Thursday, October 23, 2008

Chukchu dang

Hmanni deuh khan Medical Certificate ka mamawh avangin Doctor-ah check-up turin ka kal a, ka hmanhmawh pheng chuan ka tarmit ka keng lo a, office-ah tlan let lehin ka tarmit bawm dawhkana ka dah chu ka'n tham chhuak ringawt a, a tarmit tak chu Computer bulah a awm reng a, a bawm ruak ka lo keng tih a hmunah ka hmuchhuak chiah pek.

Doctor chuan min han check ta ngei, certificate duh chauh ka ni bawk a, natna dang nei hek lo i, ka mit berkher chu a lo check a.

Bangah hian mit entirna-a an dah thin ang alphabet tlar sawm emaw lai tur hi a khai a, a len dan indawt thla zut a ni a. Hla de daw-ah hian min thuttir a, "i mit lehlam kha hup la 1st line kha chhiar rawh le" a ti a, ka mit ka'n hup chu engmah ka hmu thei ta lo, "Ka chhiar thei lo" ka ti a, ani lah chuan "Chhiar rawh, chhiar rawh, tlar hmasa ber kha, English anih kha" a la ti zel a, "A te lutuk a, ka chhiar thei lo alawm" ka tih pawh chuan, "I mit kha hup la, lehlam hup leh la, line hmasa ber atang khan chhiar thla rawh" a ti zel a, tlar hmasa ber chu sawi loh, tlar li-na pawh ka hmu phe ruai mai a, chuti fakau-a ka mit lo chhe ta chu kei pawhin mak ka tiin ka tah a chhuak ut ut mai bawk a.

Ka vanduaina belhchhah turin Doctor lah chuan English a thiam lo zui, portuguese-in rang zet zetin a sawi a, "Tarmit i nei em? I tarmit nen khawi nge i chhiar theih" a ti, chu tak chuan ka chet chukchu-na a belhchhah, ka tarmit ber chu office-ah ka theihnghilh daih si. A thinrim lek lek hian ka hria a...

A tawpah chuan ka mit veilam hi a chhe zual a, dinglam chuan tlar hnihna vel chu ka chhiar thei a, ka ti a, ka nuih hi a za tlat mai a, Doctor pawh chuan nui chungin, "I tarmit chu bun reng rawh, motor i khalh phei chuan tarmit nen hlir khalh rawh" a ti a, lehkha chu tha tak chuan a ziak ve ta a, hlim takin kan inthen thei ta hram.

6 comments:

  1. E khai! Tarmit te i lo bun toh elo?
    Mak deuh a ni, haihawt hi chu. Kei pawh, SundaySchool-ah ka zirlaibu emaw tiin Nilai Thupui bu ka keng a! A kawm (cover)ran dan kha a inang lutuk a. Naupang zirtir tura ka'n lachhuak chiah chu..... fuh lo a sin aw.... nice post

    ReplyDelete
  2. Zai, Ka tarmit bun lo ka buai anih chu.. :)

    Taka taka Doctor-in min chawhna a rei tawh a, ka bun tha peih lo a, hna ka thawh chauhin ka bun thin a, rin aiin a lo chhe daih tawh a lo ni.

    Keini chhungkua pawh hlabu emaw tiin Dictionary kan keng fo, a kawm kan siamtir ve ve a, a in ang lutuk a...

    ReplyDelete
  3. Middle School kan kal laia English Reader kan zirah chuan Kutchu-a awm a. Anni chuan a tarmit bun reng chungin 'where is my glasses' tiin a zawng char char thung.

    ReplyDelete
  4. @Fela - Nia Kutchu kha chu mawl vah vah em alawm ti raw. Khatiang em kha chu ni ve lo ang chu maw..

    ReplyDelete
  5. Khawmualpui dang ah pawh zia te te hi chu a lo in lar leh mai thin lawm,tak tak ana dawtsawi that lo zia lanna ah ka ngai hmiah mai,for example ah te pawh a that viau hi a

    ReplyDelete

Followers