Friday, March 27, 2009

Buaibuti

2007 kum tawp lam khan office hna tulah Kolkata kal a ngai hlauh mai a, hlauh taka, Christmas hnai tawh bawk a, chakkhai lam pah rem fu ang tiin phur takin ka insiam vei surh surh a, thiante leh chhungkhat te pawhin chutia a hun tak maia phai kal tur chu mamawh min chah nasa nangiang, thil chahte chu ka note bu te-ah chuan ka list vei thlap a.Tluang takin ka tum ram pawh ka thleng a, note bu-a ka ziah lohte pawh phone hmangin thil hawn tur min la rawn chah lawp lawp hlawm bawk a, ni danga khawih pawh ka la khawih ngai loh Tennis racquet thlengin min rawn chah a, keimah rau rauah chuan ka luck ve lai tak niin ka hria a, inti fel em emin ka rawn hawn ang tiin ka promise liam puat puat hlawm a.

Pathian tha takin min awmpui a, ka kal chhan ber ka hna chu Kolkata-a thiante zarah ka thlen tuk chuan ka zo fel ta mai a, zawh hman loh hlau-in return ticket lah chu ni hnih hnu-ah ka OK daih si, bazarna hun thawl duhthusam ka nei thei ta.

Tichuan, tih tur ber zo tawh bawk a, kawlpui ka kheng thla e, ti ang maiin bazar lamah chuan chakkhai chi hrang hrang lam turin ka phek chhuak ta a, kalna tur leh lei tur ka ngah em avangin thiante pawh ka hruai duh lo a, an nin palh takin tih thu-ah keimahin ka'n ar kawh chhuah ve tawp mai a ni.

A hmasa berin ka u pakhatin trolley suitcase min chah kha tiin new market lam ka'n hma phawt a, suitcase tha tak hnuh kal theih chu tlawm takin ka'n lei ta pang mai a, mahse ka tisual chiang hle mai, a lian si, pawm bo mai mai theih ni tawh hek lo, ka hnuk ka hnuk ta mai a, thil dang pawh ka lei belh zel a, new market-ah chuan ka suitcase chu ka hnuk ri ta rum rum reng mai a, vai ho chuan min en zui vawng vawng zel bawk a....

Duh tawka new market lam ka riam hnu chuan ka pawisa ken sa chuan daih ngaihna awm hek lo, inti changkang leh inti fimkhur-in pawisa fai keng tam duh lo-in ka account-ah mi pawisa min thawn vete chu ka dah vek si. ATM lam pan a ngai ta. Bag leh pheikhawkte ka lei duh bawk a, BK Market bul lawkah ka hman than em em ATM chu a awm kha tiin BK lam chu ka pan ta vang vang a, mahse aw, ngai teh, BK market bula ka ATM hriat chu a lo chhe hlauh mai, pawi thei ve... khawnge SBI ATM dang ka hriatna ka'n ngaihtuah chiam chiam a, tichuan taxi la-in ka zawng ta ngat ngat mai a, taxi driver pawhin min buaipui na-rawh e, hmun pakhat-ah chuan ka hmu ta hlauh mai, taxi atang chuan ka chhuk sawk sawk, ruah a sur suap suap zui, taxi driver pawh chuan ka tlanbo mai a hlau teh chek nge, ka buai lutuk a hlau zawk min rawn um ve dawr dawr zel a, ATM chu lo tha hlauh mai, ka duh ang pawisa ka la chhuak thei ta bawk a, ka thaw huai mai, mahse khua a lo tlai tawh em em, lei tur ka la ngah si. Market lam chu ka pan leh ta nal nal a.

Duhthusama bazar ka zawh fel chuan tlai lam dar 7 a ri der tawh, ka thlenin te chuan kei, mahni-a chhuak ta ringawt, dar 7 pawha la haw lo chu min ngaihtuah nasa mai a lo ni, min rawn phone ta chul a, khawnge I la awm em em, rawn haw vat rawh min ti. Kei lah ngaihtha em em in ka lo la bazar veng veng si a, e, ka lo haw dawn e tiin thlamuang takin kan inthlah ta a.

In ka thlen chuan buaina dang a chhuak leh ta. Ka thil lei zawh zai chu khawiah nge ka vawmbo zawh tak ang le.... suitcase lian tak 2 chu ka nei ngei a, ka thleninpa lah chuan a U-te signboard tur Puana siam poster lian pui, ka Dung chen lai tur chu min thawn a lo tum ve chhen a, hawnsak loh ka hreh bawk si. Ka thil lei vel chu ka'n pack ta tak tak a, ka cabin baggage takngial pawh chu zahthlak khawpa rit hi a ni a. Engemaw ti ti-in ka inbeng zo thei ta hram a, khawi lai mai pawh chu a khat tha em em vek mai a ni.

Tichuan, ka haw tur ni chu kawl-ah a lo chhuak ta, thiante leh chhungkhat laina-te thil tur ka hawn hnem bawk a, phur em em-in bungraw tam tak nen Bapui tuai loh ang tuamin ka thleninte nen chuan kan invai liam ta a. Airport-ah erawh rin aiin buaina ka tawk ta lo hlauh, theih tawpa cabin baggage-ah thil rit chi hlir ka beng avangin ka luggage chu kg 5 chiahin a excess a, min chawitir lo hlauh mai. Hlim em emin, tluang takin Aizawl lam pan chuan thlawk chho ve leh ta nal nal a.

Tin, ngai teh, Lengpui airport tluang taka ka thlen chuan kan thawnthu chu a tawp mai tura ka ngaih laiin a lo ni hauh lo, Arrival-a bungrua kan chang chu ka suitcase pakhat lo thleng ka chawi thla ka bula ka hung, a dang ena khaw dang ka hawisawn hlanin miin an lo la daih mai, ka buaizia leh mangan zia chu sawiin a siaklo, sawi loh pawn a siak chuang lo. Ka bula mi pakhat chu ka suitcase a hmuh leh hmuh loh ka zawt, mipa naupang pakhatin a lak kha, a chhuak tawh a ti ta mai.... duty ho ka ko, ka suitcase 1 mi-in an la ka ti, security an ko, air office ka lut, awm an awm mumal lo, ka chhuak leh, uite vawihkhum ang maiin ka vei tuak sek tawh mai, pawnah khi...tah parking vel-ah mi haw tur kan han enkual, kan hmu silo, ka bungraw dang ka la la bawk si lo, kha hun kher kha chu zawng mang chhe mang ang maiin ka talbuai. Min hmuaktu lah chu ka be lum lam hman lo, enge thil thleng tih hre mailo khan ka kalna apiangah min rawn um tak lawp lawp a...

Airport authority lam-a thianpa Vala ka phone ta ringawt, ani lah thlawhna bulah a lo la awm a, tikhan lo awm reng rawh, ka lo kal ang a ti a, a rawn tlan phei, chanchin ka'n sawi vel a, I suitcase chu I tag nen I enmil em? I ta ngei a ni maw? a ti, ka chiang ta hauh lo, ka lo enmil hauh lo mai a, I ta a ni lo mai thei asin a ti. Bungraw off-load a lo tam em em mai niin, report-ah hian ziak ve phawt mai la, naktuk lamah a lo thleng em tih ka lo ensak ang che, tunah chuan tih theih engmah a awm chuang lo a, haw phawt rawh a ti a, rilru bet lo zetin ka haw ta hnak hnak a.

In ka thleng pawh chu sai sawm kap ang maia luh tum kha, a thla tliak ang hna hna-in ka lut ta a, ka thil bo dan ka'n sawi suam suam a, naupang ho thil hawn nghak ho pawh an lo awm kim thap a, hrilh a hai duh ngei mai. Ka nu chuan, “In zin zing ve tawh a, harsatna leh thil bo pawh in sawi ngai lo a, mi chan in hriat ve na a nih chu, tawngtai ila, I hmu leh mai ang” tiin awlsam te-in min hnem a, rilru chu hahdam deuh huai a. Kolkatta lam thiante pawh phone-in ka zu hrilh, min mangan pui hle,kan lo tawngtaipui ang che an ti.

A tukah chuan Omega travels-ah bungrua a rawn thleng em? Mahni bungrua lo la palh rawn dah an awm em? tiin ka kal deuh chhen, anni pawn an ning viau mai thei. Mahse tha takin min chhang a, I la hmu mai ang an ti, an buangrua lo an la a nih chuan rawn dah mai awm tak a nih laia chu chen chen thawm ka hre lo chu thenkhatin min manganpui a, passenger list dil rawh an ti. khami ni-a thlawhna chuang ho list ka dil, min pe ve mai bawk, detective story te pawh a ang tan ta riau mai, airport-a lo hmutu khan mipa naupang a tih avangin hmeichhe ho chu chhui a ngai lo phawt, chutah mipa-ah pawh puitling chu kan paih leh thei, mipa naupang chuang chu an lo tam lo hle mai, kan sawr zim sawt viau e. Mipa naupangte chu a kalpuitute nen an hming ka la a, an phone number nen, hemite hi phone a, an bungrua ni lo an hawn em? tih zawh chauh chu hmabak a ni ta.

Mahse a la awm tlat, khami te khan tum rengin thurualpui neiin lo la ta se, kan bungrua ni lo kan hawn lo, lo ti ta tlat se, kei hian phone ringawt ila, min chhang tha duh dawn em ni?

Chutia hawina lam ber tur hre lo-a ka inngaihtuah buai lai chuan chung lam chhanna chu airport lama thianpa Vala atang daihin a rawn ri ta a, I bungrua a vaiin kan hmu a rawn ti. Halleluiah.............. Aw Lalpa thatzia hi tih a ni ringawt mai.

Ka bungrua kha a vaiin an lo off-load vek a lo ni, ka suitcase emaw ti-a ka lak ngawt kha ka ta a lo ni reng reng lo, keima thiam loh vek alo ni, thianpa Vala'n I tag nen I enmil em a tih chiah kha, lo enmil ila chuan ka ta a ni lo tih kha ka hre ngei dawn si a.. aw,... kan mipa naupangte kha ka lo phone hman ang tih a va hlauhawm tak em... Vala chuan Lengpui atangin tlaiah a rawn phur haw leh ta zel a, mite hi chu an va fel zozai tak em tihte ka ngaihtuah a, Pathianin kan tawngtaina a chhang a nih hi tiin ka NU erawh a lo lawm em em thung a, Kolkatta-a ka thiannu thung chuan Ka rinna a la chak tha a nih hi tiin Pathian a lo fak thung a.

10 comments:

  1. Van neih thlak takin i tawn ang hi ka la tawng ve lo hlauh va.

    Mahni chauhva hnawm-tin-phuri-nu ang mai a, bawr hawk tak maia i haw kha Pathianin a khawngaih deuh che pawh a ni mahna Lol!!

    ReplyDelete
  2. Engtik thla nge i buaibut lai vel hi!!? Lengpui Tumhmunah chuan i thlan ve nasa ngawt dawn a nih chu!! Kolkata New Market vela i'n inhnuk ri rum rum lai vel chu hmuh i va chakawm ve aw!

    2003 daih tawh khan New Market-ah khuan bawr em emin, keimahin ka kal a. Cricket World Cup lai, final-a Pakistan leh India inkhelh lai vel kha a ni a. India an han chet that deuhte khan, kan indawr buai lak tak a nih pawh an thluk tawh lova, min han lam san leh rih thin a! Khawlum nen, bengchheng nen, mahni bawr bawk nen..

    Kawlpui kheng thla, Sai sawm kap ang, thla tliak ang hne hne... tawngkam lah hi, i thiam tawlh tawlh mai.... Nice read.

    ReplyDelete
  3. Hetiang ang buaina tawk tur pawh hian ka la zin tlem em a ni. I bungraw tihbo i hmuh let leh avangin ka lawmpui che a, hetiang tawk thei tura damna leh hun tha i neih avang pawh hian.

    'Buaina phen a hlimna' tih thupui ah rawn hmang ta la a inhmeh viau in ka ring he he he...

    ReplyDelete
  4. Ziakthiam ten, in kawlawm i han thai kawi tak tak hi chuan, a tawngve tu ang maiin chhiar lai pawn tang teuhin min awmtir a. I buaina leh mangangna kha keini tan thawnthaw ngaihnawm a lo chang leh hlauh thung si!

    ReplyDelete
  5. A ngaihnawm phian zel e. Vawikhat pawh ka nupui Kolkata kal a lo haw a. Krismas dawn a nih avangin a bazar ve fu a. Nghakhlel taka a bag kan han hawng chu hostel naupang, hmanhmawh taka mahni in lam pan tur, engkim inhnawh hnawk nuaih bag a lo ni reng mai a, kan hrilhhai teh asin.

    Mhase, a marksheet atangin a pa kan hre thei a, phone directory atangin an number kan zawng leh a, kan hmuchhuak leh ta a, darkar khat chhung vel chu kan buai ve hman.

    'khawi lai mai pawh chu a khat tha em em vek mai a ni' a neitunu dungthulin (lol)

    ReplyDelete
  6. New Market a suitcase i hnuk ri ruih ruih tur ka mitthla in ka suangtuah a ka nui nasa ngei mai - Kawng lâh chu a biboh nasa ropui si. BK i han thlenpui thei pawh chu i chhuanawm reng reng e - I ATM hmantum pawh a awmna ka hrethei nghal mai, AC Market hma ami kha a ni chiang mai.

    I inla Sherlock Holmes viau na in, i 'Haihawt' zawk anih chu. I va han che buai mai mai ve a - Ka hmelhriat Air Ticket ka 'Confirm' sak tawh alawm, mahse minit nga hnuah Delhi Rail Station ah a Rail Ticket chawpin zu han tibo a mawle. Chuvangin la changkâng tak i ni e. Boy's School ah i thleng em ?

    ReplyDelete
  7. ekhai!! chu tlem a tlem ah a tlem lo chauh ani maw . kolkota airport vel hi chu a buaithlak ani. kei pawh hmanni ka haw tur darkar chanve vel ala awm in ka thleng a..confirm ticket nei e ti a engthawl em em kha "seat a full tawh" tiin min lo chhang a counter an khar ta mai..thlawhna chhuah nan 15 minutes chiah a awm tawh..ka thianpa thawk ve ka phone chawp a , reserve pakhat an dah ah min kal tir ta ringawt alawm. security check tih dawn a in tlar put ngai te khi a buaithlak em mai kolkata chu :)

    ReplyDelete
  8. Puibawiha - Hetiang han tawn hi a hun lai chuan a nuam miah lo.. Pathian thil rel dan hi mak ve thei deuh a ni :)

    Zaia - I va chhiar chiang awm lo ve.. zirtirtu ni ila chu ka hrem ngei ngei ang che. Kum tawp lam, Krismas hnai tawh tihte khian IDEA tlem tal a pe lo che em ni.. he hu mai.. :)

    Tawngkam hi nangni angin ka varak tui thiam ve lo..

    Geminiboyz - Buaina phena Hlimna tih thupui hmeh tur chu ka la nei nual mai thei asin.. Zawhte upata upa ta na na na hi chu tawnhriat hi tam ve tawh a nia...

    Sekibuhchhuak - haha.. ziakthiam ten han ziak ula chu khi aia ngaihnawm leh tawi fel khian in ziak ngei ang mawle, kei chu ka tlak leh duah thin..

    Fela - Hahaha..kha daih kha asin.. Buaina hi a thleng zeuh zeuh thin a ni.. U Pari buai vel tur chu ka mitthla-in ka hmu.

    Ka khat tha vak tawh lo, ka tar tawh a.. ka zur tan.

    chhangte_ll - New market-ah khan maw, Vaiho khan Thi tur melh takin min lo melh ka ti mai,. ATM chu i hriatna kha ni chiang e..

    Ka upa tulh tulh a, ka haihawt tulh tulh a nih hi. Boys School-ah chuan thleng e, mahse U Sawma te awm hma ania..

    avena - hahaha.. Kolkatta - Mumbai flight ka missed tawh alawm kei pawh, ka han dil chiam pawhin "Sorry Madam" tih bak chhanna ka hmu lo. Next flight min pe. Nang chu thian i nei a, i vannei bik a nih chu

    ReplyDelete
  9. Tlem chuan kan ram kalphung hi chu a la buaichuar deuh chu a ni e tiraw.. Western world atanga han kir chang te hian thaw hi a ippik hman thin khawp mai. Bag bo chungchang chu ka la tawng lo na a, December 26 khan ka flight ka miss hlauh mai a. Ka in check in tawh si a, ka bag lah chu a awmna pawh ka hre tawh lo va, an phur daih ngeiah ka ngai a, ka rilru a hah em em mai a.

    Mahse, mi ram zawng an lo rel kim thin e, thlawhna luh dawn tep a, passenger hming comoutera an register ah khan ka tel hman tak loh avangin ka Bag chu an lo thun tel ta lo kha a ni a. Bo miah lovin, security ten ka awmna hmunah min rawn pe thlap mai a, ka thaw huai.

    ReplyDelete
  10. Puia - Ni e, mi ram nena han in tehkhin ngam chi pawh hi kan la ni rih lo a nih ber hi ti raw..

    ReplyDelete

Followers