Tuesday, July 12, 2011

Ruih theih chi hrang hrangte

Poli-tricks nge Po-lie-tics nge Politics tih pawh kan ngaihtuah ngai lem lo, naupan laia MLA inthlanpui awm dawn apianga political party hrang hrang inauhkhum thin dan leh an inchirhtheh tawn dante ka rilru-ah a lo lut mai mai a, khang lai khan a phuk aphak kan hrethiam tak tak lo-in kan lo uipui-tuilian-thlir ve mai mai thin kha a ni a.

1989 kha ni ta-in ka hria, MNF ho campaign khan an ramhnuai mite film an chan kha an chhuah thin a, kan kawt kha kawn zawl nuam leh zau deuh a awm avangin kan kawtah khan screen lianpuiah an chhuah thin a, narrator khan thiam tak maiin, "Kan pasalthate chuan remna leh muanna duh avangin ui tak chungin an silaite chu an tung ta" tiin a'n sawi a, ramhnuai mi lubuk tak tak khan uluk leh dim takin an silai kha an han tung a, chutah a tawp lamah zaithiamin "Zoram hmangaihtu Lalpa, kan ram hmangaihtu Lalpa, Kan ram hruaitute hi min pui la, i Lalna puang chhuak rawh" tih hla kha an han sa ngei a, a pui kan ti thei teh e. Keini naupang chumchiap mai mai pawh kha kan mittui te chu a hnâm ve sawk sawk a, vote -te phei lo nei tawh ila chu MNF kha kan vote chiang ngawt ang chu.

Khatih lai khan "MN ka sawi thei lo, zoram hi kan ram a ni" tihte,

"Tlaitla-in lenkawl khua a lo thim hian,
Riakmaw sirva leng iangin,
Riahna run kan vai tuk loh ram daiah
Piallei hmun rem kan bel e"

tihte chu kan be pui ve awl awl a, hriat erawh kan hrethiam tak tak lo. Party hla chu ka pa khan inchhunga sak a remti lo bur a, keini chu Neutral kan ni a, party hla sak ve vak vak loh tur a ti a, naupang a thu chang inkhualtelem chang chuan kan sa fo tho.

Party dangte lah an lo diau bik awzawng lo a, "Zoram thim chhah ber su kiang turin, Zoram Congress lo chu an awm lo" an lo ti ve zel a.

PC lah chuan,
"PC kan ni e, kan lawm a sang tual tual
Kan hlimin kan lawm kan ram ngeiah hian
Foreigner kan duh lo, ram pek kan tum hek lo
Kan pek sa pawh lakkir leh hi kan tum zawk a ni" an lo ti, tute nge Foreigner an tihte kha kan hrethiam ngai der lo.

An party office-a mi pakhat thusawi ka la hriat reng chu "Eng anga kutphah hlai pawh rawn kalpui mahse kan bukna hian kan lo buk zel ang a, an tling thei lo ang" a ti lauh lauh, PC ho symbol kha Patla a ni miau a!

Eng thil pawh hi a ruihchilh pawl hi awm zel a ni a, zu chauh hi emaw ruih theih kan ti mai thei a, a lo ni hauh lo, RUIH a nih tawh chinah chuan thil tha tak pawh hi a tha lo lamah a chhuak zel ni awm a ni. Politician te hi ram hruaitu tura Pathian ruatte an ni a, dik leh fel taka rorelin Pathian tih chungin ro an rel tur a ni kan ti thin. Mi hlemhle leh dik lo te an awm thin avangin ramin a tuar a, eirukna leh hlemhletna chuan hlet nasa tak chhuahin kan Mizoram zimte-a mizo, uihum lekte hian hmalam beiseina pawh nei thei lo lekin kan innekchep -in kan in the thu tawh chu a ni a, hmabak thlir chuan tu emaw Pathian thu sawi ang maiin "A pikin a pik chun" hian a hriat tak tak thin.

Politics tuinu-a inbual laklawh tawh hi chuan vawk tuihawka inbual ang maia silfai har a ni hial ang, mi dik tam tak awm thin mahse, mi dik lo an awm thin avangin politician te hian dem an hlawh fo thin reng a ni.

Ruih tih takah chuan Kohhran pawh hi a ruihchilh theih ni awm tak a ni, kohhran thenkhat, an kohhran ni ve lo chu Vanram pawh kai miah lo tura inzirtir te an awm a, Kristian theuh theuh kan rin dan hi a intum pel-inpul hlawm a, ti sual a mual mual pawh kan awm mai thei a ni. Engpawhnise, kohhran ruihchilh a, thlarau meuh pawh ruihchilh hian pawlah leh kohhranah rah tha lam aiin rah tha lo a thlen zawk chang a awm thin, hei hi ven fimkhur a tul a, kohhran hruaitute an pawimawh hle a ni.

Zu hi mi tam ber chuan In thiam a pawimawh, khap kher a ngai lo an ti, mahse in thiam an tlem bawk si. In tam chuan ruih theih a ni a, zurui nge nge hi chu rilru a fim lo a, rui lo ai chuan buaina siam pawh an sam zawk, hei vang tak hian zu hi a tha lo a ni ti-a sawi theih a lo ni thin. Zu khap lo-a in thiam tur chuan mizo te hian inzir chu kan la ngai deuh niin a lang.

Ruih nei reng reng hi chu an nu phût vek a, pangngai takin an nung thei thin lo. Politics a ni emaw, Kohhran emaw, Zu emaw pawh nise, RUI a nih tawh chinah chuan a buai nak thin.

Hetih lai hian Ringtute chu zu in leh rui buaia awm lo tura zirtir kan ni a, chhuna awm anga mawi taka awm turin Tirhkoh Paula'n min zirtir. Chuvangin politics leh kohhran te pawh hi ruihchilh lo a, min siam tha tura hman chi a ni e.

16 comments:

  1. I hawl chikim hle mai, politics lampang te pawh i lo hre hle mai, In candidate la chuan ka vote chiang ngawt ang che. A dik ka ti hlawm khawp mai.. i thu ziah leh i ngaihdan i rawn tarlan te khi, thil reng reng han ruih chilh tawh hi chuan nie, hmasawnna hmelma lian ber ani alawm. I ziak tha lutuk tlat mai. Thuziah i thiam riau, nang hi. lo chhunzawm zel rawh,,,,

    ReplyDelete
  2. Eng thil tha pawh nise, a uchuak taka tiha ruihchilh anih tawh chuan a fuh tak tak thei lo. Thingtlang lamah hian political party ruihchilhna hi a nasa bik riauvin ka hre thin. A ruh tawh vek vek hi chu an ruh thei a nia. Party boruak thalo tak mai Kohhran huang chhunga lakluh te pawh ka lo hre fo tawh thin. Chintawk hi kan va nei lo tak em.

    Varte-i nge nge, i blog luh man hi a awm thin. Mit a hah, hriatna erawh a pung, ka hlawk haw lawih thin a ni deuh ber mai.

    ReplyDelete
  3. Kan naupanlai kum 1989
    Naupang hle mai a.kha mi kum Suangpuilawn bialah election ampaign in party pakhat MLA candidate ka pui hahah.

    Jet U zu hi maw mak ka tih em em mai chu maw Mizoramah khan a in tu aimahin a in ve lotu ho khan an rui zawk in ka hria.
    Helamah chuan Biakin zu ngat han in hi nuam ka zuk han ti tlat pek a.
    Biakin pan dawna han khiah pap te hi ka ching tlat.

    Ruihtheih zz hi chu ka rui ve vek toh.Tunlai chuan ka ruih chilh toh ngai lo.Ka fim chilh tawh zawk.

    ReplyDelete
  4. MNF hotu te in surrender dan kha a hming an phuah mawihnai ve ngawtin ka hria..."Peace accord sign," an ti zaih mai ania. Englekhawle, i ziak a ngaihnawm khawp mai.

    Engkim hi a ruih (atpui) theih a, a lutuk chin chu thalam aiin thalo lam min hruaithei tu zel ani tlangpui awm e.

    Kan damchhung inzir zel tur kan nih laiin Mizoram erawh inzirna hun protestant kohhran te hian a member te asiam miahlo ni berin alang, apawi khawp mai. Zu inthianm tur chuan inzir angai. Lehkha thiam tur chuan inzir angai. Chawi ei dan hre tur chuan inzir angai. Puitling ni tur chuan inzir angai. Chutiang zelin zirlo vin thiam ngawt ngaihna a awm lo em a ni e. An chhuah zalen zawk chhung lah khan tar kiring ho sawisel karah ani a, thiam tura infuihna lam reng a nilo, hmelmaah an siam ngawt anih kha.

    ReplyDelete
  5. @David - haha, ka hawl pawlh leh nuai zel, a tira rilru-a awm lote pawh han ziah hian a lo lang leh ruai ruai thin a, a professional lo khawp mai :D

    @caribou - i ti lawmawm thin e. Nia, Politics leh Kohhran hi kawprem taka a kal tur a nih laiin Nu phût hi a awm thin a, buaithlak a ni e.

    @hmingtea - Kan CM ber paw'n zu hi chu a in leh in lo pawhin kan vai ruih e a tia lawm *hihi*

    Suangpuilawn bial kha thawk khat lai chu a rawn lar vak kha mawle :P

    @H. Vangchhia - a dik ngawt mai, inzir reng tur kan nih laiin zir tum miah lo hi an awm ve mauh thin a, khawvel a buai thin a nih hi. Zu chungchang hi sawi ka tum ngai lo, mahse khi a lo tel kur mai, ka vei ve tho aniang :-)

    ReplyDelete
  6. Thil hi i van chhinchhiah theiin a van hre rei thei ve aw.. Thu ziah tur lah chu i hre em em mai lehnghal a! I awhawm ngawt mai. Post tha tak a ni e.Thil hi i van chhinchhiah theiin a van hre rei thei ve aw.. Thu ziah tur lah chu i hre em em mai lehnghal a! I awhawm ngawt mai. Post tha tak a ni e.

    ReplyDelete
  7. Khing hlate chu i lo la hre thlip thlep a! I hriatrengna hi atha ngawt mai! MNF sign sakei lu lem sticker te kha kan van bel nasa thei tak.

    ReplyDelete
  8. TS Khupchong - i ti lawmawm e, nang deuh hi asin ziah tur hre thei ka tih chu aw.. i la naupan teh lul nen hian :D

    sekibuhchhuak - Sekibuhchhuak tih ziah ka tum a, ka pamtul leh deuh a, engtikah emaw chuan ka la ziak mai thei ni :-) Sakei lu lem leh congress ho kutphah kha kan bel kawp thin hahaha

    ReplyDelete
  9. Ruih theih chi hrang hrang te hi ruih loh tur i tihna a ni maw? :) 'Sekibuhchhuak' chu han ziak teh.

    ReplyDelete
  10. Kan pipute zu ruih a reh fel hmain, kristianna kan rui a, chutah politics kan ruih chhunzawm leh a, tun thleng hian a ram pum huapin kasauti, korean drama, etc. kan la rui ta zel a nih hi maw le! Thil thar reng reng hi kan ruihpui deuh zel em ni aw, a tih theih rum rum mai... I keuh thlu nalh leh hle mai.

    ReplyDelete
  11. Ruihchilh awl dan leh that lohna tihna em ni? A ngaihnawm dawn tan chauh a tha deuh hian i fun khawm zel a. Chhiar chhunzawm a chakawm thei i post ho reng reng hi, min ti vir tawk chauhin i rawn theh chhuak a, kan ruihchilh i hlau leh sia. I thuziah te chu zu leh politics/ kohhran tih vel nen chuan a danglam a lawm! Tuihnai deuh a tawi te a tlip loh dan han ngaihtuah teh :)

    ReplyDelete
  12. I hriatrengna tha tak chu i la chhawr zui zel a ni maw? Ruih theih chi i rawn sawi zawng zawng hi ruih loh chuan a mawi tawka khawih ve pawh a pawilo i tihna a nih hmelin ka hria

    ReplyDelete
  13. i ziak thra em mai.. a lawm nan, no hnih khat chu kan in sek ange aw...

    ReplyDelete
  14. I reh vang2 a tawpah tha deuh hian rawn chhuak leh mai thin a. I zaik tha hle mai.

    ReplyDelete
  15. Hotunu chu thil i hrerei thei riau mai.. ho te te anga lang hi, ngaihnawm tak hiawm i rawn chhuah thei zel a.. Politic lam te, Party hla vel hian lung a ti leng kher mai.. keini pawh kan veng pa ho khan Radio in inthlan result te kan inah an ngaithla thin a.. kan lo trang ve em em thrin a. ka Pa te ho tram em2 mai MNF chu an tlingzo ta lo, chutahle, kan venga Aizawl kal haw chuan 'Pi Hlimpuii bawm(ballot box) a bo a, tin bawm dang pawh a chingpen nasa khawp mai..' tiin thuthar a rawn nei a. kan lo awih ve em em thrin kha ania. mahse alo nihloh si zia leh van sanzia chu kan lo leikanga, a chiang tulh2 mai si. khatih lai khan nasa takin thingtlang mi, pa rilru ngil tak2 te kha an lo bum thin.. bum theih turin Party ruihchilh fe2 kan tam bawk si.. Mahse tunah chuan khatiang khan a tih theih tawhlo. Aizawl leh thingtlang pa te an fing vek tawh.. kei takngial pawhin 'eng party nge' ti lovin 'eng ang mi nge' tiin ka vote tur te ka thlithlai thin.

    ReplyDelete

Followers