Thursday, May 27, 2010

World Cup thunawi..

World cup Football hian engemaw ti takin âi hi a nei deuh roh a, thil thleng zen zen lo a nih bawk vang hi a niang e, mitin hlut leh ngaihsan a hlawh thin ni, keini ang duang inkhel ngai lem lo pawhin muthlu tur tal pawhin kan nghak chhuak hram hram thin anih kha maw. A lar em avang hian World Cup kan han tih ringawt pawh hian football khel a ni tih chu kan hrechiang nghal fur awm e.

1990 kha tih tak zeta World Cup ka en hmasak ber chu a ni awm e, khami kum kha chuan kan tang ve thei khawp a, kan tan zawng erawh hmeltha tha kha an ni mai, inkhelh kha chu an thiam dan a in ang put vek a-kan mitah chuan, a pet goal thei kha kan ngaisang leh deuh bawk, an hlapui To be Number 1 te kha a ke rawl a kel rawlin kan han sa ve a, a thu erawh a dik lo nasa viau ta ve ang, Argentina leh West Germany-in Final an han khel a, keini naupang deuh kha chuan an Goal keeper Goycochea hmel that vangin Argentina kan tan, a uar fal deuh phei chuan an biangah an ram flag rawngte khan an han ziak reng ngei a, puitling lam erawh chuan Germany National Anthem kha Sipai Pawl hla pui ‘Sipai puanzar ze thum ropui’ tih thluk nen a in an avangin an han tan deuh bawk a, an Music play laite khan an han sakpui tak lawng lawng a. Germany an han chak zet kha chu tlema a hnuk no deuh chu an tap hial mai..

1994 kha ka en nasat kum a ni, Atlanta USA kan ti reng anih kha, kan tlaivar deuh thaw reng a, chhunah Class-a muthlu an tam thei hle. Zan dar 12:00 kan thleng dek dek a, kan kawmchhakte fanu chuan “ehe.. kan tlaivar der nia..” a lo ti hmanhmawh bawk. Brazil leh Italy final-a intumin Brazil an vannei zawk hlauh kha aw… Italy kan tan laklawh si, a va hrehawm tak em. Inkhelh zawha ei tur Arsa kan la siam zui, ei a tui vak tawh lo.

1998 – hemi kum hi a nuam phian, Bukpui-ah Primary School-a ka thawh lai a nia, a khaw pumah khatih lai khan TV nei 4/5 bak an awm lo. Vengsang lamah Pu Biaa’n a nei a, Mualveng lamah Pu Thanga (Thangbawnga kan tih mai thin, dawrkai) leh Thanghuama leh mi dang 1, a hming ka hre ta mai lo. Ka awmna ka Pute-a ten an nei bawk a, TV nei in kha a lun thin luih luih ngei mai. Chutih laiin, electric current a awm tha lo thei si, Thangbawnga te khan Generator an nei a, power awm loh zan chuan Thangbawnga te in kan pan hul hul zel, a hunlai kha chuan a nuam thin ngawt mai. Anni lah kha an felin an zau khawp a, TV chu kawngka bulah an hung tawp a, pawn-ah thutna kan rem ta thin a, a khaw nawtin kan en a, kan ri hulh hulh mai thin, inkhel en a nuam dangdai thin teh asin.. Final khelh zan erawh chuan vanneihthlak takin power kan han nei ve hlauh mai a, inah thlamuang takin kan en a, TV room chu kan khat hneh khawp mai. France leh Brazil-in final an han khel a, ka tan lam France an chak zet kha chu a nuam ve khawp mai, Brazil tan an tam bawk a.

2002 – Korea leh Japan in an inthlen tawm a ni bawk a, a dangdai deuh turah kan ngai kha a ni a, Opening Ceremony pawh a puitham khawp a nih kha. West Phaileng-a C.O-a ka awmlai a ni, Hetah pawh hian TV nei an tlem a, kei phei chu mahni-a awm ka ni bawk nen, neih alawi kha ka nei lo hrim hrim a, Dinthar veng-a Pu Siama te inah inkhel en turin ka kal ve ziah a, kan tam thei hle, ka tawng peihin ka tang thei bawk a, ka en loh hi an hlau thei khawp a, ka kal loh pawhin Pu Siama Monu hian a fa-te min rawn lamtir ve ziah. Hemi kum hian Brazil ka tan ve teh tlat a, an la chak zui..

2006 – Hemi kum hi chuan Germany lam kan hawi ta a, en erawh ka en hnem vak lo, mi zawng zawng deuh thaw-in mahni in-ah TV kan nei fur a, tunlaia “Radio ngaithla tur insawm” ang deuhin World cup en tura insawm chu a hit vak lo, mahse thiante nena en chak hrim hrim chi mihring hi awm a ni a, a chang chuan kan han en ho leh ang dal dal bawk thin. Ka en tam lo a, tan bik pawh ka nei ta chiah pawn ka hre lo. Penalty shootout-ah Italy an chak ta a nih kha, ka tan pawh an ni lem lo, Italy hi kumtinin rin kai chu an ni ve ziah.

2010 – Kumin chu South Africa, ram nuam leh mawi tak, Africa Europe an tih mai ramin an thleng dawn bawk a, a phurawm ang reng a, inpuahchahna pawh an zo thawkhat ta hle, Lalhmei ang maiin an inpeih ap tawh a nih hmel, TV lamah pawh an ti ri chhen ta mai. Ram thenawm maite a ni bawk a, kal ve te pawh a chakawm rum rum, a hma-in ka lo va fang lawk ang chu ti-a ngaihtuahna ka siam laiin VISA ka nei mai thei lo a, tunah lah hna tau a tet leh tawh si, tin, kal man a to ta lutuk reng reng a, han kal theih ziazang niin a lang ta lo. Kan time zone a in ang bawk a, khêl lo-a en thei turah in dah phawt ang.

India ram hian engtikah tak World Cup Football te hi khel ve thei ang maw tihte ka ngaihtuah a, India-in an la khel dawn lo bawk a, kumin chu Brazil hi I’n tan phawt mai teh ang, kan Brazillian hotute hi an fel e mai. Tin, an champion ngei pawh ka ring e, tu nge rawn bid dawn????

Brazil, Brazil, Brazil…. ni 13 chiah a awm ta!!! World cup football 2010 khelh nan.

17 comments:

  1. Match khat tal en tur te chuan zuk kal la mawle,nang chu i tlawngawl bakah mahni chauh i ni a, inthurual pawh a awl ang chu. "I was there" tih ve reng rengah. Ka SA Visa a la nung reng, July thla tawp thleng hian, phur thut chuan ni mai! Ha ha ha. Kal man leh Ticket man chu a zia, Accomodation ber hi peak season a nih avangin an tito thuai thuai lutuk atin a ni.

    ReplyDelete
  2. Thunawi iva ngah zek ve!! kei chu i sawiho khi ka en ve nual hlawma, mahse pakhat mah khi a chak emaw a chak lo zawk emaw ka hre tawh lo reng reng, a tukah ka theihnghilh nghal zel, 1969 kuma Kahrod Punji khaw tan ka khelh ve tuma Belpum kan lak kan lawm nasatzia erawh kha chu ka la hre chiang khawp mai - kha lah kha World Cup han tih chi a ni ve si lo va.
    India ream chu hman kum deuh tawh khan an qualified ve a, mahse Uniform man tur leh kalman tur an nei lova, an khel ve thei ta love an tia lawm!!!!

    ReplyDelete
  3. World Cup Final hi chu; khawvel thilthleng thin zingah ka ngaih hlut pawl ani. Brazil hi engtiklaipawhin ka tan :-)

    To Be Number One- hla tluk kha an la siam chhuak lo a maw ni!

    A hmun nghak nang kan nie che a, helam post ngaihnawm deuhte pawh kan hmuh ka lo in ring reng ani.

    ReplyDelete
  4. I memory hi a tha khawp mai. Kei chu 'chip' vuah belh hial ka duh :D

    Time Zone chungchangah hian - in inan chuan ka hrethiam nghal mai a. Mahse hmanni khan TV lamah kan football hria 'Gerrard-a pa' etc khan darkar 2:30 in kan inthlau an ti a, ka dik nge an dik??

    ReplyDelete
  5. ka luh chhilh teh chiam lo mahse ka phur ve khawp a huho deuh hi chuan. Tan bik pawh ka nei lem lo...football ka game ngai nat zing a mi a ni. Kumin chu ka hman chang2 a en ka tum ang heee..heee...

    ReplyDelete
  6. @Thiama - chu chu lawm, va thlen ngawr ngawr chu a theih mai, khawsak man hi a to deuh a ni, kan chhungkua hi chu kan inthurual phian a sin mawle..

    @Kiamlova - 1969-a bulpum inchuh chu.. uiii, a van rei tawh tak..

    @Sekibuhchhuak - kei a hmun nghak ve hian in ai ka awh zo lo khawp mai, a pawi ka ti hahaha

    @Zaia - haha, chip vuah belh chu a tih chi khawp ang..

    Time difference chu 3:30hrs a ni e, India kha in hma zawk.

    @irene - naupan laia game khelh ve nasat pawl kha a ni tlat a, a hmuhnawm ve tlat alawm. Nia, hman chang chang chuan en ve ngei rawh. haha Chicken Biryani pawh ka siam thei tep tawh, Inrinni khan a hmanrua vel ka va lei a, next weekend-ah siam ang..

    ReplyDelete
  7. Hotunu chu i huai eeeee.... 1998 vel a i lo thawh daih tawh thu te kan chhiar turin i ziak ngama... keini chu sikul kan la lut a sin khatih lai chuan :D

    lolz... to be number 1 khi a va ngaihawm reuh! :(

    ReplyDelete
  8. '86 kha tih takzet a ka en hmasak ber a ni tlats. France-in Brazil SemiFinala an hneh loh tuar rual tawk vel kan ni...

    Chhangchhe pa tih takah World Cup apianga nau awih ngai ta mai erawh hi chuh... Free deuh helh hawlh a Varte te anga en ve a chakawm nen :)

    ReplyDelete
  9. 1974 kha TV a ka en hmasak ber ani.( a van rei tawh!! ) Germany an chak in ka hria. An captain kha ngaihsan a hlawh in a hnu ah coach in a champion pui leh.'Kaiser' title an phuah ve tawp.

    ReplyDelete
  10. Varte a hmun achuan en ve nei thei la ka van ti e, kei pawh ka chak lu tuk,chuan i thu nawi te te kha ka chhiarin ka ngaithla chak tlats,kei chu England ka tan e,i ngam zat zat ka ngam!!!

    ReplyDelete
  11. @ illusionaire - shhh... hotupa, lehkhazir pahin ka thawk alawm lolzz nang chu i la naupang reng reng!!!

    @David Ralte - Chhangchhepa chuan nau awi mu phawt a, thawm dim thei ang berin inkhel en ngai tawh ni maw..lolz

    @dr_feelgood - kan pian hma-in in van en hnem hman bik ve lolz..

    @Zaupuia - England maw i tan a... kei pawh i ngam ngam ka ngam ve e..!!!

    ReplyDelete
  12. Nizan khan ka chhiar hman lo.Ka bihthuak chauh.Kan lo upa ve ta nge mawni le 1982 Italy champ kum khan finale ka en khakha TV live a ual kap ka en hmasak ber a ni.Polo Rosei a lar vak kum khan.86 khan final en tur in PTC Sairang bul a tang in ruah sur hnuaah ke in Sihpui ruam thleng kan kal .Khawvar hma in kan kir leh hahahah bawn tak ani.England ka tan thin ka tan duh tawh lo .ka hu tlats tawh.Ual cup leh ah a hmunah en ve tum tawh ang.European en ka duh ka hnaih zawk bawk si a.

    ReplyDelete
  13. German an chak dawn tih an puan dum dum tawh kha, han ti mai ila'h.

    I tawk ngaihnawm thei kher mai a. Football en i tui chiang.

    Ar kanpui tur hual lawk i nei tawh em ? A remchan leh kan en ho dawn nia. En ho tih lemah hun inangah ka tihna.

    ReplyDelete
  14. Awi, misual.com a R...... hi i ni tih ka lo hre lo reng reng a! vawiin ah ka gmail inbox ka ching let vel a, kan lo in email ve tawh ngei :-) Aizawl ah kan awm hun a inang leh ta si lo va. Xmas i haw dawn em? Keichu haw ka tum a...a rem chuan inhmuh kan tum dawn nia.

    football chu live in en ngei la ka van tih pui che ve. 2006 final zan kha Hamburg a kan zin lai a nia, Italian hovin kawng an van han zawh nasa teh reng em. Non-stop till morning hi a ni ringawt!

    -blackmagicwoman

    ReplyDelete
  15. @hmingtea - kha daih kha sin, duh zawng hi chuan min pawt ruak ruak zel a nia.. WC leh hun chu Brazil i kal a ngai dawn tihna ni maw??

    @Te-a Colney - Khel thiam mah suh ila, en hi chu anuam ve alawm haha.. Helam chu ar kan tih vel pawh a sawi Hot theih tak tak loh a ni.. Han en ho ila, han sep rawtui vel ila tha tur ania.

    @BMW - hehe, shhhh... ni chiang e, October '09 khan ka haw a, ka han hawi ruk ruk mai mawle..

    CMas hi ka haw angem ka la chiang lo, haw dawn chuan rawn hrilh ang che, inhmuh kan tum dawn nia. Lo lut ziah rawh aw..

    ReplyDelete
  16. kei chu '86 mexico kha tv ah ka en ve! nang ai in ka upa a niang!!!! ha ha....

    ReplyDelete
  17. Heng ram te hi ka tan bawn tawp dawn.USA,Netherland leh Italy an 3 hian ka tan dan a in ang vek bawk.Mosolman telna ram reng reng ka tan lo bawn tawp.

    ReplyDelete

Followers