Wednesday, January 6, 2010

Titi phungleng...

Vawiin ni 6 January 2010, a lo ni vung tawh mai, Lungpho nu pakhat tawng sual hrat pawh a fapa che muang lutuk a hau ve a, "Rintluang, i muang lutuk, i thiante an ding liam zo vek tawh" a ti chiam mai a ni awm e. Kei pawh ka lo muang lutuk a, ka uphuk lungmuan a ni mai thei, thiante hnungah kawl ek kan thai ang tih a hlauhawm, Kuminah ka blog ka update tawh emaw ka tia, ka lo update der si lo a, vawiin hian ka hrechhuak ve chiah a ni.

Sesawng Corps-ah CO-a ka awm laiin thalai ho-in inhlawh nan mi hlo kan thlo a, I thlo ve thiam dawn em ni min ti min ti fahran a, ka thiam ve chiang mai si a, ka naupan lai pawn ka nu ka pui a, hlo te chu ka thlo fo a, ka thiam ve lutuk tlat ka ti a, an zingah chuan ka bung ve, an thiam dan leh ka thiam dan a in ang ta lo tawp mai, min nawr min nawr a, tawlh rawh an ti reng mai bawk nen, mahni tawka hmazawn thlo et et thin, hlo thlo thiam inti ve tan chuan a hahthlak ta khawp mai a, tan a ngai reng mai bawk si, kan innawr ut ut mai a, hei ngei hi a nih hi kan hmanlai upa ten, "Lâwmte u, sir sawn phei r'u" an lo tih chu ni tiin ka ngaihtuah a, sir chu ka sawn ve ta ruak ruak zel a.

Chhun chawfak a lo hun dawn chuan tlangval chak deuh pakhat hian kan hmalam chu a rawn pal buan buan a, kan hmazawn chu a rawn rit deuh hlawih hlawih a, chawfaka kan chawlh hma-a kan hlen tur chin, Hma a rawn tar a ni tih an lo hrethiam nghal mai, chumi kan han thlen chuan kan chawl ta a. Chawfak zawha bun leh chu a huphurhawm duh kher mai, chuvang chu a niang, "Chawhnu bun hi awm lo se chuan mitthi pawh an lo tho leh duh ang" an ti thin.

Chhuanlam tur han nat chhin eih pawh ka neih loh avangin chawhnu chu ka bung ve leh ta poh a, chau hnepin nitla vanvuaiin ka thawk ve ta erh a, hlim erawh kan hlim tlang khawp mai, kan hlawh teuh bawk nen.

Ka nu hian kan lehkha zir lai hian hlo thlawh leh lehkha zir hi a tehkhin awl lo, "Lo neitu pawh hlo a thlawh taihmak loh chuan kham khawp a thar thei lo ang bawkin in zirlai in zir that loh chuan kum tawpah in pass lo ang," a ti thin, a tehkhin thiam ve dan a ni a, a in ang hle mai bawk, mahni thawh rah seng theuh theuh.

Kum tharah rilru tharin, ngaihtuahna thar nen, ruahmanna thar leh inhlanna thar nen kan ti thin a, kum a thar a, danglamna erawh a awm lo, kum kalta a kan ni hman ang tho kha a bul atangin kan chhiar a ni lek fang a, a number a dang a, kan kum pawh a pun belh a, kan upa leh ta sawt tih mai a ni.

Chuti a nih chuan kumthara inhlan thar pawh awmzia a awm lem lo a nih chu mawle, pawimawh ta ber zawk chu Vawiin hi a lo ni e, vawiin zel hi Pathian duh danin hmang ila, inhlan tharin rilru thar nen, tawngtaiin kan hma-a awm, kan HMA TAR Krista lam enin, tiam chin lam chu pan zel a, sirsawna pheilai khai tur kan lo ni e.. Chu hmatiam chu kan hlen hun chuan Lallukhum hlu chu kan chang dawn si a.

Chhiartu zawng zawngte kumthar 2010 chibai vek ule, Nitin Lalpa Nen i ti ang u hmiang maw...

23 comments:

  1. Hunte an inher liam zel a,
    Aw ka thlarau inpeih thuai la,
    Chu chatuan ralthei lovah chuan,
    I tan hmun a la awm e!

    ReplyDelete
  2. capt chu thu leh hla te i thiam in chhiar a nuam ngei mai thil dang te hi khel tel lang chuan i khel thlu zuah tam tawh awm vei nen........nge i lo book fel toh zawk kan hre ve der silo va.
    Kum a lo vei hian kan lo upa sawt a kan kan tha leh zung an lo trhum tial 2 in kan hmel a zur chho zel a .Tumbu te poh an han vui chhuak chho hi chu an vawng trha in a tuai nguk a an rei hnu chuan a khai leng mai an ni trhin ang hian hringnun hi kan hmang ral mai dawn chu a ni si a ti raw

    ReplyDelete
  3. Chawhnu bun peihawm lohna chhante chu maw'm:
    1. Puar lutuk avangin pumin min chhawng
    2. Mut chhuah hun a ni
    3. Ni a sa vawl vawl
    4. Thosi leh vaihmite an pung

    A dik a ni, nitin mai hi A zahngaihna leh hmangaihna vanga malsawmna kan chan a ni.

    ReplyDelete
  4. Baktawng Pu Chawngzika pawh Tuirial ram tha a nei a. Chhuna duhtawka chaw a'n fak hi chuan chawhnua a han bung leh hi a ka atangin a chaw ei kha chhuak zawih2 zel a ni awm e.

    Hlo thlawh da i sawi zawng2 khi keini chuan kan hrethiam vek a, thianpa Zamlova a bangbo awm mang e aw ka lo ti deuh va

    ReplyDelete
  5. @Kiamlova, Puii - Ni e.. :)

    @hmingtea - i ti lawmawm thin e, book fel a awm hlei thei lo a nih hi, Thian tha-ah kan in chhuah zel a... Tumbu chu ni ila, a khaileng ka ni tawh ngei dawn a nih chu.. :-)

    @Thiama - chu chiah chu, chawhnu i bung ve thin ami?

    @Fela - Haha, Pu Chawngzika khi chu chanchin a ngah ngawt mai maw...???? Baktawng ho chu Khawi khua nge in nih? an tih pawn, Baktawng Corps an ti hram zel e an ti.

    Pa Zamlova te chuan Tho kang bak a hria em ni? Hahahaa

    ReplyDelete
  6. I titi phungleng leh i post tur hre lo han indap khawm vel hi a ngaihnawm za ber a nih thin hi a...

    ReplyDelete
  7. @ Manipurah chuan lo an kai thin zawk.

    ReplyDelete
  8. Lehkhabu tangkai tak i ziak thei ngei ngei ang. Han ti zel teh....

    ReplyDelete
  9. @Zaia - chutia maw thin le a... Zoawi lam chu enge chanchin?

    QAlejendro - Chibai le, al tak hian bai tlawrh thin ila ni mai lawm.. :)

    @Fela - Lo Kai chu a va mak awm dawr dawr ve...

    @Boiha - Lehkhabu ziahte chu mang lamah pawh ka la hmu lo, i ti lawmawm re re, Mas te hmang nuam bawk maw?

    ReplyDelete
  10. I va decorate thiam lulai em! Vawi hnih ngawt ka'n chhiar chhuah phah hial tak chu le!

    Thu thiama ka hriat ve ST Dula pawhin ngaihnawm a ti thlawt ang!

    ReplyDelete
  11. Hotunu Kumthar Chibai phawt.

    I ziak tha hle mai chhiar a nuam bawk.

    ReplyDelete
  12. I thingpui min lum a tui em a... kumthar chibai nawn i phu ka ti deuh a....hahaha

    ReplyDelete
  13. Kumthar chibai le! Engtik emaw chu ni lum la ai ho i la, i titi phungleng la ngaithla i la a thain ka ring ta! Ni e, 'tun' leh 'vawiin' zel hi a lo pawimawh a ni e. Hei tunah pawh ni 9 a lo ni leh vung tawh!

    ReplyDelete
  14. @VaiVa - Nang pawh le.. :)

    @chawnghilh - I va ti lawmawm ve aw.. mi cho phur dan i thiam thin a, keini te lai lai hi kan lo phur hurh thin a nih hi...

    ST Dula i hria a ni maw? Tunah Guwahati-ah a awm asin..

    @Irene - Chibai le, nangni in lo len hian kan phuisui sawt thin zu nia, i lokal leh hun chuan chaw te pawh i ei law law tawh ang chu hahaha

    @Faka - Kumthar chibai. Nilum chu kan la ai ho ngei dawn nia, i rin ang hi ka lo ni lo ang a, i khabe liam chang hian ka lo dak fan reng zawk mai ang tih ka hlau hlel lo!!!

    ReplyDelete
  15. captain i ti tha khawp alawm hnathawh na a in tel ve hrim hrim chu..kei chu hah lam ai chuan ka ti khat ve ta deuh aniang in bul huan sam mai mai pawh rei lo te ah ka kut a durh nghal zel mai a..buaithlak tak ani..naupan lai a kan tih ve nasat thin teh lul nen..vairampur a awm chu kan lo ti khat ta deuh aniang..mahse kut hnathawh chu rilru a ti hlim chu ka la ti fan!

    ReplyDelete
  16. A tha thin dap dap e. I hriatrengna hi a tha hle mai. Kilkhawr te te hi i khawrh fai kelh zel a. Thu khekrek tak tak fawm khawmin nalh rem takin i chuktuah khawm thiam si.

    Thianpa Fela ngaih ang ngawt chu ka ni lo mai thei.Lo nei mi kan ni a, ka pu hi Zopa deuh mai a ni. Manipur lam sawi dan takin leipui nei lo chuan kum khat mah a awm ngai lo. Bal, fanghma, hmazil, dawnfawh, theipui etc. awm hunlai chuan kan hnianghnar thei khawp. Kut hnathawh hi ka chemkalna chu a ni hauh lo. Mau put, hnanghlai thiam loh vang mai chuan hlo thlawh thiam loh tur a awm lo ve.

    Lei let lovin- lo chu kan kai thin ngei alawm, Manipurah chuan. Thokang te i sawi a Dini- Phanat pawh i hre rawk em ni?

    ReplyDelete
  17. @dula - ania sin, hna han tawh hi chuan chaw ei te hi a tui suah mai nia :-) kei pawh ka kut chu a durh nasa khawp, ka sawi lo mai mai...

    @ZL - i ti lawmawm thei ngei mai, ka hriat reng awm chhun ka ziak a nih hi..

    Phanat chu nang bawkin min hrilhfiah loh chuan hre pek lo tawp mai..:)

    ReplyDelete
  18. @capt ,Maj ST Dula kha football khelh trhin lai chuan FP a nuam teh a nia a pet pum pum zel mai maw le .Ghty ah Sa ho in hmun an nei ve toh e lo .Ka zir ve lai chuan pres hnuaiah Mizo kohhran ti in Ban bazar ah Baptis biakin ah kan in khawm ho mai zel trhin.ka awm kum hian pastor an rawn dah nghe 2 .Tin an biakin sakna tur hnatlang vawi khatna ah poh ka tel ve .ghty radio station hmun kan sam dirc Simson awm lai in.

    Capt chu Hmel trha pikpuak bawk,fel bawk thu leh hla thiam bawk ti ti thiam bawk nula ni bawk comment tu i hai chham lo ve hahahahah

    ReplyDelete
  19. Phanat=slipper- thelret pheikhawk (a pum ni lo).

    ReplyDelete
  20. @hmingtea - Guwahati-ah chuan hmun kan nei thar ve tawh a, Free Feeding Programme pawh kan kalpui reng tawh alawm.. Major ST Dula hotupa berah a tang nghe nghe..

    @ZL - thank you, ka rin loh lam daih a ni mai ka ti.. rannung lam pang hming ni turah ka lo ngai asin !!!

    ReplyDelete
  21. Gauhaty ah FREE FEEDING maw in free feed seng dawn emni le?!!!!!Kut dawh ei tur nei lo an tam zia kha maw.Zoram lam ah poh free feeding tih na khawp eitur nei lo an awm tho lo maw .Zoram lam thawhlawm te kha ani leh awm sia in free feed na tur sum te poh ram rethei kan nih khi maw

    ReplyDelete

Followers