Thursday, July 2, 2009

Furpui khawcheng...

Mizote’n sik leh sa hunpui kan then danah hian Nipui, Thlasik, Fur leh Thal kan ti a, heng zingah hian tu pawh mai hian Fur hi kan ankhum hnem ber mai awm asin.

Khawlaiah naupang an infiamin an ri chel chul a, Ui leh Ar-te pawh an tla sap sap mai, thawklehkhatah Van chu a rawn dum ta khuih a, chhum dum a rawn inzial tup tup a, Kawl a phe-in tek a tla a, khawpui a ri dur dur mai bawk, ruahthimpui a sur ngei dawn a nih hi tiin Nu chuan a fate khawlai leng chu haw hmanhmawh turin a au chul a, khawlaiah chuan thliin vaivut a len chum chum a, ruah a la sur tel loh avangin vaivut zingah chuan hnahthel leh bawlhhlawh dang a leng chum chum mai bawk.

Ran neiin an ran an ngaihven a, Arpui no hruai lawi tha duh lo neih phei chuan thin a rim tuk mai thin. Vawkte pawh an awm hmunah Ruahthimpui a lo thawk dawn ti niawm takin an nguk hrut hrut a. Ral khatah chuan Nu-in a fate a au lawng lawng a, Kelte pawh an be el el a, Bawng a lo bu ul ul bawk. Ruah sur chhungin inchhung a lum nuam lo palh ang tih hlau-in Nu chuan rapchungah chuan thing a ha mawlh mawlh a.

Ruah mal lian pui pui chu a rawn tla tan ta phuar phuar mai, hmanhmawh takin in tin chuan an kawngka an kalh nghet sauh sauh a, mahni in theuhah an tawmim ta diak a. Khawlai chu ruah chuan a ti huh tan ta a, kar lovah namen lo-in a rawn haw ta.

Zaleng naunawn run in chhungah
Taptual mawiin tuahmei an kil
Runlum nuthai hraileng awiin
Zate’n an bel kaina run nuam

He hun hi tu tan nge hrehawm ber thin ang le..

Khawlaiah chuan tuihawk a luang ta dum dum a, kal hleihtheih pawh a ni ta lo. Hetih lai hian thenkhat chuan natna tuarin khum an bel a, thawhah vei tan phei chuan natna a ti zualkai duh viau ang -

Awmlai vei laikhum bel tan zawng,
A sei a har tlaini len chu
Lamtluang zau-ah hawktui luang del
Laitual len zawng a har mang e

Hetih hun lai hian hmeichhia chu a awm mai mai ngai chuang lo a, inchhung sekrek khawih tur a la zawng hram thin a nih chu-

Lanu sekrek khawih bang ngai lo
Tahpuan khawn lai a rel ta e

Kei chu hetiang Furpui khawchen lai hian ka lung zu leng tlat thin a!!!!

16 comments:

  1. Chenna in tetakte a naupang ri chelchul, pâ ber lengkhawthawng theiloa tum buai reng, nû ber hnathawh âm, leh natna avanga chawhl hahdam duh han awmkhawm chu a ninawm duh ngawt ang. Khua lo duai bawk nen, thawmhnaw a lo ro vat theilo anga inchhung lo in zam hnawknuaih karah chuan rilrua pawh a hnual duh ngawt ang chu.

    Ruah hi Chhimlam ah chuan 'T(r)O' an ti.

    Furpui khawchen lai hian ka lung a kuailo tlat, chhimbâl erawhchu mawi ka ti hle thung si; a chhan chu thawnthubu chhiar nân a remchang em ani.

    ReplyDelete
  2. Post leh chu Lunglen tih rawn thawh la! A ngaihnawm thei khawp mai. Mizotawng i thiam ka lo ti khawp mai.

    Kei pawh kan rangva inchung ngei mai a TO ruah haw tur mal rawn tla koh koh ngaih thlak pah a, khuma muchunga lehkhabu han keu paha ngaihtuahna kawm mai mai kha ka chak kher mai!

    ReplyDelete
  3. Tha hle mai. Double adverb pawh i rawn hmang (lui) nalh thiam hle (tup tup, dur dur, chum chum, hrut hrut, lawng lawng, el el, ul ul, mawlh mawlh, phuar phuar, sauh suh, dum dum). Vawk hi an nguk hrut hrut ngai em tih erawh ka inzawt mek. Nguk hruih hruih pahin, an tawlh hrut hrut zawk em le? tih ka ngaihtuah...

    ReplyDelete
  4. A ngaihnawm hle mai. Kan vengah ruah a sur mek leh nghal a! Khua a chen cherh cherh lai hi chuan di Inah han awm ngei i la, rizai hnuaiah inthawlh thak i la, mu miah miah mai i la a nuam berin ka ring!

    ReplyDelete
  5. Awww... fur hi tawngkam ninawm ber ni se ka va ti em!! Heti lamah chuan nipui tih tawngkam pawh hian khua a ti lum nghal. Ziak thiam thin khawp mai

    ReplyDelete
  6. Ni e, khang hun lai thil pahat kahriat reng chu Pa an in chung thliin a la ang tih hlauva Hang kenga in chungan an tlan lawn han phuar mawlh mawlh thin kha a ni.

    Dini, I pi ( I nu nu) in vankohna a chhang tih kan hriatin kan tuarpui che a, Mahse lalpan a awmpui ang che tih kan hria, kan lo tawngtaisak a che. I chungte nen in inbiak theih ka beisei. Hei hi Missionary te chanpual pakhat a ni, awm loh hlana inkalsan fo mai hi. Mahse keimahnin kan pekkir si loh avangin aman a duh hunah a seng mai thin si a. Engtihngaihna a awm love. lalpa thlamuanna dilin kan tawngtaisak a che.

    I mail dang ka en hman lova hei hi ka rawn hmang tangkai ve mai a nih hi aw. Mizo inkhawmah kan kal dawn vawiin atang hian Salvation army Biak In Balham corps ah kan inkhawm tan dawn a.

    ReplyDelete
  7. chhangte_ll-
    khitiang nuai nuai-ah chuan dam reng tan pawh damloh mai a awl phianin ka ring kei pawh..

    Tro a haw tiin an sawi ve fo mai ni e...

    Chhimbak maw thawnthubu chhiar nan remchang i tih? han sawifiah leh deuh teh..

    Vaiva-
    Lunglen tih hi chu thuthiam deuh ziah atan ka khek mai ang, keini ziah ve zawngin Lunglen a nawt tiau zo zawk ang tih a hlauhawm e a...

    Hehehe.. ruah a sur hi chuan nghawng thleng2 hian rizai hi khamphei zawngin han dai ila, lehkhabu chhiar ila, mutthilhsan leh ila... ti raw

    Zaia -
    Double adverb hi a then chu nia ka han tilui deuh a nih khi.. thil hi i man chak lutuk a, i hlauhawm dawn riauin ka hre ta mai .. :)

    Vawk hi engtin pawn lo nguk se, kei chuan Nguk hrut hrut ka ti thau thau... ahaha

    faka -
    Nia, thil nuam pakhat ve chu sikri ai bial lat ila, puakzo han kang puak pep pep ila... thingpui sen hang leh kurtai nen...

    Joseph L -
    Keini lam pawh khua chu a lum ve tho, ruah kan hmu tam bik chuang lo, Zoram lam an dawn that lai a nih hmel em a...

    Kiamlova & Puii -
    Chu chu thil awm thei a ni ve tho mai.

    ** Nia, ka chhungte nen chuan kan inbia a, helama kan hotute pawh an lo leng a, tawngtaina te pawh an rawn nei, nimin khan Biakin-ah an puang a, kan tawngtai bawk a, ka khawhar lutuk lo e, in lama awm nen chuan a dan erawh a dang deuh. Min lo tawngtaipui leh tawrhpuinate avangin ka lawm e.

    Langtlang mail ka receive ta lo vang vang a, enge a chhan ka hre lo, Lotus kan access thei bawk si lo, server IHQ-ah kan thawn mek. Pi Heleni mail chiah ka hmu a, Yahoo atangin, midang ho khan ka ID in ti tel ta lo nge, han en chiang teh u'n.

    ReplyDelete
  8. Fur laia zih hi hrehawm ka ti kei chu... Lung tileng tawk chauhva ruah sur chang a awm a, ninawm leh bengchheng khawpa sur chang pawh a nei niin ka hria. I ziak ngaihnawm thei khawp mai, a puitu tura hlathu i rawn zep thin hian a ti ngaihnawm zual.I thuziah dahkhawmna Lehkhabu siam la a that dawn hi, hralh a tla phian ang

    ReplyDelete
  9. Ka sawisual anih khi. Chhimbâl chu mawi ka tih rualin fur khawchen hian ka lung a kuailo ka tihna anih khi, mahse he fur lai hian thawnthubu chhiar a nuam thung (Lenkhawthawn theih ta lo chu le).

    ReplyDelete
  10. Fur laiin mizo tapchhak pangngaiah meilum aiin thu bawr taih ila. Puakzote kangin, savun (sial vun ni nghe nghe sela) rawh puak ila, thingpui sen hang nen inkawm khawm pahin in mai mai ila, nuam ve tak a ni.

    ReplyDelete
  11. Geminiboyz -
    Nia, fur laia zin chu a hrehawm duh khawp mai, ka hla rawn zeh tel hi ka hre ziktluak lo a, ka hriat lai lai ka han telh a ni, zialo khawp mai.

    Lehkhabu siam te chu mang ramah pawh kan la mang phak lo.. hehehe

    chhangte_ll -
    a nih tak chu, ka hrethiam deuh riai ruai tho a, ka han sawi nawn mai mai a ni. Nia, lehkha chhiar nan a remchang alawm.

    Fela -
    i duhthusam ang khi tunlaiah chuan tih a har tawh e, mizo tapchhak pangai hi Thingtlangah pawh a van tawh hmel ka ti...

    ReplyDelete
  12. Ziak tha khawp mai... second para atang khi chuan nihliap ka khum ran mai ka computer hma ah, i ziak ang lutuk a. Ka kawr te a lo huh vel in ka hria.

    ReplyDelete
  13. illusionaire -
    Hahaa... i nihliap khum chu min lo zawn ve...

    I va lo leng khat ve, i tel lo chuan hei sera mu kan thur thei lo a nia..

    ReplyDelete
  14. Ka rawn leng ziah a lawm le... mahse comment tih lamah hian thil sawi hi har kan ti thina... mahse hei kan rawn inzir chho zel e :-)

    ReplyDelete
  15. Ps... please in comment notification han activate teh a, hotunu. :-)

    ReplyDelete
  16. he hla hi Utube ah hiqn dah a awm lo nge ,ka zawng ngual a ka la hmu lo chu ania,a ngaihnawm ka tih tehlul nen

    ReplyDelete

Followers