Friday, May 21, 2010

Facebook

I pawnto ang chaw ei khamte rual kimin
A eng nem duai kan tualah
Thian han sawm la, lungrual te in
Chhei, a chhei dur dur

Naupan lai-in thiante pawnto turin kan han ko a, pawnto hla chi hrang hrang sa-in kan han inkawm a, chutah inthengkah emaw, inbihruksiakin emaw a hmawr kan han bawk ngei a, a chang chuan kan intirameikai thin bawk. Mi kawmkar thim lai lai kan chuh a, kan lut kual thin a nih kha, thenawmte ar in-a tawm phei chuan ar hrikin min lo bawm nghal luai luai a, mut hnu-ah kan thak sup sup thin.

Aw, en teh an nun a dang ta tih hla ang maiin tunlai naupang chuan Pawnto hla pawh an sa ngai tawh lo, a awm tih pawh an hre lo hial zawk ta ve ang. Sikul an kal thei dek dek a, Computer an ti nghal ringawt tawh mai chu a nih hi. Naupang chu sawi loh puitling lam pawh a hmei a pa-in Computer hian kan tunlai khawvelah hi chuan min awmtlei zo hlawm ngawtin ka hre thin.

Kei ngial pawhin he Computer hi ka hmang tangkaiin Internet pawh ka luhchilh thuk ve tial tial a, heng website: Tweeter, Facebook, Orkut tih angreng te hi Social networking sites tia sawi a ni thin a, mite inzawmna siam tura duan a ni nghe nghe tihte pawh ka hre ve zel a, hei hi kan kristianna nen hian a inhmeh hlein ka hre thin. Kan Kristian nun hi mite nen inzawm leh midang te tana nun hmang tura beisei kan ni a, chutiang bawkin heng site hmang hian thiante nen inzawmna tha kan siamin kan ngaihdan te kan sawipui fo thei thin a ni.

Heng site zingah hian Facebook ah kumin hian ka in register ve chauh a, tunah hian thian 69 ka nei a, thian atana min duha min sawmtu apiang chu ka pawm vek a, thian tam tak neih pawh ka duh bawk, thian nei lote tana Thian nih inhuam kan Lalpa dung zuiin friend request pawh ka accept zel a ni.

Khawilai African ram pilril, tui leh power awm that lohna-ah pawh vanneih hlauh chuan Facebook profile a update theih a, Yahoo mail ka hawn theih loh pawhin Facebook chu ka hawng thei tlat a ni, chu chuan khawvel hmun danga thiante nen inbiak pawh theihin min siam a, hei hi chu a ropui tak zet a ni.

FB hian thiante nen inzawmna tha tak mai min siamsak a, ka hna avanga hmun hrang hranga ka awm thin vangin hun engemaw chen chu thian bik hnai tak pawh nei thei lo-in ka awm tawh a, ka thiante ngei pawhin a chang chuan min be pawp em em hran chuang lo fo, amaherawh chu engemaw tiin he FB hian thiante nen min thlunzawm leh ta a, ka College kalpui te leh School kalpui te mak tak takin ka chhar chhuak a, hei hian thian hmuh ngai tawh loh leh la hriat ngai lohte nen inhmelhriatna remchang min siam sak a, a lawmawm thin ngawt mai, kawng lehlamah chuan mi thenkhat mahni nihna thup a, midangte nihna hriat duh bawk si a, vak kual vel, mahni nihna dik tak dah duh lo, thlalak pawh dah duh lo hi an awm ve tho mai, heng mite hian pek aiin lak an duh zawk a ni tih a hriat, tin a takah pawh mi phakar tak an ni mai thei a ni.

Chutia han sawi zel takah chuan internet-ah hian Mizo site hrang hrang leh forum-ah te pawh thu pawimawh tak tak, hnam hnuk khawih thilte sawi ho a ni fo thin a, heng site hmang hian aizawl leh zoram chhunga thil thlengte rang takin hmun hla taka awmte pawhin kan lo hre thei thin hi ka tangkaipui hle. Chutih laiin Facebook ka sawi ang bawkin heng site-ah hian miin an hming lem an hmang tlangpui a, mi tam takin kan nihna an hriat loh avangin huai tak takin kan tawngin sawrkar dem zawng emaw, mimal hial pawh an nihna te kan duh loh zawng chu kan sawichhia-in a then phei chu ar chuk tui lo hial khawpa sawi chhuah maite pawh kan nei thin.

Hetianga thu leh hla tha tak tak nei leh ngaihdan ropui tak tak neite hi hetia inthup lo hian, kan ram hi kan vei tak tak a, a thatna tur kan duh tak tak a nih chuan ‘Keimah ngei hi a siamtha tur ka ni’ tiin bul tantu ni thei theuh ta ila kan tha tlang ngei ang.

Heng mizo site hrang hrang-a comment pe thin mi tam takte hi an rilru a chakin tawngkam an thiam a, thil an hre hlawm em em bawk, a chang chuan heng thalaite hian an ngaihtuahna ang hian kan ram hi min hruai ta se, kan tha viau ang a, tihte ka nei fo mai. Amaherawhchu heng mite hi mi dawihzep tak an lo ni ve thei tho mai. Hmaikawr vuah chunga ring tak taka huk dum dum a, a saseha tlanchhe leh tur chi, Sabengtung sakeibaknei vun sin ang mai an lo nih teh chuan a fuh chuang miah lo thei.

Miten min hriat loh a, inthup chunga huai tak taka pau pau lo hian, kan sawrkar pawh ralkhata dema, iak mai lo hian a bupui hi luhchilh ngam ta zawk ila, tha lo ni-a kan hriatte hi Dan hma-ah dik taka ti thin turin hruai ngam ila. Mi dik leh tha te chu chawisangin zah thiam ta ila, kan hnam a ropui ngei ang. Raltiang ram saw thlir teh u ti mai lo-in mahni ram ngei hi thlir teh ang u.

18 comments:

  1. Facebook atan chuan ka senior lutuk tawh in ka hria, hetia in thil ziah lo comment vel hi nuam ka ti tawk.
    I sawi ang khian ram leh hnam hi chu kan vei tlang a lawm,mahse a siam tha tu nih chu kan ngamlo fo. Mi huaisen hna ani deuh a niang.Ka theih ang tawk leh ngam ang tawk chuan ka ti ve chuan ka in hria.

    ReplyDelete
  2. Facebook hi chu i addict ve thlawt a ni tiro? :-P

    ReplyDelete
  3. Facebook-a i in register atang hian biak i har tlat :) I thiam tam ta lutuk a, i danglam zo tawh... hehehe

    ReplyDelete
  4. Kan naupanlai kha chuan pawn ah chaw thial pawng pawng chungin kut lehlam a chaw thing tlang lek chungin kan pawnto thin kha ani a .Ka fate erawh chu sandwitch snacks etc nen thu chungin in chhungah inter net hmang in an pawnto thin kan in changkan hleih khawp mai.
    home work nise internrt hmang lo chuan an ti thei tawh lo kan in chankan hleih khawp mai.
    thiam dap dap ngei mai Mizoram atangin raltiang ram kan thlir a .Raltiang atangin kan Zoram hi kan thlir let trhin reng a sin.A lang chiang duh khawp a sin.

    ReplyDelete
  5. Pawnto hla khi - thian han sawm la - lungrualtein- tih hi thian han sawm la lam thai iangin - kan ti thin. zoram siam that nana tawngkam thiam leh thil hre ho in tup lova zuang chhuak tura i sawmna hi tha ka ti khawp mai. Hetiang thahnemngaihote in hmuhkhawmna te hi siam sela an vei zawng zawng sawiho sela atha ngawt ang.

    ReplyDelete
  6. tha ngei mai, han zawm tlang thei ila aw.............

    ReplyDelete
  7. A dik chiah. Mahse kei pawh hian tawngkam mai bak chu tih theih ka nei chuang lo, ralkhat atang hian.

    ReplyDelete
  8. Eng engah emaw hi chuan account hi ka hawng ve fer fur a, a engahmah hian ka active lo lawi a! Mi thatchhia chuan hman loh chhuan lam hian tih hram theih hi kan lo ti lo fo a lo ni. Internet hmanga thian insiam leh inkawmhona tangkai neih te hi chu a lo thain a lo hlu mang e ka ti.

    ReplyDelete
  9. Facebook hi chu tangkai ngawt asin.Chhungkhat unau hmun hla tak2 kar dan a awmte awl sam tak a min tlawh kual tirtu nia, tha ka ti khawp mai.

    ReplyDelete
  10. dr_feelgood - nia, zawhte hi thi awrhtir a har thin khawp mai, mahni theih ang tawk leh ngam ang tawk theuh tal hian ti vek ila, kan ziaawm mai thei asin..

    Alejendro - nia, nangni in tawmkuk a lo ni bawk sia, a nuam ve pah reng..:-)

    Zaia - ngah nge min tih hmuh teh ei!!! biak har tih thu-ah chuan i internet kha a puh chi zawk ang... :-(

    hmingtea - Nia, ral thlir hian thil hi a chiang duh vei phian a, a chhunga luhchilh hian hmuh a har leh thin bawk si..

    Kiamlova, Puii - Pawnto hla chu i hre dik zawk mai thei, in sa hmasa zawk awm sia.. :) Mahse zirlaibu-ah chuan ka ziah ang khian an ziak thenin ka hria.. !!

    ReplyDelete
  11. Muana_hmar - zawm hmasa ber la, kan lo zui ang che..

    mesjay - kan ni vek hlawm a nih hi, ral atang hian tawng huai hi a awl viau lawi a.

    faka - nia, kei pawh ka hawng a, ka hmang leh lem lo a, user ID leh password te ka theihnghilh thul, FB hi ka active na ber a ni ta rih a nih hi.

    Irene - Niaa... chuti ve bawk maw???

    ReplyDelete
  12. i van xiak tha vee, a tam xokin hming tak kn hmang ngam lo i th hi cu a dik hle mai keiph k tel mahse dh loh chhan hrang2 a niang cu cung xingah cuan i soi tak doihzep vng th hi a dik ciah keiph blog hi ataka soicuah ngam siloh soi nan k hmang cuan engtk ni emo cuan he k kor tang hian k cuah ve theih beiseiin blogosphereah hian tan kn la hmasa a ni.

    ReplyDelete
  13. Kei hi facebook account ka nei chungin ka tuipui hman ve tlat lo. I chhawr tangkai angin ka chhawr tangkai ve lo a nih ber chu, ZAWNGLAI TE KAN NI TAWH LO bawk a!!! Zawnglai tan chuan tangkai reng asin, Ha ha ha!

    ReplyDelete
  14. I post ka chhiarlaia ka ngaihtuah South park- episode thar lam deuh a Fb chungchang an rawn chan kha.

    Nia, tiraw ngaihdan tha deuh deuh sei pui pui hi article-ah chhuahse chanchinbu-ah tal te khian han ziak ve se tha tur a nia. Chanchinbu-a chhuah meuh tur hi chuan uluk pawh a ngai a sin.."ni awm e' tih lam kha a leng tawh silo a.... Ralkhat atang hian han ziak suau2 teh ang u :-)

    ReplyDelete
  15. Mizo site hran hrana hming thup, anonymous a comment, rilru chak leh tawngkam thiam, amaherawhchu mi dawihzep tak an lo ni ve thei tho, hmaikawr vuah chunga ring tak taka huk dum dum tih vel i rawn ziah khian tu te nge i sawi chhan ka hre mai :D

    Blog hi chu Pathian thu theh darh nan pawh a tha viau a sin. Blog ka follow zingah US a Pastor blogger an awm nual, an blog (sermon) hi tawi deuh mahse ril tawk hi a tam lutuk.

    Chung tiang bawkin Twitter hi tunlai khawvel a breaking news hriatna tha ber a ni e. Kan hmang thiam dana zir a ni mai.

    ReplyDelete
  16. Fcebook hi thian biak nan bakah zirlai forum ka zawm kual a, job opportunities kan in share bawk a, laktlak ve viau mai...!

    ReplyDelete
  17. jay-me - a vai chuan ka ti lem lo, thenkhat chuan rilru han tih thawl vel nan pawh an hmang mai thei, a taka zakzum, tawng tam vak lo te pawh an ni mai thei, a tlangpui ka'n sawi mai a nih khi. Lo leng ziah rawh khai.

    Thiama - ZAWNGLAI tana a tangkaina tur ang tak hian ka la hmang tangkai pha lo, TAN KA LA ZEL E :-)

    sawmpuia - South Park chu ka la en pek miah lo, eng lam nge ni?

    Ralkhat atang hian kan ziak ringawt ang a, kan vei ber kan Mizoram hi kan hlamchhiah leh si ang tih chu hlauhawm fu ni...

    illusionaire - shh!!! .. tih chhan ka nei miah lo ania.. :D

    Nia, Blog hi Pathian thu thehdarh nan a tha viau, a then chuan FB pawh an hmang tangkai bawk. Nitin Bible chang an thawn chhuak a, a tha khawp mai.

    kan hman thiam dan azir tih chu a dik reng...

    EPISTEMOLOGY - nang pawn i hmang tangkai ve maw, i blog pawh ka rawn visit, i thu khel a theuneu lo khawp mai..

    ReplyDelete
  18. Hello, i dam thin maw?? FB ah hian account chu ka hawng ve ngei, mahse ka khawih zui peih lem lo...a chhan pawh ka hre chuang law...blog pawh hi ka update peih thlawt lo...ka internet thlarau a chau hrih aniang... :D

    ReplyDelete

Followers