Friday, May 1, 2009

Kum sawmthum leh....

Lalawithawngpa’n..

Kan lenlai nghil nghiala D kan chhai
Sakhmel chul leh hai ang tar tur Awithangpa’n
Ka dawn khawl lung reng a awi thei lo,

a lo ti mathlawn lo-in, vanglai leh vullai hi chu a lo awm nameuh mai a lo ni.

Kan High School kal laiin kan Miss, kum 30 ral kai fe tawh hian, “In kumin ka kum hi sem teh u, a vawi engemawzat a chhuak ang,” a ti fo thin. Keini High School kai tantir, kum 13 emaw lek tan kha chuan sem tham feee hi a ni lah tak a, khatih lai khan amah kha kan hmu senior teng teng khawp a, mi hauh a thiam si, a nu lian si, kan hlau thei hle. “Nitin dawrawn-a phurh tham thu tha kan infah a, sunhlu hnaha fun tham pawh in hawn ngai si lo,” min han ti thin kha a nia. Tunah lah khatiang kum kha kan thleng chho tan der ta mai si.

Pasal nei ni ila, nu valai, nu naupangte tia sawi tur kha, neih miau loh vangin nula dam rei kan ni ta mai mai a. Kumte chu number mai mai ania pung thei alawm tiin han inhnem vel thin mah ila, hmel hian min phatsan tlat tawh, mitko leh hmui hmaiah upa sulhnu a lang tawh tlat alawm. Kum 30 ral han kai meuh hi chuan piancham pawh lawm ai mahin hei chen nula dam chu sunpui ang u tih zawk awm tak hi a ni tawh a. Hetih laia ka lo nin ve em em thin chu, a zo avai, a ngo a hang hian kalna lam apianga ‘Pasal neih I tum em?’ emaw ‘I nei dawn lo em ni,?’ an ti fo fahran hi a ni. Neih tur pawh kan hmu zo ve lo a nih hi tiin han chhang khawmawi ila, min zawnpui inpeih at vek hi an ni a!!!!

Tukin chu ka Birthday a nih vang pawh ni chuang lo-in International Labour Day a nih miau avangin Office kan chawl a, thawh hma ngai lo bawk a, mut kan am teh ang ti-a dar 10 vela thawh tum kha zing dar 4 atangin text message ka dawng tan teh reng a, a lawmawm khawp mai. (Mizoram lamah dar 7:30 ni duai tawh hek lee..) Thenkhatin min rawn call bawk a, ka awmna a hlat tehlul nen, mahriakten piancham ka hmang liam mai dawn emaw tih laiin thian bengvar tak tak, min theihnghilh lotu ka lo nei chu ka lawmna a sang khawp mai, zing hma takah min tiharh mah se ka ngaidam vek.

Kan dam chhung kumte hi Lal Davida chuan kum 70 a ni a, chakna avangin kum 80 pawh a ni thei, mahse a reina chu thawhrimna leh lungngaihna mai a ni a ti a, dam chhung ni chen viau ni-a inngaite pawhin lungngaihna bawk an seng leh thin. Hei vang tak hian Kan dam chhung ni chhiar dan thiam hi a pawimawh hle a lo ni, thihnate, natnate hi kan ta vek a ni si a, eng ang pawhin kan vanglai chu chen ila, he thihna hi kan tawh vek tur a ni, ka thi dawn lo kan ti ngawt thei lo, thawklehkhatah, thangawk ang phutin a lo thleng mai. Chuvangin Kum engzatpawh dam rawh I, theih tawp chhuahin inchhekarbawm vel mah ila kan tawpna chu thuhmun vek.. Feet 6, feet 3-a phumbo a, chumi hnu-a rorelsaka awm vek tur kan ni. Chu rorelpui hunah chuan thiam kan chang angem tih hi zawhna pawimawh ber chu a lo ni zawk e.

Englekhawle, Pathianin hei leh chen damna leh hriselna tha min pe-a min kaihhruai avang hian a hnena lawmthu sawi chu ka tih makmawh a ni tiin Pathian hnenah lawmthu ka sawi a ni.

(Updated... Ka birthday lawm dan tlem azawng ka'n thailang leh ang e.)

Ka thiannu Margarida-in Cake ka lo ursak ang che a ti a, chawhnu lam dar 2 velah thian dangte nen an inah kan va phei vang vang a, a lo bei tha khawp mai a, Cake lian tawk a lo ur bakah dinner a lo siam tel leh nghal a, puar el euha kan va ei tak kha. Thiannu Celeste-in puanthan nalh deuh min pe leh nghal. Lawm lo em em chu ka ni ta lo e.


21 comments:

  1. Happy Birthday!! Ka ron risk...alo nihloh pon poi chuang lo :)

    Keipawh hi alom, ka chhungte leh thiante aiin helama naute leh thiante hian pasal ka neilo hi min vei zawk.Min zawnsak awt2 lo chauh reng alom mole hehe.

    Mi tam takin birthday hmang thei tawh lova mual min liamsan zut zut karah hian keipawh kumkhat dang hmang leh theia nunna leh chakna minla pe hi lawmthu sawina mawlh2 chhan a tling ka ti thin....kum tam lam chu a engzah pawh lo ni se :)

    ReplyDelete
  2. Damte chuan kumtinin kum zatte chu pung tur a ni alawm, thil lawmawmah ngaih tur a ni, nula nih pawhin. Pa tan pawh kum lo tam zel hi pawi tihna chen chu a awm ve tho, tar kan hnaih tial tial tihna a nih vangin. Mahse, Pathian zarah tar thlengin lo dam ta ila, kum tam ahlel hlel chu ka duh leh lawi si ang. Kum zatah kan duham thar leh ngei ang.

    I pianchamphaphak ka lawmpui a che.

    ReplyDelete
  3. awithangpa lamte i hrut tak mai. Kei, hetiang lamah hian ka ril lo ru tlat !

    ReplyDelete
  4. Happy Birthday... hlim takin i lawm dawn nia... kan lawmpui a che

    ReplyDelete
  5. Happy Belated B'day le.

    Nitin dawrawn-a phurh tham thu tha kan infah a, sunhlu hnaha fun tham pawh in hawn ngai si lo,” min han ti thin kha a nia...Hei hi a tha lutuk.

    ReplyDelete
  6. @Jinx - Birthday chiang e, ka lawm e. Nia chhungte hi chuan ngaih khatah min ngai mai a, midang ho hi an buaithlak thin a ni ti raw...!!!

    @Fela - Ka lawm e. Nia, tar ho hi chuan upat an chak leh tlat thin hi mawle. Tunlai chu in buai awm vut vut hle mai.

    @Dolién - Thank you. Mi rilte thu leh hla sawi chhawng tur mai maite chuan ril vak a ngai hleinem.... :)

    @chhangte_ll - I ti lawmawm e, tlai a awm hleinem. Kan Miss hi thu leh hla ngah zet a ni asin.. !!!

    ReplyDelete
  7. Hmmm. I hman nawm hmel hle mai, ka lawmpui a che. Kan dam rei leh dam rei loh hi, he khawvela kan sulhnu hnutchhiah hian a hril dawn a. He mihring, thi thei hian eng sulhnu hriatreng tlak nge a hnutchhiah tih hi kan ngaihtuah tur ni awm tak a ni. Chu bakah chuan, i sawi ang hian, kan tawpna tur a inang vek a, dam reng ila, mihring hi thi thei lo ila chuan kan inthlau nasa hlawm lutuk ang. Thihna hi min hrutrualtu a ni tihte pawh kan zir thin kha maw..
    Tin, Lalawithangpa hla hi i hre sual nge ka hre dik lo? 'Haiang tar leh sakhmel chul tur..' tih zawk tur emaw ka ti a?

    ReplyDelete
  8. Happy Birthdayyyy Hotunu. Kei pawn ka rawn lawmpui a che. Hemi bak kum sawmthum dang leh te pawh kan la lawm ho zel dawn nia.

    ReplyDelete
  9. "Birthdays are good for you. Statistics show that the people who have the most live the longest." Happy (belated) Birthday!

    ReplyDelete
  10. Happy belated birthday!! A reng reng in birthday te i lo la nei ve a ni maw? A expire vek tawh emaw tih nak alaia (fiamthu) :D

    ReplyDelete
  11. Belated Happy Birthday! Kum 30 nih hi a lo har lo khawp mai. I sawi ang deuh hian rilru hi la young hle mahse taksa hian min phatsan tan tlat mai :) Mahse - age is just a number - ti leh mai ang!

    ReplyDelete
  12. Ekhai, kum 30 ral i lo kai ve ta chu i lawmpui awm hle zawk mai. Mi tamtak thleng pha lo an awm dawn si a..:) Happy B'day le.

    Ka naupan lai khan kei aia upa, ka u rual tur hlir hi ka kawm thin a, chung avang chuan upat kha ka chak em em thin a. Ka kum ka sawi te hian ka piankum hi ka sawi tel talh thin kha a nia. Tunah erawh in ngai upa kher lo mah ila, min ngai upa an awm ve ta nuk.. kan la tlangval dawn chauh emaw tih nak alaiin nupui nei tawh rawh, i hun tawh, ti bawng bawng an awm ta zauh zauh mai. Kan naupang ta bik lo chu a ni phawt..heheh

    I Mizo Tawng hi ka han fak leh ngawt teh ang che. Mizo Tawng ah Sikul kal tih te, Office Kal tih te hi a dik lo va. Mahse a hmangtu kan tam zawk tawh awm e. Office kan KAI a, Sikul pawh kan KAI a. Kawngah erawh kan KAL thin a. Office leh Sikul..etc.. te hi hming lamna neih thlak a nih avangin Sap tawng tak chuan Attend a ni a. Mizo Tawng chuan KAI tih tur a ni a. I hmang dik thlap mai hi i fakawm ngawt mai. JF Laldailova te kha lo tho leh se, an fak ve ngawt che pawhin ka ring..:)

    ReplyDelete
  13. happy birthday..cake nei lian khawp mai..kei chu ka birthday hi vawi khat mah kan lawm awm pawh ka la hre lo heheheh....ka ngaihsak lo ve ang reng aniang..thiante min rawn phone a hriat chhuah chauh chang te pawh ka nei...:))

    ReplyDelete
  14. @Zaia - A thu ka lo rem fuh lo pawh a ni mai thei, dik zawk hre turin lehkhabu rawn tur ka nei si lo a, kei pawh ka chiang ngam chiah lo tawp mai. I ti lawmawm e.

    @illusionaire - Hotupa, i ti lawmawm e, tun atang kum 30 a vei leh meuh chuan TAR dam rei kan lo ni leh tawh ang a,a hlut dan a dang leh ang chu. Kan la lawm ho dial dial thei turah ngai ang aw..

    @faka - Thank you, thank you... better late than never. :)

    @luliana - hahaha... expire tawh hial awma mawi a ni ti raw, tawng leh hmuiphun pawh a la inmil thlap e.. :)

    @Puia - Hotupa, ni e tiraw, mi tam tak thleng pha lo an awm laia dam taka B'day kan la thleng hi chu a lawmawm khawp mai.

    La hmu lo inkhawmpui hi buatsaih ila, hmu lo leh hmu lo hi inpel suau suau mai ila nuam phian lawng maw???

    nangni thu leh hla lama kan miril neihin min han fak a, i ti zahthlak rum rum, tawngkauchheh hi hman sual ka ching khawp mai, ka la inzir zel ania.

    @avena - Nia, ka cake hi a lian asin, kei pawh ka hmuh tirh chuan ka phu zawk!!!

    Mahni in luma awm chuan a hlutna pawh kan ngaihtuah lem lo a, mahni-a han awm takah chuan hriat a lo awl riau mai a lo nih hi. Thiante an lo fel leh zel a, min lawmsak azarah ka khawhar ta lo a nih hi.

    ReplyDelete
  15. Tlai khawhnuah, Happy B'day.Ka hman loh vang a ni e. I cake chu rawn thawn ve tur a lawm le he2

    ReplyDelete
  16. @Geminiboyz - Tlai lem lo e, Cake chu a lian khawp a, kan ei seng si lo a, rawn thawn che ka tum a, i address kha ka chiang ta lo a... haha

    ReplyDelete
  17. B-day rawn thlawh mawi leh hle mai...thiam lo chung chungin i rawn ziaka....mam thazetin a zo leh ta...Engpawhnise lo NULA zel ang che..

    ReplyDelete
  18. Ka zina a huan taka ka rawn Hapi Batday ve hman lo che ani maw! Engpawhnise, Lalpa malsawmna dawngin, a ram tana hlawk zawk a thawk zel turin duhsakna kan hlan ve mauh mai teh ang che!

    I BatDay cake pawh atui hmel hle mai!

    ReplyDelete
  19. @zovala - chembil hnuhma ang maia pawr phing phengin kan ziak a, nangnin in rawn chul mam leh thliam thin a, a lawmawm e. Ni e, lo NULAT tang tang ka lo tum ang e.. :)

    @Sekibuhchhuak - Ka lawm e. Ka b'day cake hi a lian khawp asin.

    I lo zinbo mek a ni maw, chu vang nia thehmeh ang maia i reh veng veng ni, kan lo ngai hman khawp che asin...

    ReplyDelete
  20. A tlai tawh deuh na a ka wish a che. Happy Birthday!
    Nupui pasal nei har deuh emaw nei duh lemlo emaw kan innawr fo hi chu a zialo angreng khawp mai.

    ReplyDelete
  21. @mesjay - i ti lawmawm e. I tlai lo, ka la hmang dawn chauh alawm.

    Nia, nakinah phei chuan tu emaw hi min la pembuhbel chawtin ania ka rin :)

    ReplyDelete

Followers