Friday, September 3, 2010

Buaina râl a lian.

September ni 1 zing ka tho chu tuk dang ang bawkin Office kal turin ka insiam mawlh mawlh a, khua a lum tan tawh avangin chet vel pawh a peihawm ta lo hle mai. Ka thiannu-in min rawn call a, 'In veng lam boruak enge, hei kan veng lam chu a buai lutuk a, kan rawn kal tlang thei lo mai thei a ni' a rawn ti a, 'ka hre hleinem, eng boruak nge' tiin pawnah ka chhuak a, boruak chu ka va thlithlai a, mipui chu an lo phu sup sup tho a, motor tlan pawh ka va hmu, lungmuang takin, 'engkim a pangngai e, kei pawh office ka kal dawn' tiin ka thiannu chu ka hrilh a, ka insiam chhunzawm a, office tur chuan hun pangngaiah kan chhuak ve leh ta mai a.

Thui tak kan tlan tawh tihah chuan kan hma lam chu a buai tan ta, midang chu an in turn a, an let ta zung zung mai, kawng an dang chu lo niin, keini pawh chu kan let a, kawng dang atangin eng tin tin emaw office chu kan thleng hram, kan staff te erawh kawng lakah buaina tawkin an let leh hlawm a, office thleng chu kan tlem hle.

Chhun lamah chuan boruak a tang chho ta telh telh a, Finance Council kan nei a, kan zo fel dar 12:30 velah chuan kan staff te chu haw mai rawh u tiin kan hawtir a, keini kan la awm hnufual deuh chu buaina ral lianin min dang ta thap mai, pawn a chhuah ngam ta lo, silai a ri ta ul ul mai a, thiante kan phone kual a, Office ah khan riak mai rawh u, boruak a tha lo lutuk an ti. darkar 3/4 chhung lek chuan mi 4 lai chu an lo thi hman der a, mi 11 lai an hliam bawk.

Kan han in en chiang chu mi 9 office-ah kan lo la awm a, Foreigner vek kan lo ni!!!! kan OC te nupa Brazillian, CS te nupa Angolian, Principal te nupa leh an fapa Argentina lam, kei Indian, ka thiannu Zimbabwen.. a khawtual mi chuan hetianga an buai changa a buaithlak zia an hria a, a then an lo kal lo a, a then an haw hma vek.

Tlaiah chuan muangmarin haw kan tum a, ti deuh takin kan tlan haw, kawnglaiah chuan lungtum leh thil dang motor danna turin an lo dah thluah a, Motor ke an hal alh hluah hluah bawk a, kan tlan lai chuan motor chu an lo vawm bawk.

Motor tang laklawh dang pawh an awm a, kan innghakkhawm a, Police motor a rawn tlan a, engemaw chen chu min thlah. Police motorin min letsan hnu chuan hmun pakhat, duty awmna-ah kan chawl lawk a, chutih lai chuan tleirawl rual hian min beih tumin min rawn pan ta mai, lung vawm tur an rawn keng a, an rawn tlan hul hul a, Police ho chuan silai hmet puakin tear gas an vawm khum a, an darh leh ta ham ham. Ke-a kal mai chu him zawka kan rin avangin ke-a kal mai kan tum tawh lai chuan Police motor a rawn tlan a, kan awmna hmuna duty te chuan kha kha zui nghal rawh u min ti a, chak tawkin kan lim chhuak ve ta a, kan veng chu him tak chuan kan thleng ta hram.

2008 February khan hetiang thil hi a thleng tawh a, Oil, Tui, power leh ei tur chi dang man sang chak lutuk vanga mipui thinrim tawngkhawng-in an lungawi lohna an lantir a ni ber a, Cabinet Emergency Session ko-in an han thukhawm ve chuk chuk a, President Guebuza chuan tlai lamah Radio leh TV lamah te thu sawiin, "Sawrkar chuan thil man tihniam turin theih tawp a chhuah ang" chu a ti na-a engmah Solution a awm loh avangin mipui an lungawi thei chuang lo, ram chhung mamawh 30% chauh Mozambique hian a thar chhuak a, a bak zawng chu lakluh vek a nih avangin he harsatna sutkian hi thil namai a ni lo.

Tun kum hnih kalta chhunga thil man san dan hi a namai lo hle, Chhangthawp tlawn khat man pawh 25% dawrhin a sang a ni, hei hian mi rethei zawkte dinhmun a nghawng nasa hle. Chutih laiin minimum wage chu 2550/-mt chauh a ni thung si. Chu-a-chhapah Politician te eirukna leh hlemhletna nasa taka an inhnamhnawihna mipui lamin an hre bawk si.

Hmanni deuha ka thiante nena kan inhnialna ka hrechhuak zawk mai, "Guebuza tunah in duh lo a, in sawisel a, nangmahni thlan tlin ngei a ni si" ka tih kha.

Motor dan nan kawngpuiah motor ke an hal nasa hle, bawlhhlawh leh thing leh lung lian pui pui an dah bawk.

A tuk-ah pawh chuan tumah pawn chhuak lo-in kan tawmin ta thap, kan veng lam tlangval ho chuan buaina chawh chhuah an chak khawp a, kan in kawtah an inhawrkhawm lut lut reng a, kawngpui chhuah an tum, Police-in an lo nawr let, annin lungin an vawm, an innawr chawhma thak a, police ho chuan a vanvawr zawngin mipui rikrap nan silai an hmetpuak leh thawr thin. In dang reng na na na chu tih ngaihna dang vak an hre lo nge tlai lamah chuan an darh ta hram a, hetih lai hian veng dangah erawh chuan an la buai hle tho.

17 comments:

  1. Awi in office mi ho chu in him hlauh a lawmawm hle mai. Pathian in a veng tlat che u nih chu. Motor a in han tlan haw lai vel chu a hlauhawm ve duh fu ang a...'lo boral ta ila' tih te in ngaihtuah ve nak nak hman dawn nih chu!

    -bmw

    ReplyDelete
  2. Mizoram ah pawh Apply ve chi nih chu...heheee
    Tak2 a, him dam in in awm a, a vanneih thlak e..

    ~Kilung

    ReplyDelete
  3. I buai nuaih nuaih tak hle mai! Silai ri hrim hrim hian min rap:-) Hmanah, Nagaland-ah khian AK-47 hian min tina, min vau tawh a. I him a lawmawm e.

    ReplyDelete
  4. Pathian chu kan inhmumhimna leh chakna mangan laia tanpuitu hnai reng a ni si a. Pathian in hualhmim zel che rawh se..

    ReplyDelete
  5. Buaina tamtakah a chhan chhuak tawh che a, a la chhan chhuak zel ang che, nangmahni leh in ram tan kan tawngtai e.

    ReplyDelete
  6. dini zam hauh suh.kan lo tawngtaipui che nia

    ReplyDelete
  7. Hmanni kan in chat khan kan lo tawngtaipui nghal che u a. Lalpa in hnenah a awm e. Rambuai a awm hi inngaihtuah a na duh, tawngtaia tan lo lak hi mak takin Lalpan a chhang thin. I him zel nan kan lo tawngtai chhunzawm ang.

    A ram mite chu engatinge ramdang mi thil awmzia hrilh lova an haw san vek che u le!Ram changkang leh buai thang a awm tan chuan alert system neih a tha. Level hrang hrang keini pawh buai zual lai kha chuan kan nei. Rikrumah chuan a tangkai phian.

    ReplyDelete
  8. Hetiang buaina hi kan la tawk ve ang tih a hlauhawm hle mai. Mi rethei an chep tulh tulh bawk si, employment a vang bawk si.NREGS hian thingtlang lam chu a la chhan rih hram hram. 'A hungry man is an angry man' an tia ni lawm ni kha.

    ReplyDelete
  9. bmw - Kan tlan haw lai chuan kan Driver chu a tawng mang lo reng reng a, a serious tawp, a hlau ve deuh aniang, In kan thleng chiah chu a nui ve nasa hle.. Thi ta ila tiin chawmpangkar zawng zawng kan ngaihtuah kim vek hman alawm lolzz

    Kilung - Mizoram ah hian an ti ve lo ang tih a sawi theih miah loh nia..

    Sekibuhchhuak - nia, him takin kan chhuak a, a lawmawm a ni mai, silai hi kei pawh ka nel lo. :-)

    Anonymous - ka lawm e, lo tawngtai zel rawh u aw

    Kiamlova, Puii - in ti lawmawm e, ni e, buaina tawk ngai lo ila, thinlung hi hlim reng se, chu rammawi chu kan zawng angem??

    Anon - thank you, mifel tawngtaina chuan thil nasa tak a ti thin.

    ZL - Alert system neih chu tha khawp mai, la ngaihtuah ve chi tak a nih chu. Foreigner tan a buaithlak bik alawm le, anni chuan an hrethiam a, an kallo hmak mai a..

    dr_feelgood - i va reh ve.. mipui riltam thinrim hi namai lo deuh a nia sin..

    ReplyDelete
  10. AN motor ke hal mai mai chu aw. global warming a thlen nasa ngawt ang.

    ReplyDelete
  11. Ava hlauhawm Fia fia ve; thuziak hi i thiam tlat Lengzem kalo chhiar i Eizawnna tur i hai emaw aw..... katia sin :)

    ReplyDelete
  12. Hmanni ah ka ka chhiar zuaia,.. Comment ve leh tlaikhawhnu ang e>

    A Hlauhawm duh viau ang. a hnu a han sawileh hian Ngaihnawm a nimai a, a hunlai chuan a hrehawm ve khawp ang le...

    Damtakin in paltlang thei chu a lawm awm e,, blog ngaihnawmtak tlawhtur kan la nei chhunzawmzel dawn tihna a nih chu... hehe..

    ReplyDelete
  13. Robert - global warming bakah global black a thlen.. tin, ka hritlan phah bawk :-)

    Thaiboy - nia, hlauhawm ve fua fua asin, Lengzem chcu a EDIT tha mai mai a nih kha, eizawnna tha ber chu CHOKA ni mai. :-) I sangha dil kha kan sah dawn ti raw.. ka lo haw dawn ania.

    b-buata - haha, dam takin hlau chung chungin kan paltlang chu a nih hi, la blog zel thei turah in ngai ang.

    ReplyDelete
  14. Hetiang buaina in tawh lai hian ngaihtuahna a kal thui ve khawpin ka ring! Keini pawh Hasan hmuna kan awm laiin Hnam pahnih intualvuakna avangin mi 2 an thi a, Curfew an la puang zui! Hotel chhungah tawmin CRP ten min veng a, pawnah takngial pawh kan dakchhuak ngam lo kha a nia! In dinhmun tur ka hriatthiam pui khawp mai che. Pathianin veng zel che rawh se....

    ReplyDelete
  15. Africans ho hian silai nen a khatia tih deuh luih luih kha an ching bik riau in ka hria...

    Vawikhat Guwahati atanga kan haw chho pawh cachar dist-ah kawng chhe lutuk protest nan bandh an lo huaihawt a. Check gate ve angreng deuh a duty patling pakhatin min kal tir hnuin, a paih lawk a tleirawl rual, an hmel leh chezia en reng reng pawh a rui tih hriat reng hovin lungtum nen min han dang bet chiah kha chu...val tan chuan a tlawmngaihthlak duh teh asin :D

    ReplyDelete
  16. kka - A chang chuan kei hi ka at huai leh tlat thin pek a, kan haw kawngah thla ka la phei char char (Video), ka thianten Fimkhur rawh min ti.. mahse a han ralmuan deuh takah chuan ka thlalak en duh ber ber chu an ni leh hlawm tho :D

    luliana - ni chiah e, ram changkang lo zia dik tak mawle.. kan thenawm ram South Africa pawh a rual chiahin strike an nei ve tho, placard nen kawng an zawh a, an au rual mai, keini chu ni ve tawh hek lo, tharum nen, mei leh lung nen an tang kawp a, huaihawttu mumal awm bawk lo, a tlangval hawklak satliah ho lah duh hawi zawng zawngin an lo sapatal bawk nen... An zing ami ngeite pawh hian Manifestation a ni lo, Vandalism a ni an ti ve tho.

    ReplyDelete

Followers