Sunday, November 28, 2010

Fanu thar ka nei e!!!

A hming chu Denise a ni, a pai lai atang renga a nu-in a Godmother i ni dawn nia a tih a ni nghe nghe. A Nu nen kan inkawm ngeih a, thu chhia thu tha engkim hrilh berah min neih ve thin. An Inneih hnu, fa 3 lai an neih hnu-ah a pasal chu HIV(+) a ni tih an hmuchhuak a, treatment an la char char, a rilru a hah thei hle, heng hi a chang chuan tap zawih zawihin ka bulah a sawi thin.

Nikum December khan tih palh thil tak meuhin nau a pai a - condom an hmang ziah thin a, an hmang lo palh a ni mai thei ni :-) - Pregnancy test a ti zo chu ka bulah a rawn tlan a, a tap zawih zawih mai, kei chuan tih theih ka nei tlem. Dik tak chuan thil dangah ka tha tihna ni lo-in Counseling lam hi ka thiam loh zawng tak a ni leh pek a, ka lo tawngtaipui leh ringawt thin. Naute chu Sept 11 khan a piang a, vanneihthlak takin a positive lo leh nghal, kan lawm tlang ngei mai.

Tichuan, sawi lawk angin ni 28.11.2010 (Sunday) khan nau hlanna chu an nei a, Godmother-ah ka tang ta, he leia ka tawn vawi khatna a ni a, ka tawng leh zen zen tawh bawk lo ang. Mozambique mite hian Inneih, Nau hlan, Naupang Puitlinga lawm luh vel reng reng Ceremony hi an ngai thupui-in an la thu tak hle a, Godmother, Godfather an neihtir zel thin.

Mizote hian hetiang hi kan ching lem lo a, godmother lakah chuan enge an beisei, eng ti turin nge an duh tihte ka zawt chiang hmasa a, dik tak chuan a bangbo ve theih viau.

A tlangpuiin Inneihna-ah chuan senso zawng zawng deuh thaw leh thil tul hrang hrang buaipui hi an godfather/mother te hian an tum vek thin a, inneih zawh hnu, thu chhia hla chhia an neih pawha anmahni kaihruai thei tur mi puitling tak an thlang thin a, an mawhphurhna an dah sang khawp mai.

Nau hlan-ah pawh hetiang deuh tho hi a ni, Naute a lo thanlen a, Tisa leh Thlarau lama a mamawh sawipuitu tur, zilh a ngaih hun pawha zilha kaihruaitu tur, dam mawh hritlan -a enkawl tu tur, theih phei chuan zirna chungchangah pawh theih chen chen puitu tur a ni ber. Chuvangin chhungkhat hnaivai tak hi an ruat tlangpui.

Tichuan, kei ram dang mi, rei lote-a mahni rama haw mai tur kha chu dinhmun pawimawh tak mai chelh tur chuan min thlang ta a, mawhphurhna chu a sang ngawt mai, tih theih dang engmah nei lo mah ila, ka FANU thar Denise tana bang lo-a tawngtai chu ka tih theih awm chhun a ni tih erawh ka chiang.

16 comments:

  1. A va han vanduai ve le.

    ReplyDelete
  2. A lawmawmin a ropui hle mai. I hnathawh a ropui a, Pathian-in nasa takin malsawmnaa a vur zel ngei che ka ring.

    ReplyDelete
  3. I van chang ropui ve!

    Inneihna senso pawh i tum ve angai dawn anih chuan i mawhphurhna pawh anamai lo hle mai. Chu achhapah; apawimawh ber a thlarau nun kawng hruaitu tur i ni tel bawk nen!

    Mizoramah hian tive taila, mihausa deuh deuh kan zawng mai lawng maw! Tunlaia Man-trang ei kan siam dan atang reng mai hian :-)

    ReplyDelete
  4. Varte, i chang sang hle mai! i mawhphurhna pawh a sang! Ka lawmpui hle mai che, mahse thil huphurhawm tak chu anih dawn khi! Pathianin awmpui zel che u rawh se!

    ReplyDelete
  5. E khai aw.... naute chu a va vannei ve le. A pa HIV positive anih chuan, a nu pawh a nih ve thuai hmel a (i ziak lang lem si lova). Heti chunga natna tihbaiawm tak mai naute in a kai ve lo hi a vannei thlawt a ni. I mawhphurhna a va sang dawn ve le aw.

    ReplyDelete
  6. Chutianga mawhphurhna sang chang thei tura an hmu che chu lawmawm tak a ni. I mawhphurhna hlen thei turin Lalpan khawi hmunah pawh awm la, mal a sawm ang che.

    ReplyDelete
  7. hmingtea - vanduai-vannei a nih ber hi.. engtin thanglian zel ang maw.

    Mr. TSA - i ti lawmawm hle mai,nang pawh tam takin lalpan malsawm che rawh se.

    sekibuhchhuak - ni e, a nihna tur ang tak hian nunpui thei ila chu hautak tham tak tur chu a ni.

    Maisek - ka vannei khawp mai, he naute hian in tawngtaina a mamawh nasa ania, min lo tawngtaipui mawlh mawlh rawh u.

    caribou - a Nu pawh hi a khat tawkin a in test reng a, nau a pai vel lai hian a la + lo, mahse nau hial pai ta chu tunah hian enge niang kan la hre lo. (Anmahnin an chhiar thiam lo bawk a, ka rawn tarlang ta maia, min lo hrethiam hlawm dawn nia.)

    Kiamlova - Ka lawm e, Lalpa malsawm dawngtu nih hi a nuam a, a malsawmna tawng baw khawp erawh chuan thawh a har si thin a ni e.

    ReplyDelete
  8. I godchild chuan he khawvel ram zauvah hian godmother a nei thra ber mai awm e! Keini ve hi engtik ah maw thianten min thlang ve ang maw? :-) Naute chu a HIV +ve lo hlauh chu van lawmawm em aw! May God bless her and her parents.

    -bmw

    ReplyDelete
  9. In CHHUNGKUAin Lalpan hruaiin malsawm zel che u rawh se.

    Dinhmun pawimawh taka dingin i chang sang hle mai.

    ...khrum

    ReplyDelete
  10. I kalna a piangah hian fa hi i nei zut a... ka ti dawn a maw ka tia.. Tak takin.. an va khawngaihthlak wrauh ve.. May God bless the child..

    ReplyDelete
  11. A va lawmawm ve, kan kalna apianga Pathian mi hman hnam kan ni hi a ropui a ni.

    Nia kan inhmuh hunah kan la sawi chhunzawm dawn nia.

    ReplyDelete
  12. bmw - thank you, thank you.. ni 19 Dec hian naute thar pualin engemaw kan ti dawn, i lo tel ve dawn nia :-)

    khumchikthei - chang sang lutuk a, kan pha lo ang tih hlauhawm khawp mai, thanks

    Alejendro - nia, khawngaihthlak wreuh lutuk, a thang chak reuh phian leh nghal asin!!!

    Te-a - sawi chhunzawm ang, engtiknge Mizoram lamin haw theih dawn a? kei chu nakum July vel chuan ka awm theih tawh ka ring a.

    ReplyDelete
  13. Mawhphurhna namen lo tak a nih tak chu maw le! Lawm taka i lo pawm thei ringawt pawh chu rawngbawltu ropui tak i nihzia tilangtu a ni phawt mai. Pathianin tichak che rawh se.

    ReplyDelete
  14. I Inhmeh leh thlap mai! Puh thluk tur dik tak an hria a nih chu! I mawhphurhna zo taka hlen turin Lalpan tichak che rawh se.

    ReplyDelete
  15. Virgochhas - thanks

    faka - ka lawm e, ka'n lo pawm ve ngawt chu ania, enge maw kan an ang ni.

    keimah - i ti lawmawm thin, i rawn lut a, kan kim thin e.. tunlai chu i reh riau mai.

    ReplyDelete

Followers