Friday, August 28, 2009

Vaukhanna.

Ka Fanu,

Misualin an sawm che chuan, zawm suh
“Hawh teh, nawm chen tumin i fawr teh ang,
A vang engmah awm lovin damlai par i chen dun ang
Tichuan, kumtluang runlum nuthai atan ka pawm nang che”
Ti-a an sawm che chuan zui suh

I par mawina a thliah hun-ah
Ani, i par zu thlum a dawt zawh hnu-ah chuan
Puan ang hnawlin lunglai a hersan che’nga
Lam ang let tura i koh a, tanpui i dil laiin -
“Zal tura min thlem lai khan
In runsang kai min tiam kha,” ti-a i ngen pawhin
“Thlemsam run sang kaipui ai chuan,
Thliah loh tleitir thaleng dang buan ang pawm nang e,
Tiin a chhang ang che.

Chutih hunah chuan inchhirin ban a pel ang a,
Luaithli nulin ruam tin fang mah la
A sawt tawh lo - "A tlai lu ta,"
Tiin lu an thin khum ang che.

I Thianghlimna leh Zahawmna chu engtika hman tur nge ni??
I Pasal khum laizawlah ngei le…

18 comments:

  1. Va bei nalh thin ve maw le aw!! Heti ang thu thlum vel han chham hi chu a hunlai a awm ngai e.
    I thu chham mi chu i tan pawh a that tho dawn hi maw

    ReplyDelete
  2. Fanu ka ni lo bawk a han ti ve ngawt i la :-) A ropui kher mai le hotunu. Hei lo liama fan te tana thurawn tha... kei hi ka tello tlatin ka inhria a:P

    ReplyDelete
  3. Fanu nei tur angin i in hisap a ni maw? A tha khawp mai. Hla thlan khawm buatsaih la a that dawn hi.

    ReplyDelete
  4. Van nalh mai mai em! Khiti chung khian maw ziakmi ka nilova i la intih tlat! Hotunu, ziakmi i ni..i ni..i ni (hehe)

    ReplyDelete
  5. Essay ziah bakah poetry pawh i('I'ni loin) timi khawp a lawm. Ka han sawisel lawk. Mizo tawnga pronoun 'i' hawrawp liana i ziak thin hi i tum reng vang nge i khawl thluak nei auto-set kha i siam tha hmaih thin? Chhiar a tihrehawm bakah Mizo tawng kalhmang a ni hauh si lo.

    ReplyDelete
  6. Hotunu chuh, inti 'ziakmi' lo vela, thiam hle sia.. bei nalh khawp mai.

    Tun hma kha chuan, 'Inchhirin ban a chen,' kha an ti thin a, thangtharte hi chu kan duhthawh ta a, ban kan pelhtir ta deuh vek mai.

    Ka fanu lehkha chhiar theih hun ami turin ka'n dahtha ang e.. i fanuin engtikah tak chhiar tak ang maw??

    ReplyDelete
  7. *engtikah tak chhiar ang maw?? tih zawk tur :P

    ReplyDelete
  8. "Fanu hnenah tikhian, Fapa neih hunah khitiang bum tur zawng rawh" tikual vel mai mai te hi an awm chawk ange :D

    ReplyDelete
  9. @Fela - Haha, mahni tana chakai khawrh theuh theuh...

    @Vaiva - I tel ve thei tho ania, Fanu i neih hun atan.. :)

    @ZL - In tunu thar tan anih hi.. :(

    @Sekibuhchhuak - I ti lawmawm e. Ni ni ni, ka tan ka tan

    @Thiama - I tidik e, auto-in I hi a inthlak zel a, ka siamtha lem hlei lo a ni e, thatchhiat vang a ni pakhat. Ka siamtha e. Thank you.

    @Zaia - Inti Ziakmi leh Ziakmi lo a awm thei ami? Inchhirin ban a chen chauh hi a tawi ka ti deuh a, ka pelhtir deuh zul a nih hi.

    I fanu chuan a chhiar har awm mange ka ti.. haha.. i lo type sual ve zeuh a ni maw..??

    @chhangte_ll - sual tur mai mai te chuan tumah zirtir an ngai hran hleinem.. an lo sual ve tawp mai alawm... :D

    ReplyDelete
  10. wow wow wow hotunu, you are very ziakthiam over.

    ReplyDelete
  11. @illusionaire - hotupa chu... min bawl chiang mai. Comment chu i siamtha leh ta si na nge???

    ReplyDelete
  12. E khai, neih a hmain i vaukhang nasa khalh khalh hle mai. Neih hunah chuan tlangval bula a thu lai pawh lungtein i vawm ngamin ka ring e.

    ReplyDelete
  13. A tha hle mai. Helai tlar hi a duhawm reuh ltk. Tunali ah chuan fawr hi a tawngkam an hmang uar tawhlo khawp mai.
    “Hawh teh, nawm chen tumin i fawr teh ang,
    A vang engmah awm lovin damlai par i chen dun ang
    Tichuan, kumtluang runlum nuthai atan ka pawm nang che”

    ReplyDelete
  14. van phuah thiam ve awwww....hla ah a nalh ngawt ang, a thu a inspiring bawk si.. ka duh tawp!

    ReplyDelete
  15. @Kiamlova - Hetia sawi lawk zuah zuah hian thunun an harsat phian zel an ti.. hahaha

    @vana - fawr tih chu engin nge an thlak tak? kan tar ta deuh a niang tunlai tawngkam pawh kan hre ta meuh lo keini zawng.. lolzzzz

    @Mimihrahsel - chutia mi, i phuah a tluk ve tep alaw? a thluk chu lo siam la, kan sa dun dawn nia.. Mahse ka zai lai thei khawp a kei hi... :)

    ReplyDelete
  16. Thu zawng i ziak thiam narawh e. Kha lam tawng te i thiam tawh em? I sermon piap piap theih tawh ka ring.Tin, hetiang lam inzirtirna hi chi hrang hrang a tih a tul khawp mai, 'ti suh' tih ngawt hi chu kan zawm thei tawh lo anih hi.

    ReplyDelete
  17. @dr_feelgood - I ti lawmawm e. Kan ram hi Portuguese an hmang, chaw nghei lohna tur khawp chu ka hre ve mai na-a Sentence siam tam a har khawp mai.

    ReplyDelete
  18. Thianpa Zai blog.a i comment ka lo hmu thin a, zanin dar11:30 hian i blog hi ka tawng ve chiah ka va han lawm em! Ka thil zawnna lamah ka hmuh hlauh chu leh.....

    I poetry te khi a nalh reuh lutuk, mahse, thil pakhat 'ah' i dah dawn a pianga (-) a karah i dah kher zel hi a ngai kher em ni? 'ah' hi 'suffix' (Thu hnungbet) a ni a, '-' dah kher hi a ngai lo niin ka hria; hnam dang tawng dawtah kan dah dawn a nih loh chuan......

    Chuan 'Ani' tia ziak zawm hi pronoun a ni a, 'a ni' tih hi chu; engtin nge ni ang aw? Sentence tawpa thusawi/ziak ti changkimtu ti mai ang.

    Ka vawi khatnaah ka rawn huangtau hle mai! Mahse, i blog. hi ka duh reuh lutuk. A hming khi a sap mah mah a, keini ang duang tan chuan hriat a har a lawm

    ReplyDelete

Followers