a khaikhinna a ziak a, kan chhiar duh leh hle.

Tawngkam bungrua-ah hian hausak a ngai khawpin ka ring, mitin hian tawngkam bungraw hman bik deuh hi kan nei vek a, a tawngkam atangin hei chu chumi ziah a ni maw te kan ti thei thin. Thenkhat tawngkam thiam tak, tehkhin thu nen dak hlarha ziak thei an awm laiin a then chuan bung deuh nghutin an ziak a, a ngaihnawm thova. Mizotawnga ziak a nih chuan theih hram chuan mizotawng veka dah thin hi a tha hle, chhiar pawh a hahdam bik. Tin, ziak tura intintuah ve tawh ting tang si chuan tawngkam bungraw mawi leh tha zawn leh thlan thiam pawh a tul hle.

Thil ngaihtuah leh ngaihruat thiam mi nih hi ziaktu tana pawimawh tak pakhat a ni, unau thawnthu sawi pawh a dang an ti mathlawn lovin, a ziaktu azir leh tawngkam hman azira thu pakhat rau rau pawh ngaihnawm bik riau a awm thei thin, ziaktu chuan a chhiartute lungawina zan a chhawpchhuah a ngai a, thudik ngau ngau ziah tum mah se, a ngaihnawm tur zawnga thu leh hla a rem chhuah a ngai thin, chu chuan ngaihtuahna leh ngaihruat thiamna a neih a pawimawh tih a ti lang, hei hi thil namai a ni lo, thawnthu ziak a ni emaw thil thleng chanchin a ziak a ni emaw ngaihnawm taka ziak tur chuan ngaihtuahna sen a ngai hle thin.

Ziakmi nihna hi mahni inpek chawp mai chi niin a lang lo, midang, a chhiartutena an pek tur ni awm tak a ni. Ziakmi han tih hian chanchinbu-a open letter in thawn zur zut lam emaw, tute political party emaw sawi chhia a, a dang fak emaw vak lam kha a ni lo a, Ziakmi tak tak chuan quality a nei tur a ni. Ziak mi tia inchhal ve si, an thuziak chhiar peih miah lohte hi awm thei tak a nih hmel e.

Chuvangin, ziakmite hi kan han sawisel ve leh chiam thin na-a, a nihna takah chuan mi ropui tak an ni e.

14 comments:

  1. Nang ngei hi Ziakmi diktak chu i lo nih hi. I thuziak reng chhiar a ninawm lohvin tu pawi a sawi lo thin khawp mai.

    ReplyDelete
  2. A tha khawp mai, Caribou sawi ang hian, ziak mi diktak chu i lo nie, Engtik lai pawh a ka darthlalang ni turin he Post hi han save nghal hmiah teh ang. A tha lutuk tlat mai :)

    ReplyDelete
  3. I ziak tha leh hle mai. Pu C. Rokunga i tih khi ka va hre ngai lo ve? A hming hi i hre sual ve hlauh a ni lo maw? Pu C. Rokhuma lehkhabu pawh ngaihnawm tak tak ziak nual kha a ni zawk em? Ka lo ti ve mai mai. Khawchhak lam atang hian.

    ReplyDelete
  4. Alejendro - Nia

    caribou - hahahha, ti lawmawm e, nangni kan hmuipuipui ten min rawn tlawh thin a, min ti phuisui

    Hmelthatea - i nui tlat, i tifiam :)

    ZL - Ka ziah mi loh zia chu lang nghal pang a ni maw, kan ziah sual pang pang chu le, C. Rokhuma ni chiang e, Tunlai khawvel thlirna a ziah duah duah thin kha.

    Ka siam tha nghal e, ka lawm lutuk :D

    ReplyDelete
  5. Hei hi thâwt lawkna a ni, ka la chhiar lo va, ka lo lut leh ang.Hei hi thâwt lawkna a ni, ka la chhiar lo va, ka lo lut leh ang.

    ReplyDelete
  6. I ziak ngaihnawm bakah a ril ka tih riau pek chu. Uluk angai a ni e. Thumbs up


    Lalhmingliana Saiawi chuan, zawhna a zawh hmain surprise deuha an awmloh nan emaw introduction etc.a neih hmasak chuan "Tar hur" an tih ka ring lem love. A zawh dan azir aniang chu.

    Mizo tawngah hian thu inzawm tur leh turlo hi ka hre theilo khawp mai. Amaherawh chu Pu James Dokhuma'n min hrilh thin zing ami ka theihnghilh theih tawhloh chu:

    Dik diklo
    -----------------------------
    Hliam hluam - hlem hluam
    Nui iar uar - nui uar uar
    Mial mual - mual mual
    Kiang kuang - kuang kuang
    Hiar huar - her huar etc. ang chi hi ani awm e.

    ReplyDelete
  7. Chhiar chhuak ta. A tha ka ti e. I lo chîk e. Ziakmi nun atang lo chuan khi thu khi a ziah theih ka ring tlat lo. Lengzem-a Mozambique lam chanchinte pawh ka lo chhiar a nia!

    Nia, ziakmi nihna hi mahni inpek theih a ni ngawt lo. Chhiartute kutah a ni, a dik. Ziakmi i ni tih hi i hnial thei bik hauh lovang! Thil i chhui chet chet peih reuh em mai!Chhiar chhuak ta. A tha ka ti e. I lo chîk e. Ziakmi nun atang lo chuan khi thu khi a ziah theih ka ring tlat lo. Lengzem-a Mozambique lam chanchinte pawh ka lo chhiar a nia!

    Nia, ziakmi nihna hi mahni inpek theih a ni ngawt lo. Chhiartute kutah a ni, a dik. Ziakmi i ni tih hi i hnial thei bik hauh lovang! Thil i chhui chet chet peih reuh em mai!

    ReplyDelete
  8. Ziaklomi ziah chhiar tur ka la hre lo tlat mai .Ziakmi dik tak ziak nisi ziaklomi ang a isawi ziah hi ka chhiar tam tawh mai Capt.
    Inti ziakmilo ziakmi ni reng hmuhin ka hmu kur a che.

    ReplyDelete
  9. H Vangchhia - I blog ka tlawh fo, i tawnhriat tam tak hi i ziak thiam khawp mai, ziakmi chu i ni ve reng mai :D

    Lalhmingliana Saiawi hian a nihna sawi chiah duh loin a chhimbudawi vel thin a ni mai thei ni, ka hre tawh bik lo :P

    Pu James Dokuma kha ka pa nen an inkawm ngeih viau a, kei pawhin an thu leh hla ka ngaihthla nasa thin a, an ti ti pawh ngaihnawm ti takin ka ngaihthla dauh dauh thin. I sawi ho hi a tawngkam chhuak ni awm reng a ni e.

    TS Khupchong - Ka Ni pasal hi khupchawng a ni ve :-)

    i comment hi i ziak nawn ziah peih bik a, ziakmi dik tak chu i ni ve reng reng mai :D i ti lawmawm thin e.

    hmingtea - hahaha.. ka inti ziaklomi hleinem, ziakmi ka inti lo bawk hahahaha.. a khawlh thei hle mai. Hrim hrimin, regular taka ka blog tlawh thintu i nih avang hian i chungah a bik takin lawmthu ka sawi e. :)

    ReplyDelete
  10. A tha hle mai. 'te' tih hman dan inang lova hman ka hmu. 'Mizotawng' tih pawh hi, ziah zawm lohvin, 'Mizo tawng' tiin kan zir thin kha emaw ka ti a. :D

    Mi tih dik loh hi chu hmuh a awl viau. Mahni'n han ti dawn ila, a har leh viau zel si... Nang zawng, ziakmi i ni e. Kan zavaiin ziakmiah kan puang tlat si che a.

    ReplyDelete
  11. Dini chu ziak mi tih takah i ziak tha kher mai! Engtinnge thu ziah hi in thiam bik le? ka thiam ve chak eeee! Ziak lo mi ka ni chiang alawm kei hi chu...

    ReplyDelete
  12. Mi ropui tak te zingah i tel pha tlat mai nang chu! Chhiar zawh tum loh pawhin a mahin a tawp a thleng zel mai a. Chhiar a nuam khawp mai leh pek a.

    ReplyDelete
  13. Zaia - te tih hman dan in ang lo chu hman dan a in an loh vang a nih chu :P

    Mizo tawng.. ka hre tawh lo :D

    Maisek - Nang chu comment mi i nia lawm :D Thanks.

    VaiVa - haha, i sawi dan a va dangdai leh pek em!

    ReplyDelete

Followers