Friday, December 12, 2008

Bat dei lawm ila

Tunlai chu Masi boruakin min chiah vel a, mahni tawkah buai ve em em a, ramriak bel ang maiin ka indaihlo a, chutih karah blog update ka duh ve a, ziah tur lam ka tlachham bawk si... eng tak chu ka ziak dawn ni maw ka ti a, ti hian ka ti ka ti kual a, Krismas te a lo thleng ang a, ka lung a va leng dawn tak em aw... Kenya lamah kal daih teh ang, tah chuan U Bula te bulah va thum bul bul ila ni mai ka ti ta a...

Ka ngaihtuah zel a, naupan laia kan Krismas hman dan-te, khaw vawh theih zia-te, tlaivar kan chak em em laia, khua a var thei tlat lo mai thinte kha aw.. zing lam Dar 2 velah chuan kan muthlu leh nge nge thin a nih kha.

Hetiang vel ka ngaihtuah lai hian naupan lai chanchin ka ngaihtuah chhuak a...

Lunglei kan awm lai (1985) vel hian Bat dei (Birthday) lawm hi kan han uar laileng khawp a, zan tin mai hian lawm tur tawk hi an awm reng mai a, naupangho intihhlimna a ni ber ang chu kan ri lui lui thin.

Vawi khat chu naupang pakhat hian kan veng pitar pakhat chu a birthday lawmna-a kal ve tur chuan a sawm a, Pitarte chuan, “Enge bat dei chu” tiin a lo zawt a, a ni chuan “Ele, chau ( Chow)” tiin a chhang.

A ni taka bat dei kha kan lawm a, chow kan kang ziah a, (chow chhuah tirh kha a nia.. ) kan ri dur dur thin, naupang a thu chang a birthday neitu khan kum engzat a hmanna nge tih pawh kan ngaihtuah ngai lo ni mai lo-in tu ber kha nge tih pawh kan hre chang lo hial thin.

Kum tinin Lal Isua piancham kan lawm a, kohhran tinah ruai theh tumin kan hmanhlel a, In leh Biakin, Kawn, kawtthler thlengin mawi tak takin kan chei a, naupang chu sawi loh nu leh pa thlengin thil thar engemaw tal neih kan tum vek a, zaikhawmna lamah erawh chuan nu leh pa lungleng zual tlem azawng bak hmuh tur an awm ngai thung lo. Theihtawpin kan inchhekarbawm a, uar takin kan hmang a, kum a lo thar meuh chuan kan chau hle tawh mai thin a nih hi.

Lalpian champha kan lawm dan hi in en chian a ngai hle tawhin a rinawm. Lal Isua tellova a birthday lawm hi kan tam viau thin lo maw le????. A behbawm buaipuia kan phul hlut thin hi bansan a, thinlung leh tih tak zeta naupiang chibai kan buk hi a hun tawh tak zet a ni.

8 comments:

  1. I rawn intehkhin thiam hle mai "ram riak bel".

    Vawiin ni hi ka tan "chow" a ni e.

    ReplyDelete
  2. i khapdik thei reuh hle mai,nia a chow neitu hre leklo a hmang tur tun kum ah poh kan tam leh khop ang,mahse nang leh kei tal chuan a chow neitu hre ranin kan hmang dawn lawmni?chow i sawi tak ah chuan kum 1978 khan kan thenawm ten an siam a ka ei tawh a sin,Lunglei lam ah chuan a rawn thlengphei tlai deuh a nih dawn chu,inva insawn kualnasa awm dun dun ve a khuangruang ang mai

    ReplyDelete
  3. Keipawh tunlai chu ' lovah belte' ang mai ka ni ! :)
    Ngaihnawm e! Engtiknge i bat dei? (hehhe-fiamthu)

    ReplyDelete
  4. Dik leh pek!!
    'ramriak bel ang maiin' ka sawi zawk ni awm tak a ni!!

    Tlangvalho hi i bat-dei ka hrilh vek nang a!!

    ReplyDelete
  5. Dik khawp mai, ka u...a phawvuakah hian a tam zak hi chuan kan lo tlingtla leh mai thin... :(

    Merry christmas auh

    ReplyDelete
  6. bat dei chu chow...ka naupan min ti hrechhuak, good one

    ReplyDelete
  7. kan naute Suangpuilawn zin pawhin chhunah thingpui hmeh atan chow an kang a, an thenawm naupang lo lut chuan "tu bat dei nge in lawm a?" a rawn ti :D

    ReplyDelete
  8. @ Krismas leh Kumthar ka zinbo chhungin blog ka lut thei lo a, blog tlawhtu te zawng zawng kumthar chibai ka buk a che u. In lo len luh hlawm avangin ka lawm em em tih hi ka sawi theih tawk ni rih mai se...

    ReplyDelete

Followers