Wednesday, July 8, 2009

Vawi khatna...

Thil reng reng hi a vawikhatna awm lo chuan tih hlawtlin theih a ni lo a, chu vawikhatna chu a chang chuan a nuam emaw hlimawm viau thei a, thenkhat erawh hrehawm tak, han tih zui a nuam chho leh hlimawm chho a awm a. Tin, thil thenkhat chu a vawikhatna-a hlawhtling lo emaw tha vak lo, han tih nawn hnu-a hlawhtling ta leh tha chho ta te a awm bawk a. Hei vang hi a ni ngei ang, sap ho pawhin - "Thil hlawhtling nghal mah suh se, Bei la, bei nawn rawh.."an lo tih na chhan.

U Nula pahnih ka neih avangin kohhran thalai ah leh YMA-ah hian ka in hmang har khawp mai a, u-te ka ring chawt mai thin a, mitthi an awm pawhin thing ka khawn chuan ka hna zo-ah ka inngai hmiah a, In lama kal enah hian ka en lo thin. Vawi khat chu mitthi ina kal turin thianten min rawn sawm ve, dik tak chuan min sawm ve fo a, ka kal lo leh thin a, hemi tum hi chuan ka Ute pawhin kal ve tawh rawh an ti a, ka puan bih tur puan dum pawh min rawn pe, puan ka la bih ngai si lo, puan bih khera kal ngai hian min ti chak lo tel bawk a, kal tum lem lo-in ka thu reng a, kal a hun ta, ka che chang si lo chu kan thianpa pakhat chuan, “Tun bak chu ka sawm tawh lo ang che, I zah loh chuan lo kal suh,” min ti a, ka zak deuh a niang peihlo zetin ka zi chhuak ve ta hram a, puan lah chu ka bih nghet thei na hek lo, ka pen apiang hian a dul zel mai a, ka kawngah chuan ka hum khawm reng mai a, min ti chhangchhe khawp mai.

Mitthi in kan thleng a, mi an lo tam tawh, kan lut ve chu khuangpu hnung langsar tak mai-ah chuan thutna a lo awl, kan han inzep ve, keimah ber kha langsar ta viau hian ka inhre tlat mai a, mi lo thute chu a mal te te in han intawk ila ka zah bik dawn loh nen a huho-a an han thut tak hmurah chuan an zahawm ta em em vek mai a, khatih hun lai khan tuna ka zahtheihlohna zatve tal hi lo nei tawh ila zia deuh tur hi a ni na ale, a ni chai si lo.

Thutna chu kan tawlh kan tawlh a, a tawpah ruang bul hnaite-ah chuan kan thu ta lurh mai, keima biang ngei pawh chu ka hmu phe hlurh hlurh mai. Kan han zai a, zai rin tur nge zai zawih tur pawh ka hrethiam lo, mi mitthi in kal tirten,"Ka zak lutuk a, zai pawh ka zai ngam lo,”an tihte chu ka hre ve ang lawi si a, zah thupna tha ber chu zai deuh vak kha ni maiin ka hria a, hla lah chu ka thiam nasa mai si, zak lo awm takin ka zai ta peng peng a, duh aiin ka zai ring ta mah mahin ka hre nghe nghe. Ka kalpuite chuan I zai ring lutuk min ti a, ka zai loh chuan ngawi reng suh, zai rawh min ti bawk si, an va han sual tak em ve aw… Min bawl tel deuh bawk a ni.

Thingpui sem pawh chu in ngei ngei tur an ti leh pek a, chak lo chung chungin ka han in ve a, a hang a lo ni zui… eng emaw ti ti chuan kan tlingtla ta hram a, ka thil vawikhat tihna-a ka zah ber a ni hial mai thei a ni.

A hnu-ah chuan ka ngaihtuah a, ka u Zaui hnenah, “Mithi in han kal ringawt mai chu aw, a felthlak mang e..” ka ti ta ringawt a, ani lah chuan, “A felthlak tih nachang I hriat chuan I puitling ve tawh tihna a nih chu” min tihsan et a.

15 comments:

  1. Thuziah hi i chem kalna anih ve hi mawle. A ngaihnawm hle mai. Zahna hi ka tawng hnem tawha, ngaiah ka la nei thei hleklo mai. Hnâr hi kan hmu leh lawrh lawrh thin, vun hi han ti chhah phawt ila ani mai e. Ruang bula thut chu a hreawm duh viau ang a !!!

    ReplyDelete
  2. chhangte_ll -
    chhungte ni lo ruang bula thut chu nuamlo khawp mai, tah a chhuak chai si lo a...

    Kum hian a chal delh tawh hrim a, tunah chuan zak chung chung pawh zak lo awmin a awm theih tawh a, mahse zah hi ngaia neih a har alawm ni e...

    ReplyDelete
  3. A vawikhatna na na na hi chu kan khawr trut zel alawm le. Zah hi chu a bo tak tak thei lo, chetchhiatna lah hi ka hlimthla ni awm tak hian min zui ziah a! Ziak tha lehpek khawp mai. Hmeichhia hi puan bih hi an khawr duh tak tak nia mawle...

    ReplyDelete
  4. Vawikhatna nge nge! Thlan ka vawi khat laihna ah val upa hoin Lei Randa la turin min tir a. Inti fel zetin ka tho ve nalh a. Kudam ka han thleng a, Lei Randa awm zia chu ka hre ta hauh lo mai a. Engmah la lo alet leh chu ka hreh ve si a. Suah dur chhe zet mai lo intung chu ka pu liam ve ta a. A hmun ka zuk thleng chu min lo nuih nasa ngei mai! Ka zak ve khawp mai.

    Ziak tha thei khawp mai. Mahse hotunu, thil pakhat, coma hi i hmang uar lutuk tep a ni. Thaw a chham mai dawn a lawm. Tawpna leh makna te tel thei se la. Sentence pum a thui mah mah tep ani! Me think :P

    ReplyDelete
  5. Thil kan vawikhat tawn/tihna chanchin hi han sawi ta theuh i la, a ngaihnawm thei khawpin ka ring. Tun thlenga ka la theihnghilh theih loh, ka thiltih vawikhatna pakhat chu thihna chungchangah tho a nia. Mahse ka sawi lo zawk teh ang:) Ngaihnawm viau zel mai...

    ReplyDelete
  6. Ka thlalak footer pic-a i dah avangin ka ron komen ve e :)
    SAY, Bazar Corps site-te kan hriat phah leh zel bok a....kan hlawk haw hle :)

    ReplyDelete
  7. Vawikhatna hi chu a har vek a lawm... khuangpu hnunga thut i hreh ang mai khian, vawikhatnaah hi chuan "self conscious" hi kan nei nasa hle a, midangin min hmu, min en, ka zak, etc hi rilru ah a rawn lut chur chur mai a lawm.

    Mahse tui hleuh pawh ka zir ang tho khan (pawl 8 vel kan nih khan ka thianten an thiam vek tawh a, kei pawn ka thiama, mahse "deep end" lamah ka la cheng ngamlova, chuan vawikhat chu diving board sang tawk mai atangin ka dive lut tawp maia, without any hesitation. Ka thiam nghal!) Kha ta tang kha chuan thil ka hesitate tawh ngailo. Tih pawp a ni mai. Kan inthlahrung etc vel chuan kan loss a ni mai.

    @ VaiVa: Coma a hmang uar bawk lova, chuan comma pawh a hmang uar lo. i com vang mai khan...

    ReplyDelete
  8. Vawikhat kalnaa ruang bula han thut chu, a nuam lo hle ang tih ka hrethiam.

    Tleirawl laia, tlai deuh hleka luh a, thutna dang zawng zawng an lo luah khat vek tawh, khuangpu ep chiahah a lo la awl, kan han thu a, kan han tawngtai zo va. Kan khup leh khuang insi lek lekin, kan han hawichhuak chiah kha chu, mit zawng zawngin min en ta emaw tih mai tur kha a ni thin!

    KTP Fellowship ka hruai hmasak berin, In chep zetah a ni a. Keimah chiahin, mipui epin min thuttir a; ka va khur nasa tak! Zak lo awm taka 'zai peng peng' chu ka harsat khawp mai kei! Nang chu, hei, a vawikhatnaah pawh i chetha phian mai. I ziak ngaihnawmin, a hun laia i awmdan turte min chhuttir thei hial lehnghal..

    ReplyDelete
  9. Joseph L -
    Han chet chhiat rap rap hian a hnu-a sawi tur leh nuih tur hi a ti tam a, tha ve lawm, puan bih hi ni e, thiam a har khawp mai, tunah chuan a nghet ve viau tawh e.

    Vaiva -
    Tehee.. thlan lai tir hi an sawisa ve chawk asin, Valupa ho hian. Mitthi ruang an teh tir lo che chu i vannei a nih chu.
    Coma hi ni e, ka lo hmang hnem mawlh mawlh hle mai, tih leh hun chuan i thusawi hi ka lo vawng reng nang e....

    faka -
    han sawi ve reng reng la, ka lo ngaithla ve ang e...

    A_es -
    E khai, i thlalak a lo ni maw? khawiah emawni ka chhar a, nalh ka ti em a, ka dah ve thruai a nih hi.... i thlalak dang pawh a nalh hlawm khawp mai.
    Lo leng ziah rawh khai.

    illusionaire -
    hehehe, mi-in min en vek emaw kan han ti ringawt a, a lo ni teuh si lo a... Kei pawh tunah chuan zah bawm a keh ve laklawh tawh a, kan zaklo awm ve hmiah thei tawh alawm.. :)

    Zaia -
    ni teh reng e. mipa-te hi chu in thu kun ngun a, zah leh zah loh pawh a hriat vak loh alawm. Fellowship ka hruai hmasak berin kei pawh ka pawnfen tlang a phe nasa hle.....

    ReplyDelete
  10. Thingtlangah chuan hmeichhia hian naupan lai atangin puan bih an zir a, an nulat chuan an thiam nghal zel mai asin. Tlangval khawhar Ina nula hruai lut ve, thutna awl an hmuh hmasakbera anmahni thu chut a; an hruaite ngaihsak miah lo ka hmuh hian ka nuih a lo za thin. Mipa pawh hi an zak ve tho alawm.

    ReplyDelete
  11. Captain, i blog hi ka comment thei lo renga. Hei proxy tlema tha deuh ka hmanga, a theih tawh ang chu maw.

    Chinese thufing chuan, Melsang tam tak kal tum chuan pen khata bul tan a ngai an ti a. A dik viau mai. Ngaihnawm e.

    ReplyDelete
  12. Kiamlova & Puii -
    Mipa pawh in lo zak ve tho a ni maw...??? Thingtlangah zir kher lo mah ila Puan bih chu ka thiam lutuk tawh e... tih than a thu a ni mai..

    Sekibuhchhuak -
    E khai, hotupa chu i rawn lang ve leh hlawl maw? Min do ta mai emaw kan lo ti hman alawm le... i comment theih loh zinga ka blog a lo tel hlauh chu pawi ka ti hle mai, tunah zawng kan kim leh ta..

    ReplyDelete
  13. Mipa nih vanga zah loh ngawt thu awm bik suh. Tun thleng hian ka zahzum hi a la reh lo va, mahse, 'ka zak lo' thei ta deuh hlek chauh a ni.

    ReplyDelete
  14. Tun ang hun hi chu nise chu zak map lovin i zai nui vur2 awm sia :)

    ReplyDelete
  15. Fela -
    E khai, mipa-te chu zah tawrh in chak deuh ang chu ka ti asin..

    Geminiboyz -
    chu chiah, i ti dik mai thei, mahse zahna hi chu a lokal leh thin a nih hi.. :)

    ReplyDelete

Followers