Friday, January 7, 2011

Khuhhawnna - Zimbabwe zin thu

Nikum chhung zawng khan South Africa zin tumin ka hmanhlel a, VISA ka hmuh mai theih loh avangin ka pamtul ta thak a, Christmas tal hmang turin ti-a rilru ka siam meik laiin Lalpan kawng dangah min hersak a, Zimbabwe lam Visa ka hmu hlauh a, ka kal ta zawk a ni.

Zimbabwe hi British ho awp thin a ni a, April 8, 1980 khan an independence a, an Politician te corrupt lutuk leh rorelna tha lo avangin an economics a tlachhe nasa hle, 2009 atang khan lei rem an rap tan dek dek chauh a ni, an pawisa te phei chu a'n hlu lo khawp a, zillion dollar note te an nei vel a, 2009 atang khan US Dollar lah South African Rand an hmang a, tunah hian anmahni pual Currency an nei lo, USD nge ZAR an hman ang tih an inbuk vel mek niin a lang.

Mingo ho-in an awp chhung hian an ti rethei viau niin an sawi, Mihang kal phal lohna area te a awm a, tuna khawpuia an chenna hmun tam tak hi tunhma-a mihang kal phal lohna hmun a ni. A ram leilung a hausa a, sum leh pai tam tak thawk chhuak thei tur an nih laiin, mingo ho-in a hmun zawng zawng an pumbilh vek a, a ram neitu zawk chu hnathawkah bak an chhawr ngai lo a ni awm e.

Tuna President Robert Mugabe hi nasa taka ram tana bei leh dotu a ni, tualchhung indona nasa taka beitu a ni, politics avangin kum 10 chuang lung inah te pawh a tang a, indo a lo tawp a, ram chhunga a lo luh hnu chuan pasaltha chawimawina dawngin mipuite thinlungah a tla na hle a, Prime Minister hmasa ber a ni nghe nghe. Nimahsela, thuneihna leh lalna duh luat avangin a lalram hi midang a kian phal lo a ni chek ang, 2008 inthlan-ah pawh tling lo chungin a tling a, mipuite rikrap, tualthah leh pawngsual thlenga a mite an chet avangin an vote lo ngam lo a ni ber mai. hei hian a ram chhungah chhiatna nasa tak a thlen a ni.

Chuti taka an politics leh economy a chhe chung pawh chuan Sap ho sulhnu avangin a khawpui indin dan a felfaiin a nalh a, a nuam phian lawi a, a ram chhungah Ndebele leh Shona chu an local language ni mah se, saptawng chu an Official language a ni a, an zirna a tha a, sapram based vek anih avangin naupang te te pawh saptawng an thiam em em vek a, tar kiring pawh an tawng nalh hlei hlei.

Ka zinkawng chu - Mahni sum senga chawlh hmang tur ka nih avangin ticket tlawm ka'n zawng phawt a, a tlawm na na na chu a lo tha lo thin khawp mai. Maputo - Johannesberg zing dar 7-ah ka pan a, dar 9:30am chu J'berg - Harare a ni, thlawhna an lo delay ta pang mai. Transit ah chuan kan han in report ve sasawi a, Board-ah lah chuan Harare - Indef Delay tih an tar kuau reng. Air Zimbabwe a thlawh tum ka ni, South African Airways a thlawk turte chu an kal zung zung a, keini erawh dar 1:30pm ah rawn ngaichang rawh u min ti ta lek a.

Dar 1:30pm ah chuan ka va kal dek dek a, enge chanchin ka ti a, kan thlawhna chu a thlawk dawn nge dawn lo engmah an hre chiang thei lo, an phone a, Zimbabwe lamah meeting an nei mek a, chumi zawhah chuan a hriat ang an ti. Pilot ho an strike lo ni lek-in! Nakin deuhah chuan boarding pass min pe a, tlai dar 7-a thlawk tur an ti.

Zing dar 8 velah Jo'berg thleng tawh, tlai dar 7-a thlawk chhuak leh tur chu hun hi ka han ngah em em khawp a, airport chhungah chuan sum nei lem hlei lo-in ka vak kual ta chiam a, vawkhniakzawnthla ang chu nise, ka hniak chu a chiar dup ngei ang.

Rina loha ui buk sa - Thinrim deuh, engmah tih theih si loh, lunghnur deuh reuha ka vah pur pur reng lai chuan mi pakhat hian Hello hi a rawn ti pawr huar mai a, ka han hawi chhuak chu "Japanese i ni em?" tih zawhna ka dawng chawpchilh nghal a, ka ni lo chiang kuang tih ka sawi pawhin a awih lo a, passport phawrhin kan in hrilhfiah tep a ni. Chu mi chu Zimbabwen, kum 10 chhung Japana hnathawka awm tawh, Holiday hmanga haw tum a lo ni, Japanese ang min tih avangin min rawn be tawp a lo ni a. Kan ti ti ta a.

Victoria Falls kal ka duh a, ka thlenin turten min hruai theih loh thu leh Hotel a full vek tawh thute ka sawi thuphung a, ani chuan Kan kal dawn asin, mahse kan thlawk dawn a, ticket kan la vek tawh a, i duh chuan ka lo ensak ang che a ti teh hlauh a. Ani chu SA Airways-a thlawk tur a ni a, Harare-a in be pawp turin kan inthen ta a.

Zan atangin zingah - Kan thlawhna lah chu a reh vung vung mai, departure gate chu chauhthubarawhah kan han pan ve a, Dar 9-a thlawk turin an lo tar leh tawh, dar 9 a lo ni a, 11 an ti, an tawlh zel mai a, passenger chu kan mangang hlawm tak zet tawh. Dar 11-ah chuan gate an hawng a, kan thlawk mai dawn emaw ti-a kan hlim hle laiin thlawhna pana Bus kal hmasa zawk chu Passenger zawng zawng nen a rawn let leh. Counter-ah chuan kan awmkhawm a, an han âng hlawm tak tak mai ah... kei pawh thinrim engphiar mah ila, ka aiawh lal hma-ah a ding tih ang maiin ka sawi duh tur ve ang zawng zawng chu Nu pahnihin an sawi zo vek a!! "Manager ko thla rawh u, nangni aia thunei, a lal chin kan hmu duh" tiin counter duty te an ankhum, a thenin "Kan pawisa min refund rawh u" an ti thul, kan ri luih luih mai.

Thlawhna pakhat chu pilot strike vangin passenger tel lo-in a lo thlawk haw a, thlawhna 1 zawk khawl lam felloh vangin an repair an ti, thla a va han muang lo tak. Dar 12, zanlaiah chuan thlawhna kan lut ta, lung a dam kim chuang lo na-a kan thlawk chhuak ve ta poh a, dar 1:30am, Christmas Ni-ah Harare International Airport kan tum chu a hma-a thinrima ang phiar phiar ho khan kut an beng leh ta dar dar a.

Airport-ah chuan Colonel Wilfred Varughese te chhungkua-in min lo hmuak, Col Premai- ka hmu thut chu tah te lam lam a chhuak dawn, India mi, Kerala lam an ni a, India ah chuan kan hran teh reng nen, mi ramah zawng unau inhmu ang maiin kan lawm a ni. Zan dar 9 atang khan min hmuak-in airport ah an lo awm a, kan thlawh mai loh avangin haw lo-in min lo nghak reng a, motorah te an lo mu mai mai a, immigration kan kaltlang meuh chuan dar 3 a ri thuak tawh a, kan haw nghal par par a, zing dar 4, 25 Dec 2010, Christmas ni tak chuan In kan thleng ta a nih chu....

22 comments:

  1. I zin lam tluang chu a va han ngaih nawm leh pek em! FB a i pic vel chu ka en nasa nia.

    Have a blessed year 2011!

    ReplyDelete
  2. I tawng mak thei ngei mai. Mahse i la hlim thei phian zel mai hi i fakawm e. I bog ngaihnawm tak tak lo chhiar zel ka beisei.
    Kum Thar Chibai le.

    ReplyDelete
  3. Hehehe.. Min va tihlim ve! Thu bengvarthlak tak i rawn zep tel a, i thuziak a tihlu sawt mai.

    Tawngkam bungrua i nei tha phian lehnghal a!

    I thinrim vel lai chu ka hmu châk che mang e aw..!

    ReplyDelete
  4. Ka chhiar hmain lawk, khawnge thlalak?! Hmuh kan lo beisei em em asin!

    ReplyDelete
  5. Pic lo dah tel ta la....""Japanese i ni em?" tih zawhna ka dawng chawpchilh nghal a," tih erawh hi chu a mak ka ti vak hran lem lo..capt :)

    ReplyDelete
  6. Chunglam hrin chin hi chu kalna lam apiangaah hian an ri-nak zel ania! :-) Nie , thlalak rawn pawrh la, i van uikawp ve maw le ! :-P

    ReplyDelete
  7. Ava han ngaihnawm em! History tangin hrilfiah tan a. mi dawh thei tak nih a ngai ngei ang le. Ziak ngaihnawm bawk. Blog tlawh hi misual site tlawh aiin alo hlawk thlak zawk mah a nih hi a kawng leh lam takah chuan....

    ReplyDelete
  8. Hei ka chhiar a, a ngaihnawm khawp mai! mahse a la zo lo! victoria falls i tlawh dan chungchang leh hmun dang i tlawh chungchang pawh i la ziak lo! pic pawh a hmuhnawm e! han ziak zel teh khai, chhiar a chakawm tawh khawp mai!

    ReplyDelete
  9. Ramfangzauvi zuk ni ringawt che a :D

    ReplyDelete
  10. Ka U...Chhiar a nuam thin e, i thlalak thenkhat chu ka lo hmu tawh in ka hria, Prema khalamah kha alo awm ani tih ka hriat phah...i chawlh i hmang nuam hrim hrim a, heta i ziah bakah hian....

    ReplyDelete
  11. irene - thanks, have a wonderful married life. Happy New Year.

    daniel - Kumthar chibai le, ka tawng mak thei ania, chhiatna lam a ni em lo a, kan la hlim thei zel chu a nih hi. :D

    KC Lalthansanga - i va ti lawmawm ve, tawngkam bungrua chu i ta kha ka hmang then ania :D

    Thiama - FB lamah ka dah tuar mai.

    dula - ngah nge mak i tih loh teh ngawt a?

    ReplyDelete
  12. Sekibuhchhuak - haha, kan che nawi leh tlat thin chunglam hrin hi chu.. thlalak chu FB ah a awm e.

    krista - i ti lawmawm e, lo tlawh fo dawn nia.

    Maisek - Victoria falls chu bung 2-na ah ka la rawn ziak dawn nia.. i lo chhiar thin a, ka lawm e.

    chhangte_ll - ni ngawt mai, ramfanbu te kan siam ve mai dawn mawni le :D

    Charles - chawlh zawng zawng Zimbabwe ah ka tlingtla, a nuam khawp mai. Prema chu a hriselna tha lutuk lo, lo tawngtaipui ve dawn nia.

    ReplyDelete
  13. A ngaihnawm dawn chauh va a tawp... i ngeiawm thiam ngei mai. Thawhthu ziak tur chi i nih hmel e. Part 2 a awm ngei turah ngai ang.

    ReplyDelete
  14. Alejendro - a ngai te te-in ka rawn hawn leh :-D

    Zaia - haha, part 2 chu a rawn chhuak e..

    ReplyDelete
  15. Kumthar chibai le.. van zin hla dawrh dawrh ve. A ngaihnawm reuh lutuk, laklawh deuhah a tawp ringawt a ziahbelh leh la kalo chang ang e.

    ReplyDelete
  16. I ziak ngaihnawm ka ti hle mai. I thu ziah pawh a kaltluang tha ka ti, chhiar par par theih a ni. Mi han deuh zauh lah hi i thiam ngaiin i la thiam reng.

    ReplyDelete
  17. sawmpuia - next a awm e.

    Rp Pachuau - nang meuhin ngaihnawm i ti chu a lawmawm hle mai, Mi han deuh zauh chu engtinnge???

    ReplyDelete
  18. ngaihnawm khop mai..ziak zel teh.ka chhiar chhuak dap.

    burger

    ReplyDelete
  19. burger - i va ti lawmawm ve, i rawn lut khat hle mai, lo chhiar zel rawh.

    ReplyDelete
  20. "pawr huar" tiang vel khi i hmang thiam ang reng riau a. Dangdai ve tlat.

    ReplyDelete
  21. zillion dollar note chu van pui ve!! US$ han ni hlau se...chhar hlauh ila...a neitu hmuzolo hlauh ila...nuam awm! Salvation army, aizawl temple corps ah ka donate vek ang!!

    I zinna chu nawm hmel hle mai. flight delay nasa lutuk lo phei seng chuan, nuam famkim a ni ngei ang.

    -bmw

    ReplyDelete

Followers