Tuesday, July 13, 2010

Beer-lahai-roi

Mahni seh seh mual hranah ti-a office chhunga hna thawh mual mual hnu-a Thingpui In chawlh han neih hi chu a nuam ve hranpa thin ngawt mai. Choka-ah kalkhawmin duh zawng zawng sawiin kan ri luai luai thin. Kei, a tawng thiam lo ber hi a bengchheng leh tawng hnem ber ka la ni ta dah thin a!!

Tukin chu ka thlen thlak hma-in Politics lam an lo khel a, ka ngaithla kur reng a, ka inrawlh lem lo. Tuna kan rorel lai mek Frelimo party hian term hnih an chelh tawh a, kan President Armando Guebuza hi duh lo an tam hle, chuti chung chuan 2009 October-a inthlanpui neih khan an thlang tling leh tho si. Inthlan dawn khan Renamo leh MDM party thawm a lian hle a, result a chhuah meuh chuan a ngai bawk an lo tling leh, hei hi eng dang vang a ni lo a, Frelimo party hi an lian laklawhin sum leh pai an nei a, Campaign laiin Puan, Bag, Lukhum leh sum hial pawh an sem chhuak nasa khawp a, mipui chu an awn leh dual mai niin a lang.

Chutia Frelimo an han sawisel leh vel chu "Nangmahni thiamloh alawm, duh thlan theihna in nei a, in Vote a, Frelimo tho in thlang tling a, ngah nge tuna in sawisel leh si, in duh loh tak tak te chuan inthlan lai khan vote mah ta che u" ka ti vel a, anni paw'n dik chu an ti tho, "Nia, suma lei theih an tam em a ni, a bikin Nu-ho hi puan an dawn chuan an lungawi a, an tam nasa mai si a, nuho pawl hi an chak bawk si a.." te an ti.

Chuti'n ka sawi ngawt tak na-a kan Mizoram dinhmun nen a danglam nasa vak chuang lo, kan in ang vel reng a ni e, tiin ka ngaihtuah leh hnuhnawh. Hmana kan sêl tawh bawk kha kan thlang tling a, hmana kan duh kha kan sêl leh vel mai mai a ni e, "Uiin a luak a ei leh a, Vawk tuihawkah bawk a inbual leh thin" tih zawng zawng kan neih zo a ni awm e.

Engpawhnise, famkim lo mihring kan ni miau a, a famkim a lo lan hunah chuan Thu tak zawng zawngah a hruai lut ang che u kan Bible-in a ti a, chumi lo lan hun chu nghakhlel takin kan thlir thin a nih hi.

Hagari, a Pi Sari'n a fapa Ismaela kum 13 emaw lek nena a hnawhchhuah khan thlaler hmunah kalna lam tur hre lovin a vak a vak a, chutah an tuithawl a lo ruak ta bawk nen, lungngai manganga rumin a fapa tuihala thi mai tur chu en ngam lo-in thingbuk hnuaiah a mut a, Pathian hnenah a tawngtai ta a, chutah chuan Pathianin a mit tih var sakin Tui a pe a ni tih kan hria. Bawihnu, ro luahtu tur ni lo, a piin a hnawhchhuah hnenah pawh Pathian chu a inlar a, a mamawh a pe a, chu hmun ngei chu a hmingah Beer-lahai-roi, Nunna Tuichhunchhuah tia vuah a nih tak kha.

Hlim leh lawm lai leh engkim a kal tluan lai hian Pathian hnena lawmthu sawi hi a awl deuh a, manganna leh harsatna tawh hian Pathian dem mai, beidawn mai hi a awl thin, Amah kan mamawh hun lai tak a nih thin vei nen. Kan chak lohna leh tlin lohna te hre vektu hnena inpumpek mai hian Nun a nuam mai a lo ni, khawvel thil ten min tibuai thin mahse, Hagarin Lalpa a tawhna hmun ngei hi tun thleng pawhin a la pangngai reng a, kan chak lohna zawng zawngte min hriatpui turin Amah chu a la rintlak reng zawk a ni.

14 comments:

  1. .. Office thingpui in chawlh lai tih takah,, office-ah Thingpui inchawlh lai ngeiin Thianho in, a ri ngeiin kan chhiar chhuak a, kan ngaithla tui hlawm khawp mai. I tawngkam ngaihthlak a nuam thin e.. I conclusion pawh hian kei ni he "Nunna Tuichhunchhuah" mamawh ve tak tak ho hi mi a hneh khawp mai,,

    ReplyDelete
  2. Conclusion lam a tha, mahse Pathian Thu leh Politiks hmehbel tum hi ka ngaihdan ani chiah lo.

    ReplyDelete
  3. Khilai Pathian thu khi ka ngaihtuah thin a, Ishmaela kha Abrahama thalbe atanga chhuak ni lo se, Pathian in a in tur tui a pe a ngem tih ka ngaihtuah mai mai thin.

    Engpawhnise, Pathian mi hriat, a duh loh zawng an tih pawha a hrem thin, a thu anga an awm a Malsawmna an thlah te thlah leh chhawng thlenga vurtu Pathian a ni a, chu chuan Amaha tluk luh mai a hlawkthlak zia min zirtir. Amahah awm ila, politics ah pawh kan buai lo tur.

    ReplyDelete
  4. Ava dangdai ve.... in khaw politic lam chu sawi zui lo mai ang, sawi tur chu ngah hle mah ila..

    ReplyDelete
  5. Ber-la-hai-roi Nuna tui khur, tiin fakna hlaah kan sa thin em kha aw? Helia tlar bak hi ka hre chhuak thei tawh silova :-)

    Hagari hnena Pathian thu thiam tawh kha a ropui ngawt mai.Ishmaela thlahte ho hi chu, an lian tual tual zel dawn chu ani hmel. Pathian thutiam kha a thleng dik anih chuan.

    A dik. Harsatna hmun thlen vela, Pathian dem nghal; hlimnia Pathian hrechhuak leh chuang mang silote pawh hi kan tam awm e!

    ReplyDelete
  6. b-buata - khai aw, nangman ami chhiar ri lau lau a???

    chhangte_ll - i ti dik khawp mai, thu pahnih ka rilru-a awm ka rawn sawi pawlh a nih khi, hmehbelna lam rim a nam pha vak lo. :D

    Lehlamah chuan Politician te hi Pathian thu mamawh pawl tak chu an ni si lo maw???

    David Ralte - Nia, Keimahah awm reng rawh u titu hi kan hnenah pawh a awm reng thin tih a chiang a, hrechiang tawhtu tan chuan kal hlatsan ngam vak chi a ni lo.

    Alejendro - engemaw dangdai le, thil hi i hmu dangdai nasa thin khawp a..

    Seki - Fakna hla-ah chuan awm e, K Vanlalhneman a sak hluah hluah thin kha :D

    ReplyDelete
  7. i post heading ah 'beer' a awm vang khian mozambican beer (laurentina/2M) lampang i sawi dawn emaw ka lo ti ve ringot a... :)

    ReplyDelete
  8. waissss! profile pic thar chu, very chhelo :)

    Post pawh a tha khawp mai, mahse ka chhiar laklawh laiin i profile pic in ka mit a la zel... :D

    ReplyDelete
  9. Blog kan lut phat chu a lo dang zar sia, kan hawi kual a, i profile PIC in mit ala nghal xar:D, i post chu chhiar ta lo mai, a tha sa...hman hun ah chhiar mai ang auh!!!

    ReplyDelete
  10. el-shaddai, hla kha ka rilru ah rawn lang zawk...pathian hi a zahawm teh reng nen, keimahni covenient tur anga her kan tum zel erawh van a mi ho an lawm ka ring hran lo!

    ReplyDelete
  11. ruolngulworld - i va'n hre rei ve,i awmna a rei tawh teh reng nen. i Beer sawi ho hi a la lar lutuk. :D

    illusionaire - profile picture :P min hai an awm a!!!

    Anon - nia, tunlai chu ka'n ti danglam ve vel mai mai nih hi.

    avena - chutia mi? El-Shaddai hla kha kan sa nasa ve thin khawp ah.. :D

    ReplyDelete
  12. Ismael tih awmzia or hman na chhan chu Pathiam in a ngaithla tihna ani.Lalpa ngaithla rawh.
    Ismaela thlahte an len thur 2 a Israelfa te an do hian Israelfa ten Pthian an ko thin a ti chuan Pthian chuan a lo ngaithla thin in a lo pui thin ani.Chu chu Pthian remruat sa vek anih chu .chutak chu Ismaela hming phuah chhan pawh chu ani e.

    ReplyDelete
  13. "Aw a thukin a va sang em!" ti mai teh ang!

    ReplyDelete
  14. Hagari leh Isamaela chanchin hi chuti takin ka lo ngaihtuah ngai lova....hetia i ziak ka chhiar pah hian ka mittui a parawl treuh mai...fa han neih chiah hian fa te hmangaih a nat zia hi kan hre ve tran chauh chu a nia leh...Pa in min hmangaihna phei hi chu ngaihtuah thiam phak bak a ni...

    harsatna tawh a Pathian dem tih hi...a dem em chu ka la dem ngailo na chungin, harsatna tawh a lawmthu sawi hi rilru leh tihtakzet chuan a harsa ve angreng ka ti :D ... sawi liam ve puat hi chu a awl mai a...mahse hel ru deuh hian lawmthu sawi chang hi ka ngah khawp mai... ka sual ka rawn inpuang a nih chu :D

    ReplyDelete

Followers