Thursday, April 16, 2009

Chauhthubarawh....

Mi fa-te tih dan hria-in Blog ka han siam ve ri rawk a, update reng chu a lo har fu mai, hun chu ka nei a, ziah tur lam hi ka tlachham deuh a ni. Tunlai chu ka hmeichhe thi hul hiau mai a, han sawi tur em em ka nei lo, mahse engemaw tal han dah ka duh si. Thu sepsel te te ka han sawi mai mai ang e, chauhthubarawh-ah...

Police-in min um-
Inrinni vawi khat kan bazar haw hi Beach lamah len khawthawn pahin kan haw kual a, tlema a lun lo lai deuh kan thlen khan Police motor hian min rawn um ta tlat mai a, horn an rawn pek hnu pawh khan keini min um an ni tih ka lo hre mai lo, thui deuh fe ka tlan leh a, mahse motor dang awm hek lo le, keini tih kha a chiang ta khawp a, kawngsirah chuan kan lo ding ta a, eng vang chuan ni maw, kan tlan chak lutuk si lo, wrong side ni bawk si lo, ka hmel danglam vang hrim hrim ni maw ka ti a, Passport ka keng em, Driving License ka keng em tihte chu ka han in check leh a...

Min umtu-te chu silai nen an rawn phei ta mai, inring em em hian a silai chu a rawn lek a, a hnungah pakhat hian silai nen bawk hla deuh hlek atangin a lo veng bawk, min rawn Sakei veh hi a ni hrim mai a, kei chuan hlauhthawn ngaihna pawh ka hre lo, min um chhan tur kha ngaihdan ka nei lo reng reng.

An rawn kal hnai, kan motor an rawn hmu chiang chu engmah sawi lo-in kal turin min hui leh ta ringawt a, sawibuai erawh kan tum lem lo.

Min umna chhan kha engdang vang ni lo-in kan motor-a thu inziak vang lek kha a lo ni a. Exército De Salvação tih hma chiaha Igreja tih kha an lo hmu lo a, an rawn kal hnaiha an hmuh chian khan min release leh ta mai a lo ni. (Exército tih hi ARMY tihna a ni a, Igreja tih hi Church tihna a ni. Church tih hmu tel lo-a ARMY ringawt an hmuh khan eng ARMY hlauhawm deuh emaw turah min ngai a ni ngei ang.)

UISA vanga inhnialna-
Vawi khat leh chu Portuguese class kan neih lai-in thian pakhat (Oscara) hian China a kal tuma an uisa siam, uisa tih hre miah lo-a a ei tui a tihzia a sawi a, kan zirtirtupa Paul chuan Uisa an ei amaw? mak ti fe-in a lo ti a. Ei e, a tui lutuk mawle a la ti zui. Kei lah pek chuan Keini pawh kan ei ka lo ti hmanhmawh a, han zep ve mai mai awm kha a nih nen, inhnialna ropui a chhuah phah.

Paul chuan Uisa han ei chu ngaihtuah pawh ka ngaihtuah ngai lo, a mak e a ti ta vawng vawng mai a, uisa ei mak a tih thu hlir a sawi mai chu ka ning lutuk, keiin kan ei ka ti laklawh tawh si, Nangni pawh Mathapa in ei tho alawm ka ti a, (Mathapa chu pangbal hnah a ni a, thil eng eng emaw nen an chhumkawi thin a ni. Tui chu a tui fuu). Kan inhnial ta char char, ani lahin Khawlaia Ui in hmuhte hian ei chakin in chil a put thin lo maw? a ti fiamthu a, kei lah diau duh bik hek suh, Nang pawh arsa i ei a, ar i hmu apiangin i chil a put ami? ka ti zel a, za vak lo-in a nui ta ringawt a.

Chutah Oscar chuan min rawn thelh ta a, Khawvel ram hrang hrang hi ka kal hnem a, Russia chiah hi ka kal lohna a ni ang, thil tam tak ka tawng a, mak tih dawn chuan mak tur a tam, mahse kan hnam dan leh tih phung leh ei leh in dan a in ang lo a, heng hi chu ka hrethiam thei vek, an ei ang leh tih dan hi chu ka ti thei zel mai a ti a (Amah hi Pilot a ni a)

Tichuan, "Awmna ram azir zelin thil hi a danglamin ei leh in pawh a danglam a, mak han tih vak tur pawh a awm lo e" tiin kan inhnialna chu kan sirtluk thei ta hram a.

22 comments:

  1. Chauhthubarawhah chuan a tha ber pawl a ni awm e. Thu ziah nan hun i nei a, ziak tur i nei lo maw? ziak tur i la (chhawr) thin em ni?? Kei chu, Ziak leh ziah hi ka hmang hrang.. mi thenkhatin ziak chauh an hmang ang ni lovin.. Ziak chauh hmangtute hian 'zawngtah hi ziat loh chuan ka ei peih lo,' an ti ang em le??
    Comment tur hriat loh chauhthubarawh thu a ni miah lo a nia aw..?

    ReplyDelete
  2. dolién - lawmawm thruai thruai e

    Zaia - Nia, ka hman pwlh ngai lo sin mawle, ka lo tipalh a ni, thank you. Siam tha nghal e

    ReplyDelete
  3. A ngaihnawm leh pek hle mai. Police sawi takah chuan vawikhatmah min la man lo va, min check chang te hi chu ka tawng ve zauh zauh a. Man tak erawh ka la tawk lo. Vawikhat Pune kan awm laiin kan picnic tur Thingtlang lamah tuichen tumin local train nen kan kal a. Kal dan leh a hmunhma min kawhhmuhtu ber kan thianpa khan first class ah min lo lawn tir mai. Keini lahin hre hek lo.

    A hmun kan thleng chiah mai chu, kan chhuk dawn chiah hian kan ticket an rawn check a, second class ticket kha a lo ni si a, pawisa mi chawitir an tum a, an titam ang reng fu mai bawk si a. Kan hnial ta alawm le. Kan hriat loh thu te pawh kan sawi a. Vai tawng thiam tha si lo, english an thiam vak bik si lo. Kan inrem thei mai lo va, mi an va tir, Police an rawn kal a, Hruizen lian pui mai, Sai thlunna tur ni awm tak mai hi an rawn keng a. Kan thianpa hlauthawng lutuk hian, pawisa chu an tih ang ang pe mai teh ang u, khi hrui lian pui mai an rawn keng a nia, ka duh miah lo a nia, a ti a, nuih za bawk si, hlauthawng bawk si. Inrem mai loh chu duhthlan tur avang ngei mai.

    Uisa ei nih erawh ka zak lem lo va. Mahse, ka ei thu erawh ka sawi ngai bik lem lo va. Eng emaw changa min zawh hian kan uisa ei chu in vulh ang chi ni lo, ram ui pangngai ang chi , lian deuh deuh, khawi fin theih loh chi hi a ni. Ka ti thin a. Sakawr sa an ei a, kan ei bik loh thu te pawh ka sawi ve zauh zauh. Ei leh in hi a inang vek lo a. An ni tan chuan Ui kher kher hi chu mihring tluk deuh thawa an duat a ni tlat alawm le.

    ReplyDelete
  4. My dear Dini, i chauhthubarawh chu a tui phian tho mai, a hmin tha bawk e, tui ti takikin ka ei e.

    ReplyDelete
  5. A reng reng thuah ngatinge Mizorama kan uisa ei thinte chu mihring ei tlak tura vulh leh enkawl an ni tih tal i sawi loh le, stray dogs kan ei a ti a ni ang chu. Zawng sa te leh a dangte tuizia pawh hrilh law law la. Pawi miah lo. French-ho pawhin sakawr sa an ei a, African-ho hian caterpillar an duh lutuk bawk.African zingah chuan Congolese ho khian uisa chu an duh ve khawp asin.

    Keini pawh Zambia kan thlen tirh khan Chinese emaw min ti a, rul sa in ei thin tiraw tiin min zawt an awm fo. A chhan chu copper mines a thawk Chinese company mi leh sate khan rul sa hi an lo duh lutuk a lo ni a. Ei duh zawng sawia inhnial te hi a nuam ve mai mai thin. Mihring hi kan hmel, nih phung leh pianzia te danglamin kan duhzawngte pawh hrang thin mahse, Pathian chuan min hmangaih vek a, kan inkara induhsak tawnna leh inhmangaih tawnna a awm chuan nun hian 'par a chhuang' thin.

    ReplyDelete
  6. Update mai mai pawh a ngaihnawm khawp alawm hei...Kan awmna in a zir lo bawk a pulis ho hi chu ka hmachhawn ngun malh malh khawp mai, man em chu ka la tawk lo thung :)

    ReplyDelete
  7. Ngaihnawm e. ARMY silai nei lo hi chu buaithlak bawk ani ( heheh ) J/k.

    Uisa hi tunhmain ka ei ngai lova, tunah chuan ka ei ve ta chhen mai. " International pumpui" neih hi alo hahdamthlak ber mai :-)

    I dopui
    Seki-a
    :-)

    ReplyDelete
  8. I ziak thiam bawka, ngaihnawm ti takin kalo chhiar ve ziah ania. Chuan hei, i update te ka hriat zung zung a kalo chhiar zawm nan ka blog ah kalo link ve pawp mai che. Remlohna a awm chuan minlo hrilh dawnnia.

    ReplyDelete
  9. I update tha lutuk tlat..Ka lo visit ve ziah ania. A ngaihnawm thei lutuk tlat..~

    ReplyDelete
  10. @Puia - Kei pawh Train-ah ka che chhe chiam tawh tak asin.. min hriatchhuahtir e a. Hruipui chuan an tingmit dial em lo che u maw?

    @Fela - A lawmawm a nih chu, i hrawk a fah meuh maw?

    @Thiama - Kei pawh chinese ka nih ring an tam zawk. Kan uisa ei sawi chhuah hun a awm leh a nih vaih chuan Stray dog kan ei lo tih chu sawi tel ngei tawh tur a nih chu..

    @

    @luliana - Ka naupan lai hian Police hi ka hlau thei em em mai a, Uniform ha chi reng reng.. Salvation Army tiam lohin.. :-)

    Mahse man emaw um emaw ka tawk ngai miah lo a, ka vawikhatna ania, ka la ti thang lo lutuk..

    @Sekibuhchhuak - Nia, International Pumpui hi awmna hmun azirin neih a ngai khawp mai, hei kei pawh an Mathapa te pawh ka ei thei ve viau tho e, ka ngeih phian ni maw, thau lam ka pan tual tual leh nghal..

    @Jinx - A va lawmawm ve, lo lut ziah teh, i link chu remlohna a awm lo, ka lo zui ve zel zawk ang che...

    @EPISTEMOLOGY - Thank you. Lo visit ziah la, i hnuhma hmuh turin han hnutchhiah ziah bawk teh.

    ReplyDelete
  11. "Nang pawh arsa i ei a, ar i hmu apiangin i chil a put ami?" Ka tran lutuk he argument hi. Thil dang lo ziak leh la hetiang ho te te anga lang mahse ngaihnawm deuh si hi.

    ReplyDelete
  12. Uhuh! I chauhthubarawh pawh chu hmeichhe thi hul a hul thak chu i ni lo tawp mai! Han ziak zel teh... i lo khek zel teh ang!

    ReplyDelete
  13. A ngaihnawm hle mai. "Thu sepsel te te..." lo phei ch chhiar a va chakawm ve.

    ReplyDelete
  14. kei pawh Moscow ka thlen hlim hian Vawihnih tlawng Poliz in Min check tawh maw le...G-3 Nalh tawh mai nen ...Nelawm loh khawp mai..
    I thuziak chhiar a nuam hle mai..ka rawn lut thin a nia ..Tang fan fan...

    ReplyDelete
  15. @aduhi - Hnial hrat deuh bulah hi chuan Tai pawng pawnga tan hi a awl asin.. ho te te hi ziak ziak ila ni mai ti raw..

    @VaiVa - hahaha.. helam lamah te i lo thlawklut ve a, i ti lawmawm e, lo lut ziah la, lo khek zel teh!!!!

    @Tetea - Thu sepsel te te lo hi chu a Ho riau thin teheee...

    @zavala - Wow!!! Moscow lam inleng ka neih vawikhatna a ni tlat mai, khaw'nge thingpui ka'n lum dawn che em ni? I ti lawmawm hle mai, lo lut zel rawh.

    ReplyDelete
  16. Ui rawt partyah tel i duh chuain,
    Duli thawh la vawi thum lam la,
    Ui sa ui sa tia au chung zelin,
    Vengtin kil tin fang zel ang che,

    Ui sa ui sa, lenghmaser taivawn,
    Sa zawng laiah i tui chuang e,
    I khu ngawt pawh chhungkaw tin tan hian,
    Puar leh fanna i lo ni e.

    Ui sa rau rauah duh thu sam ila,
    Kum thum tang tawh a vun chhah chi,
    Chawnpuar nei lo awm hmun pawh sawn ngai lo,
    Awi lei lemtel a awl ngei e.

    ReplyDelete
  17. I ziak ngaihnawm phian zel mai a!

    ARMY tih i rawn sawi takah chuan Chennai kan awm laiin vawikhat chu Salvation Army motor-in Bangalore kan kal a. Toll gate apiangah a khalhtupa khan 'ARMY' a'n ti nghat zel a, a hmaah flag a phe vat vat mai bawk si a. Eng Army ber nge a nih hre hek lo, min kal tlang tir zel a. Pakhatmah kan chawi lo! Major pahnih a chhungah an thu bawk nen, a thlamuanthlak khawp mai:)

    ReplyDelete
  18. @lalkiamlova - Uisa hla sa-a i han kiu vawng vawng mai tur chu... ngaihthlak a chakawm hle mai.

    @faka - ngaihnawm i tih chuan a lawmawm a nih chu. ARMY tih vanga in tlang zel chu in vannei khawp alawm, helai chu ni se min dap hrep mai thei asin :)

    Keini pawh vawikhat chu Nepal kan kal a, ARMY motor ngei maiin, gate-ah pawisa kan chawi miah lo mawle...

    ReplyDelete
  19. Ngaihnawm ve aw...ka pu (Maj.Khumtea)poh khan buailai khan Maj tih kha a lo hmangtangkai hle mai,Khawruhlian ah khan an transfer kal hun toh si,buai lai ni bok si kha Bawrhsap phalna in dak phur Helicopter ah khan an chuan tir a,Mizoram hmun hran2 kha an fang hmasa a,lei lam a bungrua kha an phur.. Maj tih inziak si tumah pon an check ngam lo.Hei lo poh hi ka pu ni lo midang a hming zep khanglang ila Captain nih lai in kn in ah a lo thleng ni awm e,zan ah vai sipai ron lut duk..captain hian uniform a lo ha hlauh, 'I'am Salvation Army Officer' a lo ti.sipai pa chu a tlan chhe dawr2 a,kan chhungkua an him phah hlauh bok,mahse chet that reng theih loh fo,he Captain bok hi khawdang ah, MNF lam ah captain a hmingpui pu a lo awm ni awm e,Army lam in amah emaw tia an vaw hrep thung(source Mum)

    ReplyDelete
  20. @jessy - I rawn len luh ve teh hlawl chu le, lung lam lam i ti leng e, lo lut ziah teh, tunlai khawnge i awm?

    ReplyDelete
  21. lo lut ziah toh ang...chhiar a nuam thei hle mai...Delhi ah awm mek...va in la senior toh ve a,keini poh kan la awm hi...SAY ngaihawm thin mahse maw haw mah ila kan saprano pui ho thin fate thil tur a nih hi kan hawn ber tak

    ReplyDelete

Followers