Sunday, January 9, 2011

Khuhhawnna - Victoria Falls

Chutia Colonel Varughese te in kan thleng ta chu zing lam dar 4 a lo ri der mai a, dar 8-a tho turin kan mu ta dial a, Dar 10a.m. ah Christmas hmangin kan va inkhawm ve zuai a, chubak chu in lamah kan tlingtla ta.

South Africa airport-a ka thian chhar nen khan kan in be pawp a, ka ticket tur pawh a lo tifel diam, mihang ka tawn tawhah chuan a rintlak pawl tak a la ni ve tlat. 27th Dec chuan Victoria falls lam panin kan thlawk ta a.

Business class - Chawpchilh taka book a nih vangin ka ticket tur chu Economy lo awm tawh lo, darkar 1 vel lek thlawk kha Busibess class min lo book sak a, a va zialo teh reng. Pawisa ka chawi nghek a, a rei lo ropui si. Service erawh a tha hle, a hma ni lawka South Africa Airport-a kan thinrim khumte kha an ni ta lo emaw tih turin Business ah chuan an awm leh si, ei leh in tur min pe reng a, mamawh min zawt reng, ka inti lal thang ve si lo a, ka ning zawk phian, Min thlahthlam mai mai teh u ka ti tep a ni. Business class seat 12 awmna-ah chuan mi 2 chiah kan thu a!!

Airport kan thleng a, Hotel kan pan nghal, thiante chuan thil ei an rawt, ka ril a tam an ti, kei lah thlawhna-ah khan fatlum duat taka duat kha ka nia, arbawpte kha kan khel vel a nia, ka ril a tam lo khawp, economy-ah chuan sandwich chiah an sem lo niin.

Kan thlenna Kingdom hotel pang sir lehlam


Victoria Falls chu - 'Mosi-oa-Tunya' ti-a a ram miten an vuah (Smoke that Thunders) hi Scottish Missionary leh explorer hmingthang David Livingstone a hmuh hmasak ber a ni e, an ti. Chutih laia an Lalnu Queen Victoria hmingchawiin a phuah a, a ram mite erawh chuan Mosi-oa-Tunya ti te pawhin an hre lar tho. Khawvela thil mak pasarih te zingah a tel ve ni-a ngai pawh an awm nual awm e, kei pawn a tel ve emaw ka'n tih ngawt pek kha. Khawvela tuikhawthla lian ber erawh a ni chiang, 1708mtrs a zau, 108 mtrs a sang a ni hem mai. Zambia leh Zambezi inrina lai velah Zambezi lui luangin a siam a ni a, a khawhthla ri hi a ring khawp a, a zu khawhthlak hnu a hu rawn let leh pawh a force a chak khawp a, a kam lehlamah chuan ruahsur ang mai a ni a, thla la-a kan han hnufual deuh bawk avangin min nan huh hman hle.

A khawthla lian ber lai
Zambezi river, Victoria Falls siamtu ber chu


A area hi zau takin an hung a, luhna gate lian siamin chutah chuan ram dang mi tan US$30/- a ram mi tan US$5/- an lo khawn a, phunchiar ta na na na chu ka kalpuipa bulah chuan "An va ti fair lo e, ramdang mi tan an ti to bik" ka'n ti leh pek a, ani lah chuan awlsam fe-in "Ram danga kan kalin kan chawi hnem ve thin tho alawm" a ti duh lek a, dik vei phian bawk si.

Falls thlirna tur hian View point an siam thliah thluah a, awlsam takin a thlir mai theih a ni. Ram pahnih inkara awm a nih vangin he Falls hi Zambia leh Zimbabwe hian an inchuh deuh roh thin a ni awm e, he mite ram inkarah hian ram awl thui fe mai a awm a, No Man's Land tiin an vuah a, a piahah chuan Lei thui zet an dawh a, chu lei lai takah chuan ramri an siam a ni.

Bazar Ni - Ka kalpui te chuan a hma tanga an plan vek tawh avangin ni 28 chuan Botswana lam an pan a, kei INDIAN passport humtu hian VISA ka'n mamawh leh pek a nih kha, nawhchih taka visa neih theih ni hek lo, Botswana lam an kal chhungin Victoria Falls khawchhung velah ka lo tam tal mai ang tiin kan inthen a, hmelhriat tumah nei bawk si lo chuan lawm lo ten laitual ka leng hne hne tih ang maiin, mahniin bazar vel chu ka hrut kual ta nghek a, a khua a zau lo bawk a, ka fang chipchiar hman leh pek kher mai.

He dawr hi an hawn rei theih hmel ngawt asin :-)


Kalna apiangah Khawi atangin nge i lokal tih min zawt ziah a, kei lah chuan "Kingdom Hotel atangin" tih hlirin ka chhang a, an nuih a za thei hle, an mi zawhna tak ka chhang lo tih ka hre reng, a chang chuan Harare atangin ka lokal ka ti bawk, ni miau hek. Indian ka ni ti mah ila, an awih leh dawn chuang lo a, ka inham buai peih vak lo bawk a ni.

Dar 12-ah chuan dawr ka lut kim deuh vek tawh, tlai lamah sunset cruise ka ti ta thung. Mahni chauh lo deuh nen kal ila chu nuam tak tur a ni.

Helicopter - Helicopter hi ka la chuang ngai miah lo a, kan chung ah chuan a thlawk kual pup pup reng a, Victoria Falls an en a lo ni, hnial rual loh-in ka chuang chak leh ta em em mai a, zanah chuan, "Naktuk chu Helicopter chuang ang u" ka ti a, kan thian Japanese pa chu a lo phur khawp mai, pakhat erawh chuan "Thih ka la duh lo" a ti deuh ngauh thung, a hlauh vang mai mai a ni, "Kan thih leh kan thi tlang ang chu" ka ti a, a ngam chuang lo. Thianpa Tanaka nen kan chuang ta vut vut a, boruak hip a sangin a thiang vuk mai, nuam tak a ni. Hnuai lam lah chu a lang chiang em em mai si a, Pathian pawh hian min chhuk thlir a ni awm si a, a hmu chiang viau ang tihte chu ka ngaihtuah mai mai a. Kham lo takin minute 10 emaw vel kan chuang a, thlate kan la nual bawk. Helicopter ti veltute hi an zei khawp mai a, kan chuan dawn khan shooting kan han nei hmasa te te a, Falls vel video an neih sa nen an mix a, min entir leh ta a, in duh chuan a lei theih ania, an ti zaih, mahni lan vena na na na chu kan duh leh ta vek a!!

Thil dangte pawh - Official-a zin ka ni lo na-a ka thlenin te hi an fel a, ram khat Chief Secretary ve meuh an ni bawk a, programme an lo siam duah a, awl ni nei lek lo-in ka inhmang khat ve tlat. Ni 1 January ah Territorial Commander in expatriates a inah lunch a kilpui a, min sawm ve, a fel khawp mai.
2nd January hian Warren Parks Corps min tlawhpui a, thusawina hunte min pe nghe nghe, Corps lian tak mai an ni, an zaiin an lam tui thei hle, Blanket lian tawk min present nghe nghe.
3rd January-ah ka thianten min rawn lam a, an in lamah zanriah tuihnai tak min buatsaih sak. Hemi te hi 2009 khan Mozambique-ah an rawn awm zuai a, an pa hi professional pilot a ni a, Mozambique airlines a rawn pui zuai a, chutih laia inhria chu kan ni a, min lo la hre reng a, an fel hle mai.

Ka thian Maureen te In.. an han bei lian khawp a..!


4th January - Headquarters min fankual pui a, an nei changtlung in a pui khawp mai, chumi zawhah Balancing rocks enin kan kal kual zuai zuai bawk.

- Thlalak ka upload peih tawh rih lo, in tan pawh a ninawm zozai ang, Facebook lamah ka dah teuh bawk si :-P

16 comments:

  1. Victoria Falls hi ka chu kal ve theih a chakawm ngawt mai. Helicopter atanga thlir khi aman hla ngawt ang.

    Ka postah Victoria Memorial hall ka poast chiaha , ka ngaihtuah tak chua : Queen Victoria hming chawi a sak, hmun leh thil engzat tak awm ang maw tih hi !

    ReplyDelete
  2. Khaih a, ka comment fuh theih loh chu! Zambia-ah i lo zin ang a Livingstone khawpui, Zambia lam ngei atangin Falls hi kan thlirho dawn emaw tih nak alaia Zimibabwe i lo zuk kal daih chu! Tawk fair lo hle mai. Rawn zin tho rawh aw. Thlalak i nei nalh hle mai.I thusawi/lam khi i tang awm hle mai.

    ReplyDelete
  3. ropui thin ngei mai ... mut nachang hrelo lek a kan chhiar chu le

    ReplyDelete
  4. Khuhhawng tha bawk a..part 2 pawh ngaihnawm e. Busibess clas hi chu an ngaihsak thin reng a nia (Kan sual lok :) Pawisa neih tre traw a han zin vak te pawh min ti chak e. Thu i sawi hian englam nge i sawi? "Ban phar ru" i ti a mi?

    ReplyDelete
  5. Ekhai, Hotunu chu Bizness Kilas ah te i chuang tawh bik a. Keini ang tan zawng a ruk a ral a tih them them loh chuan mang ram a la ni tlat :(

    Geography Prelims tur chhiarlai min hriatchhuah tir a. Africa na na na kha chu en loin kan bai-hart ve thin alawm [Khawchhak zawnga Africa luidung luang chhun chu Limpopo River...he he he...tih vel lai te kha]. Victoria Falls leh Zambezi River hi kan save keuh ange :)

    ReplyDelete
  6. Seki - Keini hmuh ni ta se, Taitesena falls tih zawngin kan phuah angem le ti raw?

    Thiama - Zambia chu rawn kal ka chak alawm, VISA bawk mai hi buaithlak, nangni chawlh hmang in haw hlimchhawn chauh kha ni sia..

    Muana - i ti lawmawm e, mu ve tawh rawh khai. :-)

    sawmpuia - haha, pawisa ber mai hi ni ti raw.. Ka thusawi khi, Microphone awm lo a, Biakin a lian sia, a ring mawh lutuk a, tan a ngai nasa, Tlar hnung lam khan ka aw in hre phak em? ka tih vel lai kha ni awm tak a ni :D

    chhangte_ll - i va hre rei em em, i zirna a rei tawh awm nen.. Bizness klas hi chu nuam e.. :D

    Limpopo river chu lar khawp mai..

    ReplyDelete
  7. He khawvela ka tlawh ngai reng reng loh tur hmun nuam leh mawi tak tak thlalak i rawn tarlan te hian mit a titlai hlawm kher mai. A dang pawh rawn post zel rawh.

    ReplyDelete
  8. A ngaihnawmin a hmuhnawm hle mai. Victoria Falls chu a hmuna thlir ve a chakawm.

    ReplyDelete
  9. Uiii hotunu hi chu i va han chang sang tawh teh reng. Business class te pawh kan chuang phak ve loh a nia, ticket kan chang tawh pawn business class chu kan chang ngai chuang lo. ui tho!

    ReplyDelete
  10. Chhiar a manhla-in thlalak pawh en a nuam hle mai.

    No Man's Land khi mahni hmingin lo zuk pata ila tihchi fu law'ng maw

    ReplyDelete
  11. A bengvarthlakin a mit a tlai leh pek hle mai. A bikin pic-3 ka duh ber a, 4 leh 5-in a dawt! :D

    ReplyDelete
  12. Ka lawmpui a che , ka hmu ve chak khawp mai - Business class atang hian in downgrade mai che sela...David Living Stone Missionary ropui khan engatinge Victoria ?Fall a tih? Engatinge Christ Fall, Jesus Fall te a tih zawk daih loh le.. te ka lo ti mai mai.

    ReplyDelete
  13. Madin, a ngaihnawm in chhiar a manhla ngei mai! helicopter a han thlawh kual chu a hlauhawm ka van ring! ka chuang ngam miah in ka ring lo! I vannei hle mai, victoria falls te in hmu bik ania! chu a chhapah Bussiness class ah te i la chuang zui! Report a ngaihnawm e!

    ReplyDelete
  14. caribou & Mesjay - in ti lawmawm hle mai.

    illusionaire - min va hmusit tha duh lo ve.. Hotupa, kumina insuih titi-ik i tum mai vanga :-)

    triplestar - nia, Hotel kan zu sa hluai mai dawn mi, a hlawk phian mai thei sin!!

    KC - i ti lawmawm thei phian mai. :D

    Kiamlova - In retire hma ngeiin la zin ve teh u, kan mite an tha-in an fel hlawm ropui si, nuam in ti ve viauin ka ring.

    Maisek - Helicopter hi kei pawh a hlauhawm ka ring a, ka chuang duh tlat bawk si, mahse a hlauhawm loh reng reng, a nuam lutuk, hnuai lam a lang chiang nasa mai sia, ka khamlo khawp mai. :P

    ReplyDelete
  15. Thlengthla tawh maw reh rei ving veng khawp mai.In ram khawmualpui ho lah chu an buai chur chur hlawm si a.Hmuhnawm hlawm khawp mai.Ka chhiar theilo tunlai ka mit chawngjkawrin computer chhiasr a mil lo ka hmu phe ruai ka mit a na vak zel hahahah.

    ReplyDelete
  16. Fb ah ka lo hmu nual tawh a. Helamah chip chhiar takin i lo post reng si...ka hmu tlai deuh. I zin na vel chu nuam ngawt ang chu.

    ReplyDelete

Followers