Friday, March 13, 2009

Ka chesual palh hlauh... !!!!

Kan Pi Pu-te khan "Tuithiam chu tuiah an chesual a, thing thiam chu thingah bawk an chesual nge nge" an lo ti thin a, Hmeichhia erawh an chetsualna hi hmun rualrem leh Khumlaizawl te a ni duh riau.

Mahni chanchin kan sawi hnem poh leh keini ang mi tlawktlaw hi chu kan intimualpho mai ting chu a ni a, 'marawhchu lenna kar a hla em a, rualduhten ka chetsual thu tlangkamah in lo hre bawk nen, a chipchiarin helai hmun, duh duh ka sawi theihna-ah hian ka han tlangaupui law law ang e...

6th March 2009 kha Khawvel Pum Hmeichhiate tawngtaina Ni a ni tih thenkhat chuan kan hre awm e, kha Ni kha helaiah pawh Kohhran hrang hrangte inzawmkhawmin kan Biakinah tawngtai turin kan inbuatsaih a, office atangin thiante nen kan haw a, Biakin chu ka In bul mai a nih avangin "I inah Lunch siam ang u" an ti a, kei pawh ka phur vei surh surh viau.

Chutia kan buai chuk chuk lai chuan eng eng emaw lak tumin Fridge (Refrigerator) ka va hawng chu Coke bur lian bottle hi a rawn lum chhuak, chhuatah chuan a puak keh chhuai mai a, chhar tuma ka kut ka lek lai tak mai leh a puak chu a inrual a ni chek a niang chu ka kut dinglam zungu ah tak mai chuan a rawn per ta, a hik chuai hian ka hria a, thi chu a per nghal chhuai mai a, bangah nen, chhuatah nen ka kawr awmah nen coke bua nen chuan kan inchiahpiah ta nuai mai.

Thiante an rawn tlankhawm a, Damdawiin kan pan nghal. Kan veng damdawiin kan kal, thawktute lunch eiin an lo chhuak bo vek, hmun dang kan pan leh, thin hi a rim deuh tun mai. Aizawl angin Emergency roomah min hruai lut ang a, an thui chuk chuk mai turah ka ngai deuh a, a lo ni teuh lo, counter-ah chuan lehkha kan la te te a, ka hming min zawt kha chu ka hrethiam, ka Nu hming min han zawt leh kher a.. Engemaw chen kan han vahvaih kual hnu chuan min hruai lut ve ta hram a. Ka kalpui ber Beira lah chuan Motor park turin min chhuahsan leh daih a, min enkawltupa chuan kahhikna pawh hmang ta lem lo chuan Painkiller a spray thuak thuak a, a han thui ta reuh ale... a na ta khawp mai a, ka au chhuah loh nan ka kut na lo lam chuan ka ka ka hup a....!!!! vawi khat a vih khan painkiller hnathawh kha chu a zo vek tawh, vawi thum lai a thui ta mai a, vawi li a la tum cheu a, i ti leh dawn alaw, a ngai tawh a mi, thuina hmun tur pawh a awm tawh loh hi te ka lo ti vel a, a nih leh aw, ngai lo i tih chuan thui lo mai ang chu a ti sam ve leh et a. Beira tal kha chu rawn lut leh se thla a muang deuh tur hi a ni na ale.. rawn lut tange ti ta lo chuan pawnah min lo nghak veng veng a...

Dik tak chuan hetiang taka inhliam hi Pathian zarah ka nei khat khawp mai a, ka taksa-ah hian pem tenau deuhte chu nei ve nin nian thin mah ila, thui ngai ema hliam chu ka vawikhat neihna a ni a, chhungte hmuh phak loha hliampui kan tuar rup mai hi chu a manganthlak thin khawp mai. Mahse le, Pathian zarah mite hi an tha a, helai mihang ram rehah pawh hian min lainattu leh khawngaihtu hi min pe zel a, chhungkhat lainate hmu phak lo mah ila ka awmna hmun apiangah hian min thlahthlam lo ani tih leh min enkawl reng a ni tih hi a takin ka dawng leh a, lawmawm ka ti hle. Ka kut hliam chu ka lawm lo. Mahse zana ka han tawngtai chu mak tak mai hian ka kut damna tur dil ta lo chuan lawmthu ka sawi zawk ta hlauh a, kha bur keh them khan ka kutah mai per lo-in ka mit-te per ta se, a force kha a na ropui si a, ka mit te chu a del phah thei ani tihte ka ngaihtuah a, vannei tak chu ka niin ka inhre leh ang lawi a.

He ka thil tawnin a kaihhnawih thu lawmawm thenkhat chu:

THISUK ka nei lo a ni tih ka hmuchhuak, nei ila chu ka thidang chiang ngawt ang.

Kan hotute'n i frigde a te lutuk a nih hi an ti a, frigde thar lian tawk kan lei phah hlauh.

Thenawmten min insuksak vek

Rawng min bawlsak turin an rawn kal loh leh rawng bawlsa min rawn pe thin :)









15 comments:

  1. Mahni inah chuan ni sela, i tap deuh pur mai lo ang maw?
    I thuziak chu tang teuh va ka'n chhiar chu le. Hlim tuar ngai lo tan chuan a nat hmel em tak a nih kha. Experience tha tak a ni ang, Pasal te neiha fate neih hunah phei chuan....thui ngaikhawp hliam duhawm tak te pawh i la tuar mai thei a sin.
    Pathian zarah i kut chu lo dam leh thuai thuai rawh se.

    ReplyDelete
  2. Akhai a, hotunu chu i lo chesual palh tak a nih hi mawle, a va pawi em. Mahse, chetsual ro roah pawh tunlaia kan nula thenkhatte chetsualna ai chuan a thlanawm zawk feah i ngai phawt ang. Hnai a la ang a, a dam veleh mai turah ngai ila. Vanduaina hi kan tawngbuak a awm a, kan tawn palh a awm bawk a. I vanduaina erawh PALH thil a ni a. I dam that leh thuai kan beisei a, kan lo tawngtaipui ang che.


    PS/ tunlai Mizo nula zingah chuan Mizo Tawng ziak thiam tha pawl tak i ni a, ka ngaisang hle mai che. I thuziak a inrem mawi nalh thin khawp mai.

    ReplyDelete
  3. Dear Captain,
    I chesual chu pawi hle mai. A la na vuut vuut em? Kutzungtang hliam hi a na tur ut ut duh a nia. I vanduaina hi, i sawi ang hian, mite hmanga Pathianin a hmangaih zia che a lantirna hmanrua a nih hi.

    Nia Puia sawi ang hian thu hi i ziak tam tulh tulh a, i ziak thiam tulh tulh mai. Tuna i thuziak pawh hi paragraph khatna chhiar tawh chuan chhiar chhuah parh a chakawm nghal mai. Paragraph khatnaah hian i rawn 'offside' hlek a, a tawpah erawh i goal-ahnalh tak maiin i khalh lut leh si. Literary critiques ten "suspense' an tih ang chi a ni e. Reader's Digest drama in real life atan a itawm khawp mai! Rawngbawltu atangin freelance writer-ah i inlet mai ang tih ka hlau ta e!!

    ReplyDelete
  4. Coke chu ava lo puak na thei ve mawle? I reh mang e kan lo ti a, hliampui i lo tuar reng a lo niin. I kut chu pun lovin lo dam thuai rawhse. Vanduaina phena malsawmna i dawn hrethiam theia Lalpan a hruai che hi kan lawmpui a che. Dam vawng2 nang che.

    ReplyDelete
  5. E hotunu, hei chu "Freak accident" an tih ang dik tak hi a lawm le a nih, "Final Destination" tih ang vel min ti hre chhuak! :)

    A va bawn ve chung tiang i lo tawng te chu. Coke botol hi a hlaawm ve lutuk a sin, a gas in store hi vawi lehkhatah "disturb" chuan a reaction chu a bawn ve lutuk. Hmanah TV ah pawh coke litre 2 ang chu botol hi a dawt tin in leiah an vawm thla a, In chhawngkhat a thlawh kan thei mawle, a gas rawn phuh thut khan. i dam vat vat theihnan kan lo tawngtai pui a che.

    ReplyDelete
  6. ava pawi teh hlauh ve le..lo dam leh thuai teh!

    ReplyDelete
  7. Puibawiha-
    Haha.. Kei pawhin tang teuhin alawm ka ziah. Thui ngai khawp hliam duhawm tuar tur chuan hmabak ka la ngah lulai lutuk... Ka tha tawh khawp e.

    Puia -
    I tawngkam khat pawh kan tan DAMNA tih mai a va awl ve, min tawngtaipui a, ka lawm e.

    I thubelh hi... nangni ang thu leh hla lama MIRIL-in hetia i han sawi chu... ka lo in chhuah phah ve sawt.. :)

    Thiama -
    Tunah chuan a na Vuuut vuuut kha a zia tawh a, hei a thuina kan phelh a, a dam tha viau e.

    Suspense, Readers Digest, Freelance writer.. hahaha... lawmawm lutuk

    ZL -
    Ka lawm e, hei ka dam vawng vawng tawh, ka reh leh tawh lo ang.. Nangni pawh in buai hle niin ka lp hria a,in dam zel maw?

    illusionaire -
    Khai hotupa, thisen a chhuah lai tak tak phei chuan maw, ngaihtuah a thui hman asin...

    Coke chu in pawh in tawh loh tawp a nia ka duh ni.. a thawk na em mai.. hahaha

    In lo tawngtai hlawm vang a niang hei ka tha sawt ania..

    avena -
    pawi vawng vawng thin teh asin...

    ReplyDelete
  8. I in hliam palh chu i la hriat ngailoh thil tha tak tak i hriat belh a, a lawmawmah ngai mai rawh. Vawi khat thui i tawhna a nih chuan a leh pekah chuan a tawrh dan pawh i thiam tawh em ang chu... :) Kei pawh ka kut ka sah chhum tep tumin kahhikna tel map lo in an hel nuai a, a na duh khawp mai. A na tih kha ka hreh ve deuh si a, ka kun ngawih ngawih mai mawle.. Lo dam vat rawh

    ReplyDelete
  9. A la ho zawk a nih kha kabn tih sak teh ang che.Keipoh ka bengah bawk a awm a.Chennaiah ka zaitir a.Minor trho a nia.Local anasthesia an ti emaw ni khan min ti hik a.A na a hriat loh.

    A hnu kum 2 ah a lo chhuak leh a.Aizawlah kan zaitir mai chu dettol in an hru thuak thuak a,a raw in an zai ta a nih chu.Ka mutna khum tlang ka pawt nasa lutuk a,ka tap chu a ni lo,ka mittui leh thlan a chhuak nasa khop mai.

    Mahse nang chu hmeichhia i nia,special taka care tur che alawm.In hospital thuneitute chu ka sawipui ang e...:)

    Chuan ka kut zungtang in kar hi glass no ka tih keh na lamah a kak duai a,ti awm ve hek lo,a kak kha a kaw hung mai a,ka u in khawlla leh hriau hi dettol in a zut thuak thuak a,a thui bawk.Tun thleng hian a chhung hi a dam chiah lo deuh in ka hria.

    ReplyDelete
  10. A chunga mi khi keimah burgerstud2005 ka ni e aw.Ka sign up thei mai lo a.

    ReplyDelete
  11. I coke bur chu African ho siam anih vâng ani lo maw - A va han che 'Terrorist' deuh ve. Puakthei thil reng reng hi Africa khawmulah khuan a tam riauin ka hria :)

    Pawl khat ka nih khân inches khat leh a chanve lai tui hleuh na ah hliam tuarin ka awma, hmun li lai - Kah hit na tello in - min thui tawha. A na duh khawp asin, a hnuah tum thum lai min thi leh tawh bawk.

    Mahse kha dam te in i vanneih phah ta anih kha le. English hoin, "Everything happened for one's own good" antih kha i tawng ve niderin ka hria.

    P.S. Midum ho thui chu ka duh hauh lo mai ka ti :D

    ReplyDelete
  12. A va zialo ve! Tlema tlemah Hotunu kan lo chan tep a nih chu! I lu lamah a keh themte chu rawn thlawk palh ta sela chuan... lu tuam bur chungin.... a pawi ngawt ang.
    Ka comment ve hma hmain i lo dam leh hman a! Haha.. i dam chuan a tha. I dam loh chuan a tha lo. Dam viah reng la, thu tha deuh deuh hi ziak zet zet reng mai teh.. an sawi angin, i ziak thiam tawlh tawlh lehnghal...

    ReplyDelete
  13. A ho e mai, a pilh hlek emaw chauh a ni ang. Mizoram chu ni se kan tuam bir ber ang a, kan engtih a thulh phah pawhin ka ring lo. I han ziak mai mai a, a ngaihnawm phian a, mi sawm chuang laiin comment an pe leh tuar thin a, i chetsualna (a pawi lo chi) pawh malsawmna a ni tho ve.

    ReplyDelete
  14. Geminiboyz
    a lehpek chu awm tawh lo hram se ka ti a nia...
    Ka tawrh ang tuar (aia nasa mah pawh) in lo awm ve tih ka hriat ian ka thla zu muang deuh suai suai a... !!!

    burgerstud2005
    Awi, i kut kaw hung chu a va rapawm awm ve aw.. chungte chu damdawiina kalpui ngei tur asin.

    chhangte_ll
    chu chian, he ram hi chu an che Terrorist thei lutuk a.. :)

    Kahhikna tello-a thui i lo experience tawh a, a tihzia e,... nia i sawi ang khian kan thatna tur a ni ti mai ila kan hlim mai e

    Midum ho thui thu-ah chuan... a hmanhmawhthlak lutuk a, duhthlan hman pawh a ni tawh lo a ni.. hahaha

    Zaia -
    Nia, lu lamah rawn thlawk se kan na viau lovang tih pawh a sawi theih loh..

    Ka dam i nghak a nih ka ring a, i comment har dan-ah, phut chhuah kherte hi thenkhat chu an ngai a... Pathian zarah ka inhliam tawh loh ka beisei.

    Fela
    Hehe.. i sual thiam ve siah... Mizoram chu nise, a thui an phelh hma zawng chu Damdawiinah ka mu lui ang..lolz

    ReplyDelete
  15. khatiang natna kha cokeisemia an ti. africa ramah a tam duh bik. capt hi ral ramah ral hmatawngah pepsi oh! coke puakin a thi an ti mai ang tih va hlauhawm ve. enge a thihchhan an ti ang a mi chuan bin laden a te pawh an ringhlel hma hial maithei mahse a ni dawn der silo a, a natna ang khi zoramah a rawn pu darh ang tih hlauhawm tak a ni. lo in veng vek rawh u. a damdawi tha ber chu injection a nia khupah jection tur a nia tin nuih miah loh a ngai.

    ReplyDelete

Followers