Friday, August 6, 2010

I zai ang aw...

Engtik lai mahin zaithiam ti-a sawi ka ni ngai lo nachungin Zaipawl ah hi chuan ka tel ve chamchi a, nuam ka ti bawk a, mak deuh mai chu contralto hlir ka la sa zui. Zaipawl member mahni duhthu-a inpek a nih loh a, a thlana an thlan thin pawhin, thlan hi ka ni ve ziah thin, hmanlai nula fel an sawina “A alto hruaitu a ni” an tih thin ang mai khan hun engemaw chen chu zaipawl-ah hian ka lo alto (Contralto) ve tawh a, zaithiam lem lo mah ila, zaipawl chu kan pawlh mawi ve tho a, ka zaipui ten min rin berah te pawh min neih ve hial thin a nih kha.

Mozambique ka awm chu zai lamah hian keimah rau rau-ah ka tlahniam hle, hlabu hi ka keu ta meuh lo a, Solfa phei chu thiam dang awm hek lo le, ka en ngai ta lo reng reng. Chawlhni inkhawm kan han zaite hi a kel rawl a kel rawlin, key hran nuaiin kan han zai mai thin a, ka thlen tirh kha chuan ka mangang viau thin a, tunah chuan ngaiah ka neih leh tawh. Mizoram lama solfa dik taka, part hrang hrang nen mawi taka kan sak thin ang pawh kha helai-ah chuan an duh lai laiah an ti kuai thla a, a then an lo kuai sang bawk a, han hruai dik tum pawh hian keia awrawl chhe zet hi chuan a hneh ngang thin lo a, a chang chuan an sak dan chu dik lo a ni tih hre reng chunga han zawm maite pawh a awl thin. Tuikuk Pathian siam theih loh tihte pawh hi min ti hrechhuak thin. Ka u Tuikuk ho zinga a thawh thin lai pawh khan, ‘Anmahni zirtir tura kal si hian an tihdan hi kan entawn kan entawn mai a, buaithlak khawp mai’ an ti thin, tiang deuh chu a ni, mihang ho thil zirtir tum chu, beidawnna khur thuk taka tlak hlum a hlauhawm mah zawk thin.

Vawi khat chu kan CS te nupa ka inah an lo leng a, ka hlabu (Mizo hlabu Tonic Solfa awm) ka entir a, he hla hi I sa thiam em? Tiin hla pakhat ka entir a, ani a lo phur pherh nek a, “khawmaw hetiang hi alawm ka zawn ka zawn, helaiah tumah Solfa en thiam an awm si lo a, ka hmu zo lo a, ka lo copy teh ang” a ti ta hial a, a hla hriat ang ang chu, “chumi hla chu a awm em?” tiin min zawt a, a lo awm remchang hlauh zel bawk a, kan han keu a, kan han sa dun vei ngal ngal chu, Solfa ka lo bahlah tawh zia ka inhmuchhuak chiang ngei mai. A kuma kum en tawh lo ka ni bawk a, modulator ka bo nasa lutuk a, ka nuih a za zawk, ani pawh chuti tho, “ngawi rawh, Office ah hlabu hi lo keng la, ka lo Xerox ang a, chuan Officer ho kan zirtir dawn nia, a part kim ngeia sak ka duh a ni” a ti a, a phur surh surh khawp a, “In lama mahni a zir ka duh” a ti a, a copy ta nghe nghe. Kei pawh chuan nakinah amah pui roh hian midang zirtir tura min tih takin ka ti a, ka Hlabu chu ka han keu ngial a, awiii, a va beidawnthlak tak, d r m f.. atanga in en that leh a ngai nasa khawp a.

Tunhma-a, s d l f m d r... s d l t d’r’d’ ti-a kan au zuap zuap thin laite kha a ngaihawm ngei mai, hetia tonic solfa ah pawh ka buai chuan Staff notation phei chu ka theihnghilh vek tawh hial ang ka ti rilru a, ka hlabu dang ka keu a, ka hla thiamsa atangin ka inzir tha leh vel.

Hei hi maw lo ni hringnun an tih ang maiin, kan hringnun hi zirlai a ni reng mai, thil thar kan hmu, kan hria, kan zir a, kan hriatsa hi kan theihnghilh then leh mai bawk a, theihnghilh thei lo ta ila, mihringte hi kan turu viau ang nge, a buaithlak viau ang le tihte ka ngaihtuah ta mai mai a.

Engpawhnise, solfa dik emaw dik lo emaw, "Ka aw neih chhun lo mawi tawp se, ka tih hle hi Chawimawi nan" tia fak hla siamtuten an lo siam ang deuh hian a pawimawh ber chu Pathian faka zai hi a ni e, Amah chawimawi nan chuan eng ang pawhin zai ila a lo tha vek e, kan zai chhan ber Krista hriatchian hi thil tul ber zawk a lo ni. I zai zel ang aw...

19 comments:

  1. A dik khawp mai. Synod Music sikulah ka zirchhuak ve,mahse; KTP-ah kum 2 vel bak ka hmang hman lova, hetia lamah kan kal ta daih si. Mipa pawh a air inkan zai vak vak ta mai. Tunhnu hian, solfa tih dikloh hlauh reng renga zai ai chuan a lo nuam phian hian ka hre ta a. I zai zel ang aw!

    ReplyDelete
  2. Zai zel ang :D. Ka hming tih loh hi chu a zai nasa lo. Zaipawl-ah phei chuan sawi tham hniak ka hnutchhiah lo. A tenor min saktir thin. A 'air' ngei mai hian lairil a fan bik ka ti thin, 'A bass-a tap zawih zawih hi an vang lutuk,' ka ti fiamthu ve thin. :D

    Sande-Sikul ah, naupangho nen kan la 'd r m' zel... A chim chin erawh a sang lem lo :D

    ReplyDelete
  3. E, khai chutianga Tonic solfa tuipui i hmu chu ka va lawm ve, hei International Salvation Army Hlabu chhuak thar tur hi Tonic solfa (tune book) siam tel ngei turin ka ti a, a thleng thui ve tawh khawp asin!!!! kan hlawhtlin nan lo tawngtai ve ta che.

    ReplyDelete
  4. Loh theih lovin zaia eizawng tur ni ila, ka tam hlum thei ang...chutiang vel chu ka ni. Mahse a nuam chu ka ti a huhova han zai hi chu. In Kohhran hian music lam hi in ngaipawimawh, a tha phian in ka hria...

    ReplyDelete
  5. i hmle hi a contralto ka ti renga, hei vang hi a ni maw hotunu? :D Nuam hi chu i tih hmel reng a ni hetia han zai vel chu. Kei tonic solfa lamah ka bo hmup ve thung.

    ReplyDelete
  6. Note a ni emaw solfa a ni emaw ka thiam lo ve ve.Ka pianthar hnu chauhva zai tan ka ni. Tunlai hian zai nuam ka ti zual.Full support ka pe a che.

    IET hlabu hi kan ngaihlu, kan zai tam phah viau bawk. K Zohmingthanga'n min pe a, keimahni tawkah kan hlawkpuiin kan hmang tangkai hle.

    ReplyDelete
  7. '...zankhua tlai mahse' ti lam hawi zawnga ka rilrua a'n awm zui teh tlat chu:) Ni e, zai hi a nuam a ni. Zaipawl lamah ka tui ve hle thin a, lengkhawmzai lamah pawh ka tui ve viau thei zel tlat. Music thiam ka ni lo naa music lover hi chu ka ni ve chiang! Nang pawh lo 'alto' zel teh khai, zaipawla a alto ho hi an rilru a tha duh duh an ti a nia:)

    ReplyDelete
  8. Mozambique ho chu zai lama ka chipuite ni awm tak an nih chu! In inkhawm zai chu ka ngaithla ve chak khawp mai. Nangni chu in la phur tal ang a...keini ve chu maw, average in 15 vel kan inkhawm thin...chutah pawh tar deuh deuh hlir. An zai zawi thei sia, organ/piano a ring vuuut a, nung lo thei a sin aw! Chutah mizoram a sap hymn translated ang chi hi an sa ve ngai bawk si lo. Ka phun ve vel mai mai!

    Ka lo zin hunah solfa min zirtir ve rawh aw :-)

    -bmw

    ReplyDelete
  9. Sekibuhchhuak - e, chu nang chu i thiam dawn chu le... i la hmang tangkai zel ang chu. Awmna hmun azir zel hian zai ila ni mai e ti raw??

    Zaia - Zai zai lo mah la Zaia i ni tho alawm. Thlawk thlawk mah Mu kan ti ania..h!!!!

    Kiamlova, Puii - E, a va tihzia ve, Solfa awm ngei chu a tha ngawt ang,lo tawngtai ve ange, kan hlabu tharte hi a tha ka ti ania aw, hei ka keu reng mai asin..

    luliana - kei pawh chutiang vel chu ka ni, kan tam dun dawn nih chu.. :-) Synod pawhin music chu in ngaih pawimawh khawp tho kha mawle, Hmanah Rev. Lalhmangaiha'n "Kan Kohhran hian Tawtawrawt tih ve kan tum a, Cornet kan lei ve a, Tune Book kan nei lo a, kan pamtul ta" a tih tak kha mawle..

    illusionaire - niang chu mawle Hotupa, hmanlai phei chuan contralto hruaitu te chu an ngaisang thin asin!!! Nupui atan pawh an tha an ti lolzzz

    ZL - Kai pawh Tawtawrawt ham lohna rei leh tawh lutuk a, Note chu ka bahlah tawh khawp mai, mahse Zai hi Luliana sawi ang deuhin kan eizawnna tur a ni lem lo bawk a, a pawi em em lo e ti tawh mai ang.

    faka - khai!!! van reh thei ngai ve le... i buai ta viau a ni maw??? Zan khua tlai mah se tih te chu I LAM ANG AW tih a nih kha mawle.. Music chu i thiam ang tih ka ring, hla reng i rem nalh thei mai.. ka hla tur pawh kha i la siam ngei ka beisei :-)

    bmw - phur tawrh tawrh thin e mawle, eng hla pawh sa se an lam nasa thei ania aw.. solfa dik leh dik lo an ngaihtuah ngai lo, ring taka zai hi a ni ringawt mai, music pawh kan hmang lem lo, khuang a ni mai..

    Lo zin vat rawh, ka phur tawh rap a nia aw..

    ReplyDelete
  10. Zai lam hi chu nuam ka ti khawp mai. High school ka kal laiin mimal in zai siak ah lawm man 2 ka dawng ve.haaa..haaa...

    Tunah chuan ka zai khat ta hle mai. Awmna ten a zir lo bawk a. Pathian fakna nih hi chuan zai zel mai tur.

    ReplyDelete
  11. Irene - e, chu i lo zaithiam bik elo??? kei chu solo lam chu ka hlawhchham chiang rasss... a huho chuan nuam ka ti ve khawp mai. Awrawl hman ngaih lohna Tawtawrawt te kan nei hlauh a, a zia tak a awm hahaha...

    ReplyDelete
  12. Zaipawl thiam tak mai a an zai hi chu ngaihthlak nuam ka ti khawp mai, mahse solfa leh mai tai hi khawvelah hian awm lo mahse pawi ka ti miah lo. Ka Pathian fak nan erawh chuan ka zai zel dawn si.

    ReplyDelete
  13. Zai hi chu a nuam a ni,, mahse bula mite an reh kar laka kan aw ri zawi angreng tak si a, a lo lai tial ve lawih lawih mai thin hi chu.., kan fak Pathian hian kan hmel leh awri a en lemlo hlauh thin mai pawh a..

    ReplyDelete
  14. Hrangchala - Mai tai ber kher chu, kei pawh tui ka ti lem lo, a thlum ang dum a ti raw, mahse kan zaina a dal chuang hleinem...

    b-buata - nia, lo lai tial ve mai mai rawh se, ring deuh deuha zai zel tho tur ania.. :D

    ReplyDelete
  15. “A alto hruaitu a ni”-kala hre ngailo anih hi. Keipoh ka zai thiam lo mahse Biakin ah te hian midang an awm vakloh avangin hla hruaitu, zaipawl conductor te ka nia. Solfa pawh ka thiam vak chuanglo. Mahse a nuam ka ti thin, theihtawpa PATHIAN faka zai hi a nuam ber mai.

    ReplyDelete
  16. duhawma - Mizote hi chu zai ngaina tak hi kan ni ve hrim hrimin ka hria, a solfa lam thlu vak lo pawha lungleng taka zai thei deuh vek kan nih hi!!!

    Alejendro - zaithiam lo mah la i ngaithla nasa thung alawm ti raw.. zai lam chu a kaihhnawih tho tho..

    ReplyDelete

Followers