Wednesday, January 20, 2010

Tapzawl ti ti

Hmanlai chuan meilum ai pahin tapchhak zawlah ti ti an sep thin a, upa deuhte chuan khupa puan suih ngeiin an han thu awn ang diai duai a, an vanglaia an Sai ram chhuah thu-te, Maumual ram neih kuma Savawm ninhlei zia leh an kah dante leh an tlangval laia an luck ziate leh an lâwmte chanchin an sep rawtui viau thin a ni awm e, tunlaiah chuan tapchhak hria pawh kan awm tawh hmel loh e, lungthu la hmu lo thangthar zingah tam tak an awm ang a, Dawhthleng phei chu enge a nih pawh an hre kher lo ang a, tungchaw hi engtinnge an siam sawi thei kan vang viau tawhin ka ring. Thehlan te phei chu rannung hming emaw an ti hlawm mai thei a ni.

Hetia thupui hlapui vai lem lo-a thu sawprawp sawi ngaihthlak mai mai hi nuam ka tiin pi leh pu-te ti ti kotlangah chilthli far dawn dawnin ka lo dak vauh vauh thin. He tapchhak zawl ti ti mai mai tlak lek hi ania tun tumah pawh hian han sawi ka tum ni.

Hla hre sual - Vawi khat chu kan office bang motor-a kan chuan laiin ka thiannu pakhat hi hmm hmmm-in a zai a, a tawpah chuan "Michael Jackson hian a hla phuahah hian engatinge Spanish a telh le, naupang tam tak nen an sak vang em maw ni le.?" a rawn ti chhuak hlawl a, midang chuan "enge spanish chu" an ti, "Hei he hla hi mawle" tiin hla pakhat chu a han sa rat rat a, "Heta Fiesta tih hi mawle, Spanish a ang ka ti riau a" a ti a.

Midang chuan "Fiesta tih chu spanish ni awm tak a ni, portuguese chuan Festa kan ti awm sia"an ti, a tirin an thusawi chu ka man mai lo a, spanish a ni em, ni lo em tia an ngaihtuahna lamah "Captain, he hla hi i hria em?" tiin min zawt a,"Enge ni, han sa leh teh"ka ti a, a han sa leh chu dan rual lohin ka nuih chu a za ta em em mai a, "He hla-ah hian Fiesta tih a tel hleinem, Entire tih alawm"ka ti a, kan thiannu chuan "Ka fanu Irene hian a sa thin a, Fiesta hi a ti mai thin a, inah pawh han sa teh ka ti mah ang a, a sa leh mai ang" a ti a, kan nui nasa kher mai. Inah chuan Irene chu kan han saktir ta ngei a, ani pawh chuan Fiesta chu a rawn ti ta lauh lauh a, nuihza tak chungin a hla pumpui chu ka ziah chhuahsak ta nge nge a.

A hla chu Michael Jackson-a hla "Heal the World" tih kha a ni a, han sa chhin teh mah.. Heal the World, make it a better place, for you and for me and FIESTA...

Kawng bo - Chawlhni vawi khat chu thiante nen Beach-ah kal ang kan ti, ka thiante hi Zimbabwe lam mi an ni a, kawng an hre chiang lo, "Kawng i hria em"min ti a, a hriat theih mai ang, Shopping Centre kal dan i thiam chuan ta tang chuan kan kal dawn nia ka ti a, thiannu pakhat motorin kan kal a,kawng chu ka hrilh zel a. Kal lam chu kan tluang viau. Rin aiin kan awm rei, kan haw tan tih chuan khua a thim tan ta mai. Kawng chung lamah haw mai ang tiin ka pentir a, turn left, right tiin ka sawi lauh lauh, khawpui chhung luhna tur kan thleng, turn left turah Straight ka'n ti palh mai chu kan kal lohna lam turah kan tlan ta vauh vauh a, thiannu chuan kan bo em ni, hei khawilai nge a ti, kei lah chuan, ka hre tawh lo, ka ti si, bo mai a hlauhawm, thlan a tla bat mai, nachina turn awm hmasa berah khan straight lo-a left turn tur ania, Polana lamah khan kal tur zawk a ni ka ti leh, U turn-na tur a awm mai si lo, block thum vel lai kan tlan hnu-ah kan let leh ta a, nuam lo duh ngei mai, anni lah chuan Adventure a ni mai lawm an ti et a.


13 comments:

  1. thu ziak lam hi i tithei fu tlats. Hman deuh khan chanchinbu thu ka ziakah chuan; "tapchhak theory" tih ka hmang a. Khatih laia ka hmanna tak phei chu, thu belhchian dawl lemlo bawlphuan hluah ka ching thin tih lam deuh a ni.Ka thianpa hian a lo lawm ta viau mai a. Tunah hian lehkhabu ati chhuak dawn a, Tapchhak theory tih hming pu tur a ni. Introduction ka ziak dawn nghe nghe a. I lo chhiar ve ngei dawn nia.

    Tun hnuah tapchhap theory ka hmanna hi ka tizau leh ta viau a, a chhanchu, mizo tan chuan vunvar zirbing miten popular culture a tih ang huang a mi a ni a. Mizo nunah awmzia a neih thuk em avangin tunhnuah chuan, ka hmanna pawh "local discourse" tih angin ka hmang ta thung a ni

    ReplyDelete
  2. Ka Nu te naupan deuh lai pawn Rangoon Radio ah, "I'm a chhaiga, I'm a chhaiga" tiin a sa e an tia, mahse an hriatchian hnuah 'Chhaiga' kha 'Tiger' a lo ni daih a...Lolzzz..Kawngbo tih mai mai te chu, bo hmasak loh chuan kawng kan hre thei hleinem mawle.

    ReplyDelete
  3. LOL Mi hresual ve te.... i rawn zin leh hunah Tapchhak Ti Ti chu kan nei ve dawn a nia.. :-D I rawn zin ve hi i hmanhmawh thei e, biak hman pawh i ni ngailo a... buaithlak..

    ReplyDelete
  4. @EPISTEMOLOGY - Tapchhak Theory chu a va tha ve, in release hunah min rawn hrilh ve la, chhungte chah dan ka lo ngaihtuah ve ngei ang, ka chhiar chak zawng tak a ni mai..

    @chhangte_ll - haha, radio hla sak hriat fuh loh chu sawi dawn ila a tam thei ngawt ang.. kawng pawh hi ka bo fo mai, kawng dik zawk hmuhchhuah leh tho chuan kan hre bel duh khawp asin... :)

    @Alejendro - lo zin leh hunah chuan in hne hlui khawp ka cham tawh ang, chutah khatah chuan min hruai rawh u ka tia'nga Haw tawh rawh in ti sek mai ang, Illusionaire nen khan.. Tapzawl ti ti pawh hne hnawk khawp ka la hlui dawn che u nia :D

    ReplyDelete
  5. I thu ziak hi tawi kim tak hian i ziak a chhiar anuam thin kop mai.

    I bulah live in han ti ti vel pawh chakawm hle mai ka ti...

    ReplyDelete
  6. Ka nau pawhin , "u , hemite hla thu ah hian ngatinge Taj Mahal tih hi an sawi tel kher a?" tih pahin sap zai pakhat hi min ngaihthlak tir a. Kan ngaithla chiang chu... "Touch my heart" tih lai kha Taj Mahal tiin a lo hre ve char2 kha nia. Hriat sual hi chu a dik kan hriat hnuah hian kan theihnghilh har tawh thin khawp.

    ReplyDelete
  7. "Hling lukhum i khum, keiin Lallukhum" tih pawh hi Diakkawn nu pakhat chuan a hresual a, "Hling lukhum i khum, kein Lallukhum" tiin a sa thin a ni awm asin.

    ReplyDelete
  8. I titi a hoh ve theih tehlul nen, i ziah hi chuan a ngaihnawm phian zel mai :-)

    ReplyDelete
  9. Kei bo ka ching khawpa, ka hrethiam a che u. vai ho lah hi han zawt ila, 'Sidha' han kal ila, alo ni leh lem hlei lo va.

    ReplyDelete
  10. Driving direction ka pek reng rengin ... left right straight tih chu thuhran —red light-ah kan ding a nih pawhin, Green-ah hian "Go-able" ka ti mai zel. Sap-ho hian an hrethiam rang chawp ve khawp, tawng hi ka chher belhsak mai zel! Nangni pawhin FIESTAin in thlakthleng tho alawm!

    ReplyDelete
  11. @irene - i ti lawmawm e, engtikah emaw chuan live ngeiin kan la ti ti ang chu mawle... ti raw?

    @Joseph L - hahaha... pa pakhat pawn "Di fuhte"tih kha "Pi Pu-te a ti ami"ti ve nasa mawle...

    @Fela - Ka hre reng kha thu Pitar kha hahaha...

    @Zaia - Ka ti ti a ho i tih loh kha, ka thil ziah hi ho i ti zawk, i sawi let ling.. hehehe

    @daniel - Lal Isua pawh Beram bo ngawt alawm a buaipui le...ti tawh mai ang, bo hi a hlimawm alawm, bo hlen tak tak a awm thei chuang lo.

    @chawnghilh - haha, go-able-a la din vung vung hi a awl ngawt tak asin... kan hriat ang ang hian sa thin ila mi hla tha tak tak hi kan thlaksak hnem thin ngawtin ka ring.

    ReplyDelete
  12. Kan nau pawn a hresual ve deuh a....
    "That tum thei silo, thatna reng neilo kha... Ka Pathian niawm reng ani si..." LOL

    ReplyDelete

Followers