Thursday, April 9, 2009

Ser Nung..

Mi tupawh hi, "I taksa-ah SER (Scar) i nei em?" tiin zawt ila, pahnih/khat chu kan nei vekin a rinawm, taksa-a ser han neih hi a mawilo duh khawp mai, a langsar laia a awm phei chuan a hrehawm duh.

Ser kan neih dan hi chhan hrang hrang a awm a, naupanlai-a infiam na-ah kan inhliam, chetsual palh avangin kan inhliam, inzaina avanga ser leh a dang tam tak.

Hmanni lawka ka intihpalh-a ka kut an thuina pawh hei a ser reng dawn. Tin, ka nausen laia vaccine ka lakna ka banbulah pawh ser lian tawk a awm, chu lo pawh ser neuh neuh chu ka ngah mai. Mi thenkhat ser phei chu a thak thin a, han hiah vak dawn lahin na an ti bawk thin si a, ser zai leh te pawh an awm hial a ni awm e, heng hi SER NUNG an ti thin.

Mi thenkhat thung chuan mahni taksa-ah ser siam chawpin milem te an ziak thin a, chu chu an pu hlen thin. Taksa-a ser lang kher lo pawh rilru hliam, ser reh thei lo pai a awm theih bawk.

Mihring te hi Eden huana Evi leh Adama bawhchhiatna avanga suala piang kan ni, chu sual ser reh thei tawh lo tur chu Lal Isua kan tana Kraws-a a rawn inpekna avangin ngaihdam kan ni. Hla-ah chuan, "Juda maicham chunga, ran thisen luang tawh khan.. Rilru a thlamuan zo lo a, sual ser a tibo nang" a ti a.

Judaten sual thawi nana Temple-a ran an hlan thin chuan sual ser chu a tireh thei lo, chuvang chuan Isua thisen a chhuah a ngai ta a, "Van Beramno zet hian, a phur i sual zawng chu.."a lo ti leh ta a ni.

Isua an khenbeha, a kut, ke leh naka feia an chhunna hliamser leh an vuakna vualte kha vawiin thleng hian a reh lova, a nung reng zawk a ni. Chu SER NUNG hmang chuan kan sual ser zawng zawngte tihreh a lo ni ta a ni, "A vuakna vualte-a tihdamin kan awm ta"-tia Zawlnei Isaian a lo sawi ang khan.
(Good Friday pual a ni e)


6 comments:

  1. Nice...chhungkaw thil vangin zanin ka inkhawm hman lo..naktuk chu inkhawm ve ngei ka tum e..

    ReplyDelete
  2. Ka inkhawm hman lo, Bible pawh ka chhiar rih lo. Ka tawngtai hman tawk a ni. I thuziak ka chhiar a, ka lawm e.

    ReplyDelete
  3. Ka lo ngaihtuah ngai reng reng loh ser zawng zawng ah chuan SER hlu ber a ni tih ka hriat chhuah phah a, ka lawm e.

    ReplyDelete
  4. E khai.. good friday sermon tha tak a ni e.

    ReplyDelete
  5. Ka sermon tawite in lo chhiar hlawm a, a lawmawm ka ti e.

    ReplyDelete
  6. Isua ser nungin kan sual ser a ti dam, kan guilty feelingte nen lam ava lawmawm em! sermon tawi awmze nei hlu tak a ni e.

    ReplyDelete

Followers