Tuesday, December 7, 2010

Rilru-in arbo a zawng

Tak tak alawm, tunlai chu thu leh hla ka nei lo khawp mai, rilru hi a vak darh deuh nuai nuai a, hmanlai-ah te ka let a, ka kual ka kual a, Primary school kai laite, Middle school kai tantirh lai leh High school rah hnute a lo inlar zut zut mai.

Hmana kan kawm thin, inhuat tak vang pawh ni lo, awmna hmun, khawsak dan leh eizawnna a hran tak vanga hmun hrang hranga inthendarh tawhte Internet kaltlangin ka chhar chhuak bawk. Chutih rualin blog ah enge ka ziah ang aw tih ka ngaihtuah tel bawk a, ka ngaihtuah thenkhat angte chu mi thenkhatin an blog-ah te, site hrang hrangah te an lo ziak kur ngiai nguai a, ka va chhiar zut zut a... Ni, hei hi ani ka rilru-a awm chu tihte ka ngaihtuah, hla phuahtu-in "ka thinlungah hla mawi a awm a..." a tih ang mai ka ni, ka rilru teh nuai hi, han hlawmkhawm vel dan pawh ka thiam hlawm khawm lo ka ti.

Kumtin hian kumin Krismas chu engtinnge niang tih hi mitinte inzawhna a ni fo, Kohhran ah pawh engtinnge kan hman ang, Ruai atan enge ni ang a, vawi engzatnge ruai kan theh ang, Biakin engtinnge kan chei ang tihte. Khawtlangah pawh engtinnge Ruihhlo kan khap ang, zan kan duty angem tiin YMA lamin tan an la bawk a, khap rem tih erawh a awm ngai hlei lo. Chhungkua-ah nise, thil thar lei tumin kan hmanhlel a, in kan chei a, ei leh in tur tuihnai tinreng kan buatsaih bawk thin a nih kha.

Eng ka ti nge ni kumin chu Zawlnei da lam ang mai-in ka hul huk mai a, Mas lam reng rilru-in a hawi thei lo, ka awmna hmunin a zir loh vang a ni mai thei. Hei vang hian ni maw hun kal tawh ka thlir kir ruai ruai a, rilru-in ar bo a zawng tan tlat.

1997 vel kha ni ta-in ka hria, ka thiante 4 nen, zan inkhawm kan peih loh chhuanlamin zaikhawmna In-ah thingpui kan lo lum dawn kan ti a, kan lo awm mai mai a, thiannu pakhatin a Nu Puakzo a rawn ru chhuak a, kan kang puak pep pep, tapchhakah chuan kan ri le lu a, inkhawm an rawn bang a, thingpui erawh kan lo peih nghal lem hlei lo.

Kan bulah chuan Pu Pawihbawiha bengchhet zet, a beng bula au vak pawha "I tawng ka hre mang hlek lo" rawn ti hû thin hi a thu ve reng a, inkhawm bang an rawn zai tawh si kha, kan awmdan kha bengchhen hmel min ti deuh nge ni "In bengchheng lutuk" tiin min han khap ngei a, keini lah kan nuih a za leh zual sauh a. Kan thiannu Puakzo ruk chhuah lah a nu-in a man chhuak a, "Khawnge puakzo hi a awm zawh vek" tiin thinrim takin a zawt a, ani lah chuan "Dini te êk inah" tiin a chhang hmiah, ei zo tawh vek hek. Khang hunte kha kohkir rual lohin an liam vek tawh si a le..

He hla hian krismas ka'n lo hmuak teh ang -

Sakhming khuavel he lei chinah
Tu sakhming maw mawi chuang kim ber
Silhfen tha mawitin par nen a thlen ni kan lo thlir
Thangthar tung chho kal zawng reng hian
A hming lah hai awm lo le
Siklipui duma lo lang
Krismas kan lawmna ni ber

A lawm nan zaimawi tinreng leh
Ei leh bar kan neih apiang nen
Hmuakin lenrual lungduh ten kutpui awmni kan kham
A pianna leh a awih hla reng
Van lal chhungkua an lai thuril
Hmangaih mihringte hnenah
Rem leng se tih a lo ni

Eng vang maw a hming mawina ber
Hmanah Bethlehem phullengan
Van leh hnawl hnu lei sual kar
Sa ui lo tanna kha
Van zaipawlin a rawn puang chia
Lei thiamloh chang a rawn uap ta
Van in lawm lai nau ngei kha
Riang chawi nau ang a hlan ta

I pianphung leh i nihna hian
Leimi tan lung i dum mai reng
Kan lawm che Krismas duhawm damseia kan lo tawn
Kan runah lo lawi ve ang che
In tin veng tinah lawi ang che
Kan ei kan in krismas se
Hlimin min awmpui ang che

11 comments:

  1. Capt i rilru chuan ar bo lo deuh pawh zawng mawlh tehse.A hun ve tawh a lawm le.

    Kumin a ral an la zawn hmuh lo cheu che chuan Mipa lam thiam loh ah kan puh ang.

    ReplyDelete
  2. Thu ho te te hi ngaihnawm tak tak hian i ziak chhuak leh mai thin a, thil ziah zawng i thiam ka ti ngawt mai! Ziak zel teh khai!

    ReplyDelete
  3. Ni e, lung zawng a leng leh ta reng mai! Rilruin ar bo i zawng lo!!

    ReplyDelete
  4. A nih khi maw le. Krismas hian lunghlui a kaitho fo thin a sin.

    Chhiar a nuam khawp mai.

    Ar bo zawng lo hian a awm sa hi talh mai thin tur! Fiamthu.

    ...khrum

    ReplyDelete
  5. 'Zawlnei da lam ang mai..' - a mawi thin mang e!

    Ziah tur hriat loh thu mai maite hi thui deuh deuh in ziak thei bik a, in awhawm thin ngei mai!

    ReplyDelete
  6. hmingtea - hehe, ar bo chauh ka ,lo zawn thin vang a ni thei angem? :-)

    Maisek - eh, min tilai dawn tlat, min fuihpawrh i tum chiang mai. :P

    KC - Enge ka zawn nih leh?

    khumchikthei - ar awm sa chu min lo pe ve teh, kan hem hmin dawn nia.

    Zaia - Nangnin ziah tur in hre kur ngiai nguai thung a.

    ReplyDelete
  7. Krismas hi kan tan chuan kutpui hlimawm ber leh ngaihawm ber a ni thin. Kan la naupan deuh laia krismas kan hman thin dan te kha, tun hnua suangtuah let hian a lo hlimawm thei khawp mai. Thuziak thiam te'na in han ziak hi chuan a ngaihnawm thei bik thin ngawt mai.

    ReplyDelete
  8. Thu leh hla zaiah tur neih loh thu pawh ngaihnawm taka chhiar thamin i ziak thei bik zel a, hotunu chu awhawm thei bik thin mange. Han ziak zel teh, kan lo chhiar zel a nge.

    ReplyDelete
  9. Va lunglenthlak ve. Zokhua te alo lang leh nghal a.Ka khua ti har e,tha hle mai.

    ReplyDelete
  10. Capt, kei ve thung chu ka engah mah hian a thawk lo lutuk hi ka buai tawh zawk in ka hria hihi...ruaitheh na tur an fatu na a zingkar sachan pah a han titi khawm laih laih hi ka chak ve ber chu ni deuh tawh mai in ka hria ka ti@

    ReplyDelete
  11. Mihring hian ropui kan tum a, kan nun khalhtu, kan hriatrengte erawh chu kan màwl lai leh tlàwm lai hi a ni zel nia... tiraw?

    ReplyDelete

Followers