Friday, March 20, 2009

Cohabitation leh Sex

Kan mizo pi pute khan thih hnu hun hi an lo thlir thui ve viau aniang, Mithi thlarau kalna tur kha hmun hnihah an then ve thlap a, Mitthi khua leh Pialral tiin. Mitthi khua chu mitthi zawng zawngte kalna tur leh Pialral chu mi chungchuang, Khuangchawite, pasalthate kalna tur niin an ngai.

Tlangval, nula ngai lo chu mitthi khaw kawtchhuahah Pu Pawlan sairawkherh lianpuiin a lo sai thin a, nula, tlangval ngai pawh a lo sai tho thin an ti. Hei vang hian Tlangval chuan Nula ngaih ngei a tum laiin Hmeichhia erawh chu a in veng hram hram thin. Hlate pawh an lo phuah hial ni awm a ni…

“Di neilo Pawlan a sai an ti
Fam mah ila min sai bil tawh hlei lawng e
Ka nemrang puan tial Ka Di zawnna” tiin.

He ngaihdan vang hi ni maw ka hre law, mipa-te hian hmeichhe ngai thei nih hi intihtheih nan an hmang fo mai, tun thleng hian a la ni em maw ni chu aw tih turin thil a thleng leh thin.

Mizote Kristian kan nih hnu-ah thil a danglam nasa viau a, Pialral leh Mitthi khua chu Vanram leh Hremhmunin a thlakthleng tawh a, kan pi pu-te sakhaw lama an ngaihdan tam tak kha Kristian kan nih hnu hian thlak a ni tawh. Nimahsela, a chunga ka han sawi Sex chungchanga kan ngaihdan thlak hi harsa kan tih ber leh Ringtute min ti thuanawptu vawiin thleng hian a la ni ti ila kan sawisualin ka ring lo.

Tin, “Hmeichhe finin tuikhur ral a kai lo..” an lo ti fo bawk, tunlaia Hmeichhiate, Thiamna leh Finna lama kan san tawh zia ngaihtuah chuan he thu hi chu sawi chhuah ziah tlak loh a ni tawh hial. Nimahsela, hmeichhiate hian atna riau hi kan la nei tlat mai ni awm a ni. Chuvangin mak tak maia bumthlukin kan awm leh mai thin a lo ni, hemi kawnga min veng thei chu kawng khat chiah a awm.

Pathian thu zawm aiin mahni thu-a kal mai hi kan tum fo thin. He thlemna hi fing tak maiin a thawk a, kawng tam takah chuan a dan ve tur reng ni-a ngaih mai pawh awl zawk khawpin leh thil pangai ni maia ngaihna a awm fo thin. Television kan en a, Magazine hrang hrang kan chhiar a, Nupa ni si lo-a hlim taka khawsa dun, Pathian duhzawng leh A thu kalh tlat si kan hmu fo thin, hei hian zawi zawiin khawvel mite nun dan nena min siamrem tirin, he thil hi Pathian mithmuhin a dik lo a ni tih ngaihtuahna kan nei tlem tial tial thin a lo ni.

I Korinth 6:12 –ah khan Tirhkoh Paula chuan. “Thil engkim tih ka tan a thiang a, nimahsela thil engkim tih a tha kher lo; thil engkim tih ka tan a thiang a, nimahsela eng bawihah mah ka inphal lo ….”a ti a. Kan nundan tam tak hi khawvel Danah chuan thiam loh chan phahna a tling lem lo pawh a ni thei e, nimahsela, Chungnungbera hmaihma-ah hian ka tlinpui zo angem tih kan ngaihtuah a ngai hle.

Mi thenkhat chuan, mipat hmeichhiatna (Sex) kan hman loh phawt chuan Chendun hian sum leh pai, tha leh zung leh hun hlu tak kan save a ni tiin an inthiam chawp ani mai thei, dikna chen pawh a awm ngeiin ka ring, amaherawhchu, Pathian thlir dan hi a pawimawh ber chu a ni tlat si a, Bible chuan Diabola dodal rawh u tiin min hrilh a, han chendun ngat chuan thianghlim taka nun dun tum ni mah se sual tihna kawng chu zau takin an hawng huau tihna a ni.

Hei bakah hian ngaihdan dik lo tak pakhat awm leh chu Kan innei dawn tho a, kan inhual vek tawh a sex hman hi a pawina a awm lo tih hi mi tam tak ngaih dan a ni bawk . Ka awmna hmun (Mozambique)-ah hian hei hi thalai tam takte ngaihdan a ni. Bible zirtirna-ah chuan Inneih hma-a inngaih chu thil dik lo a ni tih a ni. He thu-ah hian Pathian hian a ngaihdan hi a thlak dawn lo a, Mihringten he thu hi kan ngaih pawimawh loh avang maiin engtikawng mahin a thu hi a sut dawn nahek lo.

Nupui pasal neih hma-a sex hman reng reng chu Hmangaihna zauthau mai a ni, hei hian mi tam tak chu mi famkim nena Nun famkim chen turin ngaihtuahna a siam sak a, nimahsela hei hian a daih rei lo hle, an nihna tak tak an han inhmuh meuh chuan mi famkim lo, tlin lohna tam tak nei an lo ni ve tho thin si a, inlaichinna ziktluak chuan Pathian atanga chhuak Hmangaihna nena inbiakpawhtawnna leh inpekna tak tak a keng tel a ni.

Pathian hian kan thinlung ruak hnawhkhat tura mi dang zawnga van ruai turin min duh lo a, he kan thinlung chhungril ber ruak huai nia kan ngaih, hmangaih leh duh tak, kan thinlung hmunruak luahkhat tura kan zawn ruai lai hian Amah Pathian chauh hi he thinlung ruak hnawhkhat theitu chu a ni. Midang tumah rengin an thei lo, dik tak chuan midang tan phurrit kan siam mai zawk a ni.

Mi tu emaw I hmangaih tak zet a nih chuan, sex hmanpui mai emaw, chendunpui mai ai chuan chu hmangaihna tak tak chu ti thangliana, nupa in nih ngei theih nana tan I lak leh I nghah hram hram kha a pawimawh zawk. Tin, Hmangaihna hi thutlukna pawimawh tak mai a ni tih kan hriat reng a ngai, hmangaihna kawnga thutlukna kan siam dawn anih chuan Pathian duhdana engkim kan tih hi kawng tha ber chu a ni tih hi kan vawn reng a tul tak meuh a ni.

18 comments:

  1. Tun hmaa kan hriat ngai loh Living together tih tawngkam pawh kan zingah a mikhual ta lo hle. Pulpit tlangah hetiang lam hawi sermon pawh thlak tam kan mamawh tawh hlein a lang. I rawn ziak tha khawp mai.
    Tunah chuan Paula pawhin inneih hmaa mipat hmeichhiatna hmang chu van ram kawtchhuahah a lo sai pawp tawh dawn a niang.

    ReplyDelete
  2. A dik leh pek e. Kan thinlung hmun ruak luahkhat tura Pathian nilo thildang kan ngaihtuah chuan midang tan phurrit kan siam mai zawk a ni... Pathian duhdana thil engkim tih erawh a va har thin tak. Hotunu, i ziak tha leh pek e.

    He Zoramah pawh hian thalai tam tak chuan nupui pasal neih hmaa sex hman loh hi an tum fur tawh. A chhe lam hi a langsar a, sawi tam a ni bawk a. Chhe tak zingah hian a tha hi an la tam maia, an tam zel theih nana kan tawngtai zel pawh a ngai a ni.

    ReplyDelete
  3. Dik lutuk, ka inhlan nghal e. Sex doral hi a hrang lua a ni. Mit a kan hmuh te leh beng a kan hriat te hian a nilo lamah min hruai zo ta hlawm a nih hi! Hmangaihna lanchhuah tir na ni a kan ngaih vang a ni thei a, ninhlei vang hrim hrim pawh a ni thei tho bawk.

    He lamah hian zirtirna dik leh tha chu kan mamawh khawp mai. Lehlamah chuan Pathian thu thlen dik tirtu a ni ve tho a sin... Ngaihtuah ngun a ngai e....

    ReplyDelete
  4. Hotunu hei zet chu "Post of the week" ah ka lo siam a nge. A ropui hem hem khawp mai.

    ReplyDelete
  5. 'Nimahsela, hmeichhiate hian atna riau hi kan la nei tlat mai ni awm a ni.'

    A dik na chen a awm..tin, mipate hi kan mawl thung...tunlai sex video atang hian a hriat..mizo hmeichhe humhimtu tur chu mizo mipate kan ni, vai leh sap ho an ni lo..mawl fal kan awm thin avangin hmeichhia a mualpho leh nge nge thin...

    Chuan inngaizawng pawh nilo mahse 'live in' hi chu tha ka ti lo hul hual...sual (a bikin tisa chakna sual hi) do zawh a har ropui si a...chance siam loh hi invenna tha ber chu nimaiin ka hria..

    Ziak bon tuar tuar khop mai :)

    ReplyDelete
  6. Ngaihnawm khawp mai. A bik tunlai Mizoramah sex sawi a tam fu mai. Kohhran inzirtirna hian min hneh tawk lo emaw ni aw a tih theih. Information leh technology khawvel-ah ethics leh morality tellova zuan luh hi a hlauhawm reng a ni.

    Tin, practical deuha inzirtir hi a pawimawh ta khawp mai. Entirnan, chetsual loh tur chhungril inbuatsaih viau pawh insum a har thei...chumi atan chuan- engtin nge chakna chhuah hma theihna lai leh engchin nge inngaizawng pangai ten ti ila tha ber ang..etc etc..mumal taka inzirtir hi a hun viau a ni.

    ReplyDelete
  7. Tha khop mai...zir tur a tam khop in ka hmu.Di nei lo Pualan a sai an tih chuan min sai ve ngei dawn a nih chu.

    burgerstud2005

    ReplyDelete
  8. You did it again. A blend of theology, culture and history addressing the most relevant issue of human/social behaviour. Excellent post!!

    ReplyDelete
  9. ziak ropui hle mai... ngaihtuahna ti kal thui duh khawp mai.

    ReplyDelete
  10. sermon tha tak mi ron hlui hlawm a..lawmawm e.ti hian ka ngaihtuah thin a Pathian hian SEX hman sual hi a haw viau a.. tin sex hmang khaw lo te chu hrem loh in a chhuah ngai loh thu kan hmu bawk ani..."2 Samuela 11 kan en chuan Davida`n Uria nupui a pawl avangin Davida thiltih chuan Lalpa a ti lungni lova, Uria nupuiin a hrinsak naute nunna chu laksakin a awm thu kan hmu".

    Pulpit tlang a tang pawh hian sawi chu a hun tawh ani, SEX avanga buaina lah chu a zual tial2 mai si a....!!

    Inneih hmaa inpawlna leh uirena do tur hian "pawl" din chu a hun tawh e.

    ReplyDelete
  11. thil pakhat leh lawks...Mizo mipate hian kan Hmeichhia te hi kan zah thiam a tul...!! tling lo vek kan ni chuvang chuan Mizo mipate hian kan Hmechhiate hi chawimawi leh ngaihsang na chang i hre thar leh ang u.....!! hnam dang Tv in min chawimawi sak dawn si lo....in tih mualpho tum ringawt a khawsak zawng...a hah thlak em mai.

    ReplyDelete
  12. Puibawiha - nia, han sermon hlawm se tha ang

    Zaia - nia, i sawi ang hian a tha lo lam hi a langsar awl ve bawk a, a tha te hi chawisang thiam bawk ila tha tur a nia.

    Zawlnei Elija pawh a beidawn hnu pawh khan Baal hma-a thingthi ngai lo chu an la awm teuh tho kha maw..

    Geminiboyz - ngaihtuah ngun a ngai khawp tak mai, lehlamah chuan mahni theuh hi fihlim tum ila kan tha tlang ni mai tur..

    illusionaire - e, a va lawmawm ve aw... zahthlak deuh roh bawk sia.. :)

    luliana - 'chance siam loh' hi ni e a dik e. Mizo mipa te kha han tang deuh ula...

    EPISTEMOLOGY - Kohhran zirtirna han tih hluai ai mah hian inchhunga inzirtir tam hi kan mamawh hle zawkin ka hre mai mai. i sawi ang hian practical deuhin Nute hian an fa-te zirtir thei ta se..

    burgerstud2005 - aw.. patling nupui fanau nena inkaihnawk nuai tawh turah ka lo ngai che a, Pu Pawla sai i lo la hlau a maw?

    Thiama - Thank you. your excellent comments encouraged me to go on...

    Tharax - ngaihtuahna hi a kal khawp a, kan umphak lo fo reng a nih hi, kei ngei pawh hi ka han ziak teh duah na-a ka fel ber hauh lo a nia..

    Awzman - Ni e, mizo hmeichhia-te zahawmna chu an mizopui Mipa-te ah a innghat alawm. Min chawisan thiam leh khiii-ah, thiam loh leh khuuuuu-ah...:)

    ReplyDelete
  13. I ziak tha hle tak mai. Pre-marital sex chungchanga kan ngaihdan hi a inthlak hret hret em aw, ka ti. Nikum khan tleirawl ho zinga thawk thin kan thianpa nen kan titi a, "Inneih hmaa sex hman hi sual nia ngai reng reng lo tleirawl an tam tawh zia hi i hria em?" min ti. Promise keepers movement te hi thalai hruaitu tha takte hnuaiah kalpui theih ni ta se engnge kan an ang aw...

    ReplyDelete
  14. Faka - A va lawmawm ve. ni e, eng tak ang ang mawle... kan thilhmuh leh hriatte hian a tha lam ai mahin a chhe lamah min hruai nasa thin bawk si.. tihngaihna tak hi a vang khawp

    ReplyDelete
  15. he article chu va tha thuai thuai vele

    ReplyDelete
  16. ka rawn sawi tum zawk chu; "Zirtirna" reng reng chuan eng ethical/moral backup tu a nei ngei ngei thin.. Mizoramah chuan ethical taka min kaihruai turin Kohhran hian mawhphurna a nei thuk hle a. Inchhungkhur nihna a inchen lo em em- entirnan, nu ber ler deuh te, Pa ber nula kawp reng te...etc kan tam em em tawh..Mahni fanu ngei ngei zuar te pawh kan awm nawk tawh a ni...Nu leh fanu zana zu in ru reng thin pawh ka hre nual mai...! An fate chuan entawn tur a vang ngawt ang. Hetih lai hian Kohhran chuan rualtlang takin he khawvel kan awmchhung atan hrim hrim pawh "inzirtirna" hman tlak hi min pe thei a ni.

    Hei hi ka rawn sawi tum a ni.

    ReplyDelete
  17. EPISTEMOLOGY - I ti dik e, i sawi tum chu ka hrethiam e, ni e, chhungkua hi kan in ang lo khawp mai, kohhran chuan a khairual thei zawk ngei ang

    ReplyDelete
  18. Pi leh Pute atanga 'Nulât Tlangval' uar ta hrim hrim kha kan nia - Tun hnaia rawn lâr thar pawh a niin ka hrelo. Hmanlai atang tawh reng khân Nulât/Tlangval fa nei kha antam em asin - An ngaihthah na a lan na pawh 'Sawn thlâk' man hi tun thlenga a tlawmna em em hi ani bawk. Pu Vâna pawn mipa nula la theilo a sai alawm, khaw tetak te te ah nula thianghlim an mawlo tihna ani maiin ka hria.

    ReplyDelete

Followers