Thursday, December 9, 2010

Rulh vek a ni e.

Account khawih reng reng hi chuan thlarau lam ngaihtuah tel hi a har thin aniang, mi tam zawk hian, Finance-a thawk ho chu an RAU lo, an RO min ti fo a, keini kan lo inngaih rau ve riu riau thin nen. An ngaihdan chu a dikna lai chu awm mai thei, mahni lo maha lam rui leh vir chung mi nih loh nak alaiin nitina sum leh pai che vel ngaihtuah ringawtin kan hmanhlel chu a nih hi. Ama'rawhchu, "keini Finance-a thawkte hi kan rau ber zawk, thlemna hmunah kan awm reng zawk asin" tiin ka chhang thin.

Nitin rim takin, tihsual hlau reng rengin thawk thin mah ila, tihsual palh a awm fo a, a changin pawisa a chuang a, a changin a kim lo bawk a, kan in zawng leh fe thin. Mi aia tlaia haw a ngai fo. Pawisa a kim lohin kan mangang a, a chuan lahin kan ta a ni chuang bawk si lo. He phurrit hi khawvel awm chhung chuan a tawp mai dawn lo, kei hian khawih lo mah ila, tu emaw chuan a khawih tho tho si a.

Kan pawisa hmanral thenkhat hi IHQ lamin min rawn pek let tur an nei thin a, chung chu IHQ 'B' account kan ti mai a, chutah chuan kan charge a, kan hmanral list siamin kan thawn a, min rawn rul leh thin a ni. Chutiang list chu ka siam fo a, zawhna min zawh let loha rulh hmak hi an nei ngai meuh lo.

Kumin July-November B account ka siam chu a bo abang awm lo-in zawhna pakhat mah min rawn zawt let miah lovin an rawn rul fai vek a, mak ka ti lutuk a, ka Hallelui lo chauh a ni, ka thiannu hnenah ka sawi a, a lawmawm zia hrethiam pha lo ta chuan pip e pup e a ti hlei lo.

Krismas kan lo thleng leh dawn a, Lal Isua kan tana inpe, kan sual chhiar sen loh, ngaidam a, kan bat chhiar sen loh rul tura a thlawn liau liau-a kan tana a rawn inpe lawmawmzia hi kan ngaihtuah chiang ngai em le?

A bat miah loh a rul a, keinin rulh sen loh kan Ba thung si. Chung kan sual leiba zawng zawng chu Lal Isua kan tana a rawn inpek avangin RULH VEK a lo ni ta si a.

Khawngaihna thuk, ngaidama thinlung ti thianghlimtu
Khawngaihna thuk, kan sual zawng aia nasa zawk chu.

9 comments:

  1. Sum of tangka hi chu a hlu teh a nia.Rawngbawltu inti ho hlei hlei hian an ngaina emaw tih tur a nia sin.huvangin fimkhur hle rawh.

    SA officer Biakin sakna lo eng emaw a TVleh Scooter lei te pawh an awm ni awmin a thang ka hre tawh.

    ReplyDelete
  2. Keini misual tan a nunna a rawn pe tawp mai aniah! Ani lahin bat engmah a nei si lo, chhandama kan awm theihna turin kan thiltih sual zawng zawng ngaidamin, kan ba min rulh zawh sak vek mai hi chu a ropui e tiraw? Amah fak leh chawimawi, leh a duh anga nun hi kan tih tur chu ani ta mai! A va ropui em! Madin i ziak tha e!

    ReplyDelete
  3. RAU kan tih hi a dik loh vang ani pakhat ang.

    ReplyDelete
  4. Ba lo rulh hi a har khawp asin. Office canteen Thingpui ba pawh hi kan rin aia a tam chuan hreh deuhvin kan pe thin.

    ReplyDelete
  5. A tha hle mai. I thuziak khian min bum chiang lutuk! Isua pawh khan tehkhin thu nen a ni lo'm ni kha..h rawng a bawl le..

    Krismas hman huphurh tak tak chu kan awm leh ngei âwm si a.

    ReplyDelete
  6. "A bat miah loh a rul a, keinin rulh sen loh kan Ba thung si".

    Hei hi a dik lutuk. Ka sawi chhuah thiam loh i rawn sawi chhuak e. Khi thu tawi te khian thu tam tak a sawi.

    ReplyDelete
  7. A ba lo tu in a rul a; a rulh sak a ten a kut kan lo seh sak thung a; mihring kan lo sual zia hi chu aw!

    ReplyDelete
  8. finance lam i khawih ta zel bik a ni maw.. kei chu kan thil zir kha ka chhawr trangkai lo lutuk. lol
    family finance lah hi buaipui tham kan nei leh der bawk silo.

    ReplyDelete
  9. Sorkar pawisa hmanga thil tih reng reng, Bulding, Kawng, Leihlawn dawh leh Project hna engpawh thawh a nih hian Pawisa hi a bang awm se, kei hian nei ila ti niawm tak hian kan hmanhlel hlawm si a.. Hotunu sawi ang hian 'A kimloh chuan mawhphur ngam ila, a chuang a awm a nih pawhin mahni ta ah ngai mai lo ila a van tha em aw...

    I thu tlangkawmna hian rinloh lamah daih min khalh lut leh thin.. Heti lam hi i thiam zawng tak a niin ka hre tlat.. a tha e.

    ReplyDelete

Followers